ಬೆಂಗಳೂರು : ಭಾರತದ ಎಲೆಕ್ಟ್ರಿಕ್ ದ್ವಿಚಕ್ರ ವಾಹನ ಮಾರುಕಟ್ಟೆಯಲ್ಲಿ ಟಿವಿಎಸ್ ಮೋಟಾರ್ ಕಂಪನಿ ಮುಂಚೂಣಿಯಲ್ಲಿದ್ದು, 2026ರ ಮೊದಲ ಏಳು ತಿಂಗಳಲ್ಲೇ ಮೂರು ಲಕ್ಷ ಎಲೆಕ್ಟ್ರಿಕ್ ಸ್ಕೂಟರ್ಗಳನ್ನು ಮಾರಾಟ ಮಾಡುವ ಮೂಲಕ ಹೊಸ ಮೈಲಿಗಲ್ಲು ತಲುಪಿದೆ. ಈ ಭರ್ಜರಿ ಮಾರಾಟದ ಅಂಕಿ-ಅಂಶಗಳು ಟಿವಿಎಸ್ ಸಂಸ್ಥೆಯ ಭವಿಷ್ಯದ ಗುರಿಗಳನ್ನು ಇನ್ನಷ್ಟು ಎತ್ತರಕ್ಕೇರಿಸಿದ್ದು, ಈ ವರ್ಷಾಂತ್ಯಕ್ಕೆ 5 ಲಕ್ಷಕ್ಕೂ ಅಧಿಕ ವಾಹನಗಳು ಮಾರಾಟವಾಗುವ ನಿರೀಕ್ಷೆಯಿದೆ.
ಟಿವಿಎಸ್ ಸಂಸ್ಥೆಯು 2026ರ ಜನವರಿಯಿಂದ ಜುಲೈ ನಡುವಿನ ಕೇವಲ ಏಳು ತಿಂಗಳ ಅವಧಿಯಲ್ಲಿ ಬರೋಬ್ಬರಿ 3.07 ಲಕ್ಷ ಎಲೆಕ್ಟ್ರಿಕ್ ಸ್ಕೂಟರ್ಗಳನ್ನು ಮಾರಾಟ ಮಾಡಿದೆ. 2025ರ ಪೂರ್ಣ ವರ್ಷದಲ್ಲಿ ಟಿವಿಎಸ್ ಒಟ್ಟು 3.15 ಲಕ್ಷ ಎಲೆಕ್ಟ್ರಿಕ್ ದ್ವಿಚಕ್ರ ವಾಹನಗಳನ್ನು ಮಾರಾಟ ಮಾಡಿತ್ತು. ಆದರೆ ಈ ವರ್ಷ, ಕೇವಲ ಏಳು ತಿಂಗಳಲ್ಲೇ ಕಳೆದ ವರ್ಷದ ಒಟ್ಟು ಗುರಿಯ ಶೇ.97ರಷ್ಟು ಸಾಧನೆಯನ್ನು ಪೂರೈಸಿದೆ. ಈ ಮೂಲಕ ಕ್ಯಾಲೆಂಡರ್ ವರ್ಷವೊಂದರಲ್ಲಿ ಅತಿ ವೇಗವಾಗಿ 3 ಲಕ್ಷ ರಿಟೇಲ್ ಮಾರಾಟವನ್ನು ದಾಟಿದ ಭಾರತದ ಮೊದಲ ಎಲೆಕ್ಟ್ರಿಕ್ ದ್ವಿಚಕ್ರ ವಾಹನ ತಯಾರಕ ಕಂಪನಿ ಎಂಬ ಹೆಗ್ಗಳಿಕೆಗೂ ಟಿವಿಎಸ್ ಪಾತ್ರವಾಗಿದೆ. ಈ ಹಿಂದೆ 2024ರಲ್ಲಿ ಓಲಾ ಎಲೆಕ್ಟ್ರಿಕ್ (Ola Electric) 3 ಲಕ್ಷದ ಗಡಿ ದಾಟಲು ಎಂಟು ತಿಂಗಳುಗಳನ್ನು ತೆಗೆದುಕೊಂಡಿತ್ತು.
ಜುಲೈ ತಿಂಗಳ ಭಾರಿ ಏರಿಕೆ ಮತ್ತು ಭವಿಷ್ಯದ ಗುರಿ
2026ರ ಜುಲೈ ತಿಂಗಳು ಟಿವಿಎಸ್ ಸಂಸ್ಥೆಗೆ ಅತಿ ಹೆಚ್ಚು ಮಾಸಿಕ ವಾಹನ ