ಮೆಲ್ಬರ್ನ್: ಪ್ರಳಯದಿನದ ಮೀನು(ಡೂಮ್ಸ್ ಡೇ ಫಿಶ್) ಎಂದು ಕರೆಯಲ್ಪಡುವ ಅತ್ಯಂತ ಅಪರೂಪದ ಮತ್ತು ನಿಗೂಢ ಓರ್ಫಿಶ್ ಇತ್ತೀಚೆಗೆ ತಾಸ್ಮಾನಿಯಾದ ಪಶ್ಚಿಮ ಕರಾವಳಿಯ ಒಶನ್ ಬೀಚ್‌ನಲ್ಲಿ ಕಾಣಿಸಿಕೊಂಡಿದೆ. ಈ ದೀರ್ಘವಾದ, ರಿಬ್ಬನ್ ಆಕಾರದ ಆಳ ಸಮುದ್ರದ ಮೀನು, ಜಪಾನಿನ ಜಾನಪದ ಕಥೆಗಳಲ್ಲಿ ಭೂಕಂಪ ಮತ್ತು ಸುನಾಮಿಯಂತಹ ನೈಸರ್ಗಿಕ ವಿಪತ್ತುಗಳ ಸೂಚಕವೆಂದು ಪರಿಗಣಿಸಲ್ಪಟ್ಟಿದೆ. ಈಗ ಈ ಮೀನು ತಾಸ್ಮಾನಿಯಾದಲ್ಲಿ ಪತ್ತೆಯಾಗಿರುವುದು ಸ್ಥಳೀಯರಲ್ಲಿ ಮತ್ತು ಸಾಮಾಜಿಕ ಜಾಲತಾಣಗಳಲ್ಲಿ ಭಾರೀ ಚರ್ಚೆಯನ್ನು ಹುಟ್ಟುಹಾಕಿದೆ.
ಸಿಬಿಲ್ ರಾಬರ್ಟ್ಸನ್ ಎಂಬವರು ತಾಸ್ಮಾನಿಯಾದ ಒಶನ್ ಬೀಚ್‌ನಲ್ಲಿ ತನ್ನ ಸಾಕುನಾಯಿಯೊಂದಿಗೆ ವಿಹಾರಕ್ಕೆ ತೆರಳಿದ್ದಾಗ, ಸಮುದ್ರತೀರದಲ್ಲಿ ಈ ಅಪರೂಪದ ಮೀನು ಅವರ ಕಣ್ಣಿಗೆ ಬಿದ್ದಿದೆ. ಮೊದಲಿಗೆ, ಇದು ಕೇವಲ ಬೆಳ್ಳಿಯ ಹೊಳೆಯುವ ಗೆರೆಯಂತೆ ಕಾಣಿಸಿತು ಎಂದು ಅವರು ಹೇಳಿದ್ದಾರೆ. ಸುಮಾರು 3 ಮೀಟರ್ ಉದ್ದವಿರುವ ಈ ಮೀನಿನ ಸುತ್ತಲೂ ಗಿಡುಗಗಳು ಸುತ್ತುತ್ತಿದ್ದವು. ಇದನ್ನು ನೋಡುವಾಗ ನನಗೆ ಅಚ್ಚರಿ ಎನಿಸಿತು. ಇದೊಂದು ಅದ್ಭುತ ಅನುಭವ. ಆದರೆ ಇದು ಯಾವ ಮೀನು ಎಂದು ಆರಂಭದಲ್ಲಿ ಗೊತ್ತಿರಲಿಲ್ಲ. ಇದು ಕೇವಲ ವಿಚಿತ್ರವಾದ ಮತ್ತು ಅಪರೂಪದ ಜೀವಿಯೆಂದು ತಿಳಿದಿದ್ದೆ,” ಎಂದು ರಾಬರ್ಟ್ಸನ್ ತಿಳಿಸಿದ್ದಾರೆ.
ತಾಸ್ಮಾನಿಯಾದ ಸಿಟಿಜನ್ ಸೈಂಟಿಸ್ಟ್ಸ್ ಆಫ್ ತಾಸ್ಮಾನಿಯಾ ಸಾಮಾಜಿಕ ಜಾಲತಾಣ ಪುಟದಲ್ಲಿ ಈ ಮೀನಿನ ಚಿತ್ರವನ್ನು ಪೋಸ್ಟ್ ಮಾಡಿದಾಗ, ಇದು ಓರ್ಫಿಶ್ ಎಂದು ಗುರುತಿಸಲಾಯಿತು. ಈ ಮೀನು, ವಿಶ್ವದ ಅತ್ಯಂತ ಉದ್ದದ ಎಲುಬಿನ ಮೀನುಗಳಲ್ಲಿ ಒಂದಾಗಿದ್ದು, 8 ಮೀಟರ್‌ವರೆಗೆ ಬೆಳೆಯುತ್ತದೆ. ಕೆಲವೊಂದು 400 ಕೆಜಿಯವರೆಗೆ ತೂಕ ಹೊಂದಿರುತ್ತದೆ. ಇದು ಸಾಮಾನ್ಯವಾಗಿ ಸಮುದ್ರದ ಮಧ್ಯಭಾಗದಲ್ಲಿ 150-500 ಮೀಟರ್ ಆಳದಲ್ಲಿ ವಾಸಿಸುತ್ತದೆ. ಆದ್ದರಿಂದ ಇದನ್ನು ಕರಾವಳಿಯಲ್ಲಿ ಕಾಣುವುದು ಅತ್ಯಂತ ಅಪರೂಪ.
