ಲಂಡನ್: ಇಂಗ್ಲೆಂಡ್ ಮತ್ತು ಭಾರತ ನಡುವೆ ನಡೆದ ಆಂಡರ್ಸನ್-ತೆಂಡೂಲ್ಕರ್ ಟ್ರೋಫಿಯ ಲಾರ್ಡ್ಸ್ ಟೆಸ್ಟ್‌ನಲ್ಲಿ ಧರಿಸಿದ್ದ ಮತ್ತು ಸಹಿ ಮಾಡಿದ್ದ ಭಾರತೀಯ ಆಟಗಾರ ಶುಭಮನ್ ಗಿಲ್ ಅವರ ಜೆರ್ಸಿ, ‘ರೆಡ್ ಫಾರ್ ರೂತ್’ ಚಾರಿಟಿ ಹರಾಜಿನಲ್ಲಿ 5.41 ಲಕ್ಷ ರೂಪಾಯಿ ಮಾರಾಟವಾಗಿದೆ. ಈ ಹರಾಜಿನಲ್ಲಿ ಎರಡೂ ತಂಡಗಳ ಆಟಗಾರರ ಜೆರ್ಸಿಗಳು, ಕ್ಯಾಪ್‌ಗಳು ಮತ್ತು ಬ್ಯಾಟ್‌ಗಳು ಸೇರಿದಂತೆ ಹಲವು ವಸ್ತುಗಳನ್ನು ಇಡಲಾಗಿತ್ತು. ಈ ಪೈಕಿ ಗಿಲ್ ಜೆರ್ಸಿ ಅತ್ಯಂತ ದುಬಾರಿ ಬೆಲೆಗೆ ಮಾರಾಟವಾದ ವಸ್ತುವಾಗಿದೆ.
‘ರೆಡ್ ಫಾರ್ ರೂತ್’ ಚಾರಿಟಿ ಫೌಂಡೇಶನ್ ಅನ್ನು ಇಂಗ್ಲೆಂಡ್ ಕ್ರಿಕೆಟ್ ತಂಡದ ಮಾಜಿ ನಾಯಕ ಆಂಡ್ರ್ಯೂ ಸ್ಟ್ರಾಸ್ ಸ್ಥಾಪಿಸಿದ್ದಾರೆ. ಕ್ಯಾನ್ಸರ್‌ನಿಂದ ನಿಧನರಾದ ತಮ್ಮ ಪತ್ನಿ ರೂತ್ ಸ್ಟ್ರಾಸ್ ಅವರ ಸ್ಮರಣಾರ್ಥವಾಗಿ ಪ್ರತಿ ವರ್ಷ ಲಾರ್ಡ್ಸ್‌ನಲ್ಲಿ ಈ ಹರಾಜನ್ನು ಆಯೋಜಿಸಲಾಗುತ್ತದೆ. ಹರಾಜಿನಿಂದ ಸಂಗ್ರಹವಾದ ಹಣವನ್ನು ಕ್ಯಾನ್ಸರ್ ಜಾಗೃತಿ ಮತ್ತು ಚಿಕಿತ್ಸೆಗಾಗಿ ಬಳಸಲಾಗುತ್ತದೆ. ಕಳೆದ ಆರು ವರ್ಷಗಳಲ್ಲಿ ಈ ಫೌಂಡೇಶನ್ ಸುಮಾರು 3,500 ಕುಟುಂಬಗಳಿಗೆ ಸಹಾಯ ಮಾಡಿದೆ ಮತ್ತು ಸಾವಿರಕ್ಕೂ ಹೆಚ್ಚು ವೃತ್ತಿಪರರಿಗೆ ತರಬೇತಿ ನೀಡಿದೆ ಎಂದು ಫೌಂಡೇಶನ್ ತಿಳಿಸಿದೆ.
