ಸರ್ವಶಕ್ತ ರಾಷ್ಟ್ರವಾಗಿ ಹೊರಹೊಮ್ಮಿದ ಭಾರತ: ರಕ್ಷಣಾ ವಲಯದಲ್ಲಿ ಭಾರತಕ್ಕಿಲ್ಲ ಇನ್ನು ಸರಿಸಾಟಿ

ಆಪರೇಷನ್ ಸಿಂಧೂರ…ಭಾರತದ ರಕ್ಷಣಾ ಸಾಮರ್ಥ್ಯವನ್ನು ಜಗತ್ತಿನ ಮುಂದೆ ಅನಾವರಣ ಮಾಡಿದ ಬಲುದೊಡ್ಡ ಕಾರ್ಯಾಚರಣೆ. ಅಮೆರಿಕ, ರಷ್ಯಾ, ಚೀನಾಗಳೊಟ್ಟಿಗೆ ಪೈಪೋಟಿ ನೀಡುವ ತಾಕತ್ತನ್ನ ಈಗ ಭಾರತ ಹೊಂದಿದೆ ಅನ್ನೋದು ಜಗತ್ತಿನ ಮುಂದೆ ಪ್ರತಿಬಿಂಬಿಸಿದೆ. ಇದಕ್ಕೆ ಸಾಕ್ಷಿ ಎನ್ನುವಂತೆ ಬ್ರಹ್ಮೋಸ್ ಪಾಕಿಸ್ತಾನವನ್ನು ಧೂಳೀಪಟ ಮಾಡಿದ್ರೆ, ಆಕಾಶ್ ಏರ್ ಡಿಫೆನ್ಸ್ ಸಿಸ್ಟಂ ಬಾನಲ್ಲಿ ಭಾರತದ ಬಾವುಟ ರಾರಾಜಿಸುವಂತೆ ಮಾಡಿದೆ.

ಭಾರತದ ಬತ್ತಳಿಕೆಯಲ್ಲಿದೆ ಮತ್ತೊಂದು ಡೆಡ್ಲಿ ವೆಪನ್

ಬ್ರಹ್ಮೋಸ್, ಆಕಾಶ್ ಹೆಸರು ಕೇಳಿದ್ರೆ ಈಗ ಎದುರಾಳಿಗಳು ಬೆವರಲು ಶುರುಮಾಡ್ತಿದ್ದಾರೆ. ಅಂಥದ್ರಲ್ಲಿ ಭಾರತ ಮತ್ತೊಂದು ಐತಿಹಾಸಿಕ ಅಸ್ತ್ರವನ್ನು ಹೊಂದಿರುವುದೀಗ ಬೆಳಕಿಗೆ ಬಂದಿದೆ. ಅದು ಬೇರ್ಯಾವುದು ಅಲ್ಲ ಅದೇ ಲೇಸರ್ ವೆಪನ್. 30 ಕಿಲೋ ವ್ಯಾಟ್ ಸಾಮರ್ಥ್ಯದ ಈ ಅತ್ಯಾಧುನಿಕ ಲೇಸರ್ ಅಸ್ತ್ರವನ್ನ ಡಿಆರ್ ಡಿಒ ಸಂಶೋಧಿಸಿದೆ. ಅಷ್ಟೇ ಅಲ್ಲಾ ಆಂಧ್ರದ ಕರ್ನೂಲ್ ನಲ್ಲಿ ಇದರ ಪರೀಕ್ಷಾರ್ಥ ಪ್ರಯೋಗ ನಡೆದಿದ್ದು, ಬಲು ದೊಡ್ಡ ಯಶಸ್ಸನ್ನು ಸಾಧಿಸಿದೆ.

ಅಸಲಿಗೆ ಏನಿದು ಲೇಸರ್ ವೆಪನ್ ವಿಶೇಷ

ಲೇಸರ್ ವೆಪನ್, 30 ಕಿಲೋ ವ್ಯಾಟ್ ಸಾಮರ್ಥ್ಯದ ಶಕ್ತಿಶಾಲಿ ಅಸ್ತ್ರ. ಐದು ಕಿಲೋಮೀಟರ್ ವ್ಯಾಪ್ತಿಯಲ್ಲಿ ಹಾರಿ ಬರೋ ಡ್ರೋನ್, ಕ್ಷಿಪಣಿ, ಕಣ್ಗಾವಲು ಉಪಕರಣಗಳನ್ನು ಕ್ಷಣಾರ್ಧದಲ್ಲಿ ಚಿಂದಿ ಉಡಾಯಿಸೋ ಸಾಮರ್ಥ್ಯ ಹೊಂದಿದೆ. ಭೂಮಿಯಿಂದಲೇ ಆಗಿರಲಿ ಇಲ್ಲಾ ಸಾಗರದಿಂದಲೇ ಆಗಿರ್ಲಿ ಈ ಅಸ್ತ್ರವನ್ನು ಎದುರಾಳಿಗಳ ವಿರುದ್ಧ ಪ್ರಯೋಗಿಸಬಹುದಾಗಿದೆ. ಅತ್ಯಂತ ನಿಖರವಾಗಿ ದಾಳಿ ನಡೆಸೋ ಸಾಮರ್ಥ್ಯದ ಈ ಲೇಸರ್ ಅಸ್ತ್ರ ಶೀಘ್ರವೇ ಭಾರತೀಯ ಸೇನೆಗೆ ಸೇರ್ಪಡೆಯಾಗಲಿದೆ.

