ಟೊರೊಂಟೊ – ಮಗೆಲ್ಲನ್ ಏರೋಸ್ಪೇಸ್ ಕಾರ್ಪೊರೇಷನ್ (“ಮಗೆಲ್ಲನ್”) ಸಂಸ್ಥೆಯು ಕರ್ನಾಟಕದ ಬೆಳಗಾವಿ ಏರೋಸ್ಪೇಸ್ ಕ್ಲಸ್ಟರ್‌ ನಲ್ಲಿ (ಬಿಎಸಿ) 50/ 50 ಜಂಟಿ ಮಾಲೀಕತ್ವದ ಏರೋಸ್ಪೇಸ್ ಸ್ಯಾಂಡ್ ಕಾಸ್ಟಿಂಗ್ ಘಟಕವನ್ನು ಸ್ಥಾಪಿಸಲು ಉದ್ಯಮ ಯೋಜನೆಯನ್ನು ರೂಪಿಸುವ ನಿಟ್ಟಿನಲ್ಲಿ ಕಾರ್ಯ ನಿರ್ವಹಿಸುವ ಉದ್ದೇಶದಿಂದ ಏಕಸ್ ಪ್ರೈವೇಟ್ ಲಿಮಿಟೆಡ್ (“ಏಕಸ್”) ಕಂಪನಿಯ ಜೊತೆಗೆ ಇಂದು ತಿಳಿವಳಿಕೆ ಪತ್ರಕ್ಕೆ (ಎಂಓಯು) ಸಹಿ ಮಾಡಿದೆ.
ಈ ಉದ್ದೇಶಿತ ಘಟಕವು ಬೆಳೆಯುತ್ತಿರುವ ಏರೋಸ್ಪೇಸ್ ಉದ್ಯಮದ ಸ್ಯಾಂಡ್ ಕಾಸ್ಟಿಂಗ್ ಬೇಡಿಕೆಗಳನ್ನು ಪೂರೈಸುವ ಗುರಿಯನ್ನು ಹೊಂದಿದೆ. ಈ ಹೆಚ್ಚುವರಿ ಸ್ಯಾಂಡ್ ಕಾಸ್ಟಿಂಗ್ ಸಾಮರ್ಥ್ಯವು ವಾಣಿಜ್ಯ ಮತ್ತು ರಕ್ಷಣಾ ಕ್ಷೇತ್ರಗಳಿಗೆ ಸಹಾಯ ಮಾಡಲಿದೆ.
ಪ್ರಸ್ತುತ, ಭಾರತದಲ್ಲಿ ಏರೋಸ್ಪೇಸ್- ಪ್ರಮಾಣೀಕೃತ ಎನ್‌ಎಡಿಸಿಎಪಿ ಸ್ಯಾಂಡ್ ಕಾಸ್ಟಿಂಗ್ ಘಟಕಗಳ ಸಂಖ್ಯೆ ಬಹಳ ಕಡಿಮೆ ಇದೆ. ಈ ಉದ್ದೇಶಿತ ಹೊಸ ಯೋಜನೆಯು ಆಗ್ನೇಯ ಏಷ್ಯಾ ಭಾಗದಲ್ಲಿ ಸ್ಯಾಂಡ್ ಕಾಸ್ಟಿಂಗ್ ಸಾಮರ್ಥ್ಯವನ್ನು ಹೆಚ್ಚಿಸುವ ಗುರಿಯನ್ನು ಹೊಂದಿದೆ. ಮಗೆಲ್ಲನ್ ಕಂಪನಿಯು ಈಗಾಗಲೇ ಉತ್ತರ ಅಮೆರಿಕಾದಲ್ಲಿ ಸ್ಯಾಂಡ್ ಕಾಸ್ಟಿಂಗ್ ನ ಅತ್ಯುತ್ಕೃಷ್ಟ ಕೇಂದ್ರವನ್ನು ಹೊಂದಿದೆ. ಅಲ್ಲಿ ಮಗೆಲ್ಲನ್ ಸಂಸ್ಥೆಯು ರಾಸಾಯನಿಕ ಆಧರಿತ ಸ್ಯಾಂಡ್ ಪ್ರೊಸೆಸ್ ಅನ್ನು ಬಳಸಿಕೊಂಡು ಸಂಕೀರ್ಣ ಆಕಾರಗಳನ್ನು ರೂಪಿಸುವ ಸಾಮರ್ಥ್ಯ ಹೊಂದಿದೆ. ಉತ್ತರ ಅಮೆರಿಕಾದ ಘಟಕಗಳು 3ಡಿ ಸ್ಯಾಂಡ್ ಪ್ರಿಂಟಿಂಗ್, ರೋಬೊಟಿಕ್ಸ್, ಡಿಜಿಟಲ್ ರೇಡಿಯೊಗ್ರಫಿ ಮತ್ತು ಅಟೋಮೇಟೆಡ್ ಡಿಫರೆನ್ಷಿಯಲ್ ಪ್ರೆಷರ್ ಬಾಟಮ್ ಪೋರಿಂಗ್ ಮುಂತಾದ ನವೀನ ತಂತ್ರಜ್ಞಾನಗಳಲ್ಲಿ ಅದ್ಭುತ ಪರಿಣತಿಯನ್ನು ಹೊಂದಿವೆ.
