ಗುವಾಹಟಿ: ದಕ್ಷಿಣ ಆಫ್ರಿಕಾ ವಿರುದ್ಧದ ಎರಡನೇ ಟೆಸ್ಟ್ ಪಂದ್ಯದಲ್ಲಿ (IND vs SA 2nd Test) ಭಾರತ ತಂಡದ ಬ್ಯಾಟಿಂಗ್ ಕುಸಿತಕ್ಕೆ ಕಾರಣರಾದ ರಿಷಭ್ ಪಂತ್ (Rishabh Pant) ಮತ್ತು ಧ್ರುವ್ ಜುರೆಲ್ (Dhruv Jurel) ಅವರನ್ನು ಆಲ್ರೌಂಡರ್ ವಾಷಿಂಗ್ಟನ್ ಸುಂದರ್ (Washington Sundar) ಬಲವಾಗಿ ಸಮರ್ಥಿಸಿಕೊಂಡಿದ್ದಾರೆ. “ಅವರ ಉದ್ದೇಶ ಸರಿಯಾಗಿಯೇ ಇತ್ತು, ಆದರೆ ಅನುಷ್ಠಾನದಲ್ಲಿ (Execution) ಎಡವಿದರು,” ಎಂದು ಸುಂದರ್ ಅಭಿಪ್ರಾಯಪಟ್ಟಿದ್ದಾರೆ.
ಏನಾಯಿತು ಗುವಾಹಟಿಯಲ್ಲಿ?
ದಕ್ಷಿಣ ಆಫ್ರಿಕಾ ನೀಡಿದ್ದ 489 ರನ್ಗಳ ಬೃಹತ್ ಮೊತ್ತಕ್ಕೆ ಉತ್ತರವಾಗಿ ಭಾರತದ ಮೊದಲ ಇನಿಂಗ್ಸ್ 201 ರನ್ಗಳಿಗೆ ಅಂತ್ಯವಾಯಿತು. ಮೂರನೇ ದಿನದಾಟದಲ್ಲಿ ಆಕ್ರಮಣಕಾರಿ ಆಟಕ್ಕೆ ಮುಂದಾದ ಜುರೆಲ್ ಮತ್ತು ಪಂತ್, ಅನಗತ್ಯ ಹೊಡೆತಗಳಿಗೆ ಕೈಹಾಕಿ ವಿಕೆಟ್ ಒಪ್ಪಿಸಿದರು. ಇದು ಕ್ರಿಕೆಟ್ ಪಂಡಿತರ ಮತ್ತು ಅಭಿಮಾನಿಗಳ ಟೀಕೆಗೆ ಗುರಿಯಾಗಿತ್ತು.
ಸುಂದರ್ ವಾದವೇನು?
ಪಂದ್ಯದ ಬಳಿಕ ಮಾತನಾಡಿದ ಸುಂದರ್, “ಮತ್ತೊಂದು ದಿನವಾಗಿದ್ದರೆ, ಅವರಿಬ್ಬರು ಬಾರಿಸಿದ ಚೆಂಡುಗಳು ಸ್ಟ್ಯಾಂಡ್ಸ್ಗೆ ಹೋಗುತ್ತಿದ್ದವು ಮತ್ತು ನಾವೆಲ್ಲರೂ ಚಪ್ಪಾಳೆ ತಟ್ಟುತ್ತಿದ್ದೆವು. ಅವರ ಹಿಂದಿನ ದಾಖಲೆಗಳು ಮತ್ತು ಕೌಶಲ್ಯವನ್ನು ನಾವು ನಂಬಬೇಕು. ಅವರ ಉದ್ದೇಶ (Intent) ಆಕ್ರಮಣಕಾರಿಯಾಗಿ ಆಡುವುದಾಗಿತ್ತು, ಆದರೆ ದುರದೃಷ್ಟವಶಾತ್ ಅದು ಅಂದುಕೊಂಡಂತೆ ಕಾರ್ಯಗತವಾಗಲಿಲ್ಲ,” ಎಂದು ಸಹ ಆಟಗಾರರ ಪರ ಬ್ಯಾಟ್ ಬೀಸಿದರು.
