ಇ ಖಾತಾ ಸಿಗದೆ ಪರದಾಡುತ್ತಿರುವ ಆಸ್ತಿ ಮಾಲೀಕರು!

ಬೆಂಗಳೂರು: ಇ ಖಾತಾ ಸಿಗದೆ ಆಸ್ತಿ ಮಾಲೀಕರು ಸಿಲಿಕಾನ್ ಸಿಟಿಯಲ್ಲಿ ಪರದಾಡುತ್ತಿರುವ ಸ್ಥಿತಿ ಎದುರಾಗಿದೆ. ಈ ಕುರಿತು ಕೋರ್ಟ್ ಮೆಟ್ಟಿಲು ಏರಲು ಕೂಡ ಮಾಲೀಕರು ಮುಂದಾಗಿದ್ದಾರೆ.

ಬಿಬಿಎಂಪಿ ತನ್ನ ಪೂರ್ಣ ಪ್ರಮಾಣದ ಸಿದ್ದತೆ ಇಲ್ಲದೆ ಇ ಖಾತಾ ವಿತರಣೆ ಆರಂಭಿಸಿದೆ. ಈಗ ನಾಲ್ಕೈದು ತಿಂಗಳು ಕಳೆದರೂ ನಿರೀಕ್ಷಿತ ಮಟ್ಟದಲ್ಲಿ ಅಂತಿಮ ಇ ಖಾತಾ ನೀಡುವುದಕ್ಕೆ ಸಾಧ್ಯವಾಗುತ್ತಿಲ್ಲ. ಹೀಗಾಗಿ ಆಸ್ತಿ ಮಾಲೀಕರು ಮಾತ್ರ ಬಿಬಿಎಂಪಿಯ ಕಂದಾಯ ಕಚೇರಿಗೆ ಅಲೆದಾಟ ನಡೆಸಿದ್ದಾರೆ.

ನಗರದಲ್ಲಿ ಬರೋಬ್ಬರಿ 21 ಲಕ್ಷಕ್ಕೂ ಅಧಿಕ ಆಸ್ತಿಗಳು ಅಧಿಕೃತವಾಗಿದ್ದು, ಇನ್ನೂ ಐದಾರು ಲಕ್ಷ ಆಸ್ತಿಗಳು ಇವೆ. ಆದರೂ ಅಂತಿಮ ಇ ಖಾತಾ ಪಡೆದಿರುವವರ ಪ್ರಮಾಣ ಶೇ. 10ಕ್ಕಿಂತ ಕಡಿಮೆ ಇದೆ. ಈ ವಿಷಯವಾಗಿ ಬಿಬಿಎಂಪಿಯನ್ನು ಪ್ರಶ್ನಿಸಿದರೆ, ಬಿಬಿಎಂಪಿ ಮಾತ್ರ ಎಲ್ಲಾ ಆಸ್ತಿಗಳ ಖಾತಾಗಳನ್ನು ಡಿಜಿಟಲೀಕರಣ ಮಾಡಲಾಗಿದೆ. ಜನರು ಅಂತಿಮ ಇ ಖಾತಾ ಪಡೆಯುವುದಕ್ಕೆ ಮುಂದಾಗುತ್ತಿಲ್ಲ ಎನ್ನುತ್ತಿದೆ. ಆದರೆ, ವಾಸ್ತವವಾಗಿ ಬಿಬಿಎಂಪಿಯು ಇ ಖಾತಾ ವಿತರಣೆಗೆ ಸಿದ್ದತೆ ಇಲ್ಲದೆ ಅನುಷ್ಠಾನ ಮಾಡಿದೆ.

ವಾಸ್ತವಾಗಿ ಇನ್ನೂ ಹಲವು ಆಸ್ತಿಗಳ ಖಾತಾಗಳು ಸ್ಕ್ಯಾನ್ ಆಗಿಲ್ಲ. ದತ್ತಾಂಶ ಡಿಜಿಟಲೀಕರಣ ಆಗಿಲ್ಲ. ಹೀಗಾಗಿ, ಆಸ್ತಿ ಮಾಲೀಕರಿಗೆ ಕರಡು ಇ ಖಾತಾ ಡೌನ್‌ಲೋಡ್‌ ಆಗುತ್ತಿಲ್ಲ. ಹೀಗಾಗಿ ಇ ಖಾತಾಕ್ಕಾಗಿ ಆಸ್ತಿ ಮಾಲೀಕ ಕೋರ್ಟ್ ಗೆ ಹೋಗುತ್ತಿದ್ದಾರೆ.

ವಿದೇಶಕ್ಕೆ ತರಳಬೇಕಾದವರು ನಿಗದಿತ ಅವಧಿಯ ಒಳಗೆ ಇ ಖಾತಾ ದೊರೆಯದೆ ಕೋರ್ಟ್‌ ಗೆ ಹೋಗಿ ಆದೇಶ ಪಡೆದು ಇ ಖಾತಾ ಪಡೆದಿರುವ ಪ್ರಸಂಗವೊಂದು ಬೆಳಕಿಗೆ ಬಂದಿದೆ. ಜೆ.ಪಿ.ನಗರ ಸಹಾಯ ಕಂದಾಯ ಕಚೇರಿ ವ್ಯಾಪ್ತಿಯ ಬಿಡಿಎ ಆಸ್ತಿಯ ಮಾಲೀಕರೊಬ್ಬರು ಕೋರ್ಟ್ ಗೆ ಹೋಗಿ ಇ ಖಾತಾ ಪಡೆದಿದ್ದಾರೆ.

ಇ ಖಾತಾ ಅಂಕಿ-ಸಂಖ್ಯೆಗಳು
ಇ ಖಾತಾಕ್ಕಾಗಿ ವೆಬ್ ಸೈಟ್ ಗೆ ಭೇಟಿ ಮಾಡಿದ ಸಂಖ್ಯೆ 1.45 ಕೋಟಿ
ಕರಡು ಇ-ಖಾತಾ ಡೌನ್ಲೋಡ್ ಸಂಖ್ಯೆ- 10.34 ಲಕ್ಷ
ಅಂತಿಮ ಇ-ಖಾತಾಕ್ಕೆ ಅರ್ಜಿ ಸಂಖ್ಯೆ-1.46 ಲಕ್ಷ
ಅಂತಿಮ ಇ-ಖಾತಾ ಡೌನ್ಲೋಡ್ ಸಂಖ್ಯೆ- 1.42 ಲಕ್ಷ

ವಲಯವಾರು ಇ ಖಾತಾ ವಿತರಣೆ ಸಂಖ್ಯೆ
ಬೊಮ್ಮನಹಳ್ಳಿ- 24,502
ದಾಸರಹಳ್ಳಿ- 8,177
ಪೂರ್ವ- 14,224
ಮಹದೇವಪುರ-18,375
ಆರ್‌ಆರ್‌ನಗರ- 22,245
ದಕ್ಷಿಣ-18,749
ಪಶ್ಚಿಮ- 14,143
ಯಲಹಂಕ-21,589