ಲಂಡನ್: ರಜಾದಿನಗಳನ್ನು ಕಳೆಯಲೆಂದು ಟರ್ಕಿಗೆ ಹೋಗಿದ್ದ ಇಂಗ್ಲೆಂಡ್(England)ನ ಇಬ್ಬರು ಮಕ್ಕಳ ತಾಯಿಯೊಬ್ಬರು ಅಕಾಲಿಕ ಮರಣವನ್ನಪ್ಪಿದ್ದಾರೆ. ವಿಚಿತ್ರವೆಂದರೆ, ಆಕೆಯ ಮರಣೋತ್ತರ ಪರೀಕ್ಷೆ ವೇಳೆ ದೇಹದಲ್ಲಿ ಹೃದಯವೇ ಇಲ್ಲದಿರುವ ಆಘಾತಕಾರಿ ವಿಚಾರ ಬಹಿರಂಗವಾಗಿದೆ(Crime News).
ಪೋರ್ಟ್ಸ್ ಮೌತ್ ನಿವಾಸಿಯಾದ ಬೆಥ್ ಮಾರ್ಟಿನ್(28) ಅವರು ದಿಢೀರ್ ಅನಾರೋಗ್ಯಕ್ಕೊಳಗಾಗಿ ಮೃತಪಟ್ಟಿದ್ದರು. ಅವರ ಸಾವಿಗೆ ಕಾರಣವೇನು ಎಂಬುದು ತಿಳಿದುಬಂದಿರಲಿಲ್ಲ. ಈಗ ಪೋಸ್ಟ್ ಮಾರ್ಟಂ ಬಳಿಕ ಇಂಥದ್ದೊಂದು ಅಸಾಮಾನ್ಯ ವಿಚಾರ ಬಯಲಾಗಿರುವ ಕಾರಣ ಆಕೆಯ ಕುಟುಂಬ ಸದಸ್ಯರು ಆಘಾತಕ್ಕೊಳಗಾಗಿದ್ದಾರೆ.
ಯುಕೆಯಿಂದ ಟರ್ಕಿಗೆ ಬಂದಿಳಿಯುತ್ತಿದ್ದಂತೆಯೇ ಮಾರ್ಟಿನ್ ಅವರಿಗೆ ಅನಾರೋಗ್ಯ ಕಾಡತೊಡಗಿತ್ತು. ಫುಡ್ ಪಾಯ್ಸನ್‌ನಿಂದ ಹೀಗಾಗಿರಬಹುದು ಎಂದೇ ಅವರು ಭಾವಿಸಿದ್ದರು. ಆದರೆ, ಇಸ್ತಾಂಬುಲ್‌ಗೆ ಬಂದು ತಲುಪುತ್ತಿದ್ದಂತೆಯೇ ಅವರ ಪರಿಸ್ಥಿತಿ ತೀರಾ ಹದಗೆಟ್ಟ ಕಾರಣ ಕೂಡಲೇ ಆಸ್ಪತ್ರೆಗೆ ದಾಖಲಿಸಲಾಯಿತು. ಮಾರನೇ ದಿನವೇ ಅವರು ಆಸ್ಪತ್ರೆಯಲ್ಲೇ ಕೊನೆಯುಸಿರೆಳೆದರು.
ಮಾರ್ಟಿನ್ ಅವರು ಬಹು ಅಂಗ ವೈಫಲ್ಯದಿಂದ ಆದ ಹೃದಯಾಘಾತದಿಂದ ಮೃತಪಟ್ಟಿದ್ದಾರೆ ಎಂದಷ್ಟೇ ಟರ್ಕಿ ಸಚಿವಾಲಯ ತಿಳಿಸಿದ್ದು, ಸಾವಿಗೆ ನಿಖರ ಹಾಗೂ ವಿಸ್ತೃತ ಕಾರಣವನ್ನು ತಿಳಿಸಿರಲಿಲ್ಲ. ಟರ್ಕಿ ಅಧಿಕಾರಿಗಳ ಬೇಜವಾಬ್ದಾರಿತನದಿಂದ ಮಾರ್ಟಿನ್ ಅವರ ಪತಿ ಲ್ಯೂಕ್ ಮಾರ್ಟಿನ್ ತೀವ್ರ ಅಸಮಾಧಾನಗೊಂಡಿದ್ದರು. ಆರಂಭದಿಂದಲೇ ಅಧಿಕಾರಿಗಳು ನಮಗೆ ಸರಿಯಾಗಿ ಸಹಕರಿಸಲಿಲ್ಲ. ನಾನೇ ಪತ್ನಿಗೆ ವಿಷ ಹಾಕಿರಬಹುದೆಂದೂ ಅವರು ಶಂಕಿಸಿದ್ದರು ಎಂದು ಲ್ಯೂಕ್ ತಿಳಿಸಿದ್ದಾರೆ.
