ಸೆಂಟ್ ಪೀಟರ್ಸ್ಬರ್ಗ್ (ರಷ್ಯಾ): ಭಾರತದಲ್ಲಿ ಸಾಫ್ಟ್ವೇರ್ ಡೆವಲಪರ್ ಆಗಿದ್ದ 26 ವರ್ಷದ ಯುವಕನೊಬ್ಬ, ಈಗ ರಷ್ಯಾದಲ್ಲಿ ಬೀದಿ ಗುಡಿಸುವ ಕೆಲಸ ಮಾಡುತ್ತಿರುವ ಅಚ್ಚರಿಯ ಸಂಗತಿ ಬೆಳಕಿಗೆ ಬಂದಿದೆ. ರಷ್ಯಾದಲ್ಲಿ ಕಾರ್ಮಿಕರ ಕೊರತೆ ಇರುವುದರಿಂದ, ಭಾರತದ ವಲಸಿಗರು ಅಲ್ಲಿನ ಬೀದಿಗಳನ್ನು ಸ್ವಚ್ಛಗೊಳಿಸುವ ಕಾಯಕದಲ್ಲಿ ತೊಡಗಿಸಿಕೊಂಡಿದ್ದಾರೆ.
ಟೆಕ್ಕಿಯಿಂದ ಬೀದಿ ಗುಡಿಸುವವನಾಗಿ ಬದಲಾವಣೆ
ಮುಖೇಶ್ ಮಂಡಲ್ (26) ಎಂಬ ಭಾರತೀಯ ಯುವಕ, ತಾನು ಭಾರತದಲ್ಲಿ ಸಾಫ್ಟ್ವೇರ್ ಡೆವಲಪರ್ ಆಗಿ ಕೆಲಸ ಮಾಡುತ್ತಿದ್ದೆ ಎಂದು ಹೇಳಿಕೊಂಡಿದ್ದಾನೆ. ರಷ್ಯಾದ ಸುದ್ದಿ ಸಂಸ್ಥೆಯಾದ ‘ಫಾಂಟಾಂಕಾ’ ಜೊತೆ ಮಾತನಾಡಿದ ಮುಖೇಶ್, “ನಾನು ಈ ಹಿಂದೆ ಮೈಕ್ರೋಸಾಫ್ಟ್ನಂತಹ ಕಂಪನಿಗಳಿಗೆ ಕೆಲಸ ಮಾಡಿದ್ದೇನೆ. ಎಐ (AI), ಚಾಟ್ಬಾಟ್ ಮತ್ತು ಜಿಪಿಟಿ (GPT)ಯಂತಹ ಹೊಸ ತಂತ್ರಜ್ಞಾನಗಳನ್ನು ಬಳಸಿದ್ದೇನೆ. ಮೂಲತಃ ನಾನೊಬ್ಬ ಡೆವಲಪರ್,” ಎಂದು ತಿಳಿಸಿದ್ದಾನೆ.
ಆದರೆ, ಮುಖೇಶ್ ಮೈಕ್ರೋಸಾಫ್ಟ್ ಕಂಪನಿಯ ನೇರ ಉದ್ಯೋಗಿಯಾಗಿದ್ದನೇ ಅಥವಾ ಮೈಕ್ರೋಸಾಫ್ಟ್ ಉತ್ಪನ್ನಗಳನ್ನು ಬಳಸುವ ಕಂಪನಿಯಲ್ಲಿ ಕೆಲಸ ಮಾಡುತ್ತಿದ್ದನೇ ಎಂಬುದು ಸ್ಪಷ್ಟವಾಗಿಲ್ಲ.
ಕೆಲಸ ಯಾವುದಾದರೇನು?
