ಬೆಂಗಳೂರು : ಪೋಸ್ಟ್ ಆಫೀಸ್ನಲ್ಲಿರುವ ಜನಪ್ರಿಯ ಯೋಜನೆಗಳಲ್ಲಿ ಸಾರ್ವಜನಿಕ ಭವಿಷ್ಯ ನಿಧಿ ಅಥವಾ ಪಿಪಿಎಫ್ ಯೋಜನೆಯು ಕೂಡ ಒಂದಾಗಿದೆ. ಕೇಂದ್ರ ಸರ್ಕಾರದ ಬೆಂಬಲ ಹೊಂದಿರುವ ಈ ಯೋಜನೆಯು ಮಧ್ಯಮ ವರ್ಗದವರು ಹೂಡಿಕೆ ಮಾಡಿ, ಹೆಚ್ಚಿನ ರಿಟರ್ನ್ಸ್ ಪಡೆಯಲು ಸಹಕಾರಿಯಾಗಿದೆ. ಅಲ್ಲದೆ, ಇದು ಸುರಕ್ಷಿತ ಹೂಡಿಕೆ ಮಾದರಿಯೂ ಆಗಿದೆ. ಪಿಪಿಎಫ್ ಯೋಜನೆಯಲ್ಲಿ ನೀವು ವರ್ಷಕ್ಕೆ 40 ಸಾವಿರ ರೂ. ಹೂಡಿಕೆ ಮಾಡಿದರೆ, ಸುಲಭವಾಗಿ 10 ಲಕ್ಷ ರೂ. ಗಳಿಕೆಯ ಗುರಿ ಸಾಧಿಸಬಹುದಾಗಿದೆ.
ಪಿಪಿಎಫ್ ಯೋಜನೆಯಲ್ಲಿ ನೀವು 15 ವರ್ಷಗಳವರೆಗೆ ಪ್ರತಿ ವರ್ಷ 40 ಸಾವಿರ ರೂ. ಹೂಡಿಕೆ ಮಾಡಬೇಕು. ಇದಕ್ಕೆ ಶೇ.7.1ರಷ್ಟು ಬಡ್ಡಿ ನೀಡಲಾಗುತ್ತದೆ. 15 ವರ್ಷಗಳಲ್ಲಿ ನೀವು 6 ಲಕ್ಷ ರೂ. ಹೂಡಿಕೆ ಮಾಡಿದಂತೆ ಆಗುತ್ತದೆ. ಇದಕ್ಕೆ ಶೇ.7.1ರಷ್ಟು ಬಡ್ಡಿ ಅಂದರೆ, 4.84 ಲಕ್ಷ ರೂ. ಬಡ್ಡಿ ಆದಾಯವೇ ಲಭಿಸುತ್ತದೆ. ಆಗ ನಿಮಗೆ ಮೆಚ್ಯೂರಿಟಿ ಮೊತ್ತವಾಗಿ 10.84 ಲಕ್ಷ ರೂ. ಸಿಗುತ್ತದೆ. ತಿಂಗಳಿಗೆ ನೀವು 3 ಸಾವಿರ ರೂ.ನಂತೆ ಹೂಡಿಕೆ ಮಾಡುತ್ತ ಹೋದರೆ, 15 ವರ್ಷಗಳಲ್ಲೇ ಉತ್ತಮ ಲಾಭ ಪಡೆಯಬಹುದಾಗಿದೆ.
ಪಿಪಿಎಫ್ ಯೋಜನೆಯಲ್ಲಿ ಹೂಡಿಕೆ ಮಾಡಿದರೆ ತೆರಿಗೆ ಉಳಿತಾಯದ ಲಾಭವನ್ನೂ ಪಡೆಯಬಹುದಾಗಿದೆ. ನೀವು ಸೆಕ್ಷನ್ 80C ಅಡಿಯಲ್ಲಿ ತೆರಿಗೆ ಪ್ರಯೋಜನಗಳನ್ನು ಪಡೆಯಬಹುದು. ಇದು ಮ್ಯೂಚುವಲ್ ಫಂಡ್ ಹಾಗೂ ಷೇರು ಮಾರುಕಟ್ಟೆಯ ರೀತಿ ರಿಸ್ಕ್ ಹೊಂದಿರುವ ಹೂಡಿಕೆಯಲ್ಲ. ನಿಮಗೆ 15 ವರ್ಷಗಳಲ್ಲಿ ಖಾತರಿ ಮೊತ್ತವನ್ನು ನೀಡುತ್ತದೆ.
ಪಿಪಿಎಫ್ ಯೋಜನೆಯಲ್ಲಿ ವರ್ಷಕ್ಕೆ 40 ಸಾವಿರ ರೂಪಾಯಿ ಮಾತ್ರವೇ ಹೂಡಿಕೆ ಮಾಡಬೇಕು ಎಂಬ ನಿಯಮವಿಲ್ಲ. ವರ್ಷದಲ್ಲಿ ನೀವು 1.5 ಲಕ್ಷ ರೂ.ವರೆಗೆ ಗರಿಷ್ಠ ಹೂಡಿಕೆ ಮಾಡಬಹುದಾಗಿದೆ. 15 ವರ್ಷಗಳ ಬಳಿಕ ನೀವು ಇನ್ನೂ 5 ವರ್ಷಗಳವರೆಗೆ ಹೂಡಿಕೆ ಯೋಜನೆಯನ್ನು ವಿಸ್ತರಣೆ ಮಾಡಬಹುದು. ಇದರಿಂದ ನಿಮಗೆ ಹೆಚ್ಚಿನ ಬಡ್ಡಿ ಆದಾಯ ಲಭಿಸುತ್ತದೆ.
