ಲಂಡನ್ : ಭಾರತೀಯ ಕ್ರಿಕೆಟ್ನ ಆಧುನಿಕ ಯುಗದ ದಿಗ್ಗಜರಾದ ವಿರಾಟ್ ಕೊಹ್ಲಿ, ರೋಹಿತ್ ಶರ್ಮಾ ಮತ್ತು ರವಿಚಂದ್ರನ್ ಅಶ್ವಿನ್ ಅವರ ಟೆಸ್ಟ್ ಕ್ರಿಯರ್ ವಿದೇಶಿ ಮಣ್ಣಿನಲ್ಲಿ ಅಂತ್ಯಗೊಂಡಿರುವುದು ಈಗ ಭಾರಿ ಚರ್ಚೆಗೆ ಗ್ರಾಸವಾಗಿದೆ. ಇಂಗ್ಲೆಂಡ್ ತಂಡದ ಮಾಜಿ ಸ್ಪಿನ್ನರ್ ಮಾಂಟಿ ಪಣೇಸರ್ ಈ ವಿಚಾರವಾಗಿ ಭಾರತೀಯ ಕ್ರಿಕೆಟ್ ನಿಯಂತ್ರಣ ಮಂಡಳಿ (ಬಿಸಿಸಿಐ) ವಿರುದ್ಧ ತೀವ್ರ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ. ದಶಕಗಳ ಕಾಲ ಭಾರತೀಯ ಕ್ರಿಕೆಟ್ಗೆ ಅಪಾರ ಕೊಡುಗೆ ನೀಡಿದ ಈ ಮಹಾನ್ ಆಟಗಾರರಿಗೆ ಭಾರತದ ಅಭಿಮಾನಿಗಳ ಮುಂದೆ ಗೌರವಯುತವಾಗಿ ವಿದಾಯ ಹೇಳುವ ಅವಕಾಶವನ್ನು ಮಂಡಳಿ ಕಲ್ಪಿಸಿಕೊಡಬೇಕಿತ್ತು ಎಂದು ಅವರು ಅಭಿಪ್ರಾಯಪಟ್ಟಿದ್ದಾರೆ.
2024-25ರ ಬಾರ್ಡರ್-ಗವಾಸ್ಕರ್ ಟ್ರೋಫಿಯು ಈ ಮೂವರು ಆಟಗಾರರ ಸುದೀರ್ಘ ಟೆಸ್ಟ್ ಜೀವನದ ಕೊನೆಯ ಸರಣಿಯಾಯಿತು. ಅನುಭವಿ ಸ್ಪಿನ್ನರ್ ಆರ್. ಅಶ್ವಿನ್ ಆಸ್ಟ್ರೇಲಿಯಾ ಸರಣಿಯ ಮಧ್ಯದಲ್ಲೇ ನಿವೃತ್ತಿ ಘೋಷಿಸಿದ್ದು ಕ್ರಿಕೆಟ್ ಲೋಕಕ್ಕೆ ಅಚ್ಚರಿ ಮೂಡಿಸಿತ್ತು. ಯುವ ಆಟಗಾರ ವಾಷಿಂಗ್ಟನ್ ಸುಂದರ್ ಅವರ ಅದ್ಭುತ ಪ್ರದರ್ಶನ ಮತ್ತು ತಂಡದಲ್ಲಿನ ಬದಲಾದ ಸಮೀಕರಣಗಳಿಂದಾಗಿ ಅಶ್ವಿನ್ ಅಡಿಲೇಡ್ ಟೆಸ್ಟ್ ನಂತರ ಅಂತಾರಾಷ್ಟ್ರೀಯ ಟೆಸ್ಟ್ ಕ್ರಿಕೆಟ್ಗೆ ಗುಡ್ಬೈ ಹೇಳಿದರು. ಮತ್ತೊಂದೆಡೆ, ರೋಹಿತ್ ಶರ್ಮಾ ಮತ್ತು ವಿರಾಟ್ ಕೊಹ್ಲಿ 2025ರ ಮೇ ತಿಂಗಳಲ್ಲಿ ನಿವೃತ್ತಿ ಘೋಷಿಸಿದರು. ಇಂಗ್ಲೆಂಡ್ ಪ್ರವಾಸಕ್ಕೆ ಮುನ್ನವೇ ಇಬ್ಬರೂ ರೆಡ್ ಬಾಲ್ ಕ್ರಿಕೆಟ್ನಿಂದ ದೂರ ಸರಿದ ಕಾರಣ, ತವರಿನಲ್ಲಿ ವಿದಾಯದ ಪಂದ್ಯ ಆಡುವ ಭಾಗ್ಯ ಇವರಿಗೂ ಸಿಗಲಿಲ್ಲ.
