ಬೆಂಗಳೂರು: ಯುಪಿಐ ಗ್ರಾಹಕರಿಗೆ ಹೊಸ ಸಿಹಿ ಸುದ್ದಿ ಸಿಕ್ಕಿದೆ. ನ್ಯಾಷನಲ್ ಪೇಮೆಂಟ್ಸ್ ಕಾರ್ಪೊರೇಶನ್ ಸಂಸ್ಥೆ (ಎನ್ ಪಿ ಸಿ ಐ)ಯು ಯುಪಿಐ ಟ್ರಾನ್ಸಾಕ್ಷನ್ಸ್ ಸಂಬಂಧ ಮಂಗಳವಾರದಿಂದಲೇ (ಜುಲೈ 15) ಹೊಸ ಚಾರ್ಜ್ ಬ್ಯಾಕ್ ನಿಯಮಗಳನ್ನು ಜಾರಿಗೆ ತರುತ್ತಿದೆ. ಈಗ ಗ್ರಾಹಕರಿಗೆ ಪಾವತಿ ಸಂಬಂಧದ ಸಮಸ್ಯೆಗಳಿಗೆ ಕ್ಷಿಪ್ರವಾಗಿ ಪರಿಹಾರ ಸಿಗುತ್ತದೆ. ಯುಪಿಐ ಮೂಲಕ ಹಣ ಕಳುಹಿಸಿದಾಗ ಬ್ಯಾಂಕ್ ಅಕೌಂಟ್ ನಿಂದ ಹಣ ಕಟ್ ಆಗಿಯೂ ವಹಿವಾಟು ವಿಫಲವಾದ ಪ್ರಕರಣಗಳಿಗೆ ಸಂಬಂಧಿಸಿದ ನಿಯಮ ಇದಾಗಿದೆ. ಇದರಿಂದ ಯಾವ ರೀತಿ ಗ್ರಾಹಕರಿಗೆ ಅನುಕೂಲವಾಗಲಿದೆ ಎಂಬುದರ ಮಾಹಿತಿ ಇಲ್ಲಿದೆ.
ಹೊಸ ನಿಯಮದ ಪ್ರಕಾರ, ಯುಪಿಐ ಬಳಕೆದಾರರು ಇನ್ನೊಬ್ಬ ವ್ಯಕ್ತಿಗೆ ಅಥವಾ ಸಂಸ್ಥೆಗೆ ಹಣ ಕಳುಹಿಸಿದಾಗ, ಬ್ಯಾಂಕ್ ಅಕೌಂಟ್ ನಿಂದ ಹಣ ಕಡಿತಗೊಂಡರೂ ತಲುಪಬೇಕಾದವರಿಗೆ ಆ ಹಣ ತಲುಪದೇ ಹೋಗುವ ಸಾಧ್ಯತೆಗಳು ಇರುತ್ತವೆ. ಟ್ರಾನ್ಸಾಕ್ಷನ್ ಫೇಲ್ಡ್ ಎಂದು ಹೇಳಿದರೂ, ಹಣ ಕಡಿತವಾಗುವ ಪ್ರಕರಣಗಳು ಸುದ್ದಿಯಾಗುತ್ತವೆ. ಹಾಗಾಗಿ, ಹೊಸ ನಿಯಮಗಳ ಪ್ರಕಾರ, ಬ್ಯಾಂಕ್ ಖಾತೆಯಿಂದ ಕಡಿತಗೊಂಡ ಹಣವನ್ನು ರಿಫಂಡ್ ಮಾಡುವಂತೆ ಚಾರ್ಜ್ ಬ್ಯಾಕ್ ರಿಕ್ವೆಸ್ಟ್ ಮೂಲಕ ಮನವಿ ಸಲ್ಲಿಸಬಹುದು. ಇದರಿಂದ ಬೇಗನೆ ಹಣ ರಿಫಂಡ್ ಆಗುತ್ತದೆ.
ಒಂದೆರಡು ದಿನದಲ್ಲೇ ರಿಫಂಡ್
ಇದಕ್ಕೂ ಮೊದಲು ಗ್ರಾಹಕರು, ಚಾರ್ಜ್ ಬ್ಯಾಕ್ ರಿಕ್ವೆಸ್ಟ್ ಕಳುಹಿಸಿದಾಗ ಅದಕ್ಕೆ ಪರಿಹಾರ ಸಿಗಲು ಐದಾರು ದಿನಗಳಾಗುತ್ತಿದ್ದುವು. ಈಗ ಒಂದು ಅಥವಾ ಎರಡು ದಿನದೊಳಗೆ ಪರಿಹಾರ ಸಿಗುವಂತೆ ನಿಯಮ ಮಾಡಲಾಗಿದೆ. ಚಾರ್ಜ್ ಬ್ಯಾಕ್ ರಿಕ್ವೆಸ್ಟ್ ಬಂದಾಗ ಬ್ಯಾಂಕುಗಳು ಈ ಮೊದಲು ಯುಪಿಐ ರೆಫರೆನ್ಸ್ ಕಂಪ್ಲೇಂಟ್ ಸಿಸ್ಟಂ ಮೂಲಕ ವೈಟ್ ಲಿಸ್ಟ್ ಮಾಡುವಂತೆ ಎನ್ ಪಿಸಿಐಗೆ ಮನವಿ ಮಾಡಬೇಕಿತ್ತು. ಒಟ್ಟಾರೆ ಪ್ರಕ್ರಿಯೆಯಲ್ಲಿ ಈ ಕ್ರಮವನ್ನು ಕೈಬಿಡಲಾಗುತ್ತಿದೆ. ಬ್ಯಾಂಕುಗಳು ನೇರವಾಗಿ ಇದನ್ನು ನಿರ್ವಹಿಸಲು ಸ್ವತಂತ್ರವಾಗಿರುತ್ತವೆ ಇದು ಗ್ರಾಹಕರಿಗೆ ಅನುಕೂಲಕರವಾಗಿದೆ.
ಒಬ್ಬ ವ್ಯಕ್ತಿಗೆ ಹಣ ಕಳುಹಿಸುವುದು ವಿಫಲವಾದಾಗ ರಿಫಂಡ್ ಪಡೆಯಲು ಬ್ಯಾಂಕುಗಳಿಗೆ ಒಂದು ದಿನ ಕಾಲಾವಕಾಶ ಕೊಡಲಾಗುತ್ತದೆ. ಇವತ್ತು ನೀವು ದೂರು ಕೊಟ್ಟರೆ ನಾಳೆಯೊಳಗೆ ಈ ಸಮಸ್ಯೆ ಬಗೆಹರಿಯಬೇಕು. ವ್ಯಾಪಾರಿಗಳಿಗೆ ಮಾಡಿದ ಪಾವತಿ ವಿಫಲವಾದಾಗ ರಿಫಂಡ್ ಕೊಡಲು ಎರಡು ದಿನ ಕಾಲಾವಕಾಶ ಕೊಡಲಾಗುತ್ತದೆ. ಜುಲೈ 15ರಿಂದಲೇ ಹೊಸ ನಿಯಮ ಜಾರಿಗೆ ಬಂದಿದೆ.
