‘
ಮುಂಬೈ: ಬಾಲಿವುಡ್‌ನ ಖ್ಯಾತ ನಟ, ನಿರ್ದೇಶಕ ಮತ್ತು ನಿರ್ಮಾಪಕ ಆಮೀರ್ ಖಾನ್ ಅವರ ಮುಂಬರುವ ಬಹುನಿರೀಕ್ಷಿತ ಚಿತ್ರ ‘ಸಿತಾರೆ ಜಮೀನ್ ಪರ್’ ಕುರಿತು ಒಂದು ಅಚ್ಚರಿಯ ಸುದ್ದಿಯನ್ನು ಹಂಚಿಕೊಂಡಿದ್ದಾರೆ. ಅದೇನು ಗೊತ್ತೇ?
ಈ ಚಿತ್ರದಲ್ಲಿ ಆಮೀರ್ ಖಾನ್ ಅವರ 91 ವರ್ಷದ ತಾಯಿ ಜೀನತ್ ಹುಸೇನ್ ಖಾನ್ ಕೂಡ ನಟಿಸಿದ್ದು, ತಮ್ಮ ಚೊಚ್ಚಿಲ ಪಾತ್ರದ ಮೂಲಕ ಚಿತ್ರರಂಗಕ್ಕೆ ಕಾಲಿಟ್ಟಿದ್ದಾರಂತೆ. ಇದರ ಜೊತೆಗೆ ಆಮೀರ್‌ರ ಸಹೋದರಿ ನಿಖತ್ ಖಾನ್ ಕೂಡ ಈ ಚಿತ್ರದಲ್ಲಿ ಪಾತ್ರವೊಂದನ್ನು ನಿರ್ವಹಿಸಿದ್ದಾರಂತೆ. ಈ ಸುದ್ದಿಯು ಆಮೀರ್ ಖಾನ್‌ರ ಅಭಿಮಾನಿಗಳಲ್ಲಿ ಭಾರೀ ಕುತೂಹಲವನ್ನು ಹುಟ್ಟುಹಾಕಿದೆ.
ಮುಂಬೈನಲ್ಲಿ ನಡೆದ ಮಾಧ್ಯಮ ಸಂವಾದದಲ್ಲಿ ಆಮೀರ್ ಖಾನ್, ತಮ್ಮ ತಾಯಿ ಮತ್ತು ಸಹೋದರಿಯು ಚಿತ್ರದಲ್ಲಿ ನಟಿಸಿರುವ ಬಗ್ಗೆ ಬಹಿರಂಗಪಡಿಸಿದ್ದಾರೆ. ‘ಸಿತಾರೆ ಜಮೀನ್ ಪರ್’ ಚಿತ್ರದ ಕೊನೆಯ ಗೀತೆಯ ಚಿತ್ರೀಕರಣ ನಡೆಯುತ್ತಿತ್ತು. ಈ ಹಾಡು ಒಂದು ರೋಮಾಂಚಕ ಮದುವೆಯ ದೃಶ್ಯವಾಗಿದ್ದು, ಆ ದಿನ ಆಮೀರ್ ತಾಯಿ ಜೀನತ್ ಖಾನ್ ಚಿತ್ರೀಕರಣದ ಸ್ಥಳಕ್ಕೆ ಭೇಟಿ ನೀಡಲು ಬಯಸಿದ್ದರು. ಅಮ್ಮಿ(ಅಮ್ಮ) ಫೋನ್ ಮಾಡಿ, ‘ನೀವು ಎಲ್ಲಿ ಶೂಟಿಂಗ್ ಮಾಡುತ್ತಿದ್ದೀರಿ? ನಾನೂ ಶೂಟಿಂಗ್‌ಗೆ ಬರಲು ಇಷ್ಟಪಡುತ್ತೇನೆ ಎಂದರು. ನಾನು ಒಪ್ಪಿಕೊಂಡು ಕಾರನ್ನು ಕಳುಹಿಸಿದೆ ಎಂದು ಆಮೀರ್ ತಮ್ಮ ತಾಯಿಯ ಉತ್ಸಾಹವನ್ನು ನೆನಪಿಸಿಕೊಂಡಿದ್ದಾರೆ.
ಜೀನತ್ ಖಾನ್ ಗಾಲಿಕುರ್ಚಿಯಲ್ಲಿ ಶೂಟಿಂಗ್ ಸ್ಥಳಕ್ಕೆ ಆಗಮಿಸಿದರು. ಚಿತ್ರೀಕರಣವನ್ನು ಗಮನಿಸುತ್ತಿದ್ದಾಗ, ಚಿತ್ರದ ನಿರ್ದೇಶಕ ಆರ್.ಎಸ್. ಪ್ರಸನ್ನ ಜೀನತ್‌ರವರನ್ನು ಮದುವೆಯ ದೃಶ್ಯದಲ್ಲಿ ಒಬ್ಬ ಅತಿಥಿಯಾಗಿ ಕಾಣಿಸಿಕೊಳ್ಳುವಂತೆ ಮನವೊಲಿಸಿದರು. ಆಮೀರ್ ಆರಂಭದಲ್ಲಿ ತಮ್ಮ ತಾಯಿಯನ್ನು ಈ ಬಗ್ಗೆ ಕೇಳಲು ಹಿಂಜರಿದಿದ್ದರು. “ನಾನು ನಿರ್ದೇಶಕರಿಗೆ, ‘ನೀವು ತುಂಬಾ ಧೈರ್ಯ ಮಾಡುತ್ತಿದ್ದೀರಿ, ನನ್ನ ತಾಯಿಯನ್ನು ಕೇಳಲು ನನಗಂತೂ ಧೈರ್ಯವಿಲ್ಲ’ ಎಂದಿದ್ದೆ,” ಎಂದು ಆಮೀರ್ ಹೇಳಿದ್ದಾರೆ. ಆದರೆ, ಜೀನತ್ ಖಾನ್ ಈ ಪ್ರಸ್ತಾಪಕ್ಕೆ ಒಪ್ಪಿಕೊಂಡರು. ಜೊತೆಗೆ ಒಂದೆರಡು ದೃಶ್ಯಗಳಲ್ಲಿ ಕಾಣಿಸಿಕೊಂಡರು.
