ಮಾರುತಿ ಸುಜುಕಿ ‘ಇ ವಿಟಾರಾ’ ಬಿಡುಗಡೆಗೆ ಕೌಂಟ್‌ಡೌನ್ : ಎಲೆಕ್ಟ್ರಿಕ್ ಲೋಕದಲ್ಲಿ ಸಂಚಲನ ಸೃಷ್ಟಿಸಲು ಸಜ್ಜಾದ ದೈತ್ಯ

ಬೆಂಗಳೂರು: ಭಾರತದ ರಸ್ತೆಗಳನ್ನು ದಶಕಗಳಿಂದ ಆಳುತ್ತಿರುವ ಮಾರುತಿ ಸುಜುಕಿ, ಇದೀಗ ಎಲೆಕ್ಟ್ರಿಕ್ ವಾಹನ ಮಾರುಕಟ್ಟೆಯಲ್ಲಿ ಇತಿಹಾಸ ಸೃಷ್ಟಿಸಲು ಸಜ್ಜಾಗಿದೆ. ದೇಶದ ಅತಿದೊಡ್ಡ ಕಾರು ತಯಾರಕ ಕಂಪನಿಯ ಬಹುನಿರೀಕ್ಷಿತ ಮೊದಲ ಎಲೆಕ್ಟ್ರಿಕ್ ಎಸ್‌ಯುವಿ ‘ಇ ವಿಟಾರಾ‘ (e Vitara) ಜನವರಿ 2026ರಲ್ಲಿ ಭಾರತದ ರಸ್ತೆಗಿಳಿಯಲಿದೆ ಎಂದು ಕಂಪನಿ ಅಧಿಕೃತವಾಗಿ ಪ್ರಕಟಿಸಿದೆ. ಈ ಎಲೆಕ್ಟ್ರಿಕ್ ಕ್ರಾಂತಿಗೆ ಮುನ್ನುಡಿ ಬರೆಯಲಿರುವ ಇ ವಿಟಾರಾ ಬುಕ್ಕಿಂಗ್ ಇದೇ ತಿಂಗಳಾಂತ್ಯಕ್ಕೆ ಆರಂಭವಾಗುವ ನಿರೀಕ್ಷೆಯಿದ್ದು, ವಾಹನ ಪ್ರಿಯರಲ್ಲಿ ತೀವ್ರ ಕುತೂಹಲ ಮೂಡಿಸಿದೆ.

ಕೇವಲ ಕಾರು ಬಿಡುಗಡೆ ಮಾಡುವುದಷ್ಟೇ ಅಲ್ಲ, ಎಲೆಕ್ಟ್ರಿಕ್ ವಾಹನ ಮಾಲೀಕರಿಗೆ ಅತಿದೊಡ್ಡ ತಲೆನೋವಾಗಿರುವ ಚಾರ್ಜಿಂಗ್ ಸಮಸ್ಯೆಯನ್ನೇ ಇಲ್ಲವಾಗಿಸಲು ಮಾರುತಿ ಸುಜುಕಿ ಬೃಹತ್ ಯೋಜನೆಯೊಂದನ್ನು ರೂಪಿಸಿದೆ. 2030ರ ವೇಳೆಗೆ ದೇಶಾದ್ಯಂತ ಬರೋಬ್ಬರಿ ಒಂದು ಲಕ್ಷ ಸಾರ್ವಜನಿಕ ಚಾರ್ಜಿಂಗ್ ಪಾಯಿಂಟ್‌ಗಳನ್ನು ಸ್ಥಾಪಿಸುವ ಗುರಿ ಹೊಂದಿದ್ದು, ಪ್ರತಿ 5 ರಿಂದ 10 ಕಿಲೋಮೀಟರ್ ಅಂತರದಲ್ಲಿ ಚಾರ್ಜರ್ ಲಭ್ಯವಿರುವಂತೆ ನೋಡಿಕೊಳ್ಳಲು ಕಂಪನಿ ಪಣತೊಟ್ಟಿದೆ. ಈಗಾಗಲೇ ದೇಶದ 1,100ಕ್ಕೂ ಹೆಚ್ಚು ನಗರಗಳಲ್ಲಿ 2,000ಕ್ಕೂ ಅಧಿಕ ಎಕ್ಸ್‌ಕ್ಲೂಸಿವ್ ಚಾರ್ಜಿಂಗ್ ಪಾಯಿಂಟ್‌ಗಳನ್ನು ಸ್ಥಾಪಿಸುವ ಮೂಲಕ ತನ್ನ ಬದ್ಧತೆಯನ್ನು ತೋರ್ಪಡಿಸಿದೆ.

