‘ಬೆಳ್ಳಿ’ ಐ ಲವ್ ಯೂ…ಬೆಳ್ಳಿ ಖರೀದಿಗೆ ಇದು ಸೂಕ್ತ ಸಮಯವೇ?

ಸುರಕ್ಷಿತ ಹೂಡಿಕೆ, ಮನೆಯಲ್ಲಿ ಎಟಿಎಂ ಥರಾ ಇರಬೇಕು ಅಂದ್ರೆ, ತುಂಬ ಜನ ಚಿನ್ನವನ್ನೇ ಖರೀದಿಸುತ್ತಾರೆ. ಆದರೆ, ಇತ್ತೀಚೆಗೆ ಹೂಡಿಕೆಯ ದೃಷ್ಟಿಕೋನ ಬದ್ಲಾಗಿದೆ. “ಬೆಳ್ಳಿ”ಗೂ ಈಗ “ಚಿನ್ನ”ದ ಬೆಲೆ ಬಂದಿದ್ದು, ಇದರ ಮೇಲೂ ಹೆಚ್ಚಿನ ಜನ ಹೂಡಿಕೆ ಮಾಡ್ತಿದಾರೆ. ಅರೆ, ಚಿನ್ನ ಓಕೆ, ಬೆಳ್ಳಿ ಮೇಲೆ ಹೂಡಿಕೆ ಯಾಕೆ ಅಂತೀರಾ? ಬೆಳ್ಳಿ ಖರೀದಿಯಿಂದ ಒಳ್ಳೆಯ ಲಾಭ ಮಾಡಬಹುದಾ ಎಂಬ ಪ್ರಶ್ನೆ ನಿಮ್ಮ ತಲೆಯಲ್ಲಿದೆಯೇ? ಹಾಗಾದ್ರೆ, ಈ ಸ್ಟೋರಿ ನೋಡಿ.

ಬೆಳ್ಳಿಗೂ ಬಂತು ಈಗ ‘ಚಿನ್ನ’ದ ಬೆಲೆ
ಬೆಳ್ಳಿ ಮೇಲೆ ಹೂಡಿಕೆಯಿಂದ ಭಾರಿ ಲಾಭ
ಇಲ್ಲಿದೆ ನೋಡಿ ಸಂಪೂರ್ಣ ಲೆಕ್ಕಾಚಾರ

ಹೌದು, ಚಿನ್ನದಂತೆ ಬೆಳ್ಳಿ ಬೆಲೆಯೂ ದಿನೇದಿನೆ ಜಾಸ್ತಿಯಾಗುತ್ತಿದೆ. ಹಾಗಾಗಿ, ಹೂಡಿಕೆದಾರರು ಚಿನ್ನದ ಜತೆಗೆ ಬೆಳ್ಳಿಯ ಮೇಲೂ ಹೂಡಿಕೆ ಮಾಡುತ್ತಿದ್ದಾರೆ. ಇದಕ್ಕೆ ನಿದರ್ಶನ ಎಂಬಂತೆ, 2023ರ ಜನವರಿಯಿಂದ 2025ರ ಜೂನ್ ಅವಧಿಯ ಬೆಳ್ಳಿಯ ಹೂಡಿಕೆದಾರರಿಗೆ ಶೇಕಡ 47.5ರಷ್ಟು ಲಾಭ ಸಿಕ್ಕಿದೆ. ಎರಡೂವರೆ ವರ್ಷದಲ್ಲಿ ಬೆಳ್ಳಿಯ ಬೆಲೆ ಕೆ.ಜಿಗೆ 74,600 ರೂ.ನಿಂದ 1.10 ಲಕ್ಷ ರೂಪಾಯಿಗೆ ಏರಿಕೆಯಾಗಿರುವುದೇ ಇದಕ್ಕೆ ಸಾಕ್ಷಿಯಾಗಿದೆ.

ಎರಡೂವರೆ ವರ್ಷದಲ್ಲೇ 36 ಸಾವಿರ ರೂ. ಲಾಭ
ಹಾಗಾಗಿ, ಬೆಳ್ಳಿಯತ್ತ ಒಲವು ತೋರ್ತಿರೋ ಜನ
ಅಷ್ಟಕ್ಕೂ, ಬೆಳ್ಳಿ ಬೆಲೆ ಏರಲು ಏನು ಕಾರಣ?

