ಬೆಂಗಳೂರು : ಭಾರತದ ರಸ್ತೆಗಳಲ್ಲಿ ರಾಜನಂತೆ ಮೆರೆಯುತ್ತಿರುವ ಟೊಯೋಟಾ ಫಾರ್ಚುನರ್ಗೆ ಸೆಡ್ಡು ಹೊಡೆಯಲು ಸಜ್ಜಾಗಿದೆ ಎಂಜಿ ಮೆಜೆಸ್ಟರ್ ಫೆಬ್ರವರಿ 12 ರಂದು ಬಿಡುಗಡೆಯಾಗಲಿರುವ ಈ ದೈತ್ಯ ಎಸ್ಯುವಿಯ ವಿಶೇಷತೆಗಳೇನು? ಇಲ್ಲಿದೆ ಮಾಹಿತಿ.
ಭಾರತೀಯ ವಾಹನ ಮಾರುಕಟ್ಟೆಯಲ್ಲಿ ಟೊಯೋಟಾ ಫಾರ್ಚುನರ್ (Toyota Fortuner) ಪರಿಚಯದ ಅಗತ್ಯವಿಲ್ಲದ ಹೆಸರು. ಕಳೆದ ಹಲವು ವರ್ಷಗಳಿಂದ ತನ್ನ ವಿಭಾಗದಲ್ಲಿ ಏಕಚಕ್ರಾಧಿಪತ್ಯ ಸಾಧಿಸಿರುವ ಫಾರ್ಚುನರ್ಗೆ, ಇದೀಗ ಎಂಜಿ ಮೋಟಾರ್ಸ್ನ ಮುಂಬರುವ ‘ಮೆಜೆಸ್ಟರ್’ (MG Majestor) ಪ್ರಬಲ ಪೈಪೋಟಿ ನೀಡುವ ಸಾಧ್ಯತೆಗಳಿವೆ. ಫೆಬ್ರವರಿ 12 ರಂದು ಮಾರುಕಟ್ಟೆಗೆ ಲಗ್ಗೆ ಇಡಲಿರುವ ಮೆಜೆಸ್ಟರ್, ಫಾರ್ಚುನರ್ಗಿಂತ ಯಾವೆಲ್ಲಾ ವಿಷಯಗಳಲ್ಲಿ ಮುಂದಿದೆ? ಇಲ್ಲಿದೆ ಪ್ರಮುಖ 5 ಅಂಶಗಳ ವಿಶ್ಲೇಷಣೆ.
ದೈತ್ಯ ಗಾತ್ರ ಮತ್ತು ಹೆಚ್ಚು ಸ್ಥಳಾವಕಾಶ
ಎಂಜಿ ಮೆಜೆಸ್ಟರ್ ಅಕ್ಷರಶಃ ಒಂದು ದೈತ್ಯ ವಾಹನ. ಫಾರ್ಚುನರ್ಗೆ ಹೋಲಿಸಿದರೆ ಇದು ಗಾತ್ರದಲ್ಲಿ ಸಾಕಷ್ಟು ದೊಡ್ಡದಾಗಿದೆ. ಮೆಜೆಸ್ಟರ್ ಅಳತೆ: 5,046 ಮಿ.ಮೀ ಉದ್ದ, 2,016 ಮಿ.ಮೀ ಅಗಲ ಮತ್ತು 1,876 ಮಿ.ಮೀ ಎತ್ತರವಿದೆ. ಇದರ ವೀಲ್ಬೇಸ್ (ಚಕ್ರಗಳ ನಡುವಿನ ಅಂತರ) 2,950 ಮಿ.ಮೀ ಇದೆ. 4,795 ಮಿ.ಮೀ ಉದ್ದ, 1,855 ಮಿ.ಮೀ ಅಗಲ ಮತ್ತು 1,835 ಮಿ.ಮೀ ಎತ್ತರವಿದೆ. ವೀಲ್ಬೇಸ್ 2,745 ಮಿ.ಮೀ ಇದೆ. ಅಂದರೆ, ಫಾರ್ಚುನರ್ಗಿಂತ ಮೆಜೆಸ್ಟರ್ ಬರೋಬ್ಬರಿ 251 ಮಿ.