‘ಡೂಮ್ಸ್‌ಡೇ ಫಿಶ್’ ಎಂಬ ಕುಖ್ಯಾತಿ
ಓರ್‌ಫಿಶ್‌ಗೆ ‘ಡೂಮ್ಸ್‌ಡೇ ಫಿಶ್’ ಎಂಬ ಬಿರುದು ಜಪಾನಿನ ಜಾನಪದ ಕಥೆಗಳಿಂದ ಬಂದಿದೆ. 17ನೇ ಶತಮಾನದಿಂದಲೂ, ಈ ಮೀನು ಸಮುದ್ರದ ದೇವತೆ ರಿಯುಜಿನ್‌ನಿಂದ ಕಳುಹಿಸಲ್ಪಟ್ಟ ‘ರಿಯುಗು ನೋ ತ್ಸುಕೈ’ (ಸಮುದ್ರ ದೇವನ ಅರಮನೆಯ ಸಂದೇಶವಾಹಕ) ಎಂದು ಜಪಾನಿನಲ್ಲಿ ಕರೆಯಲಾಗುತ್ತದೆ.
ಇದು ಭೂಕಂಪ ಅಥವಾ ಸುನಾಮಿಯಂತಹ ವಿಪತ್ತುಗಳ ಸೂಚಕವೆಂದು ನಂಬಲಾಗಿದೆ. ಈ ನಂಬಿಕೆಗೆ 2011ರ ಜಪಾನಿನ ತೋಹೊಕು ಭೂಕಂಪ ಮತ್ತು ಸುನಾಮಿಯ ಮೊದಲು ಸುಮಾರು 20 ಓರ್‌ಫಿಶ್‌ಗಳು ಕರಾವಳಿಯಲ್ಲಿ ಕಾಣಿಸಿಕೊಂಡಿದ್ದವು ಎಂಬ ವರದಿಗಳು ಮತ್ತಷ್ಟು ಪುಷ್ಟಿ ನೀಡಿವೆ. ಇದೇ ರೀತಿ, 2017ರಲ್ಲಿ ಫಿಲಿಪೈನ್ಸ್‌ನ ಲುಝಾನ್‌ನಲ್ಲಿ 6.6 ತೀವ್ರತೆಯ ಭೂಕಂಪ ಸಂಭವಿಸುವ ಒಂದು ದಿನ ಮೊದಲು ಎರಡು ಓರ್‌ಫಿಶ್‌ಗಳು ಕಾಣಿಸಿಕೊಂಡಿದ್ದವು.
ವೈಜ್ಞಾನಿಕ ದೃಷ್ಟಿಕೋನ
ಆದರೆ, ಓರ್ಫಿಶ್ ಕಾಣಿಸಿಕೊಳ್ಳುವುದಕ್ಕೂ ಭೂಕಂಪ ಸಂಭವಿಸುವುದಕ್ಕೂ ಯಾವುದೇ ವೈಜ್ಞಾನಿಕ ಸಾಕ್ಷ್ಯವಿಲ್ಲ. 2019ರಲ್ಲಿ ‘ಬುಲೆಟಿನ್ ಆಫ್ ದಿ ಸೀಸ್ಮೋಲಾಜಿಕಲ್ ಸೊಸೈಟಿ ಆಫ್ ಅಮೆರಿಕಾ’ದಲ್ಲಿ ಪ್ರಕಟವಾದ ಅಧ್ಯಯನವೊಂದು, 1928ರಿಂದ 2011ರವರೆಗೆ ಓರ್ಫಿಶ್ ಕಾಣಿಸಿಕೊಳ್ಳುವುದು ಮತ್ತು ಭೂಕಂಪಗಳ ನಡುವೆ ಯಾವುದೇ ನೇರ ಸಂಬಂಧವಿಲ್ಲ ಎಂದು ಕಂಡುಕೊಂಡಿದೆ.
