ಮುಂಬೈ : ಟಿ20 ಲೀಗ್ 2026 ಟೂರ್ನಿಯಲ್ಲಿ ಅದ್ಭುತ ಆಲ್ರೌಂಡರ್ ಆಟ ಪ್ರದರ್ಶಿಸಿದ ಅರ್ಜುನ್ ತೆಂಡೂಲ್ಕರ್, ಬಾಂದ್ರಾ ಬ್ಲಾಸ್ಟರ್ಸ್ ವಿರುದ್ಧದ ಪಂದ್ಯದಲ್ಲಿ ಆರ್ಕ್ಸ್ ಅಂಧೇರಿ ತಂಡಕ್ಕೆ 9 ವಿಕೆಟ್ಗಳ ಭರ್ಜರಿ ಗೆಲುವು ತಂದುಕೊಟ್ಟಿದ್ದಾರೆ. ವಾಂಖೆಡೆ ಕ್ರೀಡಾಂಗಣದಲ್ಲಿ ನಡೆದ ಈ ಪಂದ್ಯದಲ್ಲಿ ಬ್ಯಾಟಿಂಗ್ ಹಾಗೂ ಬೌಲಿಂಗ್ ಎರಡರಲ್ಲೂ ಅತ್ಯುತ್ತಮ ಪ್ರದರ್ಶನ ನೀಡಿದ ಅರ್ಜುನ್, ಪಂದ್ಯದ ಗೆಲುವಿನ ರೂವಾರಿ ಎನಿಸಿಕೊಂಡರು.
ಇತ್ತೀಚೆಗೆ ಮುಕ್ತಾಯಗೊಂಡ ಐಪಿಎಲ್ 2026 ಟೂರ್ನಿಯಲ್ಲಿ ಲಕ್ನೋ ಸೂಪರ್ ಜೈಂಟ್ಸ್ ಪರ ಕೇವಲ 1 ಪಂದ್ಯವನ್ನಷ್ಟೇ ಆಡಿ ಬೆಂಚ್ ಕಾಯ್ದಿದ್ದ ಅವರಿಗೆ, ಈ ಅಮೋಘ ಪ್ರದರ್ಶನವು ಹೊಸ ಹುರುಪು ತಂದುಕೊಟ್ಟಿದೆ. ಪಂದ್ಯದ ನಂತರ ಡ್ರೆಸ್ಸಿಂಗ್ ರೂಮ್ನಲ್ಲಿ ನಾಯಕ ಶಿವಂ ದುಬೆ ನೇತೃತ್ವದಲ್ಲಿ ಇಡೀ ತಂಡವೇ ಎದ್ದು ನಿಂತು ಚಪ್ಪಾಳೆ ತಟ್ಟುವ ಮೂಲಕ ಈ ಯುವ ಆಟಗಾರನನ್ನು ಗೌರವಿಸಿದೆ.
ಬಾಂದ್ರಾ ಬ್ಲಾಸ್ಟರ್ಸ್ ಬ್ಯಾಟರ್ಗಳನ್ನು ಕಟ್ಟಿಹಾಕಿದ ಬೌಲಿಂಗ್
ಪಂದ್ಯದ ಮೊದಲಾರ್ಧದಲ್ಲಿಯೇ ಪಾರುಪತ್ಯ ಮೆರೆದ ಅರ್ಜುನ್ ತೆಂಡೂಲ್ಕರ್, ಎದುರಾಳಿ ತಂಡದ ಬ್ಯಾಟಿಂಗ್ ಲೈನಪ್ ಅನ್ನು ಅಕ್ಷರಶಃ ಧೂಳೀಪಟ ಮಾಡಿದರು. ತಮ್ಮ 3 ಓವರ್ಗಳ ಬೌಲಿಂಗ್ ಸ್ಪೆಲ್ನಲ್ಲಿ 1 ಮೇಡನ್ ಸಹಿತ ಕೇವಲ 11 ರನ್ ಬಿಟ್ಟುಕೊಟ್ಟು 3 ಪ್ರಮುಖ ವಿಕೆಟ್ಗಳನ್ನು ಕಬಳಿಸಿದರು. ಅವರ ಈ ಮಾರಕ ದಾಳಿ ಹಾಗೂ ಪ್ರಸೂನ್ ಸಿಂಗ್ ಅವರ ಉತ್ತಮ ಬೌಲಿಂಗ್ ನೆರವಿನಿಂದ ಬಾಂದ್ರಾ ಬ್ಲಾಸ್ಟರ್ಸ್ ತಂಡವನ್ನು ನಿಗದಿತ ಓವರ್ಗಳಲ್ಲಿ 144/9 ರನ್ಗಳಿಗೆ ಕಟ್ಟಿಹಾಕಲು ಸಾಧ್ಯವಾಯಿತು. ಅತ್ಯಂತ ನಿಖರವಾದ ಲೈನ್ ಮತ್ತು ಲೆಂಗ್ತ್ನಲ್ಲಿ ಬೌಲಿಂಗ್ ಮಾಡಿದ ಅರ್ಜುನ್, ಎದುರಾಳಿಗಳಿಗೆ ಯಾವುದೇ ಹಂತದಲ್ಲೂ ಬಿರುಸಿನ ರನ್ ಗಳಿಸಲು ಅವಕಾಶ ನೀಡಲಿಲ್ಲ.
