ಪಣಜಿ : ಪ್ರವಾಸಿಗರ ಸ್ವರ್ಗ, ಸುಂದರ ಕಡಲತೀರಗಳ ರಾಜ್ಯವಾದ ಗೋವಾದಲ್ಲಿ ರಷ್ಯಾದ ಪ್ರಜೆಯೊಬ್ಬ ತನ್ನ ಗೆಳತಿ ಸೇರಿದಂತೆ ಇಬ್ಬರು ರಷ್ಯನ್ ಮಹಿಳೆಯರನ್ನು ಅತ್ಯಂತ ಕ್ರೂರವಾಗಿ ಹತ್ಯೆ ಮಾಡಿರುವ ಘಟನೆ ಬೆಳಕಿಗೆ ಬಂದಿದೆ. ಉತ್ತರ ಗೋವಾದ ಅರಂಬೋಲ್ ಮತ್ತು ಮೊರ್ಜಿಮ್ ಎಂಬಲ್ಲಿ ಈ ಭೀಕರ ಕೃತ್ಯಗಳು ನಡೆದಿದ್ದು, ಗೋವಾ ಪೊಲೀಸರು ಆರೋಪಿ ಅಲೆಕ್ಸಿ ಲಿಯೊನೊವ್ (37) ಎಂಬಾತನನ್ನು ಬಂಧಿಸಿದ್ದಾರೆ. ಕೇವಲ ಎರಡು ದಿನಗಳ ಅಂತರದಲ್ಲಿ ಈ ಎರಡು ಕೊಲೆಗಳು ನಡೆದಿದ್ದು, ಸ್ಥಳೀಯರಲ್ಲಿ ಹಾಗೂ ಪ್ರವಾಸಿಗರಲ್ಲಿ ತೀವ್ರ ಆತಂಕ ಮೂಡಿಸಿದೆ.
ಗೆಳತಿಯ ಕೈಕಾಲು ಕಟ್ಟಿ ಗಂಟಲು ಸೀಳಿ ಹತ್ಯೆ
ಗುರುವಾರ ರಾತ್ರಿ ಅರಂಬೋಲ್ನ ಬಾಡಿಗೆ ಮನೆಯೊಂದರಲ್ಲಿ ಅಲೆಕ್ಸಿ ಲಿಯೊನೊವ್ ತನ್ನ ಗೆಳತಿ ಎಲೆನಾ ಕಸ್ತನೋವಾ (37) ಜೊತೆ ಗಲಾಟೆ ಮಾಡಿಕೊಂಡಿದ್ದ. ಈ ಜಗಳ ವಿಕೋಪಕ್ಕೆ ತಿರುಗಿದಾಗ ಆರೋಪಿಯು ಆಕೆಯ ಕೈಕಾಲುಗಳನ್ನು ಹಗ್ಗದಿಂದ ಕಟ್ಟಿ ಹಾಕಿದ್ದ. ಆಕೆ ಅಲ್ಲಿಂದ ತಪ್ಪಿಸಿಕೊಳ್ಳಲು ಪ್ರಯತ್ನಿಸಿದಾಗ, ಚಾಕುವಿನಿಂದ ಆಕೆಯ ಗಂಟಲು ಸೀಳಿ ಕೊಲೆ ಮಾಡಿದ್ದಾನೆ. ಮನೆಯ ಮಾಲೀಕ ಉತ್ತಮ ನಾಯಕ್ ಅವರು ಪೊಲೀಸರಿಗೆ ಮಾಹಿತಿ ನೀಡಿದ ನಂತರ ಈ ಘಟನೆ ಬೆಳಕಿಗೆ ಬಂದಿದೆ. ಪೊಲೀಸರು ಸ್ಥಳಕ್ಕೆ ಧಾವಿಸಿ ಆರೋಪಿಯನ್ನು ಬಂಧಿಸಿದ್ದಾರೆ.
