ನವದೆಹಲಿ: 2026ರ ಇಂಡಿಯನ್ ಪ್ರೀಮಿಯರ್ ಲೀಗ್ (ಐಪಿಎಲ್) ಟೂರ್ನಿಯ ಮಿನಿ ಹರಾಜಿಗಾಗಿ ವೇದಿಕೆ ಸಿದ್ಧಗೊಳ್ಳುತ್ತಿದ್ದು, ಎಲ್ಲಾ 10 ಫ್ರಾಂಚೈಸಿಗಳು ತಾವು ಉಳಿಸಿಕೊಂಡ ಮತ್ತು ಬಿಡುಗಡೆ ಮಾಡಿದ ಆಟಗಾರರ ಅಂತಿಮ ಪಟ್ಟಿಯನ್ನು ಬಿಸಿಸಿಐಗೆ ಸಲ್ಲಿಸಿವೆ. ಈ ಪ್ರಕ್ರಿಯೆಯು ಹಲವು ಅಚ್ಚರಿಯ ನಿರ್ಧಾರಗಳಿಗೆ ಸಾಕ್ಷಿಯಾಗಿದ್ದು, ಕೆಲವು ಸ್ಟಾರ್ ಆಟಗಾರರು ತಮ್ಮ ಹಳೆಯ ತಂಡಗಳನ್ನು ತೊರೆದು ಹರಾಜಿಗೆ ಲಭ್ಯರಾಗಿದ್ದಾರೆ.
ಪ್ರಮುಖ ಆಟಗಾರರ ವಿನಿಮಯ ಮತ್ತು ಬಿಡುಗಡೆ
ಈ ಬಾರಿಯ ರಿಟೆನ್ಷನ್ ಪ್ರಕ್ರಿಯೆಯಲ್ಲಿ ಕೆಲವು ಮಹತ್ವದ ವಿನಿಮಯಗಳು ನಡೆದಿವೆ. ರಾಜಸ್ಥಾನ ರಾಯಲ್ಸ್ ತಂಡದ ನಾಯಕ ಸಂಜು ಸ್ಯಾಮ್ಸನ್ ಅವರು ಚೆನ್ನೈ ಸೂಪರ್ ಕಿಂಗ್ಸ್ಗೆ ವಿನಿಮಯಗೊಂಡರೆ, ಪ್ರತಿಯಾಗಿ ಸಿಎಸ್ಕೆಯ ಸ್ಟಾರ್ ಆಲ್ರೌಂಡರ್ ರವೀಂದ್ರ ಜಡೇಜಾ ಅವರು ರಾಜಸ್ಥಾನ ರಾಯಲ್ಸ್ ಪಾಲಾಗಿದ್ದಾರೆ.
ಕೋಲ್ಕತ್ತಾ ನೈಟ್ ರೈಡರ್ಸ್ (ಕೆಕೆಆರ್) ತಂಡವು ತನ್ನ ಅತ್ಯಂತ ದುಬಾರಿ ಆಟಗಾರರಾದ ವೆಂಕಟೇಶ್ ಅಯ್ಯರ್ (23.75 ಕೋಟಿ ರೂಪಾಯಿ) ಮತ್ತು ಆಂಡ್ರೆ ರಸೆಲ್ (12 ಕೋಟಿ ರೂಪಾಯಿ) ಅವರನ್ನು ಬಿಡುಗಡೆ ಮಾಡಿ ಅಚ್ಚರಿ ಮೂಡಿಸಿದೆ. ಈ ನಿರ್ಧಾರದಿಂದಾಗಿ, ಕೆಕೆಆರ್ ಅತಿ ಹೆಚ್ಚು ಪರ್ಸ್ ಮೊತ್ತವನ್ನು ಹೊಂದಿದೆ. ಇತ್ತ, ಚೆನ್ನೈ ಸೂಪರ್ ಕಿಂಗ್ಸ್, ಶ್ರೀಲಂಕಾದ ವೇಗಿ ಮತೀಶ ಪತಿರಣ (13 ಕೋಟಿ ರೂಪಾಯಿ) ಅವರನ್ನು ಬಿಡುಗಡೆ ಮಾಡಿದೆ. ಅಲ್ಲದೆ, ಸಿಎಸ್ಕೆ ಆಟಗಾರ ರವಿಚಂದ್ರನ್ ಅಶ್ವಿನ್ ಐಪಿಎಲ್ಗೆ ವಿದಾಯ ಹೇಳಿದ್ದಾರೆ.
