ನವದೆಹಲಿ: ದಕ್ಷಿಣ ಆಫ್ರಿಕಾ ವಿರುದ್ಧದ ಅಹಮದಾಬಾದ್ ಟಿ20 ಪಂದ್ಯದಲ್ಲಿ ಟೀಂ ಇಂಡಿಯಾ ಮತ್ತೆ ತನ್ನ ಹಳೆಯ ಖದರ್ ಪ್ರದರ್ಶಿಸಿದೆ. ಇದಕ್ಕೆ ಮುಖ್ಯ ಕಾರಣ ಆರಂಭಿಕರಾಗಿ ಕಣಕ್ಕಿಳಿದ ಸಂಜು ಸ್ಯಾಮ್ಸನ್ ಮತ್ತು ಅಭಿಷೇಕ್ ಶರ್ಮಾ ಜೋಡಿ. ಶುಭಮನ್ ಗಿಲ್ ಓರ್ವ ಶ್ರೇಷ್ಠ ಆಟಗಾರ ಎಂಬುದರಲ್ಲಿ ಎರಡು ಮಾತಿಲ್ಲ, ಆದರೆ ಭಾರತವು ತನ್ನ ಟಿ20 ವಿಶ್ವಕಪ್ ಕಿರೀಟವನ್ನು ಉಳಿಸಿಕೊಳ್ಳಬೇಕಾದರೆ, ಈಗ ತಂಡಕ್ಕೆ ಬೇಕಿರುವುದು ಕೇವಲ ಬ್ಯಾಟಿಂಗ್ ಸೊಬಗಲ್ಲ, ಬದಲಾಗಿ ಎದುರಾಳಿಗಳ ಎದೆ ನಡುಗಿಸುವ ಅಬ್ಬರದ ಬ್ಯಾಟಿಂಗ್ ಶಕ್ತಿ.
ಗಿಲ್ ಗಾಯಗೊಂಡಿದ್ದು ವರವಾಯಿತೇ?
“ಅಸಲಿಗೆ ಸಂಜು ತಂಡದಲ್ಲಿ ಯಾಕಿರಲಿಲ್ಲ? ಗಿಲ್ ಗಾಯಗೊಳ್ಳುವವರೆಗೂ ಇವರು ಕಾಯಬೇಕಾಯಿತೇ? ಸಂಜು ಅಗ್ರ ಕ್ರಮಾಂಕದ ನೈಜ ಬ್ಯಾಟರ್. ದಕ್ಷಿಣ ಆಫ್ರಿಕಾ ವಿರುದ್ಧ ಸತತ ಎರಡು ಶತಕ ಸೇರಿದಂತೆ ಟಿ20ಯಲ್ಲಿ ಈಗಾಗಲೇ 300ಕ್ಕೂ ಹೆಚ್ಚು ರನ್ ಗಳಿಸಿದ್ದಾರೆ. ಅವರ ಆಟ ನೋಡಿದರೆ, ಅವರನ್ನು ಕಟ್ಟಿಹಾಕಲು ಬೌಲರ್ಗಳು ಎಲ್ಲಿ ಬೌಲ್ ಮಾಡಬೇಕು ಎಂದು ತಿಳಿಯುವುದಿಲ್ಲ,” ಎಂದು ಮಾಜಿ ಕೋಚ್ ರವಿ ಶಾಸ್ತ್ರಿ ಅಚ್ಚರಿ ವ್ಯಕ್ತಪಡಿಸಿದ್ದಾರೆ.
ಅಹಮದಾಬಾದ್ನಲ್ಲಿ ಸಂಜು ಸ್ಯಾಮ್ಸನ್ ಅವರ ಆಟ 2024ರ ಉತ್ತುಂಗದ ದಿನಗಳನ್ನು ನೆನಪಿಸಿತು. ಆದರೆ, ಶುಭಮನ್ ಗಿಲ್ ಗಾಯಗೊಳ್ಳುವವರೆಗೂ ಸಂಜು ಅವಕಾಶಕ್ಕಾಗಿ ಕಾಯಬೇಕಾಗಿ ಬಂದಿದ್ದು ವಿಪರ್ಯಾಸ.
