ಬೆಂಗಳೂರು : ಭಾರತೀಯ ಆಟೋಮೊಬೈಲ್ ಮಾರುಕಟ್ಟೆಯಲ್ಲಿ ಮಿಡ್‌ಸೈಜ್ ಎಸ್‌ಯುವಿಗಳ (Midsize SUV) ಸಮರ ಜೋರಾಗುವ ಲಕ್ಷಣಗಳು ಕಾಣಿಸುತ್ತಿವೆ. ಬಹುನಿರೀಕ್ಷಿತ ರೆನಾಲ್ಟ್ ಡಸ್ಟರ್ ಜನವರಿ 26ರಂದು ಮರುಬಿಡುಗಡೆಯಾಗುತ್ತಿರುವ ಬೆನ್ನಲ್ಲೇ, ಅದರ ಸಹೋದರ ಸಂಸ್ಥೆಯಾದ ನಿಸ್ಸಾನ್ ಕೂಡ ತನ್ನ ಹೊಚ್ಚ ಹೊಸ ಅಸ್ತ್ರವನ್ನು ಪ್ರಯೋಗಿಸಲು ಸಜ್ಜಾಗಿದೆ. ನಿಸ್ಸಾನ್ ಇಂಡಿಯಾ ತನ್ನ ಮಹತ್ವಾಕಾಂಕ್ಷೆಯ ಮಿಡ್‌ಸೈಜ್ ಎಸ್‌ಯುವಿ ‘ನಿಸ್ಸಾನ್ ಟೆಕ್ಟಾನ್’ (Nissan Tekton) ಅನ್ನು 2026ರ ಫೆಬ್ರವರಿ 4 ರಂದು ಜಾಗತಿಕವಾಗಿ ಅನಾವರಣಗೊಳಿಸುವುದಾಗಿ ಅಧಿಕೃತವಾಗಿ ಘೋಷಿಸಿದೆ.
ರೆನಾಲ್ಟ್ ಡಸ್ಟರ್ ಬಿಡುಗಡೆಯಾದ ಸರಿಯಾಗಿ ಒಂದು ವಾರದ ನಂತರ ನಿಸ್ಸಾನ್ ಟೆಕ್ಟಾನ್ ಅನಾವರಣಗೊಳ್ಳುತ್ತಿರುವುದು ಮಾರುಕಟ್ಟೆಯಲ್ಲಿ ಕುತೂಹಲ ಮೂಡಿಸಿದೆ. ಪ್ರಸ್ತುತ ಮ್ಯಾಗ್ನೈಟ್ ಮತ್ತು ಎಕ್ಸ್-ಟ್ರಯಲ್ ಹೊರತುಪಡಿಸಿ ಸೀಮಿತ ಮಾದರಿಗಳನ್ನು ಹೊಂದಿರುವ ನಿಸ್ಸಾನ್‌ಗೆ, ಈ ಹೊಸ ಎಸ್‌ಯುವಿ ಅತ್ಯಂತ ನಿರ್ಣಾಯಕವಾಗಲಿದೆ.
ಪ್ರಬಲ ಸ್ಪರ್ಧಿಗಳಿಗೆ ನಡುಕ?
ಹ್ಯುಂಡೈ ಕ್ರೆಟಾ, ಕಿಯಾ ಸೆಲ್ಟೋಸ್, ಮಾರುತಿ ಗ್ರ್ಯಾಂಡ್ ವಿಟಾರಾ, ಸ್ಕೋಡಾ ಕುಶಾಕ್ ಮತ್ತು ಇತ್ತೀಚೆಗೆ ಬಿಡುಗಡೆಯಾದ ಟಾಟಾ ಸಿಯೆರಾ ಮುಂತಾದ ಘಟಾನುಘಟಿಗಳು ಆಳ್ವಿಕೆ ನಡೆಸುತ್ತಿರುವ ವಿಭಾಗಕ್ಕೆ ಟೆಕ್ಟಾನ್ ಲಗ್ಗೆ ಇಡುತ್ತಿದೆ. ನಿಸ್ಸಾನ್ ಈ ವಿಭಾಗದಲ್ಲಿ ತನ್ನ ಮಾರುಕಟ್ಟೆ ಪಾಲನ್ನು ಹೆಚ್ಚಿಸಿಕೊಳ್ಳಲು ಈ ಎಸ್‌ಯುವಿಯ ಮೇಲೆ ಭಾರೀ ನಿರೀಕ್ಷೆ ಇಟ್ಟುಕೊಂಡಿದೆ.
