ಇಸ್ಲಾಮಾಬಾದ್: ಪಹಲ್ಗಾಮ್ ದಾಳಿಯ ನಂತರ ಭಾರತ ನಡೆಸಿದ ‘ಆಪರೇಷನ್ ಸಿಂದೂರ’ದಲ್ಲಿ ಧ್ವಂಸಗೊಂಡಿದ್ದ ತನ್ನ ಪ್ರಧಾನ ಕಚೇರಿಯನ್ನು ಲಷ್ಕರ್-ಎ-ತೊಯ್ಬಾ (ಎಲ್ಇಟಿ) ಸಂಘಟನೆಯು ಪಾಕಿಸ್ತಾನ ಸರ್ಕಾರದ ಸಹಾಯದಿಂದ ಪುನರ್ನಿರ್ಮಿಸುತ್ತಿದೆ ಎಂಬ ಅಚ್ಚರಿಯ ವಿಚಾರ ಬಹಿರಂಗವಾಗಿದೆ. ಭಾರತೀಯ ಗುಪ್ತಚರ ಸಂಸ್ಥೆಗಳು ನೀಡಿರುವ ಮಾಹಿತಿ ಪ್ರಕಾರ, ಪಾಕಿಸ್ತಾನದ ಪಂಜಾಬ್ ಪ್ರಾಂತ್ಯದ ಮುರಿದ್ಕೆಯಲ್ಲಿರುವ ‘ಮರ್ಕಜ್ ತೈಬಾ’ ಕೇಂದ್ರದ ಪುನರ್ನಿರ್ಮಾಣ ಕಾರ್ಯಗಳು ಸದ್ದಿಲ್ಲದೆ ನಡೆಯುತ್ತಿವೆ.
ಪಹಲ್ಗಾಮ್ ದಾಳಿಯಲ್ಲಿ ಗಡಿಯಾಚೆಗಿನ ನಂಟು ಪತ್ತೆಯಾದ ನಂತರ, ಭಾರತವು ಮೇ 7 ರಂದು ‘ಆಪರೇಷನ್ ಸಿಂದೂರ’ವನ್ನು ಪ್ರಾರಂಭಿಸಿತ್ತು. ಈ ಕಾರ್ಯಾಚರಣೆಯಲ್ಲಿ ಭಾರತೀಯ ವಾಯುಪಡೆಯ ಮಿರಾಜ್ ವಿಮಾನಗಳು ಪಾಕಿಸ್ತಾನದ ಪಂಜಾಬ್ ಪ್ರಾಂತ್ಯದೊಳಗೆ ನುಗ್ಗಿ ಮುರಿದ್ಕೆಯಲ್ಲಿರುವ 1.09 ಎಕರೆ ವಿಸ್ತೀರ್ಣದ ಮರ್ಕಜ್ ತೈಬಾ ಕ್ಯಾಂಪಸ್ನ ಮೂರು ಪ್ರಮುಖ ಕಟ್ಟಡಗಳನ್ನು ಗುರಿಯಾಗಿಸಿ ನಾಶಪಡಿಸಿದ್ದವು. ಈ ದಾಳಿಯಲ್ಲಿ ಉಗ್ರರ ವಸತಿ ಮತ್ತು ಶಸ್ತ್ರಾಸ್ತ್ರ ಸಂಗ್ರಹಣೆಗೆ ಬಳಸಲಾಗುತ್ತಿದ್ದ ಕೆಂಪು ಬಣ್ಣದ ಬಹುಮಹಡಿ ಕಟ್ಟಡ ಹಾಗೂ ತರಬೇತಿ ಕೇಂದ್ರಗಳಾಗಿದ್ದ ಎರಡು ಹಳದಿ ಬಣ್ಣದ ಕಟ್ಟಡಗಳು ಸಂಪೂರ್ಣವಾಗಿ ನಾಶವಾಗಿದ್ದವು.
