ಲಖನೌ : ಶಾಲೆಯ ಆವರಣದಲ್ಲಿ ಚಿಕ್ಕ ಮಕ್ಕಳ ಮೂಲಕ ಬಲವಂತವಾಗಿ ಶಿಕ್ಷಕಿ ಇಟ್ಟಿಗೆ ಹೊರಿಸುತ್ತಿರುವ ವಿಡಿಯೊವೊಂದು ಭಾರಿ ವೈರಲ್ ಆಗಿದೆ. ಉತ್ತರ ಪ್ರದೇಶದ ರಾಯ್ಬರೇಲಿ ಜಿಲ್ಲೆಯ ಸರ್ಕಾರಿ ಶಾಲೆಯೊಂದರಲ್ಲಿ ಈ ಘಟನೆ ನಡೆದಿದೆ. ಈ ಆಘಾತಕಾರಿ ಘಟನೆ ಸೋಶಿಯಲ್ ಮೀಡಿಯಾದಲ್ಲಿ ವೈರಲ್ ಆಗುತ್ತಿದ್ದಂತೆ ಸಾರ್ವಜನಿಕ ವಲಯದಲ್ಲಿ ಆಕ್ರೋಶಕ್ಕೆ ಕಾರಣವಾಗಿದೆ.
ಪ್ರಾಥಮಿಕ ಶಾಲಾ ಮಕ್ಕಳನ್ನು ಶಾಲೆಯ ಆವರಣದಲ್ಲಿ ಇಟ್ಟಿಗೆಗಳನ್ನು ಹೊತ್ತುಕೊಂಡು ಹೋಗಲು ಒತ್ತಾಯಿಸಲಾಗಿದೆ. ಈ ಘಟನೆ ಅಮವಾನ್ ಬ್ಲಾಕ್ನಲ್ಲಿರುವ ಸಂದಿ ನಾಗಿನ್ ಪ್ರಾಥಮಿಕ ಶಾಲೆಯಲ್ಲಿ ನಡೆದಿದೆ ಎನ್ನಲಾಗಿದೆ. ಮಕ್ಕಳನ್ನು ಬಾಲ ಕಾರ್ಮಿಕರಂತೆ ದುಡಿಸಿಕೊಳ್ಳುವ ಈ ದೃಶ್ಯವನ್ನು ಕಂಡ ನೆಟ್ಟಿಗರು ಶಿಕ್ಷಕರ ವಿರುದ್ದ ಕ್ರಮ ಕೈಗೊಳ್ಳುವಂತೆ ಕಿಡಿಕಾರಿದ್ದಾರೆ.
ವಿಡಿಯೋದಲ್ಲಿ ಸಮವಸ್ತ್ರ ಧರಿಸಿದ ಹಲವು ಮಕ್ಕಳು ಇಟ್ಟಿಗೆಗಳನ್ನು ಹೊರಲು ಹೆಣಗಾಡುತ್ತಿರುವುದನ್ನು ನೋಡಬಹುದು. ಚಿಕ್ಕ ಮಕ್ಕಳಲ್ಲಿ ಕೆಲವರು ದಣಿದಂತೆ ಕಾಣುತ್ತಿದ್ದರೂ, ಭಾರವಾದ ಇಟ್ಟಿಗೆಗಳನ್ನು ಹೊರಲು ಶಿಕ್ಷಕಿ ಬಲವಂತ ಪಡಿಸಿತ್ತಿರುವ ದೃಶ್ಯ ಸೆರೆಯಾಗಿದೆ.
ಶಾಲೆಯ ಮುಖ್ಯೋಪಾಧ್ಯಾಯಿನಿ ಪ್ರತಿಭಾ ಸಿಂಗ್ ಮಕ್ಕಳನ್ನು ಇಟ್ಟಿಗೆ ಹೊರಲು ಬಲವಂತ ಮಾಡಿಸಿದ್ದಾರೆ ಎನ್ನಲಾಗಿದೆ. ಅವರು ವಿಡಯೊ ಚಿತ್ರೀಕರಣವನ್ನು ನಿಲ್ಲಿಸಲು ಯತ್ನಿಸುತ್ತಿರುವುದನ್ನೂ ಕಾಣಬಹುದು. ಅವರು ವಿಡಿಯೊವನ್ನು ರೆಕಾರ್ಡ್ ಮಾಡಿದ ವ್ಯಕ್ತಿಯ ಬಳಿ ಡಿಲೀಟ್ ಮಾಡುವಂತೆ ಪಟ್ಟು ಹಿಡಿದಿದ್ದಾರೆ. ನಂತರ ಮಕ್ಕಳನ್ನು ಆತುರದಿಂದ ತರಗತಿಗಳ ಒಳಗೆ ಕಳುಹಿಸುತ್ತಾರೆ. ಶಾಲಾ ಮುಖ್ಯಸ್ಥರ ಈ ವರ್ತನೆಯನ್ನು ಸಾರ್ವಜನಿಕರು ಟೀಕಿಸಿದ್ದಾರೆ.
ಇದನ್ನೂ ಓದಿ : ಜಾಗತಿಕ ಮಾರುಕಟ್ಟೆಗೆ ನಿಸ್ಸಾನ್ ‘ಕೈಟ್’ ಎಂಟ್ರಿ: ಬ್ರೆಜಿಲ್ನಲ್ಲಿ ಉತ್ಪಾದನೆ ಆರಂಭ