ಬೆಳ್ಳಿಯ ಬೆಲೆಯು ಕಳೆದ ಎರಡೂವರೆ ವರ್ಷದಲ್ಲಿಯೇ ಸುಮಾರು 36 ಸಾವಿರ ರೂ. ಜಾಸ್ತಿಯಾಗಿದೆ. ಅಂದ್ರೆ, 2023ರ ಜನವರಿಯಲ್ಲಿ ನೀವು ಒಂದು ಕೆ.ಜಿ ಬೆಳ್ಳಿ ಖರೀದಿಸಿ, ಈಗ ಮಾರಾಟ ಮಾಡಿದರೆ, ನಿಮಗೆ 36 ಸಾವಿರ ರೂ. ಲಾಭ ಸಿಗ್ತಿತ್ತು. ಚಿನ್ನದ ಬೆಲೆ ಏರಿಕೆಗೆ ಪೈಪೋಟಿ ಕೊಡುವಷ್ಟರ ಮಟ್ಟಿಗೆ ಬೆಳ್ಳಿ ಬೆಲೆ ಜಾಸ್ತಿಯಾಗ್ತಿರೋದ್ರಿಂದ ಜನರ ಒಲವು ಬೆಳ್ಳಿಯತ್ತ ವಾಲುತ್ತಿದೆ.

ಆಭರಣದ ಜತೆಗೆ ಹಲವು ಕಾರಣಗಳಿಗಾಗಿ ಬೆಳ್ಳಿಯನ್ನು ಬಳಕೆ ಮಾಡ್ತಿರೋದ್ರಿಂದ ಬೆಲೆ ಜಾಸ್ತಿಯಾಗ್ತಿದೆ. ಅದ್ರಲ್ಲೂ, ಕೈಗಾರಿಕಾ ಬಳಕೆ, ಫೋಟೋಗ್ರಫಿ, ಆಭರಣ ತಯಾರಿಕೆ, ನಾಣ್ಯ ತಯಾರಿಕೆ ಮತ್ತು ಬೆಳ್ಳಿಯ ಬಿಸ್ಕತ್ಗಳಿಗೆ ಬೇಡಿಕೆ ಇರುತ್ತದೆ. ಬೆಳ್ಳಿಗೆ ಇರುವ ಬೇಡಿಕೆಯಲ್ಲಿ ಶೇ 50ಕ್ಕೂ ಹೆಚ್ಚು ಪಾಲು ಎಲೆಕ್ಟ್ರಾನಿಕ್ಸ್, ಸೋಲಾರ್ ಫಲಕ ಮತ್ತು ವಿದ್ಯುತ್ಚಾಲಿತ ವಾಹನಗಳ ತಯಾರಿಕಾ ವಲಯದಿಂದ ಬರುತ್ತಿದೆ. 2020ರವರೆಗೂ ಬೆಳ್ಳಿಯ ಬೇಡಿಕೆಗೆ ತಕ್ಕಂತೆ ಪೂರೈಕೆ ಇತ್ತು. ಆದರೆ 2021ರಿಂದ ಲಭ್ಯತೆಗಿಂತ ಬೇಡಿಕೆ ಜಾಸ್ತಿಯಾಗುತ್ತಿದೆ.

ಚಿನ್ನದಂತೆ ಬೆಳ್ಳಿಯ ಬೆಲೆಯೂ ನಿರಂತರ ಏರಿಕೆ
2011ರ ಬಳಿಕ ಬೆಳ್ಳಿಯ ಬೆಲೆಗೆ ‘ಸುವರ್ಣ’ಯುಗ
2023ರ ಬಳಿಕವಂತೂ ಬೆಳ್ಳಿಯ ಬೆಲೆ ಗಗನಕ್ಕೇರಿಕೆ