ಆಗಸ್ಟ್ 18ರ ಹೊತ್ತಿಗೆ, ಎಲ್ಇಟಿ ಸಂಘಟನೆಯು ಭಾರಿ ಯಂತ್ರೋಪಕರಣಗಳನ್ನು ಬಳಸಿ ಈಗಾಗಲೇ ಹಾನಿಗೊಳಗಾದ ಕಟ್ಟಡಗಳ ಅವಶೇಷಗಳನ್ನು ನೆಲಸಮಗೊಳಿಸಲು ಪ್ರಾರಂಭಿಸಿತು. ಸೆಪ್ಟೆಂಬರ್ 4 ರಂದು ಹಳದಿ ಬಣ್ಣದ ‘ಉಮ್-ಉಲ್-ಖುರಾ’ ಬ್ಲಾಕ್ ಮತ್ತು ಮೂರು ದಿನಗಳ ನಂತರ ಕೆಂಪು ಕಟ್ಟಡವನ್ನು ಸಂಪೂರ್ಣವಾಗಿ ಕೆಡವಲಾಯಿತು. ಕಾಶ್ಮೀರ ಏಕತಾ ದಿನವಾದ ಫೆಬ್ರವರಿ 5, 2026 ರೊಳಗೆ ಪುನರ್ನಿರ್ಮಿತ ಸಂಕೀರ್ಣವನ್ನು ಉದ್ಘಾಟಿಸಲು ಎಲ್ಇಟಿ ಯೋಜಿಸಿದೆ ಎಂದು ಮೂಲಗಳು ತಿಳಿಸಿವೆ.
ಪುನರ್ನಿರ್ಮಾಣದ ಉಸ್ತುವಾರಿಯನ್ನು ಮರ್ಕಜ್ ತೈಬಾದ ನಿರ್ದೇಶಕ ಮೌಲಾನಾ ಅಬು ಜರ್ ಮತ್ತು ಕಾರ್ಯಾಚರಣೆಯ ಮೇಲ್ವಿಚಾರಕ ಯೂನುಸ್ ಶಾ ಬುಖಾರಿ ಖುದ್ದಾಗಿ ವಹಿಸಿಕೊಂಡಿದ್ದಾರೆ. ದಾಳಿಯ ನಂತರ, ಲಷ್ಕರ್ ತನ್ನ ತರಬೇತಿ ಕೇಂದ್ರಗಳನ್ನು ತಾತ್ಕಾಲಿಕವಾಗಿ ಬಹವಾಲ್ಪುರದ ಮರ್ಕಜ್ ಅಕ್ಸಾಗೆ ಮತ್ತು ನಂತರ ಕಸೂರ್ ಜಿಲ್ಲೆಯ ಪಟೋಕಿಯಲ್ಲಿರುವ ಮರ್ಕಜ್ ಯಾರ್ಮೌಕ್ಗೆ ಸ್ಥಳಾಂತರಿಸಿತ್ತು.
ಹಣಕಾಸು ಒದಗಿಸಿದ ಪಾಕಿಸ್ತಾನ ಸರ್ಕಾರ!
ಭಾರತದ ಗುಪ್ತಚರ ಇಲಾಖೆಯ ದಾಖಲೆಗಳ ಪ್ರಕಾರ, ‘ಆಪರೇಷನ್ ಸಿಂದೂರ’ದ ಸಮಯದಲ್ಲಿ ನಾಶವಾದ ಎಲ್ಇಟಿ ಮತ್ತು ಜೈಶ್-ಎ-ಮೊಹಮ್ಮದ್ (ಜೆಇಎಂ) ನಂತಹ ಸಂಘಟನೆಗಳ ಸೌಲಭ್ಯಗಳಿಗೆ ಪಾಕಿಸ್ತಾನ ಸರ್ಕಾರವು ಆರ್ಥಿಕ ನೆರವು ನೀಡುವುದಾಗಿ ಭರವಸೆ ನೀಡಿತ್ತು. ಆಗಸ್ಟ್ನಲ್ಲಿ, ಎಲ್ಇಟಿ ಪಾಕಿಸ್ತಾನ ಸರ್ಕಾರದಿಂದ ಆರಂಭಿಕ ಹಣವಾಗಿ 4 ಕೋಟಿ ಪಾಕಿಸ್ತಾನಿ ರೂ. (ಸುಮಾರು 1.25 ಕೋಟಿ ಭಾರತದ ರೂಪಾಯಿ) ಪಡೆದಿದೆ. ಪುನರ್ನಿರ್ಮಾಣದ ಒಟ್ಟು ವೆಚ್ಚ 15 ಕೋಟಿ ಪಾಕಿಸ್ತಾನಿ ರೂಪಾಯಿ (ಸುಮಾರು 4.7 ಕೋಟಿ) ಮೀರಲಿದೆ ಎಂದು ಅಂದಾಜಿಸಲಾಗಿದೆ. ಇದು ಭಯೋತ್ಪಾದನೆ ನಿಗ್ರಹದ ವಿಷಯದಲ್ಲಿ ಪಾಕಿಸ್ತಾನದ ದ್ವಂದ್ವ ನೀತಿಯನ್ನು ಬಹಿರಂಗಪಡಿಸುತ್ತದೆ.