ಬ್ಯಾಟಿಂಗ್ನಲ್ಲೂ ಅಬ್ಬರಿಸಿದ ಜೂನಿಯರ್ ತೆಂಡೂಲ್ಕರ್
145 ರನ್ಗಳ ಸಾಧಾರಣ ಗುರಿ ಬೆನ್ನತ್ತಿದ ಆರ್ಕ್ಸ್ ಅಂಧೇರಿ ತಂಡಕ್ಕೆ ಆರಂಭಿಕ ಆಟಗಾರ ದಿವ್ಯಾಂಶ್ ಸಕ್ಸೇನಾ 26 ರನ್ಗಳ ಬಿರುಸಿನ ಆರಂಭ ಒದಗಿಸಿದರು. ನಂತರ ಕ್ರೀಸ್ಗೆ ಬಂದ ಅರ್ಜುನ್ ತೆಂಡೂಲ್ಕರ್, ಬ್ಯಾಟಿಂಗ್ನಲ್ಲೂ ಎದುರಾಳಿ ಬೌಲರ್ಗಳನ್ನು ಬೆಂಡೆತ್ತಿದರು. ಯುವ ಪ್ರತಿಭೆ ಮುಶೀರ್ ಖಾನ್ ಅವರ ಜೊತೆಗೂಡಿ ಎರಡನೇ ವಿಕೆಟ್ಗೆ 116 ರನ್ಗಳ ಬೃಹತ್ ಹಾಗೂ ಮುರಿಯದ ಜೊತೆಯಾಟವನ್ನು ಆಡಿದರು. ಕೇವಲ 34 ಎಸೆತಗಳನ್ನು ಎದುರಿಸಿದ ಅರ್ಜುನ್, ಅಜೇಯ 66 ರನ್ ಸಿಡಿಸಿ ಅಬ್ಬರಿಸಿದರು. ಇನ್ನೊಂದೆಡೆ ಅವರಿಗೆ ಅತ್ಯುತ್ತಮ ಸಾಥ್ ನೀಡಿದ ಮುಶೀರ್ ಖಾನ್, 38 ಎಸೆತಗಳಲ್ಲಿ ಅಜೇಯ 54 ರನ್ ಗಳಿಸಿದರು. ಈ ಜೋಡಿಯ ಸ್ಫೋಟಕ ಬ್ಯಾಟಿಂಗ್ ನೆರವಿನಿಂದ ಆರ್ಕ್ಸ್ ಅಂಧೇರಿ ತಂಡವು ಇನ್ನು 37 ಎಸೆತಗಳು ಬಾಕಿ ಇರುವಾಗಲೇ, ಅಂದರೆ ಕೇವಲ 13.5 ಓವರ್ಗಳಲ್ಲಿ ಅನಾಯಾಸವಾಗಿ ಗೆಲುವಿನ ದಡ ಸೇರಿತು.
ವೈರಲ್ ಆದ ಡ್ರೆಸ್ಸಿಂಗ್ ರೂಮ್ ವಿಡಿಯೋ
ಪಂದ್ಯದ ಬಳಿಕ ಡ್ರೆಸ್ಸಿಂಗ್ ರೂಮ್ನಲ್ಲಿ ನಡೆದ ಸಂಭ್ರಮಾಚರಣೆಯ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ಭಾರೀ ವೈರಲ್ ಆಗುತ್ತಿದೆ. ತಂಡದ ನಾಯಕ ಶಿವಂ ದುಬೆ ಅವರು ಪ್ರತಿಯೊಬ್ಬ ಆಟಗಾರರ ಪ್ರದರ್ಶನವನ್ನು ಹೊಗಳುತ್ತಾ, ವಿಶೇಷವಾಗಿ ಅರ್ಜುನ್ ಹಾಗೂ ಮುಶೀರ್ ಖಾನ್ ಅವರ ಆಟವನ್ನು ಕೊಂಡಾಡಿದ್ದಾರೆ. ದುಬೆ ಅವರು ಹೊಗಳುತ್ತಿದ್ದಾಗಲೂ ಅತ್ಯಂತ ಶಾಂತವಾಗಿದ್ದ ಅರ್ಜುನ್, ಕೊನೆಯಲ್ಲಿ ತಮ್ಮ ಹೆಸರು ಮತ್ತೆ ಕೇಳಿಬಂದಾಗ ಮುಗುಳ್ನಕ್ಕಿರುವ ದೃಶ್ಯ ಕ್ಯಾಮೆರಾದಲ್ಲಿ ಸೆರೆಯಾಗಿದೆ. ಹಿಂದಿನ ದಿನವಷ್ಟೇ ಆಕಾಶ್ ಟೈಗರ್ಸ್ ವಿರುದ್ಧ ಕೇವಲ 7 ರನ್ಗಳ ರೋಚಕ ಸೋಲು ಕಂಡಿದ್ದ ಆರ್ಕ್ಸ್ ಅಂಧೇರಿ ತಂಡಕ್ಕೆ, ಈ ಅಮೋಘ ಗೆಲುವು ಭಾರಿ ಆತ್ಮಾಭಿಮಾನವನ್ನು ತಂದುಕೊಡುವುದರ ಜೊತೆಗೆ ಟೂರ್ನಿಯಲ್ಲಿ ಭರವಸೆ ಮೂಡಿಸಿದೆ.
ಇದನ್ನೂ ಓದಿ : ಟಿ20 ವಿಶ್ವಕಪ್ ಅಭ್ಯಾಸ ಪಂದ್ಯದಲ್ಲಿ ಪಾಕಿಸ್ತಾನಕ್ಕೆ ಶಾಕ್ ಕೊಟ್ಟ ಸ್ಕಾಟ್ಲೆಂಡ್