ಯಾವ ತಂಡದ ಪರ್ಸ್ನಲ್ಲಿ ಎಷ್ಟು ಹಣವಿದೆ?
ಆಟಗಾರರನ್ನು ಉಳಿಸಿಕೊಂಡ ಮತ್ತು ಬಿಡುಗಡೆ ಮಾಡಿದ ನಂತರ, ಪ್ರತಿ ಫ್ರಾಂಚೈಸಿಯ ಖಾತೆಯಲ್ಲಿ ಉಳಿದಿರುವ ಹಣದ ವಿವರ ಇಲ್ಲಿದೆ. ಡಿಸೆಂಬರ್ 16ರಂದು ಅಬುಧಾಬಿಯಲ್ಲಿ ನಡೆಯಲಿರುವ ಮಿನಿ ಹರಾಜಿನಲ್ಲಿ ಈ ಮೊತ್ತವನ್ನು ಬಳಸಿ, ಫ್ರಾಂಚೈಸಿಗಳು ಹೊಸ ಆಟಗಾರರನ್ನು ಖರೀದಿಸಲಿವೆ.
ಪರ್ಸ್ನಲ್ಲಿ ಉಳಿದಿರುವ ಮೊತ್ತ (ಕೋಟಿ ರೂ.) |
ಕೋಲ್ಕತ್ತಾ ನೈಟ್ ರೈಡರ್ಸ್- 64.30 ರೂಪಾಯಿ
ಚೆನ್ನೈ ಸೂಪರ್ ಕಿಂಗ್ಸ್ 43.40 ರೂಪಾಯಿ
ಸನ್ರೈಸರ್ಸ್ ಹೈದರಾಬಾದ್ 25.50 ರೂಪಾಯಿ
ಲಖನೌ ಸೂಪರ್ ಜಯಂಟ್ಸ್ – 22.95 ರೂಪಾಯಿ
ಡೆಲ್ಲಿ ಕ್ಯಾಪಿಟಲ್ಸ್- 21.80 ರೂಪಾಯಿ
ರಾಯಲ್ ಚಾಲೆಂಜರ್ಸ್ ಬೆಂಗಳೂರು- 16.40 ರೂಪಾಯಿ
ರಾಜಸ್ಥಾನ್ ರಾಯಲ್ಸ್- 16.05 ರೂಪಾಯಿ
ಗುಜರಾತ್ ಟೈಟನ್ಸ್ – 12.90 ರೂಪಾಯಿ
ಪಂಜಾಬ್ ಕಿಂಗ್ಸ್ – 11.50 ರೂಪಾಯಿ
ಮುಂಬೈ ಇಂಡಿಯನ್ಸ್- 2.75 ರೂಪಾಯಿ
ಅತಿ ಹೆಚ್ಚು ಮೊತ್ತವನ್ನು ಹೊಂದಿರುವ ಕೆಕೆಆರ್ ಹರಾಜಿನಲ್ಲಿ ಪ್ರಮುಖ ಪಾತ್ರ ವಹಿಸುವ ನಿರೀಕ್ಷೆಯಿದೆ. ಆದರೆ, ಮುಂಬೈ ಇಂಡಿಯನ್ಸ್ ಬಳಿ ಕೇವಲ ₹2.75 ಕೋಟಿ ಇರುವುದರಿಂದ, ಅವರು ಹರಾಜಿನಲ್ಲಿ ದೊಡ್ಡ ಆಟಗಾರರನ್ನು ಖರೀದಿಸುವ ಸಾಧ್ಯತೆ ಕಡಿಮೆ.
ಇದನ್ನೂ ಓದಿ: 15 ಸಿಕ್ಸರ್, 32 ಎಸೆತಗಳಲ್ಲಿ ಶತಕ : ಟಿ20 ಕ್ರಿಕೆಟ್ನಲ್ಲಿ ಹೊಸ ದಾಖಲೆ ಬರೆದ 14ರ ಪೋರ ವೈಭವ್ ಸೂರ್ಯವಂಶಿ!