ಭಾರತದಲ್ಲಿ ಸಿದ್ಧವಾಗ್ತಿವೆಯಾ ಭವಿಷ್ಯದ ಅಸ್ತ್ರಗಳು

ಲೇಸರ್ ಅಸ್ತ್ರ ಈಗಾಗಲೇ ತನ್ನ ಪ್ರಯೋಗವನ್ನು ಪೂರ್ಣಗೊಳಿಸಿ ಸೇನೆ ಸೇರಲು ಸಜ್ಜಾಗುತ್ತಿದೆ. ಇತ್ತ ಭವಿಷ್ಯದ ಶಸ್ತ್ರಗಳನ್ನು ರೂಪಿಸುವ ಕಾರ್ಯವನ್ನು ಡಿಆರ್ ಡಿಒ ಮುಂದುವರಿಸಿದೆ. ಅದ್ರಲ್ಲೂ ಮೈಕ್ರೋವೇವ್ ವೆಪನ್ ಒಂದನ್ನು ರೂಪಗೊಳಿಸಲಾಗ್ತಿದೆ. 21ನೇ ಶತಮಾನದ ಅಸ್ತ್ರ ಅಂತಲೇ ಕರೆಸಿಕೊಳ್ತಿರೋ ಈ ಅಸ್ತ್ರ ಎದುರಾಳಿಗಳ ಸಂಪೂರ್ಣ ಸಂವಹನ ಜಾಲವನ್ನೇ ಜಾಮ್ ಮಾಡಿಬಿಡಬಲ್ಲದು. ಅಷ್ಟೇ ಅಲ್ಲಾ ರೆಡಾರ್ ವ್ಯವಸ್ಥೆಯನ್ನೇ ಸ್ತಬ್ಧ ಮಾಡುವ ತಾಕತ್ತನ್ನೂ ಹೊಂದಿರಲಿದೆ. ಸಾಲದ್ದಕ್ಕೆ ಮಾನವ ರಹಿತ ಡ್ರೋನ್ ಗಳನ್ನು ಮಿಂಚಿನ ವೇಗದಲ್ಲಿ ಚಿಂದು ಉಡಾಯಿಸುವ ಶಕ್ತಿ ಕೂಡಾ ಈ ಮೈಕ್ರೋವೇವ್ ಹೈ ಎನರ್ಜಿ ಅಸ್ತ್ರಕ್ಕಿರಲಿದೆ.

ಎಲೆಕ್ಟ್ರೋ ಮ್ಯಾಗ್ನೆಟಿಕ್ ವೆಪನ್

ಇಎಂಪಿ ಅಂತಲೇ ಕರೆಸಿಕೊಳ್ತಿರೋ ಎಲೆಕ್ಟ್ರೋ ಮ್ಯಾಗ್ನೆಟಿಕ್ ಅಸ್ತ್ರ ಇದೀಗ ಪ್ರಯೋಗಾಲಯದಲ್ಲಿ ಸಿದ್ಧಗೊಳ್ತಿದೆ. ಡಿಆರ್ ಡಿಒನ ಕನಸಿನ ಕೂಸಾದ ಈ ಇಎಂಪಿ ಅಸ್ತ್ರ ಅತ್ಯಂತ ಪ್ರಭಲ ತರಂಗಾಂತರಗಳನ್ನು ರೂಪಿಸುತ್ತೆ. ಇದರ ಪರಿಣಾಮ ಎದುರಾಳಿಗಳ ಎಲ್ಲ ಎಲೆಕ್ಟ್ರಾನಿಕ್ ಉಪಕರಗಳು ಸ್ತಬ್ಧವಾಗಬಲ್ಲವು. ಅಣ್ವಸ್ತ್ರ ಲಾಂಚ್ ಮಾಡುವ ಕಮಾಂಡ್ ಸೆಂಟರ್ ಗಳನ್ನು ಕೂಡಾ ಈ ಅಸ್ತ್ರ ಸಂಪೂರ್ಣ ನಿರ್ಜೀವ ಮಾಡಬಲ್ಲದು. ಅಷ್ಟೇ ಅಲ್ಲಾ ಶತ್ರುಗಳ ಸಂವಹನ ನೆಟ್ ವರ್ಕನ್ನೇ ಚಿಂದಿ ಉಡಾಯಿಸಬಲ್ಲದಾಗಿದ್ದು, ಭೂಮಿಯಿಂದಲೇ ಉಪಗ್ರಹಗಳನ್ನು ಸಂಪರ್ಕ ರಹಿತ ಮಾಡುವ ತಾಕತ್ತು ಹೊಂದಿರಲಿದೆ. ಈ ಅಸ್ತ್ರಗಳು ಸೇನೆಯ ಬತ್ತಳಿಕೆ ಸೇರಿದ್ರೆ ಭಾರತವೂ ಅಮೆರಿಕ, ಚೀನಾ,ರಷ್ಯಾದಂಥಾ ಬಲಿಷ್ಠ ಸೇನೆಗಳ ಸಾಲಲ್ಲಿ ನಿಲ್ಲಲಿದೆ. ಒಟ್ನಲ್ಲಿ ಸುಖಾಸುಮ್ಮನೆ ಭಾರತವನ್ನು ಕೆಣಕೋ ತಪ್ಪನ್ನ ಪಾಕ್ ಮಾಡಿದ್ರೆ ಈ ಬಾರಿ ಇನ್ನಿಲ್ಲದಂತೆ ಸಮಾಧಿಯಾಗೋದಂತೂ ಸತ್ಯ.