ಬೆಂಗಳೂರು: ಷೇರು ಮಾರುಕಟ್ಟೆಯು ಸತತವಾಗಿ ಕುಸಿತ ಕಾಣುತ್ತಿದೆ. ಜಾಗತಿಕ ರಾಜಕೀಯ ಸಂಘರ್ಷ, ಡೊನಾಲ್ಡ್ ಟ್ರಂಪ್ ಸುಂಕದ ಸಮರ ಸೇರಿ ಹಲವು ಕಾರಣಗಳಿಂದ ಮಾರುಕಟ್ಟೆ ಕುಸಿಯುತ್ತಿದೆ. ಇದರಿಂದಾಗಿ ಹೆಚ್ಚಿನ ಜನ ಷೇರು ಮಾರುಕಟ್ಟೆಯಲ್ಲಿ ಹೂಡಿಕೆ ಮಾಡುವ ಬದಲು ಮ್ಯೂಚುವಲ್ ಫಂಡ್ ಎಸ್ಐಪಿಗಳಲ್ಲಿ (SIP) ಹೂಡಿಕೆ ಮಾಡುತ್ತಿದ್ದಾರೆ. ಹಾಗೊಂದು ವೇಳೆ ನೀವು ಕೂಡ ಎಸ್ಐಪಿಯಲ್ಲಿ ಹೂಡಿಕೆ ಮಾಡುವುದಾದರೆ, ತಿಂಗಳಿಗೆ 16,500 ರೂ. ಹೂಡಿಕೆ ಮೂಲಕ 15 ವರ್ಷಗಳಲ್ಲಿ ಒಂದು ಕೋಟಿ ರೂ.ಗಿಂತ ಅಧಿಕ ಹಣವನ್ನು ಗಳಿಸಬಹುದಾಗಿದೆ.
ಮಾರುಕಟ್ಟೆ ಕುಸಿತದಿಂದ ಈಗ ಮ್ಯೂಚುವಲ್ ಫಂಡ್ ಎಸ್ಐಪಿಗಳಿಂದ ಹೆಚ್ಚಿನ ರಿಟರ್ನ್ಸ್ ಸಿಗದಿದ್ದರೂ ಸುದೀರ್ಘ ಅವಧಿ ದೃಷ್ಟಿಯಿಂದ ಎಸ್ಐಪಿಯು ಉತ್ತಮವಾಗಿದೆ. ಮಗುವಿನ ಭವಿಷ್ಯ, ಉನ್ನತ ಶಿಕ್ಷಣ, ಮಗಳ ಮದುವೆ ಸೇರಿ ಹಲವು ಗುರಿಗಳಿಗಾಗಿ ಮ್ಯೂಚುವಲ್ ಫಂಡ್ ಎಸ್ಐಪಿಯನ್ನು ಆಯ್ಕೆ ಮಾಡಿಕೊಳ್ಳಬಹುದಾಗಿದೆ.
ತಿಂಗಳಿಗೆ 16,500 ರೂ. ಎಸ್ಐಪಿ ಮಾಡಿದರೆ 15 ವರ್ಷಕ್ಕೆ ನೀವು ಒಟ್ಟು 29.70 ಲಕ್ಷ ರೂ. ಹೂಡಿಕೆ ಮಾಡಿದಂತೆ ಆಗುತ್ತದೆ. ಆದರೆ, ರಿಟರ್ನ್ಸ್ ಜತೆಗೆ ನಿಮಗೆ 1,01,70,032 ರೂ. ಸಿಗುತ್ತದೆ. ಅಂದರೆ, ಇದು ಭವಿಷ್ಯಕ್ಕಾಗಿ ಸ್ಮಾರ್ಟ್ ಉಳಿತಾಯ ಮತ್ತು ಬಲವಾದ ಹಣಕಾಸು ಯೋಜನೆಯಾಗಿರಬಹುದು. ಸರಳವಾಗಿ ಹೇಳುವುದಾದರೆ, ನಿಮ್ಮ ಹೂಡಿಕೆ 29,70,000 ರೂ. ಆಗಿರುತ್ತದೆ, ಇದರಲ್ಲಿ ನಿಮ್ಮ ಲಾಭ 72,00,032 ರೂ. ಆಗಿರುತ್ತದೆ. ಶೇ.15ರಷ್ಟು ರಿಟರ್ನ್ಸ್ ಎಂದರೂ 1.01 ಕೋಟಿ ರೂ. ನಿಮ್ಮದಾಗುತ್ತದೆ.
ಹೆಚ್ಚುತ್ತಿರುವ ಹಣದುಬ್ಬರ ಮತ್ತು ಮಕ್ಕಳ ಶಿಕ್ಷಣದ ಮೇಲಿನ ಹೆಚ್ಚುತ್ತಿರುವ ವೆಚ್ಚಗಳನ್ನು ಗಮನದಲ್ಲಿಟ್ಟುಕೊಂಡು ಹೂಡಿಕೆ ಮಾಡಬೇಕಾಗಿದೆ. ಇದಕ್ಕೆ ಸರಿಯಾದ ಹಣಕಾಸು ಯೋಜನೆ ಬಹಳ ಮುಖ್ಯ. ವ್ಯವಸ್ಥಿತವಾದ ಹಣಕಾಸು ಯೋಜನೆ ಇಲ್ಲದೆ, ಮಕ್ಕಳ ಖರ್ಚುಗಳನ್ನು ನಿರ್ವಹಿಸಲು ಸಾಧ್ಯವಿಲ್ಲ ಎಂಬುದು ತಜ್ಞರ ಅಂಬೋಣವಾಗಿದೆ.
ಗಮನಿಸಿ: ಮ್ಯೂಚುವಲ್ ಫಂಡ್ ಎಸ್ಐಪಿ ಹೂಡಿಕೆಯಲ್ಲೂ ರಿಸ್ಕ್ ಇರುತ್ತದೆ. ಇಲ್ಲಿ ನಿಮಗೆ ಲೆಕ್ಕಾಚಾರವು ಮಾಹಿತಿ ದೃಷ್ಟಿಯಿಂದ ಅಷ್ಟೆ ನೀಡಿದ್ದೇವೆ. ಮಾರುಕಟ್ಟೆ ಏರಿಳಿತಗಳ ಆಧಾರದ ಮೇಲೆ ಹೂಡಿಕೆ ರಿಟರ್ಸ್ ದೊರೆಯುತ್ತದೆ. ಹಾಗಾಗಿ, ಇದನ್ನು ಮಾಹಿತಿ ದೃಷ್ಟಿಯಿಂದ ಮಾತ್ರ ನೋಡಬೇಕೇ ಹೊರತು, ಶಿಫಾರಸು ದೃಷ್ಟಿಯಿಂದ ಅಲ್ಲ. ಹೂಡಿಕೆ ಮಾಡುವ ಮುನ್ನ ಕಡ್ಡಾಯವಾಗಿ ತಜ್ಞರ ಸಲಹೆ-ಸೂಚನೆ ಪಡೆಯಿರಿ.
