ಟ್ರಂಪ್ ಸುಂಕದಿಂದ ಸೆನ್ಸೆಕ್ಸ್, ನಿಫ್ಟಿ ಕುಸಿತ: ಹೂಡಿಕೆದಾರರಿಗೆ ಆತಂಕ

ನವದೆಹಲಿ: ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರು ಭಾರತದ ಉತ್ಪನ್ನಗಳ ಮೇಲೆ ಹೆಚ್ಚುವರಿ ಸುಂಕವನ್ನು ಘೋಷಿಸಿರುವುದು ಭಾರತದ ಷೇರು ಮಾರುಕಟ್ಟೆಗಳ ಮೇಲೆ ದುಷ್ಪರಿಣಾಮ ಬೀರತೊಡಗಿದೆ. ಗುರುವಾರ ಮುಂಬೈ ಷೇರುಪೇಟೆ ಭಾರೀ ಕುಸಿತದೊಂದಿಗೆ ವಹಿವಾಟು ಆರಂಭಿಸಿದೆ. ಸೆನ್ಸೆಕ್ಸ್ ಮತ್ತು ನಿಫ್ಟಿ ತೀವ್ರ ಏರಿಳಿತಗಳಿಗೆ ಒಳಗಾಗಿ, ಹೂಡಿಕೆದಾರರಲ್ಲಿ ಆತಂಕ ಮೂಡಿಸಿದೆ.

ಭಾರತವು ರಷ್ಯಾದಿಂದ ತೈಲ ಆಮದು ಮಾಡಿಕೊಳ್ಳುತ್ತಿರುವುದನ್ನು ಸಹಿಸದ ಟ್ರಂಪ್ ಭಾರತದ ಮೇಲೆ ಸುಂಕ ಪ್ರಹಾರ ನಡೆಸುತ್ತಿದ್ದಾರೆ. ಸುಂಕವನ್ನು ಶೇ.50ಕ್ಕೇರಿಸಿ ಹೊಸ ಆದೇಶವನ್ನೂ ಹೊರಡಿಸಿದ್ದಾರೆ. ಇದರ ಪರಿಣಾಮವಾಗಿ, ಗುರುವಾರ ಸೆನ್ಸೆಕ್ಸ್ ಸುಮಾರು 250 ಅಂಕಗಳಷ್ಟು ಕುಸಿತದೊಂದಿಗೆ ವಹಿವಾಟು ಆರಂಭಿಸಿದೆ. ಬೆಳಿಗ್ಗೆ 9:22 ರ ವೇಳೆಗೆ, ಇದು 131.05 ಅಂಕಗಳ ಕುಸಿತದೊಂದಿಗೆ 80,412.94 ಕ್ಕೆ ತಲುಪಿತು. ಇತ್ತ, ನಿಫ್ಟಿ 50 ಕೂಡ 67.25 ಅಂಕಗಳಷ್ಟು ಕುಸಿದು 24,506.95ಕ್ಕೆ ಇಳಿಯಿತು. ಮಾರುಕಟ್ಟೆಯ ಆರಂಭಿಕ ಗಂಟೆಗಳಲ್ಲಿ ಭಾರೀ ಏರಿಳಿತಗಳು ಕಂಡುಬಂದವು, ಇದು ದಿನದ ಉಳಿದ ಅವಧಿಯಲ್ಲೂ ಮಾರುಕಟ್ಟೆ ಅಸ್ಥಿರವಾಗಿರಬಹುದೆಂಬ ಸೂಚನೆ ನೀಡಿದೆ.