ಬೆಳ್ಳಿ ಬೆಲೆಯ ಇತಿಹಾಸವನ್ನೊಮ್ಮೆ ನೋಡಿದಾಗ ಅಲ್ಲಿ ಸದಾ ಏರಿಳಿತ ಕಾಣಿಸುತ್ತದೆ. 2003ರವರೆಗೂ ಏಳೆಂಟು ಸಾವಿರ ರೂಪಾಯಿಯ ಆಸುಪಾಸಿನಲ್ಲೇ ಇತ್ತು. ಆದರೆ 2011ರಲ್ಲಿ ಬೆಳ್ಳಿಯ ಬೆಲೆ ಗಣನೀಯ ಏರಿಕೆ ಕಂಡು ಕೆ.ಜಿಗೆ 56,900 ರೂ. ದಾಟಿತು. ಮುಂದಿನ ಹತ್ತು ವರ್ಷ ಅಂದರೆ 2021ರವರೆಗೂ ಬೆಳ್ಳಿಯ ಬೆಲೆ 37 ಸಾವಿರ ರೂ.ನಿಂದ 62,572 ರೂ. ನಡುವೆ ಏರಿಳಿತ ಕಾಣುತ್ತಿತ್ತು. 2023ರಿಂದ ಬೆಳ್ಳಿಯ ಬೆಲೆ ಗಗನಕ್ಕೇರಿದೆ. ಬೆಳ್ಳಿಯ ಬೆಲೆ 2023ರಲ್ಲಿ 78,600 ರೂ., 2024ರಲ್ಲಿ 95,700 ರೂ. ಮತ್ತು 2025ರಲ್ಲಿ 1.10 ಲಕ್ಷ ರೂ. ಆಗಿದೆ. ಇದನ್ನು ಮನಗಂಡೇ ಹೂಡಿಕೆದಾರರು ‘ಬೆಳ್ಳಿ ಐ ಲವ್ ಯೂ’ ಎನ್ನುತ್ತಿದ್ದಾರೆ.

ಜಾಗತಿಕ ತಲ್ಲಣ, ಯುದ್ಧದ ಸಂದರ್ಭ, ಆರ್ಥಿಕ ಅನಿಶ್ಚಿತತೆಗಳು ಹೆಚ್ಚಾಗ್ತಿವೆ. ಇದರಿಂದ ಪಾರಾಗಲು ಪ್ರತಿ ದೇಶವೂ ಸುರಕ್ಷತೆಯ ದೃಷ್ಟಿಯಿಂದ ಚಿನ್ನ ಮತ್ತು ಬೆಳ್ಳಿಯ ಮೇಲೆ ಹೂಡಿಕೆ ಮಾಡುತ್ತದೆ. ಸಾಮಾನ್ಯವಾಗಿ ಜಾಗತಿಕ ಅನಿಶ್ಚಿತ ಸಂದರ್ಭಗಳು ಬಂದಾಗ ಚಿನ್ನ ಮತ್ತು ಬೆಳ್ಳಿಯ ಬೆಲೆ ಏರಿಕೆ ಕಾಣುತ್ತದೆ. ಹಾಗಾಗಿಯೇ, ಬೆಳ್ಳಿ ಮೇಲಿನ ಹೂಡಿಕೆ ಸದ್ಯದ ಟ್ರೆಂಡ್ ಎಂಬಂತಾಗಿದೆ.

Disclaimer: ನಿಮಗಿಲ್ಲಿ ಬೆಳ್ಳಿಯ ಹೂಡಿಕೆ ಕುರಿತು ಮಾಹಿತಿ ನೀಡುವುದಷ್ಟೇ ನಮ್ಮ ಉದ್ದೇಶವಾಗಿದೆ. ಬೆಳ್ಳಿಯ ಬೆಲೆಯು ಮಾರುಕಟ್ಟೆಯ ಏರಿಳಿತವನ್ನು ಆಧರಿಸಿರುವ ಕರಣ ಹೂಡಿಕೆ ಮಾಡುವ ಮುನ್ನ ತಜ್ಞರ ಸಲಹೆ-ಸೂಚನೆಗಳನ್ನು ಪಡೆಯುವುದು ಮರೆಯದಿರಿ. ಮಾಹಿತಿ ನೀಡುವುದು ಮಾತ್ರ ನಮ್ಮ ಉದ್ದೇಶ.