ವಿನ್ಯಾಸ ಮತ್ತು ಪ್ಲಾಟ್‌ಫಾರ್ಮ್ : ಡಸ್ಟರ್‌ಗಿಂತ ಭಿನ್ನ
ರೆನಾಲ್ಟ್ ಡಸ್ಟರ್ ಬಳಸುವ ಅದೇ CMF-B ಪ್ಲಾಟ್‌ಫಾರ್ಮ್ ಮೇಲೆ ಟೆಕ್ಟಾನ್ ನಿರ್ಮಾಣವಾಗಿದ್ದರೂ, ವಿನ್ಯಾಸದಲ್ಲಿ ಇದು ಸಂಪೂರ್ಣ ಭಿನ್ನವಾಗಿರಲಿದೆ ಎಂದು ಕಂಪನಿ ಸ್ಪಷ್ಟಪಡಿಸಿದೆ.
- ಪ್ಯಾಟ್ರೋಲ್ ಸ್ಫೂರ್ತಿ : ಟೆಕ್ಟಾನ್‌ನ ವಿನ್ಯಾಸವು ನಿಸ್ಸಾನ್‌ನ ಜನಪ್ರಿಯ ಅಂತಾರಾಷ್ಟ್ರೀಯ ಎಸ್‌ಯುವಿ ‘ಪ್ಯಾಟ್ರೋಲ್’ (Patrol) ನಿಂದ ಪ್ರೇರಿತವಾಗಿದೆ.
- ಮುಂಭಾಗ : ಕನೆಕ್ಟೆಡ್ ಎಲ್‌ಇಡಿ ಹೆಡ್‌ಲ್ಯಾಂಪ್‌ಗಳು, ಚಪ್ಪಟೆಯಾದ ಸ್ನಾಯುಬದ್ಧ ಬಾನೆಟ್ (Muscular Bonnet) ಮತ್ತು ಬಲಿಷ್ಠವಾದ ವೀಲ್ ಆರ್ಚ್‌ಗಳು ಇದಕ್ಕೆ ಗತ್ತು ನೀಡಲಿವೆ.
- ಹಿಂಭಾಗ : ಪೂರ್ಣ ಅಗಲದ ಎಲ್‌ಇಡಿ ಲೈಟ್ ಬಾರ್, ಚೌಕಾಕಾರದ ಟೈಲ್ ಲ್ಯಾಂಪ್‌ಗಳು ಮತ್ತು ರೂಫ್ ಸ್ಪಾಯ್ಲರ್ ಈ ಕಾರಿನ ಪ್ರೀಮಿಯಂ ಲುಕ್ ಅನ್ನು ಹೆಚ್ಚಿಸಿವೆ.
- ವಿಶೇಷತೆ : ಹಿಂಬದಿಯ ಡೋರ್ ಹ್ಯಾಂಡಲ್ ಅನ್ನು ‘ಸಿ-ಪಿಲ್ಲರ್’ (C-Pillar) ನಲ್ಲಿ ಅಳವಡಿಸಿರುವುದು ಇದರ ಮತ್ತೊಂದು ವಿನ್ಯಾಸದ ವಿಶೇಷ.