ವಿಜ್ಞಾನಿಗಳ ಪ್ರಕಾರ, ಓರ್‌ಫಿಶ್‌ಗಳು ಸಾಮಾನ್ಯವಾಗಿ ಆರೋಗ್ಯವಿಲ್ಲದಿರುವಾಗ, ಗಾಯಗೊಂಡಾಗ ಅಥವಾ ಸಮುದ್ರದ ತಾಪಮಾನದ ಬದಲಾವಣೆಗಳಾದ ಎಲ್ ನಿನೋ ಮತ್ತು ಲಾ ನಿನಾದಂತಹ ಪರಿಸ್ಥಿತಿಗಳಿಂದ ಕರಾವಳಿಗೆ ತೇಲಿಬರುತ್ತವೆ. ಕೆಲವು ವಿಜ್ಞಾನಿಗಳು ಈ ಮೀನುಗಳು ಭೂಕಂಪದ ಚಟುವಟಿಕೆಗೆ ಸೂಕ್ಷ್ಮವಾಗಿರಬಹುದು ಎಂದು ಊಹಿಸಿದ್ದಾರೆ. ಏಕೆಂದರೆ ಇವು ಭೂಕಂಪದ ರೇಖೆಗಳ ಸಮೀಪದಲ್ಲಿ ವಾಸಿಸುತ್ತವೆ, ಆದರೆ ಇದನ್ನು ಸಾಬೀತುಪಡಿಸುವ ಯಾವುದೇ ದೃಢವಾದ ಆಧಾರವಿಲ್ಲ.
ತಾಸ್ಮಾನಿಯಾ ವಿಶ್ವವಿದ್ಯಾಲಯದ ಸಮುದ್ರ ಜೀವವಿಜ್ಞಾನಿ ನೆವಿಲ್ ಬ್ಯಾರೆಟ್, ಓರ್ಫಿಶ್ ಕಂಡಿದ್ದನ್ನು “ಅಸಾಧಾರಣವಾದ ಘಟನೆ” ಎಂದು ಕರೆದಿದ್ದಾರೆ. “ನಾವು ಸಾಮಾನ್ಯವಾಗಿ ಆಳ ಸಮುದ್ರದಲ್ಲಿ ಇಂತಹ ಜೀವಿಗಳನ್ನು ನೋಡಲು ಹೋಗುವುದಿಲ್ಲ. ಇದು ಒಂದು ಅಪರೂಪದ ಅವಕಾಶ,” ಎಂದು ಅವರು ಹೇಳಿದ್ದಾರೆ.
ಓರ್‌ಫಿಶ್‌ನ ವೈಶಿಷ್ಟ್ಯಗಳು
ಓರ್ಫಿಶ್ (ರಿಗಾಲೆಕಸ್ ಗ್ಲೆಸ್ನೆ) ತನ್ನ ವಿಶಿಷ್ಟವಾದ ರಿಬ್ಬನ್ ಆಕಾರದ ದೇಹ ಮತ್ತು ಬೆಳ್ಳಿಯಂತಹ ಹೊಳೆಯುವ ಚರ್ಮದಿಂದ ಗುರುತಿಸಲ್ಪಡುತ್ತದೆ. ಇದು 36 ಅಡಿಗಳವರೆಗೆ ಬೆಳೆಯಬಹುದಾದರೂ, ಸಾಮಾನ್ಯವಾಗಿ 10 ಅಡಿಗಳಷ್ಟು ಉದ್ದವಿರುತ್ತದೆ. ಇದು ಆಳ ಸಮುದ್ರದ ಮೆಸೊಪೆಲಾಜಿಕ್ ವಲಯದಲ್ಲಿ ವಾಸಿಸುತ್ತದೆ. ಈಜುವ ಬದಲು ಲಂಬವಾಗಿ ತೇಲುತ್ತದೆ, ತನ್ನನ್ನು ತಾನು ಮರೆಮಾಚಲು ಈ ತಂತ್ರವನ್ನು ಬಳಸುತ್ತದೆ. ಇದರ ವಿಚಿತ್ರ ರೂಪದಿಂದಾಗಿ, ಇದನ್ನು ಸಮುದ್ರದ ಸರ್ಪಗಳ ದಂತಕಥೆಗಳಿಗೆ ಸ್ಫೂರ್ತಿಯೆಂದು ಕೂಡ ಭಾವಿಸಲಾಗಿದೆ.
ಸಾಮಾಜಿಕ ಜಾಲತಾಣಗಳಲ್ಲಿ ಚರ್ಚೆ
ತಾಸ್ಮಾನಿಯಾದ ಈ ಘಟನೆಯು ಸಾಮಾಜಿಕ ಜಾಲತಾಣಗಳಲ್ಲಿ ಗಮನ ಸೆಳೆದಿದೆ. ಕೆಲವರು ಇದನ್ನು “ವಿಪತ್ತಿನ ಸೂಚಕ” ಎಂದು ಉಲ್ಲೇಖಿಸಿದ್ದಾರೆ. ಇನ್ನು ಕೆಲವರು ಇದನ್ನು ಕೇವಲ ಅಪರೂಪದ ಜೈವಿಕ ಘಟನೆಯೆಂದು ಪರಿಗಣಿಸಿದ್ದಾರೆ.
