ಸಿಡ್ನಿ: ಆಸ್ಟ್ರೇಲಿಯಾದ ವೇಗದ ಬೌಲರ್ ಮಿಚೆಲ್ ಸ್ಟಾರ್ಕ್ ಅವರು ಇತ್ತೀಚೆಗೆ ಇಂಡಿಯನ್ ಪ್ರೀಮಿಯರ್ ಲೀಗ್ (ಐಪಿಎಲ್) 2025 ರ ಪುನರಾರಂಭದ ನಂತರ ಭಾರತಕ್ಕೆ ಮರಳದಿರುವ ತಮ್ಮ ನಿರ್ಧಾರದ ಕುರಿತು ಮಾತನಾಡಿದ್ದಾರೆ. ಪಾಕಿಸ್ತಾನದ ದಾಳಿಗಳ ನಂತರ ಐಪಿಎಲ್ ಒಂದು ವಾರ ಸ್ಥಗಿತಗೊಂಡಿದ್ದರೂ, ಮೇ 17 ರಂದು ಶಾಂತಿ ಒಪ್ಪಂದದ ಬಳಿಕ ಟೂರ್ನಿ ಮತ್ತೆ ಆರಂಭಗೊಂಡಿತ್ತು.
ಆದಾಗ್ಯೂ, ಹಲವಾರು ಆಟಗಾರರು ವಿವಿಧ ಕಾರಣಗಳಿಂದ ಭಾರತಕ್ಕೆ ಮರಳಲು ನಿರಾಕರಿಸಿದ್ದರು. ಡೆಲ್ಲಿ ಕ್ಯಾಪಿಟಲ್ಸ್ (ಡಿಸಿ) ತಂಡವನ್ನು ಪ್ರತಿನಿಧಿಸುತ್ತಿದ್ದ ಮಿಚೆಲ್ ಸ್ಟಾರ್ಕ್ ಕೂಡ ಟೂರ್ನಮೆಂಟ್‌ನ ಕೊನೆಯ ಹಂತದಿಂದ ಹಿಂದೆ ಸರಿದಿದ್ದರು. ತಾನು ದೇಶಕ್ಕೆ ಮರಳಿದ ನಂತರ ರೆಡ್-ಬಾಲ್ ಕ್ರಿಕೆಟ್‌ಗೆ ಗಮನ ಕೇಂದ್ರೀಕರಿಸಿದ್ದಾಗಿ ಸ್ಟಾರ್ಕ್ ಬಹಿರಂಗಪಡಿಸಿದರು, ಏಕೆಂದರೆ ಆಸ್ಟ್ರೇಲಿಯಾ 2025ರ ವಿಶ್ವ ಟೆಸ್ಟ್ ಚಾಂಪಿಯನ್‌ಶಿಪ್ (ಡಬ್ಲ್ಯೂಟಿಸಿ) ಫೈನಲ್‌ನಲ್ಲಿ ಸ್ಪರ್ಧಿಸಲಿದೆ.
ಸಿಡ್ನಿ ಮಾರ್ನಿಂಗ್ ಹೆರಾಲ್ಡ್‌ಗೆ ನೀಡಿದ ಸಂದರ್ಶನದಲ್ಲಿ ಸ್ಟಾರ್ಕ್, “ನನ್ನ ನಿರ್ಧಾರ ಮತ್ತು ಇಡೀ ಪರಿಸ್ಥಿತಿಯ ಬಗ್ಗೆ ಖುಷಿಯಾಗಿದ್ದೆ. ಪರಿಸ್ಥಿತಿಯನ್ನು ಚೆನ್ನಾಗಿ ನಿರ್ವಹಿಸಿಚೆ. ಆದ್ದರಿಂದಲೇ ನಾನು ಆ ನಿರ್ಧಾರವನ್ನು ತೆಗೆದುಕೊಂಡೆ, ಮತ್ತು ಇಲ್ಲಿಗೆ ಬರುವ ಒಂದು ವಾರದ ಮೊದಲು ನನ್ನ ಗಮನ ರೆಡ್-ಬಾಲ್ ಕ್ರಿಕೆಟ್‌ಗೆ ತಿರುಗಿತು. ಮರಳದವರಿಗೆ ಇದರ ಪರಿಣಾಮಗಳು ಅಥವಾ ಇದು ಹೇಗೆ ಕಾಣುತ್ತದೆ ಎಂಬುದನ್ನು ಕಾಲವೇ ತೋರಿಸುತ್ತದೆ. ಆದರೆ ಆ ಆಟಕ್ಕೆ ಮುಂಚಿತವಾಗಿ ನನ್ನಲ್ಲಿ ಕೆಲವು ಪ್ರಶ್ನೆಗಳು ಮತ್ತು ಕಾಳಜಿಗಳಿದ್ದವು, ಮತ್ತು ಸ್ಪಷ್ಟವಾಗಿ, ಏನಾಯಿತು ಎಂಬುದನ್ನು ನಾವು ಕಂಡೆವು, ಇದು ನನ್ನ ನಿರ್ಧಾರದಲ್ಲಿ ಒಂದು ಭಾಗವಾಗಿತ್ತು,” ಎಂದು ತಿಳಿಸಿದರು.
ಸ್ಟಾರ್ಕ್ ಡೆಲ್ಲಿ ಕ್ಯಾಪಿಟಲ್ಸ್ (ಡಿಸಿ) ತಂಡದೊಂದಿಗಿನ ತಮ್ಮ ಬದ್ಧತೆಯನ್ನು ಒತ್ತಿಹೇಳಿದರು. “ನಾನು ಇನ್ನೂ ಡೆಲ್ಲಿ ಗುಂಪಿನೊಂದಿಗೆ ಗಟ್ಟಿಯಾಗಿ ಬದ್ಧನಾಗಿದ್ದೇನೆ, ಮತ್ತು ಹರಾಜಿನಲ್ಲಿ ಆಯ್ಕೆಯಾದ ನಂತರ ಟೂರ್ನಮೆಂಟ್‌ಗಳಿಂದ ಹಿಂದೆ ಸರಿಯುವವನಲ್ಲ. ಇವು ಅನಿವಾರ್ಯ ಪರಿಸ್ಥಿತಿಗಳು,” ಎಂದು ಅವರು ಹೇಳಿದ್ದಾರೆ. .
ಸ್ಟಾರ್ಕ್ ಡೆಲ್ಲಿಯ ಬೌಲಿಂಗ್ ದಾಳಿಯಲ್ಲಿ ಪ್ರಮುಖ ಆಟಗಾರರಾಗಿದ್ದರು, 10 ಇನ್ನಿಂಗ್ಸ್‌ಗಳಿಂದ 26.14ರ ಸರಾಸರಿಯಲ್ಲಿ 14 ವಿಕೆಟ್‌ಗಳನ್ನು ಕಿತ್ತಿದ್ದರು. ಆದ್ದರಿಂದ, ಅವರು ಬರದ ಕಾರಣ ಡೆಲ್ಲಿ ತೀವ್ರ ನಷ್ಟ ಅನುಭವಿಸಿತು. ಸ್ಟಾರ್ಕ್ ಇಲ್ಲದೆ, ಡೆಲ್ಲಿ ಕೊನೆಯ ಮೂರು ಪಂದ್ಯಗಳಲ್ಲಿ ಕೇವಲ ಒಂದರಲ್ಲಿ ಗೆಲುವು ಸಾಧಿಸಿ ಟೂರ್ನಮೆಂಟ್‌ನಿಂದ ಹೊರಬಿದ್ದಿತು.