ಇತರೆ ಆಟಗಾರರ ವಸ್ತುಗಳ ಬೆಲೆಗಳು
ಶುಭಮನ್ ಗಿಲ್ ಅವರ ಜೆರ್ಸಿಯಷ್ಟೇ ಅಲ್ಲದೆ, ಇತರ ಪ್ರಮುಖ ಆಟಗಾರರ ವಸ್ತುಗಳಿಗೂ ಭಾರಿ ಬೇಡಿಕೆ ವ್ಯಕ್ತವಾಯಿತು. ಅವುಗಳ ಬೆಲೆಗಳ ವಿವರ ಹೀಗಿದೆ:
- ಜಸ್‌ಪ್ರಿತ್ ಬುಮ್ರಾ ಜೆರ್ಸಿ: 4.94 ಲಕ್ಷ ರೂಪಾಯಿ
- ರವೀಂದ್ರ ಜಡೇಜಾ ಜೆರ್ಸಿ: 4.94 ಲಕ್ಷ ರೂಪಾಯಿ
- ಬೆನ್ ಸ್ಟೋಕ್ಸ್ ಜೆರ್ಸಿ: 4 ಲಕ್ಷ ರೂಪಾಯಿ
- ಜೋ ರೂಟ್ ಸಹಿ ಹಾಕಿದ ಕ್ಯಾಪ್: 3.52 ಲಕ್ಷ ರೂಪಾಯಿ
- ರಿಷಭ್ ಪಂತ್ ಕ್ಯಾಪ್: 1.76 ಲಕ್ಷ ರೂಪಾಯಿ
ರೋಚಕವಾಗಿ ಅಂತ್ಯಗೊಂಡ ಆಂಡರ್ಸನ್-ತೆಂಡೂಲ್ಕರ್ ಸರಣಿ
ಈ ಬಾರಿಯ ಆಂಡರ್ಸನ್-ತೆಂಡೂಲ್ಕರ್ ಸರಣಿ ಅತ್ಯಂತ ರೋಚಕವಾಗಿ ಕೊನೆಗೊಂಡಿತು. ಕುತೂಹಲ, ಹೋರಾಟ, ವಿವಾದಗಳು ಮತ್ತು ನಾಟಕೀಯ ಬೆಳವಣಿಗೆಗಳಿಗೆ ಸಾಕ್ಷಿಯಾದ ಈ ಸರಣಿ ಕೋಟ್ಯಂತರ ಕ್ರಿಕೆಟ್ ಅಭಿಮಾನಿಗಳನ್ನು ತುದಿಗಾಲಲ್ಲಿ ನಿಲ್ಲಿಸಿತ್ತು. ವಿಶೇಷವಾಗಿ, 5ನೇ ಪಂದ್ಯ ಥ್ರಿಲ್ಲರ್ ಕ್ಲೈಮ್ಯಾಕ್ಸ್‌ನಿಂದ ಕೂಡಿತ್ತು. ಪಂದ್ಯದ ಕೊನೆಯ ದಿನ ಇಂಗ್ಲೆಂಡ್‌ಗೆ ಗೆಲುವಿಗೆ 35 ರನ್‌ಗಳ ಅಗತ್ಯವಿದ್ದಾಗ, ಭಾರತಕ್ಕೆ ಸರಣಿ ಸಮಬಲಗೊಳಿಸಲು 4 ವಿಕೆಟ್‌ಗಳ ಅಗತ್ಯವಿತ್ತು. ಅಂತಿಮವಾಗಿ, ಭಾರತೀಯ ವೇಗಿಗಳು ಕರಾರುವಾಕ್ ಬೌಲಿಂಗ್ ದಾಳಿ ನಡೆಸಿ 6 ರನ್‌ಗಳ ರೋಚಕ ಜಯಭೇರಿ ಬಾರಿಸಿದರು. ಇದರೊಂದಿಗೆ 5 ಪಂದ್ಯಗಳ ಸರಣಿಯು 2-2ರಲ್ಲಿ ಸಮಬಲಗೊಂಡಿತು.
