ಉಳಿಸಿದ ಹಣವನ್ನೋ, ಚಿನ್ನ ಮಾರಾಟ ಮಾಡಿಯೋ, ಪಿಎಫ್ ಮೊತ್ತವನ್ನೋ ವಿತ್ ಡ್ರಾ ಮಾಡಿ ಮನೆ ಖರಿದಿಸಿರುತ್ತೇವೆ. ಬ್ಯಾಂಕಿನಲ್ಲಿ ಸಾಲ ಪಡೆದು ಮನೆ ಕಟ್ಟಿಸಿರುತ್ತೇವೆ ಅಥವಾ ಅಪಾರ್ಟ್ ಮೆಂಟ್ ಖರೀದಿ ಮಾಡಿರುತ್ತೇವೆ. ಆದರೆ, ಜೀವನದ ಉಳಿದ ಭಾಗದ 20 ವರ್ಷದವರೆಗೆ ನಾವು ಪ್ರತಿ ತಿಂಗಳು ಇಎಂಐ ಕಟ್ಟಬೇಕಾದ ಅನಿವಾರ್ಯಕ್ಕೆ ಸಿಲುಕುತ್ತೇವೆ. ಪ್ರತಿ ತಿಂಗಳು ಇಎಂಐಗೆ ಹಣ ಹೊಂದಿಸುವ ಲೆಕ್ಕಾಚಾರ ಕಾಡುತ್ತದೆ. ಆದರೆ, 20 ವರ್ಷದ ಸಾಲವನ್ನ ಹತ್ತೇ ವರ್ಷಕ್ಕೆ ತೀರಿಸಲು ಸ್ಮಾರ್ಟ್ ದಾರಿಯೊಂದಿದೆ. ಹಾಗಾದ್ರೆ ಆ ದಾರಿ ಯಾವ್ದು? ಇಲ್ಲಿದೆ ನೋಡಿ ಮಾಹಿತಿ.
50 ಲಕ್ಷ ರೂ. ಮನೆ ಸಾಲ, 20 ವರ್ಷ ಅವಧಿ
ಪ್ರತಿ ತಿಂಗಳೂ ಇಎಂಐ ಕಟ್ಟೋ ಹೊಣೆ
ಆದ್ರೆ, ಸ್ಮಾರ್ಟ್ ಯೋಜನೆ ಮೂಲಕ ದುಡ್ಡು ಉಳಿಸಿ
ಸಾಮಾನ್ಯವಾಗಿ ಹೆಚ್ಚಿನ ಜನ ಅಪಾರ್ಟ್ ಮೆಂಟ್ ಖರೀದಿಗೆ 20 ವರ್ಷದ ಅವಧಿಗಾಗಿ ಸಾಲ ಪಡೆಯುತ್ತಾರೆ. 50 ಲಕ್ಷ ರೂಪಾಯಿ ಸಾಲವನ್ನು 20 ವರ್ಷಗಳವರೆಗೆ ಇಎಂಐ ಪಾವತಿಸುತ್ತ ಹೋಗುತ್ತಾರೆ. ಆದ್ರೆ, ನಾವು ಕಟ್ಟುವ ಇಎಂಐ ಮಾದರಿಯಲ್ಲೇ ಸ್ವಲ್ಪ ಸ್ಮಾರ್ಟ್ ಆದರೆ ಸಾಕು, 5-10 ವರ್ಷಗಳವರೆಗೆ ಸಾಲದ ಅವಧಿಯನ್ನು ಕಡಿಮೆ ಮಾಡಬಹುದಾಗಿದೆ.
50 ಲಕ್ಷ ಸಾಲಕ್ಕೆ 48 ಲಕ್ಷ ಬಡ್ಡಿಯೇ ಆಗತ್ತೆ
20 ವರ್ಷಗಳಲ್ಲಿ ಕಟ್ಟುವ ಬಡ್ಡಿಯೇ 48 ಲಕ್ಷ ರೂ.
ಹಾಗಾಗಿ, ಪ್ರತಿ ವರ್ಷ ಇಎಂಐ ಹೆಚ್ಚಳ ಅತ್ಯವಶ್ಯಕ
ಸುಮ್ಮನೆ ಲೆಕ್ಕಾಚಾರ ಹಾಕಿ ನೋಡಿದರೆ, 20 ವರ್ಷಗಳವರೆಗೆ ಇಎಂಐ ಕಟ್ಟಿದರೆ, 50 ಲಕ್ಷ ರೂ. ಸಾಲಕ್ಕೆ 48 ಲಕ್ಷ ರೂ. ಬಡ್ಡಿಯೇ ಆಗುತ್ತದೆ. ಅಲ್ಲಿಗೆ, ನಾವು ಸಾಲದ ಮೊತ್ತದಷ್ಟೇ ಬಡ್ಡಿ ಕಟ್ಟಿದಂತಾಗುತ್ತದೆ. ಆದರೆ, ಪ್ರತಿ ತಿಂಗಳು ಕಟ್ಟುವ ಇಎಂಐ ಮೊತ್ತದಲ್ಲಿ ವರ್ಷಕ್ಕೆ ಶೇ.5ರಿಂದ ಶೇ.10ರಷ್ಟು ಹೆಚ್ಚಳ ಮಾಡುತ್ತ ಹೋದರೆ, ನೀವು ಕೇವಲ ಹತ್ತೇ ವರ್ಷದಲ್ಲಿ ಸಾಲದ ಹೊರೆಯಿಂದ ಮುಕ್ತರಾಗಬಹುದಾಗಿದೆ. ಇದರಿಂದ ಸಮಯ ಉಳಿಯುವ ಜತೆಗೆ ಲಕ್ಷಾಂತರ ರೂಪಾಯಿ ಉಳಿಸಬಹುದಾಗಿದೆ.