ತಜ್ಞರ ಅಭಿಪ್ರಾಯವೇನು
ಜಿಯೋಜಿತ್ ಫೈನಾನ್ಶಿಯಲ್ ಸರ್ವಿಸಸ್‌ನ ಮುಖ್ಯ ಹೂಡಿಕೆ ತಂತ್ರಜ್ಞರಾದ ಡಾ. ವಿ.ಕೆ. ವಿಜಯಕುಮಾರ್ ಅವರು ಈ ಕುರಿತು ಪ್ರತಿಕ್ರಿಯಿಸಿ, ಹೆಚ್ಚುವರಿ ಶೇಕಡಾ 25ರಷ್ಟು ಸುಂಕ ಜಾರಿಗೆ ಬರಲು 21 ದಿನಗಳ ಕಾಲಾವಕಾಶ ಇರುವುದರಿಂದ, ಈ ಅವಧಿಯಲ್ಲಿ ರಾಜತಾಂತ್ರಿಕ ಮಾತುಕತೆ ಮತ್ತು ಅಂತಿಮ ಒಪ್ಪಂದಕ್ಕೆ ಅವಕಾಶವಿದೆ. ಆದರೆ, ಉಭಯ ರಾಷ್ಟ್ರಗಳು ಎಷ್ಟು ಮಟ್ಟಿಗೆ ರಾಜಿಗೆ ಸಿದ್ಧವಾಗುತ್ತವೆ ಎಂಬುದು ಅನಿಶ್ಚಿತವಾಗಿದೆ ಎಂದಿದ್ದಾರೆ.

ಟ್ರಂಪ್ ಅವರು ಈ ಹಿಂದೆ ಇತರ ಪ್ರಮುಖ ವ್ಯಾಪಾರ ಪಾಲುದಾರರಿಂದ ರಿಯಾಯಿತಿಗಳನ್ನು ಪಡೆದಿರುವ ಕಾರಣ, ತಮ್ಮ ನಿಲುವಿನಿಂದ ಹಿಂದೆ ಸರಿಯುವ ಸಾಧ್ಯತೆ ಕಡಿಮೆ ಎಂದು ವಿಜಯಕುಮಾರ್ ಅಭಿಪ್ರಾಯಪಟ್ಟಿದ್ದಾರೆ. ಜೊತೆಗೆ ಅಮೆರಿಕದ ನಿರ್ಧಾರಕ್ಕೆ ಭಾರತದ ಪ್ರತಿಕ್ರಿಯೆ ಪ್ರಬುದ್ಧವಾಗಿದೆ ಎಂದಿದ್ದಾರೆ. ಈ ಪರಿಸ್ಥಿತಿಯಿಂದಾಗಿ, ಅಲ್ಪಾವಧಿಗೆ ರಫ್ತು ಆಧಾರಿತ ವಲಯಗಳು ದುರ್ಬಲಗೊಳ್ಳುವ ಸಾಧ್ಯತೆ ಇದೆ. ಆದರೂ, ಬ್ಯಾಂಕಿಂಗ್, ಹಣಕಾಸು, ಟೆಲಿಕಾಂ, ಹೋಟೆಲ್, ಸಿಮೆಂಟ್, ಬಂಡವಾಳ ಸರಕುಗಳು ಮತ್ತು ಆಟೋಮೊಬೈಲ್‌ನಂತಹ ದೇಶೀಯ ಬೇಡಿಕೆ ಆಧಾರಿತ ವಲಯಗಳು ಸ್ಥಿರವಾಗಿರಬಹುದು ಎಂದು ಅವರು ತಿಳಿಸಿದ್ದಾರೆ.

ಸ್ವಸ್ತಿಕ ಇನ್ವೆಸ್ಟ್‌ಮಾರ್ಟ್‌ನ ಸಂಶೋಧನಾ ಮುಖ್ಯಸ್ಥ ಸಂತೋಷ್ ಮೀನಾ ಕೂಡ ಇದೇ ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ. ಟ್ರಂಪ್ ಈ ಹಿಂದೆ ಇಂತಹ ಸುಳಿವುಗಳನ್ನು ನೀಡಿದ್ದರಿಂದ, ಮಾರುಕಟ್ಟೆಗಳು ಈ ಬೆಳವಣಿಗೆಯನ್ನು ನಿರೀಕ್ಷಿಸಿದ್ದವು. ಆದ್ದರಿಂದ, ಇದು ಹೊಸ ನಕಾರಾತ್ಮಕ ಅಚ್ಚರಿಯೇನಲ್ಲ ಎಂದಿದ್ದಾರೆ. ಸುಂಕ ಜಾರಿಗೆ 20 ದಿನಗಳ ಅಂತರ ಇರುವುದು ಮತ್ತು ಆಗಸ್ಟ್ 24 ರಂದು ಅಮೆರಿಕದ ವ್ಯಾಪಾರ ನಿಯೋಗ ಭಾರತಕ್ಕೆ ಭೇಟಿ ನೀಡುವ ಯೋಜನೆ ಇರುವುದು, ರಾಜತಾಂತ್ರಿಕ ಮಾತುಕತೆಗೆ ಅವಕಾಶ ತೆರೆದಿದೆ ಎಂದು ಅವರು ಹೇಳಿದರು.

