ಅಭಿಮಾನಿಗಳಲ್ಲಿ ಈ ರೀತಿ ಕರೆಯಬೇಡಿ ಎಂದು ಮನವಿ ಮಾಡಿದ ಕಮಲ್ ಹಾಸನ್

ಚೆನ್ನೈ: ಭಾರತೀಯ ಚಿತ್ರರಂಗದಲ್ಲಿ ತಮ್ಮದೆಯಾದ ಛಾಪು ಮೂಡಿಸಿದ ನಟ ಕಮಲ್ ಹಾಸನ್ ( Kamal Haasan ) ಈಗ ತಮ್ಮ ಅಭಿಮಾನಿಗಳಲ್ಲಿ ಮನವಿಯೊಂದನ್ನು ಮಾಡಿದ್ದಾರೆ.

ಅಭಿಮಾನಿಗಳು ಸದ್ಯ ಅವರನ್ನು ಪ್ರೀತಿಯಿಂದ ‘ಉಳಗನಾಯಗನ್ (ವಿಶ್ವನಾಯಕ)’ ಎಂದು ಕರೆಯುತ್ತಾರೆ. ಆದರೆ, ನನ್ನನ್ನು ಹಾಗೆ ಕರೆಯಬೇಡಿ. ಕಮಲ್ ಅಥವಾ ಕೆಎಚ್ ಎಂದು ಕರೆದರೆ ಸಾಕು ಎಂದಿದ್ದಾರೆ.

ತಮ್ಮ ಎಕ್ಸ್ ಖಾತೆಯಲ್ಲಿ ಪತ್ರವೊಂದನ್ನು ಪೋಸ್ಟ್ ಮಾಡಿರುವ ಕಮಲ್ ಹಾಸನ್, ನನ್ನ ಮೇಲಿನ ಪ್ರೀತಿಯಿಂದ ನೀವು ನನಗೆ ‘ಉಳಗನಾಯಗನ್’ ಸೇರಿದಂತೆ ಅನೇಕ ಬಿರುದುಗಳನ್ನು ನೀಡಿದ್ದೀರಿ. ಸಹ ಕಲಾವಿದರು, ಅಭಿಮಾನಿಗಳು ಮತ್ತು ಜನರ ಮೆಚ್ಚುಗೆಯಿಂದ ನನಗೆ ಸಂತೋಷವಾಗಿದೆ. ನಿಮ್ಮ ಪ್ರೀತಿಗೆ ನಾನು ಮನಸೋತಿದ್ದೇನೆ ಮತ್ತು ನಿಮ್ಮ ಪ್ರೀತಿಗೆ ನಾನು ಸದಾ ಚಿರಋಣಿಯಾಗಿರುತ್ತೇನೆ. ಆದರೆ, ಸಿನಿಮಾ ಕಲೆಯು ಯಾವುದೇ ವ್ಯಕ್ತಿಗಿಂತ ದೊಡ್ಡದಲ್ಲ. ನಾನು ಹೆಚ್ಚು ಕಲಿಯಲು ಮತ್ತು ಕಲೆಯಲ್ಲಿ ಬೆಳೆಯಲು ಬಯಸುವ ಜೀವಮಾನದ ವಿದ್ಯಾರ್ಥಿಯಾಗಿರಲು ಇಷ್ಟಪಡುತ್ತೇನೆ. ಪ್ರತಿಭಾವಂತ ಕಲಾವಿದರು, ತಂತ್ರಜ್ಞರು ಮತ್ತು ಅಭಿಮಾನಿಗಳ ಸಮ್ಮಿಶ್ರಣವಾಗಿ ಸಿನಿಮಾ ಕೂಡ ಇತರ ಕಲೆಗಳಂತೆ ಎಲ್ಲರಿಗೂ ಸಂಬಂಧಿಸಿದೆ. ಕಲಾವಿದನಿಗಿಂತ ಕಲೆ ಶ್ರೇಷ್ಠ. ಅದಕ್ಕಾಗಿ ತುಂಬಾ ಯೋಚಿಸಿ ನಿರ್ಧಾರ ತೆಗೆದುಕೊಳ್ಳಬೇಕಾಯಿತು.

ನಾನು ಮೇಲೆ ತಿಳಿಸಿದಂತೆ ಅಂತಹ ಶೀರ್ಷಿಕೆಗಳು ಮತ್ತು ಬಿರುದುಗಳನ್ನು ತ್ಯಜಿಸುವುದು ತುಂಬಾ ಮುಖ್ಯವಾಗಿದೆ. ಆದರೆ, ಆ ಬಿರುದು ಕೊಟ್ಟವರಿಗೆ ನಾನು ಅಗೌರವ ತೋರುತ್ತಿಲ್ಲ. ನನ್ನನ್ನು ಪ್ರೀತಿಸುವ ಎಲ್ಲರಲ್ಲೂ ಒಂದು ಮನವಿ ಮಾಡುತ್ತೇನೆ. ಅಭಿಮಾನಿಗಳು, ಮಾಧ್ಯಮ ಸ್ನೇಹಿತರು, ಚಿತ್ರರಂಗದ ಜನರು, ಮಕ್ಕಳ್ ನೀತಿ ಮಯ್ಯಂ ಪಕ್ಷದ ಕಾರ್ಯಕರ್ತರು ಮತ್ತು ಸಹ ಭಾರತೀಯರು ನನ್ನನ್ನು ಕಮಲ್ ಹಾಸನ್, ಕಮಲ್ ಅಥವಾ ಕೆಎಚ್ ಎಂದು ಮಾತ್ರ ಕರೆಯಿರಿ ಎಂದು ಮನವಿ ಮಾಡಿದ್ದಾರೆ.