ತನ್ನ ಪ್ರಸ್ತುತ ಕೆಲಸದ ಬಗ್ಗೆ ಹೆಮ್ಮೆಯಿಂದಲೇ ಮಾತನಾಡಿರುವ ಮುಖೇಶ್, “ನಾನು ಭಾರತೀಯ. ಒಬ್ಬ ಭಾರತೀಯನಿಗೆ ಕೆಲಸ ಯಾವುದು ಎಂಬುದು ಮುಖ್ಯವಲ್ಲ. ಕಾಯಕವೇ ಕೈಲಾಸ (Work is for God). ನಾವು ಎಲ್ಲಿ ಬೇಕಾದರೂ ಕೆಲಸ ಮಾಡಬಹುದು, ಅದು ಶೌಚಾಲಯವಾಗಲಿ ಅಥವಾ ಬೀದಿಯಾಗಲಿ. ಇದು ನನ್ನ ಕೆಲಸ ಮತ್ತು ಜವಾಬ್ದಾರಿ, ಇದನ್ನು ಸಾಧ್ಯವಾದಷ್ಟು ಉತ್ತಮವಾಗಿ ನಿರ್ವಹಿಸುವುದಷ್ಟೇ ನನ್ನ ಗುರಿ,” ಎಂದು ಹೇಳಿದ್ದಾನೆ. ಒಂದು ವರ್ಷ ರಷ್ಯಾದಲ್ಲಿ ಕೆಲಸ ಮಾಡಿ, ಹಣ ಸಂಪಾದಿಸಿ ನಂತರ ಭಾರತಕ್ಕೆ ಮರಳುವ ಯೋಜನೆ ಹೊಂದಿರುವುದಾಗಿ ಆತ ತಿಳಿಸಿದ್ದಾನೆ.
ವೇತನ ಎಷ್ಟು?
ಸುಮಾರು ನಾಲ್ಕು ತಿಂಗಳ ಹಿಂದೆ ರಷ್ಯಾ ತಲುಪಿದ 17 ಭಾರತೀಯರ ಗುಂಪಿನಲ್ಲಿ ಮುಖೇಶ್ ಕೂಡ ಒಬ್ಬ. ಇವರೆಲ್ಲರೂ ಸೆಂಟ್ ಪೀಟರ್ಸ್ಬರ್ಗ್ನಲ್ಲಿ ‘ಕೊಲೊಮ್ಯಾಝ್ಸ್ಕೊಯೆ’ (Kolomyazhskoye) ಎಂಬ ರಸ್ತೆ ನಿರ್ವಹಣಾ ಕಂಪನಿಯಲ್ಲಿ ಕೆಲಸ ಮಾಡುತ್ತಿದ್ದಾರೆ. ಈ ಕೆಲಸಕ್ಕೆ ತಿಂಗಳಿಗೆ ಸುಮಾರು 1,00,000 ರೂಬಲ್ಸ್ (ಅಂದಾಜು 1.1 ಲಕ್ಷ ರೂ.) ವೇತನ ನೀಡಲಾಗುತ್ತಿದೆ. ಕಂಪನಿಯು ಇವರಿಗೆ ಊಟ, ವಸತಿ ಮತ್ತು ಸಾರಿಗೆ ವ್ಯವಸ್ಥೆಯನ್ನು ಕಲ್ಪಿಸಿದೆ.
ವಿವಿಧ ವೃತ್ತಿಯವರು
ರಷ್ಯಾದಲ್ಲಿ ಸ್ವಚ್ಛತಾ ಕಾರ್ಯದಲ್ಲಿ ತೊಡಗಿರುವ ಈ ಭಾರತೀಯರ ಗುಂಪಿನಲ್ಲಿ 19 ರಿಂದ 43 ವರ್ಷ ವಯಸ್ಸಿನವರಿದ್ದಾರೆ. ಇವರಲ್ಲಿ ಕೆಲವರು ಭಾರತದಲ್ಲಿ ರೈತರಾಗಿದ್ದರು, ಇನ್ನು ಕೆಲವರು ಸ್ವಂತ ಉದ್ಯಮ ಹೊಂದಿದ್ದರು. ಇವರ ಗುಂಪಿನಲ್ಲಿ ವೆಡ್ಡಿಂಗ್ ಪ್ಲಾನರ್, ಚಾಲಕರು ಮತ್ತು ಆರ್ಕಿಟೆಕ್ಟ್ಗಳು ಕೂಡ ಇದ್ದಾರೆ ಎಂದು ವರದಿ ತಿಳಿಸಿದೆ.
ಇದನ್ನೂ ಓದಿ: ಪರೀಕ್ಷಾ ಪೇ ಚರ್ಚಾ 2026 : ಬ್ರಹ್ಮಪುತ್ರ ನದಿಯ ಕ್ರೂಸ್ನಲ್ಲಿ ವಿದ್ಯಾರ್ಥಿಗಳಿಗೆ ಪ್ರಧಾನಿ ಮೋದಿ ಪಾಠ
