ಬೆಂಗಳೂರು | ಬ್ರಿಟಿಷ್ ಐಷಾರಾಮಿ ಕಾರು ತಯಾರಕ ಕಂಪನಿ ಜಾಗ್ವಾರ್ ತನ್ನ ಮಹತ್ವಾಕಾಂಕ್ಷೆಯ ಎಲೆಕ್ಟ್ರಿಕ್ ಮರುಶೋಧನೆಯ ಹಾದಿಯಲ್ಲಿ ಮಹತ್ವದ ಹೆಜ್ಜೆ ಇಟ್ಟಿದೆ. ಕಂಪನಿಯು ತನ್ನ ಮುಂಬರುವ 1,000 ಬಿಎಚ್ಪಿ (BHP) ಸಾಮರ್ಥ್ಯದ ಆಲ್-ಎಲೆಕ್ಟ್ರಿಕ್ ನಾಲ್ಕು ಬಾಗಿಲಿನ ಜಿಟಿ (GT) ಮಾದರಿಯನ್ನು ಆರ್ಕ್ಟಿಕ್ ವೃತ್ತದ ಕೊರೆಯುವ ಚಳಿಯಲ್ಲಿ ಕಠಿಣ ಪರೀಕ್ಷೆಗೆ ಒಳಪಡಿಸಿದೆ.
ಸ್ವೀಡನ್ನ ಅರ್ಜೆಪ್ಲಾಗ್ (Arjeplog) ನ ಹಿಮಾವೃತ ಕೆರೆಗಳ ಮೇಲೆ ನಡೆಯುತ್ತಿರುವ ಈ ಪರೀಕ್ಷೆಯು ಜಾಗ್ವಾರ್ನ ತಾಂತ್ರಿಕ ಸಾಮರ್ಥ್ಯಕ್ಕೆ ಹಿಡಿದ ಕನ್ನಡಿಯಾಗಿದೆ. ಮೈನಸ್ 40 ಡಿಗ್ರಿ ಸೆಲ್ಸಿಯಸ್ನಷ್ಟು ಕಡಿಮೆ ತಾಪಮಾನವಿರುವ ಇಲ್ಲಿ, ಕಾರಿನ ಟ್ರ್ಯಾಕ್ಷನ್ ಸಿಸ್ಟಮ್, ಕ್ಯಾಬಿನ್ ಕಂಫರ್ಟ್ ಮತ್ತು ಥರ್ಮಲ್ ಎಫಿಶಿಯೆನ್ಸಿಯನ್ನು (Thermal Efficiency) ನಿಖರವಾಗಿ ಅಳೆಯಲಾಗುತ್ತಿದೆ.
ಜಾಗ್ವಾರ್ ಇದನ್ನು ಕೇವಲ ಮತ್ತೊಂದು ಹೈ-ಪವರ್ ಎಲೆಕ್ಟ್ರಿಕ್ ಕಾರ್ ಎಂದು ಪರಿಗಣಿಸುತ್ತಿಲ್ಲ. ಬದಲಾಗಿ, ಚಾಲಕನಿಗೆ ರಸ್ತೆ ಮೇಲಿನ ಹಿಡಿತ ಮತ್ತು ಡ್ರೈವಿಂಗ್ ಅನುಭವದಲ್ಲಿ ಯಾವುದೇ ರಾಜಿ ಮಾಡಿಕೊಳ್ಳದಂತೆ ಎಂಜಿನಿಯರ್ಗಳು ಶ್ರಮಿಸುತ್ತಿದ್ದಾರೆ. ಇದಕ್ಕಾಗಿ ಸುಮಾರು 150 ಪ್ರೊಟೊಟೈಪ್ಗಳನ್ನು ಬಳಸಿಕೊಳ್ಳಲಾಗಿದ್ದು, ಸಾರ್ವಜನಿಕ ರಸ್ತೆಗಳು, ಟೆಸ್ಟ್ ಟ್ರ್ಯಾಕ್ ಮತ್ತು ವರ್ಚುವಲ್ ಪರಿಸರದಲ್ಲಿ ಲಕ್ಷಾಂತರ ಮೈಲುಗಳಷ್ಟು ಪರೀಕ್ಷೆ ನಡೆಸಲಾಗುತ್ತಿದೆ.
ಈ ಹೊಸ ಜಿಟಿ ಕಾರಿನ ಹೃದಯಭಾಗದಲ್ಲಿ ಟ್ರೈ-ಮೋಟರ್ (Tri-motor) ಎಲೆಕ್ಟ್ರಿಕ್ ಪವರ್ಟ್ರೇನ್ ಇದ್ದು, ಇದು 1,000 ಬಿಎಚ್ಪಿಗೂ ಹೆಚ್ಚಿನ ಶಕ್ತಿಯನ್ನು ಉತ್ಪಾದಿಸುವ ಸಾಮರ್ಥ್ಯ ಹೊಂದಿದೆ. ಇದುವರೆಗೆ ನಿರ್ಮಿಸಲಾದ ಅತ್ಯಂತ ಶಕ್ತಿಶಾಲಿ ಜಾಗ್ವಾರ್ ರೋಡ್ ಕಾರ್ ಇದಾಗಲಿದ್ದು, ಇದರ ಆಲ್-ವೀಲ್ ಡ್ರೈವ್ ಮತ್ತು ಇಂಟೆಲಿಜೆಂಟ್ ಟಾರ್ಕ್ ವೆಕ್ಟರಿಂಗ್ ವ್ಯವಸ್ಥೆಯು ಎಂತಹ ಕಠಿಣ ರಸ್ತೆಗಳಲ್ಲೂ ಸ್ಥಿರತೆ ಕಾಪಾಡಿಕೊಳ್ಳಲು ನೆರವಾಗಲಿದೆ.
