ಪತ್ನಿಯ ಮುಖವನ್ನು ಏಕೆ ನೋಡಬಾರದು?: ಸುಬ್ರಹ್ಮಣ್ಯನ್ ಗೆ ಜ್ವಾಲಾಗುಟ್ಟಾ ಪ್ರಶ್ನೆ
– ದೊಡ್ಡವರಿಂದ ಇಂಥಾ ಮಾತೇ?: ನಟಿ ದೀಪಿಕಾ ಪಡುಕೋಣೆ ಗರಂ
– ಪರಿಶ್ರಮ ಇರಲಿ, ಗುಲಾಮಗಿರಿ ಬೇಡ ಎಂದ ಹರ್ಷ್ ಗೋಯೆಂಕಾ
– ವಾರಕ್ಕೆ 90 ದಿನ ಕೆಲಸ ಮಾಡಿ ಎಂದ ಸುಬ್ರಹ್ಮಣ್ಯನ್ ಗೆ ತಪರಾಕಿ
ನವದೆಹಲಿ: “ಮನೆಯಲ್ಲಿ ಎಷ್ಟು ಹೊತ್ತು ಪತ್ನಿಯ ಮುಖ ನೋಡಿಕೊಂಡು ಕೂರುತ್ತೀರಿ. ವಾರದಲ್ಲಿ 90 ಗಂಟೆ ಕೆಲಸ ಮಾಡಿ, ಭಾನುವಾರವೂ ದುಡಿಯಿರಿ” ಎಂಬ ಎಲ್ ಆಂಡ್ ಟಿ ಮುಖ್ಯಸ್ಥ ಎಸ್.ಎನ್.ಸುಬ್ರಹ್ಮಣ್ಯನ್ ಹೇಳಿಕೆ ಈಗ ಸಾಮಾಜಿಕ ಜಾಲತಾಣಗಳಲ್ಲಿ ವಿವಾದದ ಕಿಡಿ ಹೊತ್ತಿಸಿದೆ. ಸುಬ್ರಹ್ಮಣ್ಯನ್ ವಿರುದ್ಧ ಟೀಕೆಗಳ ಸುರಿಮಳೆಯೇ ಆಗುತ್ತಿದ್ದು, ದೀಪಿಕಾ ಪಡುಕೋಣೆ, ಜ್ವಾಲಾ ಗುಟ್ಟಾ, ಹರ್ಷ್ ಗೋಯೆಂಕಾ ಸೇರಿದಂತೆ ಹಲವು ಸೆಲೆಬ್ರಿಟಿಗಳು ಕೂಡ ಧ್ವನಿಯೆತ್ತಿದ್ದಾರೆ.
ಸುಬ್ರಹಣ್ಯನ್ ಹೇಳಿಕೆಯು “ಸ್ತ್ರೀದ್ವೇಷಿ” ಎಂದು ಟೀಕಿಸಿರುವ ಮಾಜಿ ಬ್ಯಾಡ್ಮಿಂಟನ್ ತಾರೆ ಜ್ವಾಲಾ ಗುಟ್ಟಾ,(Jwala gutta) “ಜನರು ಇನ್ನೂ ಮಾನಸಿಕ ಆರೋಗ್ಯ ಮತ್ತು ಮಾನಸಿಕ ವಿಶ್ರಾಂತಿಯನ್ನು ಗಂಭೀರವಾಗಿ ಪರಿಗಣಿಸದೇ ಇರುವುದನ್ನು ನೋಡಿದರೆ ಬೇಸರವಾಗುತ್ತದೆ. ಎಸ್.ಎನ್.ಸುಬ್ರಹ್ಮಣ್ಯನ್(SN Subrahmanyan) ಅವರ ಹೇಳಿಕೆಯಂತೂ ಸ್ತ್ರೀ ದ್ವೇಷದಿಂದ ಕೂಡಿದೆ. ಅಷ್ಟಕ್ಕೂ, ಅವರು ತಮ್ಮ ಪತ್ನಿಯ ಮುಖವನ್ನು ಏಕೆ ನೋಡಬಾರದು?” ಎಂದು ಖಾರವಾಗಿ ಪ್ರಶ್ನಿಸಿದ್ದಾರೆ.
ಇನ್ನು, ತಮ್ಮ ಇನ್ ಸ್ಟಾಗ್ರಾಂ ಖಾತೆಯಲ್ಲಿ ಸುಬ್ರಹ್ಮಣ್ಯನ್ ವಿರುದ್ಧ ಕಿಡಿಕಾರಿರುವ ಬಾಲಿವುಡ್ ನಟಿ ದೀಪಿಕಾ ಪಡುಕೋಣೆ, ‘ಇಷ್ಟು ಪ್ರಮುಖ ಹುದ್ದೆಯಲ್ಲಿರುವ ವ್ಯಕ್ತಿಗಳು ಇಂಥ ಹೇಳಿಕೆ ನೀಡುತ್ತಿರುವುದು ನಿಜಕ್ಕೂ ಅಚ್ಚರಿಯನ್ನು ಉಂಟುಮಾಡಿದೆ’ ಎಂದಿದ್ದಾರೆ.