ಕುಸಿತದ ಹಾದಿ
ಜುರೆಲ್ ಅವರು ಮಾರ್ಕೊ ಜಾನ್ಸೆನ್ ಬೌಲಿಂಗ್ನಲ್ಲಿ ಅನಗತ್ಯ ಹೊಡೆತಕ್ಕೆ ಮುಂದಾಗಿ ಮಿಡ್-ಆನ್ನಲ್ಲಿ ಕ್ಯಾಚ್ ನೀಡಿದರು. ಇದಾದ ಕೆಲವೇ ಕ್ಷಣಗಳಲ್ಲಿ, ಹಂಗಾಮಿ ನಾಯಕ ರಿಷಭ್ ಪಂತ್ ಕ್ರೀಸ್ ಬಿಟ್ಟು ಬಾರಿಸಲು ಹೋಗಿ ವಿಕೆಟ್ ಕೀಪರ್ಗೆ ಕ್ಯಾಚ್ ನೀಡಿದರು. ಈ ಎರಡು ವಿಕೆಟ್ಗಳ ಪತನದ ನಂತರ ಭಾರತ ಚೇತರಿಸಿಕೊಳ್ಳಲೇ ಇಲ್ಲ. ಊಟದ ವಿರಾಮದ ವೇಳೆಗೆ 174ಕ್ಕೆ 7 ವಿಕೆಟ್ ಕಳೆದುಕೊಂಡಿದ್ದ ಭಾರತ, ಅಂತಿಮವಾಗಿ 201 ರನ್ಗಳಿಗೆ ಆಲೌಟ್ ಆಯಿತು.
ಸುಂದರ್-ಕುಲದೀಪ್ ಪ್ರತಿರೋಧ
ಒಂದೆಡೆ ವಿಕೆಟ್ ಉರುಳುತ್ತಿದ್ದರೂ, ವಾಷಿಂಗ್ಟನ್ ಸುಂದರ್ ಮತ್ತು ಕುಲದೀಪ್ ಯಾದವ್ ತಾಳ್ಮೆಯ ಆಟ ಪ್ರದರ್ಶಿಸಿದರು. 8ನೇ ವಿಕೆಟ್ಗೆ ಈ ಜೋಡಿ 72 ರನ್ಗಳ ಜೊತೆಯಾಟವಾಡಿ ದಕ್ಷಿಣ ಆಫ್ರಿಕಾ ಬೌಲರ್ಗಳನ್ನು ಸ್ವಲ್ಪ ಕಾಲ ಕಾಡಿತು. ಇದು ದಕ್ಷಿಣ ಆಫ್ರಿಕಾ ವಿರುದ್ಧ ಭಾರತದ ಅತಿ ದೊಡ್ಡ 8ನೇ ವಿಕೆಟ್ ಜೊತೆಯಾಟ ಎಂಬ ಹೆಗ್ಗಳಿಕೆಗೂ ಪಾತ್ರವಾಯಿತು.
ಫಾಲೋ-ಆನ್ ನೀಡದ ದಕ್ಷಿಣ ಆಫ್ರಿಕಾ, ಎರಡನೇ ಇನಿಂಗ್ಸ್ ಬ್ಯಾಟಿಂಗ್ ಆರಂಭಿಸಿ ದಿನದಾಟದ ಅಂತ್ಯಕ್ಕೆ ವಿಕೆಟ್ ನಷ್ಟವಿಲ್ಲದೆ 26 ರನ್ ಗಳಿಸಿದೆ. ಒಟ್ಟಾರೆ 314 ರನ್ಗಳ ಮುನ್ನಡೆ ಸಾಧಿಸಿರುವ ಹರಿಣಗಳು, ಪಂದ್ಯದ ಮೇಲೆ ಬಿಗಿ ಹಿಡಿತ ಸಾಧಿಸಿವೆ.
ಇದನ್ನೂ ಓದಿ; ದಕ್ಷಿಣ ಆಫ್ರಿಕಾ ಸರಣಿಗೆ ‘ಹಿಟ್ಮ್ಯಾನ್’ ಭರ್ಜರಿ ತಯಾರಿ : ಮುಂಬೈ ಇಂಡಿಯನ್ಸ್ ಫಿಸಿಯೋ ಜೊತೆ ಕಸರತ್ತು!