ಮೀ ಹೆಚ್ಚು ಉದ್ದ, 161 ಮಿ.ಮೀ ಹೆಚ್ಚು ಅಗಲ ಮತ್ತು 21 ಮಿ.ಮೀ ಹೆಚ್ಚು ಎತ್ತರವನ್ನು ಹೊಂದಿದೆ. ಈ ಹೆಚ್ಚುವರಿ ಗಾತ್ರವು ಕ್ಯಾಬಿನ್ ಒಳಗೆ, ಅದರಲ್ಲೂ ವಿಶೇಷವಾಗಿ ಮೂರನೇ ಸಾಲಿನಲ್ಲಿ (Third Row) ಪ್ರಯಾಣಿಕರಿಗೆ ಹೆಚ್ಚಿನ ಸ್ಥಳಾವಕಾಶ ನೀಡಲಿದೆ. ಫಾರ್ಚುನರ್ನ ಮೂರನೇ ಸಾಲಿನಲ್ಲಿ ಸ್ಥಳಾವಕಾಶದ ಕೊರತೆ ಇದೆ ಎಂಬ ದೂರಿಗೆ ಮೆಜೆಸ್ಟರ್ ಉತ್ತರವಾಗಬಹುದು.
ಆಫ್-ರೋಡಿಂಗ್ ಸಾಮರ್ಥ್ಯಕ್ಕೆ ಬೂಸ್ಟ್ (ಮೂರು ಡಿಫ್-ಲಾಕ್ಸ್)
ಮೆಜೆಸ್ಟರ್ ಕೇವಲ ನೋಡಲು ಸುಂದರವಲ್ಲ, ಇದು ಕಠಿಣ ಭೂಪ್ರದೇಶಗಳಲ್ಲೂ ಸಂಚರಿಸಬಲ್ಲ ಸಮರ್ಥ ಆಫ್-ರೋಡರ್ ಆಗಿರಲಿದೆ ಎಂದು ನಿರೀಕ್ಷಿಸಲಾಗಿದೆ. ಮ್ಯಾಕ್ಸಸ್ ಡಿ90 (Maxus D90) ಮಾದರಿಯ ಲ್ಯಾಡರ್-ಫ್ರೇಮ್ ಚಾಸಿಸ್ ಅನ್ನು ಆಧರಿಸಿರುವ ಮೆಜೆಸ್ಟರ್, ಮೂರು ಡಿಫರೆನ್ಷಿಯಲ್ ಲಾಕ್ (Differential Locks) ಗಳೊಂದಿಗೆ ಬರುವ ಸಾಧ್ಯತೆಯಿದೆ.
ಮೂರು ಲಾಕ್ಗಳು : ಮುಂಭಾಗ (Front), ಮಧ್ಯ (Centre) ಮತ್ತು ಹಿಂಭಾಗದ (Rear) ಡಿಫರೆನ್ಷಿಯಲ್ ಲಾಕ್ಗಳನ್ನು ಇದು ಹೊಂದಿರಲಿದ್ದು, ಕೆಸರು, ಕಲ್ಲು ಅಥವಾ ಜಾರುವ ಮೇಲ್ಮೈಗಳಲ್ಲಿ ಅದ್ಭುತವಾದ ಎಳೆತವನ್ನು (Traction) ನೀಡಲಿದೆ. ಮತ್ತೊಂದೆಡೆ, ಫಾರ್ಚುನರ್ ಕೇವಲ ಹಿಂಭಾಗದ ಎಲೆಕ್ಟ್ರಾನಿಕ್ ಡಿಫರೆನ್ಷಿಯಲ್ ಲಾಕ್ ಅನ್ನು ಹೊಂದಿದೆ. ಫಾರ್ಚುನರ್ ಕೂಡ ಉತ್ತಮ ಆಫ್-ರೋಡರ್ ಹೌದಾದರೂ, ತಾಂತ್ರಿಕವಾಗಿ ಮೆಜೆಸ್ಟರ್ ಇದಕ್ಕಿಂತ ಒಂದು ಹೆಜ್ಜೆ ಮುಂದಿರಲಿದೆ.