ಎಂಜಿನ್ ಸಾಮರ್ಥ್ಯ (ನಿರೀಕ್ಷಿತ) ಮೂಲಗಳ ಪ್ರಕಾರ, ಟೆಕ್ಟಾನ್ ಎರಡು ಟರ್ಬೊ ಪೆಟ್ರೋಲ್ ಎಂಜಿನ್ ಆಯ್ಕೆಗಳಲ್ಲಿ ಬರುವ ಸಾಧ್ಯತೆಯಿದೆ
ನಿಸ್ಸಾನ್ ಈ ಬಾರಿ ಒಳಾಂಗಣದ ಗುಣಮಟ್ಟಕ್ಕೆ ಹೆಚ್ಚಿನ ಒತ್ತು ನೀಡಿದೆ. ಮೂರು ಬಣ್ಣಗಳ (Three-tone) ಡ್ಯಾಶ್‌ಬೋರ್ಡ್ ಲೇಔಟ್, ದೊಡ್ಡ ಟಚ್‌ಸ್ಕ್ರೀನ್ ಇನ್ಫೋಟೈನ್ಮೆಂಟ್ ಸಿಸ್ಟಮ್, ವೈರ್‌ಲೆಸ್ ಚಾರ್ಜಿಂಗ್, ಆಟೋಮ್ಯಾಟಿಕ್ ಕ್ಲೈಮೇಟ್ ಕಂಟ್ರೋಲ್ ಮತ್ತು ಸನ್‌ರೂಫ್‌ಗಳು ಇರಲಿವೆ ಎಂದು ಟೀಸರ್‌ಗಳು ಸುಳಿವು ನೀಡಿವೆ.
ಬೆಲೆ ಮತ್ತು ಲಭ್ಯತೆ
ಫೆಬ್ರವರಿ 4 ರಂದು ಕಾರಿನ ವಿನ್ಯಾಸ ಮತ್ತು ವೈಶಿಷ್ಟ್ಯಗಳು ಬಹಿರಂಗವಾದರೂ, ಬೆಲೆ ಘೋಷಣೆ ಮತ್ತು ಬಿಡುಗಡೆ 2026ರ ಮಧ್ಯಭಾಗದಲ್ಲಿ ನಡೆಯುವ ಸಾಧ್ಯತೆಯಿದೆ. ಉದ್ಯಮದ ಅಂದಾಜಿನ ಪ್ರಕಾರ, ಇದರ ಬೆಲೆ 10 ರಿಂದ 12 ಲಕ್ಷ ರೂ. (ಎಕ್ಸ್ ಶೋರೂಂ) ವ್ಯಾಪ್ತಿಯಲ್ಲಿ ಆರಂಭವಾಗಿ, ಟಾಪ್ ಮಾಡೆಲ್ ಬೆಲೆ 18-20 ಲಕ್ಷ ರೂ. ವರೆಗೆ ಇರಬಹುದು. ಒಟ್ಟಾರೆಯಾಗಿ, ಜನವರಿ 21ಕ್ಕೆ ‘ಗ್ರಾವೈಟ್’ (Gravite) ಎಂಪಿವಿ ಬಿಡುಗಡೆ, ನಂತರ ಫೆಬ್ರವರಿಯಲ್ಲಿ ‘ಟೆಕ್ಟಾನ್’ ಅನಾವರಣ ಮತ್ತು 2027ರಲ್ಲಿ 7-ಸೀಟರ್ ಎಸ್‌ಯುವಿ ಬಿಡುಗಡೆ ಮಾಡುವ ಮೂಲಕ ನಿಸ್ಸಾನ್ ಭಾರತದಲ್ಲಿ ತನ್ನ ಅಸ್ತಿತ್ವವನ್ನು ಗಟ್ಟಿಗೊಳಿಸಿಕೊಳ್ಳಲು ಸಜ್ಜಾಗಿದೆ.
ಇದನ್ನೂ ಓದಿ : ಇನ್ನೆಷ್ಟು ದಿನ ಇರ್ತೀವೋ ಗೊತ್ತಿಲ್ಲ.. ‘ದೀರ್ಘಾವಧಿ ಸಿಎಂ’ ದಾಖಲೆ ಬೆನ್ನಲ್ಲೇ ವಿದಾಯದ ಮಾತುಗಳನ್ನಾಡಿದ ಸಿದ್ದರಾಮಯ್ಯ!