ಅಂಕಿ-ಅಂಶಗಳ ಆಟ: ಗಿಲ್ vs ಸಂಜು
2024 ಸಂಜು ಪಾಲಿಗೆ ಅದ್ಭುತ ವರ್ಷವಾಗಿತ್ತು. ಒಂದೇ ವರ್ಷದಲ್ಲಿ ಮೂರು ಟಿ20 ಶತಕಗಳನ್ನು ಸಿಡಿಸಿದ ಅವರು, 180.16ರ ಸ್ಟ್ರೈಕ್ ರೇಟ್ನಲ್ಲಿ ರನ್ ಗಳಿಸಿದ್ದರು. ಸಂಜು ಮತ್ತು ಅಭಿಷೇಕ್ ಶರ್ಮಾ (ಸಂಜುಷೇಕ್) ಜೋಡಿ ಭಾರತದ ಆರಂಭಿಕ ಸಮಸ್ಯೆಗೆ ಉತ್ತರವಾಗಿತ್ತು.
ಆದರೆ ಗಿಲ್ ಆರಂಭಿಕರಾಗಿ ಬಂದಾಗ ತಂಡದ ಲೆಕ್ಕಾಚಾರ ತಲೆಕೆಳಗಾಯಿತು. 2025ರ ಅಂಕಿಅಂಶಗಳನ್ನು ನೋಡಿದರೆ, ಗಿಲ್ 15 ಪಂದ್ಯಗಳಲ್ಲಿ 291 ರನ್ ಗಳಿಸಿದ್ದಾರಷ್ಟೇ. ಸರಾಸರಿ 24.25 ಇದ್ದರೆ, ಸ್ಟ್ರೈಕ್ ರೇಟ್ 137ರ ಆಸುಪಾಸಿನಲ್ಲಿದೆ. ಮುಖ್ಯವಾಗಿ ಇಡೀ ವರ್ಷದಲ್ಲಿ ಗಿಲ್ ಬ್ಯಾಟ್ನಿಂದ ಒಂದೇ ಒಂದು ಅರ್ಧಶತಕ ಮೂಡಿಬಂದಿಲ್ಲ.
‘ಸಂಜುಷೇಕ್’ ಜೋಡಿಯ ಅಬ್ಬರ
ಗಿಲ್ ಆಡುವಾಗ ಆಕ್ರಮಣಕಾರಿ ಆಟ ಕೇವಲ ಅಭಿಷೇಕ್ ಶರ್ಮಾ ಕಡೆಯಿಂದ ಮಾತ್ರ ಬರುತ್ತಿತ್ತು. ಗಿಲ್ ನಿಧಾನಗತಿಯ ಆಟದಿಂದಾಗಿ, ಅಭಿಷೇಕ್ ಮೇಲೂ ಒತ್ತಡ ಬೀಳುತ್ತಿತ್ತು. ಆದರೆ ಸಂಜು ಮತ್ತು ಅಭಿಷೇಕ್ ಜೊತೆಯಾಗಿ ಇನಿಂಗ್ಸ್ ಆರಂಭಿಸಿದಾಗಲೆಲ್ಲಾ ಭಾರತ ಸುಲಭವಾಗಿ 200 ರನ್ ಗಡಿ ದಾಟಿದೆ.
ಅಹಮದಾಬಾದ್ ಪಂದ್ಯದಲ್ಲಿ ಮೊದಲ 5 ಓವರ್ಗಳಲ್ಲಿಯೇ ಈ ಜೋಡಿ 63 ರನ್ ಕೊಳ್ಳೆಹೊಡೆಯಿತು. ಸಂಜು ಅವರ ಆಟ ಕೇವಲ ಕಣ್ಣಿಗೆ ಹಿತ ನೀಡುವ ಹೊಡೆತಗಳಾಗಿರಲಿಲ್ಲ, ಬದಲಾಗಿ ಎದುರಾಳಿ ಬೌಲರ್ಗಳ ಮನಸ್ಥೈರ್ಯ ಕುಗ್ಗಿಸುವ ಅಸ್ತ್ರಗಳಾಗಿದ್ದವು. ತಿಲಕ್ ವರ್ಮಾ ಹೇಳುವಂತೆ, “ಸಂಜು ಭಾಯ್ ಮತ್ತು ಅಭಿಷೇಕ್ ಮೊದಲ ಐದು ಓವರ್ಗಳಲ್ಲಿ ಹಾಕಿಕೊಟ್ಟ ಬುನಾದಿ ಇಡೀ ತಂಡಕ್ಕೆ ಮುಕ್ತವಾಗಿ ಆಡಲು ನೆರವಾಯಿತು.”
ಗಿಲ್ ಶೈಲಿ ಈಗಿನ ಟಿ20ಗೆ ಒಗ್ಗುತ್ತಿಲ್ಲವೇ?
