ನವದೆಹಲಿ : ಮುಂಬರುವ 2026ರ ಟಿ20 ವಿಶ್ವಕಪ್ ಟೂರ್ನಿಯಲ್ಲಿ ಹಾಲಿ ಚಾಂಪಿಯನ್ ಟೀಂ ಇಂಡಿಯಾವೇ ಅತ್ಯಂತ ಬಲಿಷ್ಠ ತಂಡ ಎಂದು ಇಂಗ್ಲೆಂಡ್ನ ಸ್ಫೋಟಕ ಬ್ಯಾಟರ್ ಫಿಲ್ ಸಾಲ್ಟ್ (Phil Salt) ಬಣ್ಣಿಸಿದ್ದಾರೆ. ಭಾರತ ತಂಡವನ್ನು ತವರಿನ ಅಂಗಳದಲ್ಲಿ ಎದುರಿಸುವುದು ಕಠಿಣ ಸವಾಲಾಗಿದ್ದು, ರೋಹಿತ್ ಪಡೆಯನ್ನು ಸೋಲಿಸಬೇಕಾದರೆ ಎದುರಾಳಿಗಳಿಗೆ ಕೇವಲ ಪ್ರತಿಭೆಯಷ್ಟೇ ಸಾಲದು, ಸ್ವಲ್ಪ ಅದೃಷ್ಟವೂ ಬೇಕು ಎಂದು ಅವರು ಅಭಿಪ್ರಾಯಪಟ್ಟಿದ್ದಾರೆ.
ಕಳೆದ ಆಗಸ್ಟ್ 2023ರಿಂದ ಈಚೆಗೆ ಟಿ20 ಮಾದರಿಯಲ್ಲಿ ಭಾರತ ತಂಡದ ಪರಾಕ್ರಮ ಕಂಡು ಕ್ರಿಕೆಟ್ ಜಗತ್ತೇ ಬೆರಗಾಗಿದೆ. ದ್ವಿಪಕ್ಷೀಯ ಸರಣಿ ಮತ್ತು ಬಹುರಾಷ್ಟ್ರೀಯ ಟೂರ್ನಿಗಳಲ್ಲಿ ಸೋಲನ್ನೇ ಕಾಣದ ಭಾರತ, ಈ ಅವಧಿಯಲ್ಲಿ ಆಡಿದ 63 ಪಂದ್ಯಗಳಲ್ಲಿ ಬರೋಬ್ಬರಿ 49 ಪಂದ್ಯಗಳನ್ನು ಗೆದ್ದುಕೊಂಡಿದೆ. ಕೇವಲ ಮೂರು ಪಂದ್ಯಗಳಲ್ಲಿ ಸೋತಿದೆ. ಈ ಅಂಕಿ-ಅಂಶಗಳನ್ನು ಉಲ್ಲೇಖಿಸಿರುವ ಫಿಲ್ ಸಾಲ್ಟ್, “ನನ್ನ ಪ್ರಕಾರ ಭಾರತವೇ ವಿಶ್ವಕಪ್ನ ಅತ್ಯಂತ ಬಲಿಷ್ಠ ತಂಡ. ಅವರನ್ನು ಸೋಲಿಸಬೇಕೆಂದರೆ ಪ್ರತಿಯೊಬ್ಬರಿಗೂ ಸ್ವಲ್ಪಮಟ್ಟಿನ ಅದೃಷ್ಟದ ಅಗತ್ಯವಿದೆ. ಅವರದೇ ಅಂಗಳದಲ್ಲಿ (ಭಾರತದಲ್ಲಿ) ವಿಶ್ವಕಪ್ ಪಂದ್ಯದಲ್ಲಿ ಅವರನ್ನು ಎದುರಿಸುವ ಆಲೋಚನೆಯೇ ನನಗೆ ರೋಮಾಂಚನ ನೀಡುತ್ತಿದೆ,” ಎಂದು ಹೇಳಿದ್ದಾರೆ.
ಅಭಿಷೇಕ್ ಶರ್ಮಾ ಆಟಕ್ಕೆ ಸಾಲ್ಟ್ ಕ್ಲೀನ್ ಬೌಲ್ಡ್!