20 ವರ್ಷಕ್ಕೆ 220 ಇಎಂಐ ಕಟ್ಟಬೇಕು
ಆದ್ರೆ, ವರ್ಷಕ್ಕೆ ಶೇ.5ರಷ್ಟು ಏರಿಕೆ ಮಾಡಿ
12-13 ವರ್ಷದಲ್ಲೇ ಸಾಲ ತೀರತ್ತೆ ನೋಡಿ
ಉದಾಹರಣೆಗೆ, ನೀವು ಶೇ.8.5ರಷ್ಟು ಬಡ್ಡಿದರದೊಂದಿಗೆ 50 ಲಕ್ಷ ರೂಪಾಯಿ ಸಾಲ ಪಡೆದಿದ್ದೀರಿ. 20 ವರ್ಷಗಳ ಸಾಲ ಪಡೆದುಕೊಂಡಿದ್ದೀರಿ ಎಂದಿಟ್ಟುಕೊಳ್ಳಿ. ನೀವು ಪ್ರತಿ ವರ್ಷ ಶೇ.5ರಷ್ಟು ಇಎಂಐಯನ್ನು ಹೆಚ್ಚಿಸುತ್ತ ಹೋದರೆ, ನೀವು 80 ಇಎಂಐಗಳನ್ನು ಉಳಿಸುತ್ತೀರಿ. 6-7 ವರ್ಷ ಕಡಿಮೆ ಅವಧಿಯಲ್ಲೇ ಸಾಲ ತೀರಿಸುತ್ತೀರಿ. ಇದರಿಂದ ನಿಮಗೆ 16 ಲಕ್ಷ ರೂಪಾಯಿ ಉಳಿಯುತ್ತದೆ ಎಂಬುದು ಗಮನಾರ್ಹ ಸಂಗತಿಯಾಗಿದೆ.
ಪ್ರತಿ ವರ್ಷ ಶೇ.10ರಷ್ಟು ಇಎಂಐ ಹೆಚ್ಚಿಸಿ
ಕೇವಲ 10 ವರ್ಷದಲ್ಲಿ ಸಾಲದಿಂದ ಮುಕ್ತಿ ಹೊಂದಿ
ಅಲ್ಲದೆ, ಬರೋಬ್ಬರಿ 22 ಲಕ್ಷ ರೂ. ಉಳಿಸಿ
ನಿಮ್ಮ ಆದಾಯ ಜಾಸ್ತಿಯಾಗುತ್ತಿದೆ, ಆಫೀಸಿನಲ್ಲಿ ಒಳ್ಳೆಯ ಇನ್ ಕ್ರಿಮೆಂಟ್ ಸಿಗುತ್ತಿದೆ ಅಂದ್ರೆ, ಪ್ರತಿ ವರ್ಷ ಇಎಂಐ ಮೊತ್ತದಲ್ಲಿ ಶೇ.10ರಷ್ಟು ಹೆಚ್ಚಿಸಬೇಕು. ಉದಾಹರಣೆಗೆ ನೀವು, ಪ್ರತಿ ತಿಂಗಳು 25 ಸಾವಿರ ರೂ. ಇಎಂಐ ಕಟ್ಟುತ್ತಿದ್ದರೆ, ಮುಂದಿನ ವರ್ಷದಿಂದ 27,500 ರೂ. ಇಎಂಐ ಕಟ್ಟಬೇಕು. ಆಗ, ಕೇವಲ 10 ವರ್ಷದಲ್ಲಿಯೇ ನಿಮ್ಮ ಸಾಲ ಮುಗಿಯುತ್ತದೆ. ಇದರಿಂದ 22 ಲಕ್ಷ ರೂಪಾಯಿ ಬಡ್ಡಿ ಕಟ್ಟುವುದು ಕೂಡ ತಪ್ಪುತ್ತದೆ. ಆಗ ನೀವು 109 ಇಎಂಐಗಳನ್ನು ಉಳಿಸಬಹುದು.
ಇದೇ ರೀತಿ ವರ್ಷಕ್ಕೆ ಶೇ.15ರಷ್ಟು ಇಎಂಐ ಹೆಚ್ಚಿಸುತ್ತ ಹೋದರೆ, 25 ಲಕ್ಷ ರೂಪಾಯಿ ಉಳಿತಾಯವಾಗುತ್ತದೆ. 125 ಇಎಂಐಗಳನ್ನುಉಳಿಸಿದಂತಾಗುತ್ತದೆ. ಹಾಗೆಯೇ, ಶೇ.20ರಷ್ಟು ಹೆಚ್ಚಿಸುತ್ತ ಹೋದರೆ, 28 ಲಕ್ಷ ರೂಪಾಯಿ ಉಳಿಯುತ್ತದೆ. ಇದರ ಜತೆಗೆ 136 ಇಎಂಐಗಳನ್ನು ಉಳಿಸಬಹುದಾಗಿದೆ. ಹೀಗೆ, ಸ್ಮಾರ್ಟ್ ಉಳಿತಾಯದ ಮೂಲಕ ಸಾಲದ ಮೊತ್ತವನ್ನು ಕಡಿಮೆ ಮಾಡುವ ಜತೆಗೆ, ಬೇಗನೆ ಸಾಲವನ್ನು ತೀರಿಸಬಹುದಾಗಿದೆ.