ಮಾನವೀಯ ನೆರವಿನ ಸೋಗಿನಲ್ಲಿ ದೇಣಿಗೆ ಸಂಗ್ರಹ
ಆರ್ಥಿಕ ಸಂಪನ್ಮೂಲ ಕ್ರೋಡೀಕರಿಸಲು, ಲಷ್ಕರ್ ಸಂಘಟನೆಯು ಪ್ರವಾಹ ಪರಿಹಾರ ಕಾರ್ಯಾಚರಣೆಗಳ ಹೆಸರಿನಲ್ಲಿ ದೇಣಿಗೆ ಸಂಗ್ರಹ ಅಭಿಯಾನವನ್ನು ಪ್ರಾರಂಭಿಸಿದೆ. ಪಾಕಿಸ್ತಾನಿ ರೇಂಜರ್ಗಳ ಬೆಂಬಲದೊಂದಿಗೆ ಸಂಘಟನೆಯ ಕಾರ್ಯಕರ್ತರು ಪರಿಹಾರ ಸಾಮಗ್ರಿಗಳನ್ನು ವಿತರಿಸುವಂತೆ ಫೋಟೋಗಳನ್ನು ತೆಗೆಸಿಕೊಂಡು, ಸಂಗ್ರಹವಾದ ಹೆಚ್ಚಿನ ದೇಣಿಗೆಯನ್ನು ಮುರಿದ್ಕೆ ಕೇಂದ್ರದ ಪುನರ್ನಿರ್ಮಾಣಕ್ಕೆ ಬಳಸಿಕೊಳ್ಳುತ್ತಿದ್ದಾರೆ. 2005ರ ಭೂಕಂಪದ ನಂತರವೂ ಇದೇ ರೀತಿ ಮಾನವೀಯ ನೆರವಿನ ಹೆಸರಿನಲ್ಲಿ ಸಂಗ್ರಹಿಸಿದ ಹಣದ ಶೇ. 80ರಷ್ಟನ್ನು ಭಯೋತ್ಪಾದಕ ಮೂಲಸೌಕರ್ಯಗಳಿಗೆ ಬಳಸಲಾಗಿತ್ತು.
ಪರೋಕ್ಷ ಯುದ್ಧದ ಮುಂದುವರಿಕೆ
‘ಆಪರೇಷನ್ ಸಿಂದೂರ’ದ ಯಶಸ್ಸಿನ ಹೊರತಾಗಿಯೂ, ಎಲ್ಇಟಿಯ ತ್ವರಿತ ಪುನಶ್ಚೇತನವು ಅದರ ಸ್ಥಿತಿಸ್ಥಾಪಕತ್ವವನ್ನು ತೋರಿಸುತ್ತದೆ. ದಿ ರೆಸಿಸ್ಟೆನ್ಸ್ ಫ್ರಂಟ್ (ಟಿಆರ್ಎಫ್), ಪೀಪಲ್ಸ್ ಆ್ಯಂಟಿ-ಫ್ಯಾಸಿಸ್ಟ್ ಫ್ರಂಟ್ (ಪಿಎಎಫ್ಎಫ್) ನಂತಹ ತನ್ನ ಪ್ರಾಕ್ಸಿ ಸಂಘಟನೆಗಳ ಮೂಲಕ ಪಾಕಿಸ್ತಾನವು ಭಾರತದ ವಿರುದ್ಧ ತನ್ನ ಪರೋಕ್ಷ ಯುದ್ಧವನ್ನು ಮುಂದುವರಿಸಿದೆ ಎನ್ನುವುದನ್ನು ಇದು ತೋರಿಸುತ್ತದೆ. ಮುರಿದ್ಕೆಯ ಈ ಪ್ರಕರಣವು ಪಾಕಿಸ್ತಾನದ ಸರ್ಕಾರಿ ವ್ಯವಸ್ಥೆ ಮತ್ತು ಭಯೋತ್ಪಾದಕ ಸಂಘಟನೆಗಳ ನಡುವಿನ ಆಳವಾದ ಸಂಬಂಧವನ್ನು ಮತ್ತೊಮ್ಮೆ ಜಗಜ್ಜಾಹೀರಾಗಿಸಿದೆ.