ದೀಪಿಕಾ ಪಡುಕೋಣೆ ಹೇಳಿಕೆಯ ಬೆನ್ನಲ್ಲೇ ಉದ್ಯಮಿ ಹಾಗೂ ಆರ್ ಪಿಜಿ ಗ್ರೂಪ್ ಮುಖ್ಯಸ್ಥ ಹರ್ಷ್ ಗೋಯೆಂಕಾ ಅವರೂ ಸುಬ್ರಹ್ಮಣ್ಯನ್ ಅಭಿಪ್ರಾಯವನ್ನು ವಿರೋಧಿಸಿದ್ದಾರೆ. “ಸ್ಮಾರ್ಟ್ ಆಗಿ ಕೆಲಸ ಮಾಡಬೇಕೇ ಹೊರತು, ಗುಲಾಮರಾಗಿ ಅಲ್ಲ” ಎಂದು ಟ್ವೀಟ್ ಮಾಡಿದ್ದಾರೆ. “ವಾರಕ್ಕೆ 90 ದಿನ ಕೆಲಸವೇ? ಹಾಗಿದ್ದರೆ ಇನ್ನು Sunday ಯನ್ನು Sun-duty ಎಂದು ಬದಲಾಯಿಸಬಹುದಲ್ಲವೇ? ನಾನು ನಂಬುವುದು ಶ್ರಮವಹಿಸಿ, ಸ್ಮಾರ್ಟ್ ಆಗಿ ಕೆಲಸ ಮಾಡುವುದನ್ನು ಮಾತ್ರ. ಉದ್ಯೋಗ-ಜೀವನ ಸಮತೋಲನವೆಂಬುವುದು ಆಯ್ಕೆಯಲ್ಲ, ಅದು ಅತ್ಯವಶ್ಯಕವೂ ಹೌದು ಎಂದೂ ಗೋಯೆಂಕಾ ಬರೆದುಕೊಂಡಿದ್ದಾರೆ.
ಏನಿದು ವಿವಾದ?
ತಮ್ಮ ಉದ್ಯೋಗಿಗಳನ್ನು ಉದ್ದೇಶಿಸಿ ಎಲ್ ಆಂಡ್ ಟಿ ಮುಖ್ಯಸ್ಥ ಎಸ್.ಎನ್.ಸುಬ್ರಹ್ಮಣ್ಯನ್ (SN Subrahmanyan) ಅವರು ಮಾತನಾಡಿರುವ ವಿಡಿಯೋವೊಂದರಲ್ಲಿ ಅವರು, ‘ನಿಮ್ಮಿಂದ ಭಾನುವಾರವೂ ಕೆಲಸ ಮಾಡಿಸಬೇಕು ಎಂಬ ಯೋಚನೆ ನನದಿದೆ. ಆದರೆ ಅದು ಸಾಧ್ಯವಾಗುತ್ತಿಲ್ಲ ಎಂಬ ಬೇಸರವೂ ಇದೆ. ನಾನಂತೂ ಭಾನುವಾರವೂ ಕೆಲಸ ಮಾಡುತ್ತಿದ್ದೇನೆ. ನಿಮ್ಮಿಂದಲೂ ಕೆಲಸ ಮಾಡಿಸಲು ಸಾಧ್ಯವಾದರೆ ನಾನು ಹೆಚ್ಚು ಸಂತೋಷ ಪಡುತ್ತೇನೆ.
ಮನೆಯಲ್ಲಿ ಕುಳಿತು ಏನು ಮಾಡುತ್ತೀರಿ. ಎಷ್ಟು ಹೊತ್ತು ಹೆಂಡತಿಯ ಮುಖವನ್ನೇ ನೋಡುತ್ತಾ ಕುಳಿತಿರಲು ಸಾಧ್ಯ. ಕಚೇರಿಗೆ ಬಂದು ಕೆಲಸ ಮಾಡಿ ನಿಮ್ಮ ಸಾಮರ್ಥ್ಯವನ್ನು ಪ್ರದರ್ಶಿಸಿ’ ಎಂದು ಹೇಳಿದ್ದರು. ಈ ವಿಡಿಯೋ ತುಣುಕು ಸಾಮಾಜಿಕ ಜಾಲತಾಣಗಳಲ್ಲಿ ಕಾಡ್ಗಿಚ್ಚಿನಂತೆ ವ್ಯಾಪಿಸಿದ್ದು, ಸುಬ್ರಹ್ಮಣ್ಯನ್ ಹೇಳಿಕೆಗೆ ಪರ-ವಿರೋಧ ಪ್ರತಿಕ್ರಿಯೆಗಳು ವ್ಯಕ್ತವಾಗತೊಡಗಿವೆ. ಅದರಲ್ಲೂ ಬಹುತೇಕ ಮಂದಿ ಅವರ ವಾದವನ್ನು ಒಪ್ಪದೇ, ಟೀಕಾ ಪ್ರಹಾರ ಆರಂಭಿಸಿದ್ದಾರೆ.