ಕಳೆದ ಒಂದು ದಶಕದಲ್ಲಿ ಭಾರತದ ಏರೋಸ್ಪೇಸ್ ಕ್ಷೇತ್ರವು ಭಾರಿ ಬೆಳವಣಿಗೆ ಕಂಡಿದೆ. ಸರ್ಕಾರದ ಮೇಕ್ ಇನ್ ಇಂಡಿಯಾ ಮತ್ತು ಉಡಾನ್ ಯೋಜನೆಗಳು, ಖಾಸಗಿ ಕ್ಷೇತ್ರದಲ್ಲಿ ಉಂಟಾಗಿರುವ ಅಭಿವೃದ್ಧಿ ಮತ್ತು ಹೆಚ್ಚುತ್ತಿರುವ ವಿಮಾನ ಯಾನ ಬೇಡಿಕೆ ಏರೋಸ್ಪೇಸ್ ಕ್ಷೇತ್ರದ ಬೆಳವಣಿಗೆಗೆ ಮೂಲ ಕಾರಣವಾಗಿವೆ. ಭಾರತದಲ್ಲಿ ವಿಮಾನ ಪ್ರಯಾಣಕ್ಕೆ ಬೇಡಿಕೆ ಜಾಸ್ತಿಯಾಗಿದ್ದು, ಭಾರತವು ವಿಶ್ವದ ಅತಿ ವೇಗವಾಗಿ ಬೆಳೆಯುತ್ತಿರುವ ವಾಯುಯಾನ ಮಾರುಕಟ್ಟೆಗಳಲ್ಲಿ ಒಂದಾಗಿದೆ.
2007ರಲ್ಲಿ ಏಕಸ್ ಮತ್ತು ಮಗೆಲ್ಲನ್ ಜಂಟಿಯಾಗಿ ಏರೋಸ್ಪೇಸ್ ಪ್ರೊಸೆಸಿಂಗ್ ಇಂಡಿಯಾ (ಎಪಿಓ) ಅನ್ನು ಸ್ಥಾಪಿಸಿದವು. ಇದು ಭಾರತದಲ್ಲಿ ಏರ್‌ ಬಸ್ ಮತ್ತು ಬೋಯಿಂಗ್ ಎರಡರಿಂದಲೂ ಮೊದಲ ಬಾರಿಗೆ ಮಾನ್ಯತೆ ಪಡೆದ ಥರ್ಡ್ ಪಾರ್ಟಿ ಘಟಕವಾಗಿದೆ ಎಂಬುದು ಗಮನಾರ್ಹ. ಏರೋಸ್ಪೇಸ್ ಪ್ರೊಸೆಸಿಂಗ್ ಇಂಡಿಯಾ ಭಾರತದಲ್ಲಿ ಸುಲಭವಾಗಿ ದೊರಕದ ವಿನೂತನ ಸರ್ಫೇಸ್ ಟ್ರೀಟ್ ಮೆಂಟ್ ಉತ್ಪನ್ನಗಳನ್ನು ಒದಗಿಸುತ್ತಿದೆ.
2024ರಲ್ಲಿ ಮಗೆಲ್ಲನ್ ಮತ್ತು ಏಕಸ್ ಕರ್ನಾಟಕದಲ್ಲಿ ವಿಮಾನ ಎಂಜಿನ್ ಗಳ ನಿರ್ವಹಣೆ, ದುರಸ್ತಿ ಮತ್ತು ಎಂಜಿನ್ ನ ಬಿಡಿಭಾಗಗಳ ಪರಿಶೀಲನೆ ಮತ್ತು ರಿಪೇರಿ ಮಾಡುವ ಜಂಟಿ ಮಾಲೀಕತ್ವದ ಘಟಕವನ್ನು ಸ್ಥಾಪಿಸಲು ವ್ಯವಹಾರ ಯೋಜನೆ ರೂಪಿಸುವ ನಿಟ್ಟಿನಲ್ಲಿ ಪರಿಶೀಲನೆ ನಡೆಸಲು ತಿಳುವಳಿಕೆ ಪತ್ರಕ್ಕೆ ಸಹಿ ಹಾಕಿದ್ದುವು. ಈ ಯೋಜನೆಗಳು ಏಕಸ್ ಮತ್ತು ಮಗೆಲ್ಲನ್ ನ ಗಾಢ ಸಂಬಂಧದ ಅಡಿಪಾಯವನ್ನು ಪ್ರದರ್ಶಿಸುತ್ತಿದ್ದು, ಈ ಸಹಭಾಗಿತ್ವದ ಮೂಲಕ ಜಾಗತಿಕ ಗ್ರಾಹಕರಿಗೆ ಪರಿಣಾಮಕಾರಿ ಉತ್ಪನ್ನಗಳನ್ನು ನೀಡುವ ಗುರಿಯನ್ನು ಹೊಂದಲಾಗಿದೆ.