ಸುರಕ್ಷತೆಗೆ ಲೆವೆಲ್-2 ADAS ತಂತ್ರಜ್ಞಾನ
ಇಂದಿನ ದಿನಗಳಲ್ಲಿ ಸಣ್ಣ ಕಾರುಗಳಲ್ಲೂ ಲಭ್ಯವಿರುವ ಸುಧಾರಿತ ಚಾಲಕ ಸಹಾಯ ವ್ಯವಸ್ಥೆ (ADAS) ಫಾರ್ಚುನರ್ನಂತಹ ದುಬಾರಿ ಎಸ್ಯುವಿಯಲ್ಲಿ ಇಲ್ಲದಿರುವುದು ದೊಡ್ಡ ಕೊರತೆ. ಟೆಕ್-ಸ್ನೇಹಿ ಲೆಜೆಂಡರ್ ಆವೃತ್ತಿಯಲ್ಲೂ ಟೊಯೋಟಾ ಈ ಫೀಚರ್ ನೀಡಿಲ್ಲ.
ಆದರೆ, ಎಂಜಿ ಮೆಜೆಸ್ಟರ್ ಈ ವಿಷಯದಲ್ಲಿ ರಾಜಿ ಮಾಡಿಕೊಂಡಿಲ್ಲ. ಇದು ಲೆವೆಲ್-2 ಪ್ಲಸ್ ADAS (Level 2+ ADAS) ಫೀಚರ್ಗಳೊಂದಿಗೆ ಬರಲಿದೆ. ಆಟೋಮ್ಯಾಟಿಕ್ ಎಮರ್ಜೆನ್ಸಿ ಬ್ರೇಕಿಂಗ್, ಲೇನ್ ಕೀಪ್ ಅಸಿಸ್ಟ್ ಮುಂತಾದ ಸುರಕ್ಷತಾ ವೈಶಿಷ್ಟ್ಯಗಳು ಇದರಲ್ಲಿ ಇರಲಿವೆ. ಈಗಾಗಲೇ ಎಂಜಿ ಗ್ಲೋಸ್ಟರ್ನಲ್ಲಿರುವ ಈ ತಂತ್ರಜ್ಞಾನ ಮೆಜೆಸ್ಟರ್ನಲ್ಲಿ ಇನ್ನಷ್ಟು ಸುಧಾರಿತವಾಗಿರುವ ನಿರೀಕ್ಷೆಯಿದೆ.
ಹೆಚ್ಚು ಶಕ್ತಿಶಾಲಿ ಇಂಜಿನ್, ಆದರೆ…
ಎಂಜಿ ಮೆಜೆಸ್ಟರ್, ಗ್ಲೋಸ್ಟರ್ನಲ್ಲಿ ಬಳಸಲಾದ ಅದೇ 2.0 ಲೀಟರ್ ಡೀಸೆಲ್ ಇಂಜಿನ್ ಅನ್ನು ಹೊಂದಿರಲಿದೆ. ಇದು ಎರಡು ಟ್ಯೂನಿಂಗ್ ಆಯ್ಕೆಗಳಲ್ಲಿ ಲಭ್ಯವಿರಲಿದ್ದು, ಹೈಯರ್ ವೇರಿಯೆಂಟ್ ಸುಮಾರು 213 hp ಹಾರ್ಸ್ಪವರ್ ಮತ್ತು 480 Nm ಟಾರ್ಕ್ ಉತ್ಪಾದಿಸಲಿದೆ. ಟೊಯೋಟಾ ಫಾರ್ಚುನರ್ 204 hp ಹಾರ್ಸ್ಪವರ್ ನೀಡಲಿದ್ದು, ಮೆಜೆಸ್ಟರ್ಗಿಂತ ಕೊಂಚ ಕಡಿಮೆ ಶಕ್ತಿಶಾಲಿಯಾಗಿದೆ. ಆದರೆ, ಟಾರ್ಕ್ ವಿಚಾರದಲ್ಲಿ ಫಾರ್ಚುನರ್ ಮುಂದಿದ್ದು, 500 Nm ಟಾರ್ಕ್ ಉತ್ಪಾದಿಸುತ್ತದೆ. ಎಂಜಿ ತನ್ನ ಚಿಕ್ಕದಾದ 2.0 ಲೀಟರ್ ಇಂಜಿನ್ ಮೂಲಕ ಹೆಚ್ಚು ಮೈಲೇಜ್ ನೀಡಬಹುದು ಎಂದು ಅಂದಾಜಿಸಲಾಗಿದೆ. ಆದರೆ ಟೊಯೋಟಾದ 2.8 ಲೀಟರ್ ಇಂಜಿನ್ ವಿಶ್ವಾಸಾರ್ಹತೆಗೆ ಹೆಸರಾಗಿದೆ.