ಇದೇ ವೇಳೆ ಭಾರತದ ಯುವ ಆರಂಭಿಕ ಬ್ಯಾಟರ್ ಅಭಿಷೇಕ್ ಶರ್ಮಾ (Abhishek Sharma) ಅವರ ಬ್ಯಾಟಿಂಗ್ ಶೈಲಿಯನ್ನು ಸಾಲ್ಟ್ ಮುಕ್ತ ಕಂಠದಿಂದ ಹೊಗಳಿದ್ದಾರೆ. ಜುಲೈ 2024ರಲ್ಲಿ ಪದಾರ್ಪಣೆ ಮಾಡಿದ ನಂತರ ಅಭಿಷೇಕ್ ಶರ್ಮಾ ಟಿ20 ಕ್ರಿಕೆಟ್ನಲ್ಲಿ ಹೊಸ ಸಂಚಲನ ಮೂಡಿಸಿದ್ದಾರೆ. 36 ಇನ್ನಿಂಗ್ಸ್ಗಳಲ್ಲಿ 194.92ರ ಸ್ಫೋಟಕ ಸ್ಟ್ರೈಕ್ ರೇಟ್ನಲ್ಲಿ 1,267 ರನ್ ಸಿಡಿಸಿರುವ ಅವರು, ಪ್ರಸ್ತುತ ವಿಶ್ವದ ನಂಬರ್ 1 ಟಿ20 ಬ್ಯಾಟರ್ ಆಗಿದ್ದಾರೆ. “ಮೊದಲ ಎಸೆತವನ್ನೇ ಸಿಕ್ಸರ್ಗೆ ಅಟ್ಟುವ ಅವರ ಸಾಮರ್ಥ್ಯ, ವಿಕೆಟ್ ಮೇಲೆ ಓಡಿ ಬಂದು ಆಡುವ ರೀತಿ ಅದ್ಭುತ. ಆಫ್ ಸೈಡ್ನ ಚೆಂಡನ್ನು ಲೆಗ್ ಸೈಡ್ಗೆ ಬಾರಿಸುವ ಅವರ ಶೈಲಿ ವಿಭಿನ್ನ. ನಾನು ಅವರಾಗಲು ಸಾಧ್ಯವಿಲ್ಲ, ಅವರು ನಾನಾಗಲು ಸಾಧ್ಯವಿಲ್ಲ. ಆದರೆ ಅವರ ಬ್ಯಾಟಿಂಗ್ ನೋಡುವುದು ನನಗೆ ತುಂಬಾ ಇಷ್ಟ,” ಎಂದು ಸಾಲ್ಟ್ ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ.
ಫೆಬ್ರವರಿ 7ರಿಂದ ಭಾರತದ ವಿಶ್ವಕಪ್ ಅಭಿಯಾನ
ಹಾಲಿ ಚಾಂಪಿಯನ್ ಆಗಿ ಕಣಕ್ಕಿಳಿಯಲಿರುವ ಭಾರತ ತಂಡ, ಫೆಬ್ರವರಿ 7ರಂದು ಅಮೆರಿಕ (USA) ವಿರುದ್ಧ ಸೆಣಸಾಡುವ ಮೂಲಕ ತನ್ನ ಅಭಿಯಾನ ಆರಂಭಿಸಲಿದೆ. ‘ಗ್ರೂಪ್ ಎ’ನಲ್ಲಿ ಸ್ಥಾನ ಪಡೆದಿರುವ ಭಾರತಕ್ಕೆ ಪಾಕಿಸ್ತಾನ, ನೆದರ್ಲೆಂಡ್ಸ್, ನಮೀಬಿಯಾ ಮತ್ತು ಅಮೆರಿಕ ತಂಡಗಳು ಎದುರಾಳಿಗಳಾಗಿವೆ. ತವರಿನಲ್ಲಿ ನಡೆಯುತ್ತಿರುವ ಟೂರ್ನಿಯಾಗಿರುವುದರಿಂದ ಮತ್ತು ಆಟಗಾರರು ಭರ್ಜರಿ ಫಾರ್ಮ್ನಲ್ಲಿರುವುದರಿಂದ ಕಪ್ ಉಳಿಸಿಕೊಳ್ಳುವ ಫೇವರಿಟ್ ತಂಡವಾಗಿ ಭಾರತ ಹೊರಹೊಮ್ಮಿದೆ.
ಇದನ್ನೂ ಓದಿ : ರಾಜ್ಯಶಾಸ್ತ್ರದಲ್ಲಿ ಪಿಎಚ್ಡಿ ಪದವಿ ಪಡೆದ BJP ಎಂಎಲ್ಸಿ ಸಿ.ಟಿ.ರವಿ!