63 ಚಾರ್ಜಿಂಗ್ ಸ್ಟೇಷನ್ ಸ್ಥಾಪನೆ

ದೆಹಲಿ ಮತ್ತು ಚಂಡೀಗಢ ನಡುವಿನ ಪ್ರಯಾಣವನ್ನು ಉದಾಹರಣೆಯಾಗಿ ತೆಗೆದುಕೊಂಡರೆ, ಮಾರುತಿ ಈಗಾಗಲೇ ಈ ಮಾರ್ಗದಲ್ಲಿ 63 ಚಾರ್ಜಿಂಗ್ ಸ್ಟೇಷನ್‌ಗಳನ್ನು ಸ್ಥಾಪಿಸಿದೆ. ವಿಶೇಷವೆಂದರೆ, ಇ ವಿಟಾರಾದ 543 ಕಿಲೋಮೀಟರ್ ರೇಂಜ್ ಸಾಮರ್ಥ್ಯವಿದ್ದು, ದೆಹಲಿಯಿಂದ ಚಂಡೀಗಢಕ್ಕೆ ಹೋಗಿ, ಮತ್ತೆ ವಾಪಸ್ ಒಂದೇ ಚಾರ್ಜ್‌ನಲ್ಲಿ ಬರುವ ತಾಕತ್ತು ಹೊಂದಿದೆ ಎಂದು ಕಂಪನಿ ಹೇಳಿಕೊಂಡಿದೆ.

ಗ್ರಾಹಕರ ಸೇವೆಯಲ್ಲಿಯೂ ರಾಜಿ ಮಾಡಿಕೊಳ್ಳದ ಮಾರುತಿ, ಎಲೆಕ್ಟ್ರಿಕ್ ವಾಹನಗಳ ನಿರ್ವಹಣೆಗಾಗಿಯೇ ದೇಶಾದ್ಯಂತ 1,500ಕ್ಕೂ ಹೆಚ್ಚು ವರ್ಕ್‌ಶಾಪ್‌ಗಳನ್ನು ಸಜ್ಜುಗೊಳಿಸಿದೆ. ಇದಕ್ಕಾಗಿ ಸುಮಾರು ಒಂದೂವರೆ ಲಕ್ಷ ಸಿಬ್ಬಂದಿಗೆ ವಿಶೇಷ ತರಬೇತಿ ನೀಡಲಾಗಿದೆ. ಗ್ರಾಹಕರ ಅನುಕೂಲಕ್ಕಾಗಿ ‘ಇ ಫಾರ್ ಮೀ’ (e for me) ಎಂಬ ಹೊಸ ಮೊಬೈಲ್ ಆ್ಯಪ್ ಪರಿಚಯಿಸಲಾಗಿದ್ದು, ಇದರ ಮೂಲಕ ಹತ್ತಿರದ ಚಾರ್ಜಿಂಗ್ ಸ್ಟೇಷನ್ ಪತ್ತೆ, ಯುಪಿಐ ಪೇಮೆಂಟ್ ಮತ್ತು ಸರ್ವಿಸ್ ಬುಕ್ಕಿಂಗ್ ಎಲ್ಲವನ್ನೂ ಅಂಗೈಯಲ್ಲೇ ಮಾಡಬಹುದಾಗಿದೆ.