ದೊಡ್ಡದಾದ ಅಲಾಯ್ ವೀಲ್ಸ್
ಮೆಜೆಸ್ಟರ್ ಫಾರ್ಚುನರ್ಗಿಂತ ದೊಡ್ಡದಾದ ಚಕ್ರಗಳನ್ನು ಹೊಂದಿರಲಿದೆ. ಪ್ರಸ್ತುತ ಫಾರ್ಚುನರ್ನ ಟಾಪ್ ಮಾಡೆಲ್ಗಳು 18-ಇಂಚಿನ ಚಕ್ರಗಳನ್ನು ಹೊಂದಿದ್ದರೆ, ಕೆಳ ಹಂತದ ಮಾಡೆಲ್ಗಳು 17-ಇಂಚಿನ ಚಕ್ರಗಳನ್ನು ಹೊಂದಿವೆ. ಆದರೆ, ಎಂಜಿ ಮೆಜೆಸ್ಟರ್ 19-ಇಂಚಿನ ಬೃಹತ್ ಅಲಾಯ್ ವೀಲ್ಗಳೊಂದಿಗೆ (Alloy Wheels) ರಸ್ತೆಗಿಳಿಯಲಿದೆ. ದೊಡ್ಡ ಚಕ್ರಗಳು ವಾಹನದ ಲುಕ್ ಅನ್ನು ಹೆಚ್ಚಿಸುತ್ತವೆ. ಆದರೆ, ಆಫ್-ರೋಡಿಂಗ್ ವಿಷಯಕ್ಕೆ ಬಂದರೆ ದೊಡ್ಡ ಚಕ್ರಗಳು ಮತ್ತು ಕಡಿಮೆ ಟೈರ್ ವಾಲ್ (Tyre wall) ಹೇಗೆ ಕಾರ್ಯನಿರ್ವಹಿಸುತ್ತವೆ ಎಂಬುದನ್ನು ಕಾದು ನೋಡಬೇಕಿದೆ.
ಒಟ್ಟಾರೆಯಾಗಿ, ಫೀಚರ್ಗಳು, ಗಾತ್ರ ಮತ್ತು ತಂತ್ರಜ್ಞಾನದ ವಿಷಯದಲ್ಲಿ ಎಂಜಿ ಮೆಜೆಸ್ಟರ್ ಕಾಗದದ ಮೇಲೆ ಫಾರ್ಚುನರ್ಗಿಂತ ಬಲಿಷ್ಠವಾಗಿ ಕಾಣುತ್ತಿದೆ. ಫೆಬ್ರವರಿ 12 ರಂದು ಬಿಡುಗಡೆಯಾದ ನಂತರವಷ್ಟೇ ಇದರ ನಿಜವಾದ ಸಾಮರ್ಥ್ಯ ತಿಳಿಯಲಿದೆ.
ಇದನ್ನೂ ಓದಿ : ಮಹೀಂದ್ರಾ ಇತಿಹಾಸದಲ್ಲೇ ಅತಿದೊಡ್ಡ ‘ಡೀಲ್’ | ಇಂಡೋನೇಷ್ಯಾದಿಂದ ಬಂತು ಬರೋಬ್ಬರಿ 35,000 ಸ್ಕಾರ್ಪಿಯೋ ಪಿಕ್-ಅಪ್ಗಳ ಆರ್ಡರ್!