ಕೊನೆಗೆ ಮೃತದೇಹವನ್ನು ಯುಕೆಗೆ ರವಾನಿಸಲಾಗಿದ್ದು, ಅಲ್ಲಿ ಮರಣೋತ್ತರ ಪರೀಕ್ಷೆ ನಡೆಸಿದ ಅಧಿಕಾರಿಗಳು ಮಾರ್ಟಿನ್ ದೇಹದಲ್ಲಿ ಹೃದಯವೇ ನಾಪತ್ತೆಯಾಗಿದೆ ಎಂಬ ವಿಚಾರವನ್ನು ತಿಳಿಸಿದ್ದಾರೆ. ಹೀಗಾಗಿ ಟರ್ಕಿಯ ಆಸ್ಪತ್ರೆಯಲ್ಲೇ ಗೋಲ್ ಮಾಲ್ ನಡೆದಿರಬಹುದೇ ಎಂಬ ಅನುಮಾನ ಶುರುವಾಗಿದೆ. ಆದರೆ, ಆಸ್ಪತ್ರೆಯಲ್ಲಿ ಮಾರ್ಟಿನ್ ಯಾವುದೇ ಶಸ್ತ್ರಚಿಕಿತ್ಸೆಗೆ ಒಳಗಾಗಿಲ್ಲ ಎಂದು ಟರ್ಕಿ ಅಧಿಕಾರಿಗಳು ಸ್ಪಷ್ಟನೆ ನೀಡಿದ್ದಾರೆ. ಆದರೆ, ಇಸ್ತಾಂಬುಲ್ ನ ಮರ್ಮರಾ ಯುನಿವರ್ಸಿಟಿ ಪೆಂಡಿಕ್ ಎಜುಕೇಷನ್ ಆಂಡ್ ರಿಸರ್ಚ್ ಆಸ್ಪತ್ರೆಯಲ್ಲಿನ ಸಿಬ್ಬಂದಿಯೇ ಏನಾದರೂ ಮಾಡಿರಬಹುದು ಎಂಬ ಅನುಮಾನವನ್ನು ಮಾರ್ಟಿನ್ ಕುಟುಂಬ ಹೊರಹಾಕಿದೆ. ಈ ಹಿನ್ನೆಲೆಯಲ್ಲಿ ತನಿಖೆ ಆರಂಭಿಸಲಾಗಿದೆ.
ಮಾರ್ಟಿನ್ ಅವರು ತಮ್ಮ ಪತಿ ಲ್ಯೂಕ್, ಮಕ್ಕಳಾದ ಎಲೌಸಿ(8) ಮತ್ತು ಟಾಮಿ(5) ಜೊತೆಗೆ ಏಪ್ರಿಲ್ 27ರಂದು ಟರ್ಕಿಗೆ ಪ್ರವಾಸ ಹೋಗಿದ್ದರು. ಆದರೆ, ವಿಮಾನ ಸಂಚಾರದ ವೇಳೆಯೇ ಮಾರ್ಟಿನ್ ಅನಾರೋಗ್ಯಕ್ಕೀಡಾಗಿದ್ದು, ಇಡೀ ಕುಟುಂಬ ಈಗ ಆಘಾತಕ್ಕೊಳಗಾಗಿದೆ. ಮಾರ್ಟಿನ್ ಅವರಿಗೆ ದಿಢೀರ್ ಬಹುಅಂಗ ವೈಫಲ್ಯವಾಗಲು ಕಾರಣವೇನು, ಅವರ ಹೃದಯ ನಾಪತ್ತೆಯಾಗಿದ್ದು ಹೇಗೆ ಎಂಬ ವಿಚಾರ ಬಹಿರಂಗವಾಗಲು ಇನ್ನೂ 6 ತಿಂಗಳ ಬೇಕಾಗಬಹುದು ಎಂದು ಇಂಗ್ಲೆಂಡ್ ಅಧಿಕಾರಿಗಳು ತಿಳಿಸಿದ್ದಾರೆ.