ಬಿಸಿಸಿಐ ಕಲಿಯುವುದು ಸಾಕಷ್ಟಿದೆ
ಈ ಕುರಿತು ಕಟುವಾಗಿ ಮಾತನಾಡಿರುವ ಮಾಂಟಿ ಪಣೇಸರ್, ಬಿಸಿಸಿಐ ಈ ವಿಚಾರದಲ್ಲಿ ಇಂಗ್ಲೆಂಡ್ ಕ್ರಿಕೆಟ್ ಮಂಡಳಿಯಿಂದ (ECB) ಕಲಿಯುವುದು ಬಹಳಷ್ಟಿದೆ ಎಂದು ಹೇಳಿದ್ದಾರೆ. ಇಂಗ್ಲೆಂಡ್ ತನ್ನ ದಿಗ್ಗಜ ಬೌಲರ್ಗಳಾದ ಸ್ಟುವರ್ಟ್ ಬ್ರಾಡ್ ಮತ್ತು ಜೇಮ್ಸ್ ಆಂಡರ್ಸನ್ ಅವರಿಗೆ ಕ್ರಮವಾಗಿ ಓವಲ್ ಮತ್ತು ಲಾರ್ಡ್ಸ್ ಅಂತಹ ಐತಿಹಾಸಿಕ ಮೈದಾನಗಳಲ್ಲಿ ಅವರ ಕುಟುಂಬದ ಸಮ್ಮುಖದಲ್ಲಿ ಅದ್ಧೂರಿ ವಿದಾಯ ನೀಡಿರುವುದನ್ನು ಅವರು ನೆನಪಿಸಿದ್ದಾರೆ. ಭಾರತದ ಪರ ಒಂದು ದಶಕಕ್ಕೂ ಹೆಚ್ಚು ಕಾಲ ನಿರಂತರವಾಗಿ ಸೇವೆ ಸಲ್ಲಿಸಿದ ಆಟಗಾರರಿಗೆ ಈ ರೀತಿಯ ಕನಿಷ್ಠ ಗೌರವ ಸಿಗದಿರುವುದು ದುರದೃಷ್ಟಕರ ಎಂದು ಅವರು ಬೇಸರ ವ್ಯಕ್ತಪಡಿಸಿದ್ದಾರೆ.
ಭಾರತೀಯ ಕ್ರಿಕೆಟ್ ಸಂಸ್ಕೃತಿಯಲ್ಲಿ ವಿದಾಯ ಪಂದ್ಯಗಳನ್ನು ಆಯೋಜಿಸುವುದು ಅಷ್ಟು ಸುಲಭವಲ್ಲದಿದ್ದರೂ, ಕೊಹ್ಲಿ, ರೋಹಿತ್ ಮತ್ತು ಅಶ್ವಿನ್ ಅವರಂತಹ ಸಾಧಕರಿಗೆ ಮರ್ಯಾದೆ ನೀಡುವ ದೃಷ್ಟಿಯಿಂದ ಬಿಸಿಸಿಐ ವಿಶೇಷ ಯೋಜನೆ ರೂಪಿಸಬೇಕಿತ್ತು ಎಂಬುದು ಪಣೇಸರ್ ಅವರ ವಾದವಾಗಿದೆ. ಐಎಎನ್ಎಸ್ ಸುದ್ದಿಸಂಸ್ಥೆಯೊಂದಿಗೆ ಮಾತನಾಡಿದ ಅವರು, ಇಂಗ್ಲೆಂಡ್ ತನ್ನ ಆಟಗಾರರ ಸಾಧನೆಯನ್ನು ಸಂಭ್ರಮದಿಂದ ಬೀಳ್ಕೊಡುತ್ತದೆ, ಆದರೆ ಭಾರತ ಈ ವಿಚಾರದಲ್ಲಿ ಎಡವಟ್ಟಿದೆ ಎಂದು ನೇರವಾಗಿ ಟೀಕಿಸಿದ್ದಾರೆ. ಇದು ಕೇವಲ ಆಟಗಾರರಿಗೆ ಮಾತ್ರವಲ್ಲದೆ, ತಮ್ಮ ನೆಚ್ಚಿನ ತಾರೆಗಳನ್ನು ಕೊನೆಯದಾಗಿ ತವರಿನ ಮೈದಾನದಲ್ಲಿ ನೋಡಬಯಸುವ ಲಕ್ಷಾಂತರ ಅಭಿಮಾನಿಗಳಿಗೂ ಮಾಡಿದ ಅನ್ಯಾಯ ಎಂಬ ಭಾವನೆ ಕ್ರೀಡಾ ವಲಯದಲ್ಲಿ ಕೇಳಿಬರುತ್ತಿದೆ.
ಇದನ್ನೂ ಓದಿ : ಶ್ರೀಲಂಕಾ ಚಂಡಮಾರುತ ಸಂತ್ರಸ್ತರ ನೆರವಿಗಾಗಿ ಬಿಸಿಸಿಐ ಮಾನವೀಯ ಹಸ್ತ