ತಾಪದ ಮರು ಬಳಕೆ
ಈ ಕಾರಿನ ಮತ್ತೊಂದು ಪ್ರಮುಖ ವಿಶೇಷತೆಯೆಂದರೆ ಇದರ ‘ಥರ್ಮಅಸಿಸ್ಟ್’ (ThermAssist) ತಂತ್ರಜ್ಞಾನ. ಎಲೆಕ್ಟ್ರಿಕ್ ವಾಹನಗಳ ಪ್ರಮುಖ ಸಮಸ್ಯೆಯಾದ ಚಳಿಗಾಲದ ರೇಂಜ್ ಡ್ರಾಪ್ (Range Drop)ಗೆ ಇದು ಪರಿಹಾರ ನೀಡಲಿದೆ. ಈ ತಂತ್ರಜ್ಞಾನವು ಹೀಟಿಂಗ್ಗೆ ವ್ಯಯವಾಗುವ ಶಕ್ತಿಯನ್ನು ಶೇ. 40 ರಷ್ಟು ಉಳಿಸುವ ಮೂಲಕ, ಆ ತಾಪವನ್ನು ಮರುಬಳಕೆ ಮಾಡಿ ವಾಹನದ ಬ್ಯಾಟರಿ ಅಥವಾ ಕ್ಯಾಬಿನ್ ಅನ್ನು ಬೆಚ್ಚಗಿಡಲು ಬಳಸುತ್ತದೆ. ಮೈನಸ್ 10 ಡಿಗ್ರಿ ಸೆಲ್ಸಿಯಸ್ನಲ್ಲೂ ಇದು ಪರಿಣಾಮಕಾರಿಯಾಗಿ ಕಾರ್ಯನಿರ್ವಹಿಸಲಿದೆ ಎಂದು ಕಂಪನಿ ಹೇಳಿಕೊಂಡಿದೆ. ಇದರ ಜೊತೆಗೆ ಆಲ್-ವೀಲ್ ಸ್ಟೀರಿಂಗ್, ಡೈನಾಮಿಕ್ ಏರ್ ಸಸ್ಪೆನ್ಷನ್ ಮತ್ತು 23-ಇಂಚಿನ ವಿಶೇಷ ವಿಂಟರ್ ಟೈರ್ಗಳು ಐಷಾರಾಮಿ ಪ್ರಯಾಣದ ಅನುಭವವನ್ನು ಮತ್ತಷ್ಟು ಹೆಚ್ಚಿಸಲಿವೆ.
ಜಾಗ್ವಾರ್ ಬ್ರ್ಯಾಂಡ್ ಸಂಪೂರ್ಣವಾಗಿ ಎಲೆಕ್ಟ್ರಿಕ್ ಮಯವಾಗುವತ್ತ ಸಾಗುತ್ತಿದ್ದು, ಈ ನಾಲ್ಕು ಬಾಗಿಲಿನ ಜಿಟಿ ಕಾರು ಆ ಪರಿವರ್ತನೆಯ ಮೂಲಾಧಾರವಾಗಿದೆ. ‘ಟೈಪ್ 00’ ಕಾನ್ಸೆಪ್ಟ್ ಮತ್ತು ‘ಎಕ್ಸುಬರಂಟ್ ಮಾಡರ್ನಿಸ್ಟ್’ (Exuberant Modernist) ವಿನ್ಯಾಸ ಶೈಲಿಯನ್ನು ಆಧರಿಸಿರುವ ಈ ಕಾರು, ಮಾರುಕಟ್ಟೆಯಲ್ಲಿ ಜಾಗ್ವಾರ್ನ ಸ್ಥಾನವನ್ನು ಮರು ವ್ಯಾಖ್ಯಾನಿಸುವ ನಿರೀಕ್ಷೆಯಿದೆ. ಈ ವರ್ಷದ ಅಂತ್ಯದ ವೇಳೆಗೆ ಜಾಗತಿಕವಾಗಿ ಅನಾವರಣಗೊಳ್ಳಲಿರುವ ಈ ಮಾಡೆಲ್, ಸಾಂಪ್ರದಾಯಿಕ ಜಾಗ್ವಾರ್ ಮೌಲ್ಯಗಳನ್ನು ಎಲೆಕ್ಟ್ರಿಕ್ ಯುಗಕ್ಕೆ ಹೇಗೆ ವರ್ಗಾಯಿಸಬಹುದು ಎಂಬುದಕ್ಕೆ ಸಾಕ್ಷಿಯಾಗಲಿದೆ.
ಇದನ್ನೂ ಓದಿ : ಕೋಲಾರದಲ್ಲಿ ಹಿಂದೂ ಮುಖಂಡರ ಕಾರ್ಯಾಚರಣೆ | ಕಂಟೇನರ್ನಲ್ಲಿ ಅಕ್ರಮವಾಗಿ ಸಾಗಿಸುತ್ತಿದ್ದ 37 ಗೋವುಗಳ ರಕ್ಷಣೆ!