ಬ್ಯಾಟರಿಗಳಲ್ಲಿ ಎರಡು ಆಯ್ಕೆ

ಇನ್ನು ಕಾರಿನ ಕಾರ್ಯಕ್ಷಮತೆಯ ವಿಚಾರಕ್ಕೆ ಬಂದರೆ, ಇ ವಿಟಾರಾ ಎರಡು ಬ್ಯಾಟರಿ ಆಯ್ಕೆಗಳಲ್ಲಿ ಲಭ್ಯವಿರಲಿದೆ. 49 ಕಿಲೋವ್ಯಾಟ್ ಬ್ಯಾಟರಿ ಪ್ಯಾಕ್ 144 ಬಿಎಚ್‌ಪಿ ಶಕ್ತಿ ನೀಡಿದರೆ, 61 ಕಿಲೋವ್ಯಾಟ್‌ನ ದೊಡ್ಡ ಬ್ಯಾಟರಿ ಪ್ಯಾಕ್ 174 ಬಿಎಚ್‌ಪಿ ಶಕ್ತಿಯನ್ನು ಉತ್ಪಾದಿಸಲಿದೆ. ಒಳಾಂಗಣದಲ್ಲಿಯೂ ಐಷಾರಾಮಕ್ಕೆ ಕೊರತೆಯಿಲ್ಲದಂತೆ ನೋಡಿಕೊಂಡಿರುವ ಮಾರುತಿ, ಡ್ಯುಯಲ್ ಟೋನ್ ಫಿನಿಶ್, ವೆಂಟಿಲೇಟೆಡ್ ಸೀಟುಗಳು ಮತ್ತು ಹರ್ಮನ್ ಆಡಿಯೋ ಸಿಸ್ಟಮ್‌ನಂತಹ ಅತ್ಯಾಧುನಿಕ ಸೌಲಭ್ಯಗಳನ್ನು ನೀಡಿದೆ. ಸುರಕ್ಷತೆಗೂ ಹೆಚ್ಚಿನ ಆದ್ಯತೆ ನೀಡಲಾಗಿದ್ದು, ಏಳು ಏರ್‌ಬ್ಯಾಗ್‌ಗಳು ಮತ್ತು ಲೆವೆಲ್-2 ಎಡಿಎಎಸ್ (ADAS) ತಂತ್ರಜ್ಞಾನವನ್ನು ಅಳವಡಿಸಲಾಗಿದೆ.

ಭಾರತದಲ್ಲಿ ತಯಾರಾಗಿ ಜಗತ್ತಿನ 100ಕ್ಕೂ ಹೆಚ್ಚು ರಾಷ್ಟ್ರಗಳಿಗೆ ರಫ್ತಾಗಲಿರುವ ಇ ವಿಟಾರಾ, ಮಾರುಕಟ್ಟೆಗೆ ಲಗ್ಗೆ ಇಟ್ಟ ನಂತರ ಟಾಟಾ ಕರ್ವ್ ಇವಿ ಮತ್ತು ಎಂಜಿ ಝಡ್‌ಎಸ್ ಇವಿ ಕಾರುಗಳಿಗೆ ನೇರ ಪ್ರತಿಸ್ಪರ್ಧಿಯಾಗಲಿದೆ. ‘ಬ್ಯಾಟರಿ ಆಸ್ ಎ ಸರ್ವಿಸ್’ (BaaS) ಮತ್ತು ಬೈಬ್ಯಾಕ್ ಆಫರ್‌ಗಳ ಮೂಲಕ ಗ್ರಾಹಕರನ್ನು ಸೆಳೆಯಲು ಮಾರುತಿ ಸುಜುಕಿ ಭರ್ಜರಿ ತಯಾರಿ ನಡೆಸಿದೆ.

ಇದನ್ನೂ ಓದಿ: ಫ್ಲ್ಯಾಗ್‌ಶಿಪ್‌ಗಳಿಗೇ ನಡುಕ ಹುಟ್ಟಿಸಿದ ಒನ್​ಪ್ಲಸ್​ ಏಸ್ 6T : 8,300mAh ಬ್ಯಾಟರಿ, ಹೊಚ್ಚ ಹೊಸ ಪ್ರೊಸೆಸರ್!