ಭಾರತದ ಆರ್ಥಿಕತೆಯು ಹೆಚ್ಚಾಗಿ ದೇಶೀಯ ಬಳಕೆ ಆಧಾರಿತವಾಗಿರುವುದರಿಂದ ಅಮೆರಿಕದ ನೇರ ಪ್ರಭಾವ ಸೀಮಿತವಾಗಿದೆ ಎಂದು ಅವರು ಹೇಳಿದ್ದಾರೆ. ಆದರೆ, ಜವಳಿ, ರತ್ನ ಮತ್ತು ಆಭರಣ ಹಾಗೂ ಚರ್ಮದ ಉತ್ಪನ್ನಗಳ ವಲಯಗಳು ಅಲ್ಪಾವಧಿಗೆ ಒತ್ತಡ ಎದುರಿಸಬಹುದು.

ಹೂಡಿಕೆದಾರರಿಗೆ ಸಲಹೆ ಏನು?
ಅಲ್ಪಾವಧಿಯ ವ್ಯಾಪಾರಿಗಳಿಗೆ ಎಚ್ಚರಿಕೆ: ಅಲ್ಪಾವಧಿಯ ಹೂಡಿಕೆದಾರರು ಎಚ್ಚರಿಕೆಯಿಂದ ಇರುವುದು ಉತ್ತಮ ಎಂದು ತಜ್ಞರು ಸಲಹೆ ನೀಡಿದ್ದಾರೆ. ಮೊದಲ ತ್ರೈಮಾಸಿಕದಲ್ಲಿನ ಕಳಪೆ ಸಾಧನೆಗಳು, ಹೆಚ್ಚಿದ ಮೌಲ್ಯಮಾಪನ ಮತ್ತು ಜಾಗತಿಕ ವ್ಯಾಪಾರ ಉದ್ವಿಗ್ನತೆಗಳು ಅಲ್ಪಾವಧಿಯ ದೃಷ್ಟಿಕೋನವನ್ನು ಅನಿಶ್ಚಿತವಾಗಿಸಿದೆ. ಆದ್ದರಿಂದ, ಹೂಡಿಕೆದಾರರು ರಕ್ಷಣಾತ್ಮಕ ಮತ್ತು ಆಯ್ದ ವಿಧಾನವನ್ನು ಅನುಸರಿಸಬೇಕು ಎಂದು ಸಂತೋಷ್ ಮೀನಾ ಸಲಹೆ ನೀಡಿದ್ದಾರೆ.

ದೀರ್ಘಾವಧಿಯ ಹೂಡಿಕೆದಾರರಿಗೆ ಅವಕಾಶ: ದೀರ್ಘಾವಧಿಯ ಹೂಡಿಕೆದಾರರು ತಮ್ಮ ಹೂಡಿಕೆಯನ್ನು ಮುಂದುವರಿಸಲು ಮೀನಾ ಸಲಹೆ ನೀಡಿದ್ದಾರೆ. ಯಾವುದೇ ತೀವ್ರ ಕುಸಿತವು ಖರೀದಿಗೆ ಉತ್ತಮ ಅವಕಾಶವಾಗಬಹುದು ಮತ್ತು ಮುಂದಿನ ತ್ರೈಮಾಸಿಕದಿಂದ ಗಳಿಕೆ ವೇಗವನ್ನು ಪಡೆದುಕೊಳ್ಳಬಹುದು ಎಂದು ಅವರು ವಿಶ್ವಾಸ ವ್ಯಕ್ತಪಡಿಸಿದ್ದಾರೆ.