ಆಮೀರ್‌ರ ಸಹೋದರಿ ನಿಖತ್ ಖಾನ್ ಈಗಾಗಲೇ ಹಲವಾರು ಚಿತ್ರಗಳಲ್ಲಿ ಕಾಣಿಸಿಕೊಂಡಿರುವ ವೃತ್ತಿಪರ ನಟಿಯಾಗಿದ್ದಾರೆ. ‘ಸಿತಾರೆ ಜಮೀನ್ ಪರ್’ ಚಿತ್ರದಲ್ಲಿ ಅವರು ಒಂದು ಪಾತ್ರವನ್ನು ನಿರ್ವಹಿಸಿದ್ದಾರೆ ಮತ್ತು ಕೆಲವು ದೃಶ್ಯಗಳಲ್ಲಿ ಕಾಣಿಸಿಕೊಂಡಿದ್ದಾರೆ. ಇದು ಆಮೀರ್ ಮತ್ತು ನಿಖತ್‌ರ ತೆರೆಯ ಮೇಲಿನ ಮೊದಲ ಸಹಯೋಗವಾಗಿದ್ದು, ಭವಿಷ್ಯದಲ್ಲಿ ಇವರಿಬ್ಬರೂ ಮತ್ತೆ ಒಟ್ಟಿಗೆ ಕೆಲಸ ಮಾಡುವ ಸಾಧ್ಯತೆಯ ಬಗ್ಗೆ ಆಮೀರ್ ಸುಳಿವು ನೀಡಿದ್ದಾರೆ.
‘ಸಿತಾರೆ ಜಮೀನ್ ಪರ್’ ಚಿತ್ರವನ್ನು ಆರ್.ಎಸ್. ಪ್ರಸನ್ನ ನಿರ್ದೇಶಿಸಿದ್ದಾರೆ. ಚಿತ್ರದಲ್ಲಿ ಆಮೀರ್ ಖಾನ್ ಜೊತೆಗೆ ಜೆನಿಲಿಯಾ ಡಿಸೋಜಾ ಪ್ರಮುಖ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ. ಇದರ ಜೊತೆಗೆ, ಆಮಿರ್ ಖಾನ್ ಪ್ರೊಡಕ್ಷನ್ಸ್‌ನಡಿ 10 ಹೊಸ ನಟರನ್ನು ಈ ಚಿತ್ರದಲ್ಲಿ ಪರಿಚಯಿಸಲಾಗುತ್ತಿದೆ.
ಚಿತ್ರದ ಸಂಗೀತವನ್ನು ಶಂಕರ್-ಎಹಸಾನ್-ಲಾಯ್ ಸಂಯೋಜಿಸಿದ್ದು, ಗೀತೆಗಳಿಗೆ ಅಮಿತಾಭ್ ಭಟ್ಟಾಚಾರ್ಯ ಅವರ ಸಾಹಿತ್ಯವಿದೆ. 2018ರ ಸ್ಪ್ಯಾನಿಷ್ ಚಿತ್ರ ‘ಕ್ಯಾಂಪಿಯೋನ್ಸ್’ನಿಂದ ಪ್ರೇರಿತವಾದ ಈ ಚಿತ್ರವು, ಒಂದು ಕಾಮಿಡಿ ಡ್ರಾಮಾವಾಗಿದ್ದು, ವಿಶೇಷ ಸಾಮರ್ಥ್ಯದ ವ್ಯಕ್ತಿಗಳ ಸುತ್ತ ಸುತ್ತುವ ಕಥೆಯನ್ನು ಹೊಂದಿದೆ.
ಆಮಿರ್ ಖಾನ್ ಈ ಚಿತ್ರದಲ್ಲಿ ಬಾಸ್ಕೆಟ್‌ಬಾಲ್ ಕೋಚ್‌ನ ಪಾತ್ರವನ್ನು ನಿರ್ವಹಿಸುತ್ತಿದ್ದಾರೆ, ಇದು ವಿಶೇಷ ಚೇತನರ ತಂಡವನ್ನು ತರಬೇತಿಗೊಳಿಸುವ ಕಥಾನಕವನ್ನು ಒಳಗೊಂಡಿದೆ. ಈ ಚಿತ್ರವು “ಸಬ್ಕಾ ಆಪ್ನಾ ಆಪ್ನಾ ನಾರ್ಮಲ್” ಎಂಬ ಘೋಷವಾಕ್ಯವನ್ನು ಹೊಂದಿದ್ದು, ಭಾರೀ ಕುತೂಹಲಕ್ಕೆ ಕಾರಣವಾಗಿದೆ. ‘ಸಿತಾರೆ ಜಮೀನ್ ಪರ್’ ಚಿತ್ರವು ಜೂನ್ 20, 2025ರಂದು ಚಿತ್ರಮಂದಿರಗಳಲ್ಲಿ ಬಿಡುಗಡೆಯಾಗಲಿದೆ.