ಇದು ಗಿಲ್ ಸಾಮರ್ಥ್ಯವನ್ನು ಪ್ರಶ್ನಿಸುವ ವರದಿಯಲ್ಲ. ಗಿಲ್ ಅವರ ಕೆಲಸದ ಬದ್ಧತೆ (Work ethic) ಮತ್ತು ಪ್ರತಿಭೆ ಅಪಾರ. ಆದರೆ ಈಗಿನ ಟಿ20 ಸ್ವರೂಪ ಬದಲಾಗಿದೆ. ಪ್ರಭಸಿಮ್ರಾನ್ ಸಿಂಗ್, ಪ್ರಿಯಾಂಶ್ ಆರ್ಯ ಅವರಂತಹ ಯುವ ಆಟಗಾರರು ಮೊದಲ ಎಸೆತದಿಂದಲೇ ಅಬ್ಬರಿಸುತ್ತಿದ್ದಾರೆ.
ಭಾರತ ತಂಡಕ್ಕೆ ಈಗ ಬೇಕಿರುವುದು ಇನಿಂಗ್ಸ್ ಕಟ್ಟುವ ಆಟಗಾರರಲ್ಲ, ಬದಲಾಗಿ ಮೊದಲ ಓವರ್ನಿಂದಲೇ ಬೌಲರ್ಗಳನ್ನು ಬೆದರಿಸುವ ಆಟಗಾರರು. ರಾಬಿನ್ ಉತ್ತಪ್ಪ ಹೇಳುವಂತೆ, “ಗಿಲ್ ಅದ್ಭುತ ಆಟಗಾರ, ಆದರೆ ಅವರು ತಮ್ಮ ನೈಜ ಶೈಲಿಯಿಂದ ದೂರ ಸರಿದಿದ್ದಾರೆ. ಟೀಂ ಇಂಡಿಯಾಗೆ ಅಗ್ರ ಕ್ರಮಾಂಕದಲ್ಲಿ 140-150 ಸ್ಟ್ರೈಕ್ ರೇಟ್ ಸಾಲದು.”
ನಿರ್ಣಾಯಕ ಘಟ್ಟದಲ್ಲಿ ಆಯ್ಕೆ ಸಮಿತಿ
ಟಿ20 ವಿಶ್ವಕಪ್ ಆಯ್ಕೆ ಸಮೀಪಿಸುತ್ತಿದೆ. ಗಿಲ್ ಮೇಲಿನ ಗೌರವದ ಹೊರತಾಗಿಯೂ, ತಂಡದ ಹಿತದೃಷ್ಟಿಯಿಂದ ಕಠಿಣ ನಿರ್ಧಾರ ಕೈಗೊಳ್ಳುವ ಸಮಯ ಬಂದಿದೆ. ಸಂಜು ಸ್ಯಾಮ್ಸನ್, “ನಾನು ಓಪನಿಂಗ್ ಆಗಲಿ ಅಥವಾ 3ನೇ ಕ್ರಮಾಂಕವಾಗಲಿ, ತಂಡಕ್ಕೆ ಎಲ್ಲಿ ಅಗತ್ಯವಿದೆಯೋ ಅಲ್ಲಿ ಆಡಲು ಸಿದ್ಧ,” ಎಂದು ಹೇಳುವ ಮೂಲಕ ತಮ್ಮ ಬದ್ಧತೆ ತೋರಿದ್ದಾರೆ.
ವಿಶ್ವಕಪ್ ಕಿರೀಟ ಉಳಿಸಿಕೊಳ್ಳಬೇಕಾದರೆ, ಭಾರತಕ್ಕೆ ಈಗ ಬೇಕಿರುವುದು ‘ಸೊಬಗು’ (Finesse) ಅಲ್ಲ, ‘ಸ್ಫೋಟಕ ಶಕ್ತಿ’ (Firepower). ಆ ಶಕ್ತಿ ಸಂಜು-ಅಭಿಷೇಕ್ ಜೋಡಿಯಲ್ಲಿದೆ. ಬಯಸುತ್ತೀರಾ?
ಇದನ್ನೂ ಓದಿ: 16 ಎಸೆತಗಳಲ್ಲಿ ಅರ್ಧಶತಕ ಸಿಡಿಸಿ ಪ್ರೇಮಿ ಮಹಿಕಾಗೆ ಮುತ್ತಿನ ಉಡುಗೊರೆ!