ಮೊರ್ಜಿಮ್ನಲ್ಲಿ ಮತ್ತೊಬ್ಬ ರಷ್ಯನ್ ಮಹಿಳೆಯ ಕೊಲೆ
ತನಿಖೆಯ ವೇಳೆ ಪೊಲೀಸರಿಗೆ ಮತ್ತೊಂದು ಆಘಾತಕಾರಿ ಸತ್ಯ ತಿಳಿದುಬಂದಿದೆ. ಗೆಳತಿಯನ್ನು ಕೊಲ್ಲುವ ಕೇವಲ ಒಂದು ದಿನ ಮೊದಲು ಅಂದರೆ ಜನವರಿ 14 ರಂದು, ಅಲೆಕ್ಸಿ ಮತ್ತೊಬ್ಬ ರಷ್ಯನ್ ಪ್ರಜೆ ಎಲೆನಾ ವನೀವಾ (37) ಎಂಬಾಕೆಯನ್ನು ಮೊರ್ಜಿಮ್ನಲ್ಲಿ ಹತ್ಯೆ ಮಾಡಿದ್ದ. ಅಲ್ಲಿಯೂ ಸಹ ಕ್ಷುಲ್ಲಕ ಕಾರಣಕ್ಕೆ ನಡೆದ ಜಗಳದ ನಂತರ ಆಕೆಯ ಕುತ್ತಿಗೆ ಸೀಳಿ ಕ್ರೂರವಾಗಿ ಕೊಲ್ಲಲಾಗಿತ್ತು. ಮೊದಲ ಕೊಲೆಯ ನಂತರ ಸುಮಾರು 8 ಕಿಲೋಮೀಟರ್ ದೂರದ ಅರಂಬೋಲ್ಗೆ ತೆರಳಿದ್ದ ಆರೋಪಿ, ಅಲ್ಲಿ ತನ್ನ ಗೆಳತಿಯನ್ನು ಹತ್ಯೆ ಮಾಡಿರುವುದು ತನಿಖೆಯಲ್ಲಿ ದೃಢಪಟ್ಟಿದೆ.
ತನಿಖೆ ಚುರುಕು
ಆರೋಪಿ ಅಲೆಕ್ಸಿ ಲಿಯೊನೊವ್ ವಿರುದ್ಧ ಭಾರತೀಯ ನ್ಯಾಯ ಸಂಹಿತೆಯ (BNS) ಸೆಕ್ಷನ್ 103(1) ಮತ್ತು 126(2) ಅಡಿಯಲ್ಲಿ ಪ್ರಕರಣ ದಾಖಲಿಸಲಾಗಿದೆ. ಮಾಂಡ್ರೆಮ್ ಪೊಲೀಸರು ಎರಡೂ ಶವಗಳನ್ನು ವಶಕ್ಕೆ ಪಡೆದು ಮರಣೋತ್ತರ ಪರೀಕ್ಷೆಗೆ ರವಾನಿಸಿದ್ದಾರೆ. ಈ ಅವಳಿ ಕೊಲೆಗಳಿಗೆ ನಿಖರವಾದ ಕಾರಣವೇನು ಮತ್ತು ಆರೋಪಿಯ ಹಿನ್ನೆಲೆ ಏನು ಎಂಬ ಬಗ್ಗೆ ಪೊಲೀಸರು ತೀವ್ರ ವಿಚಾರಣೆ ನಡೆಸುತ್ತಿದ್ದಾರೆ. ಗೋವಾದ ಕರಾವಳಿ ತೀರದಲ್ಲಿ ಇಂತಹ ವಿದೇಶಿ ಪ್ರಜೆಗಳ ನಡುವಿನ ಹಿಂಸಾಚಾರವು ಪ್ರವಾಸೋದ್ಯಮದ ಮೇಲೆ ಆತಂಕದ ನೆರಳು ಮೂಡಿಸಿದೆ.
ಇದನ್ನೂ ಓದಿ : ಡಿಸಿಎಂ ಡಿಕೆಶಿ ದಾವೊಸ್ ಪ್ರವಾಸ ದಿಢೀರ್ ರದ್ದು!
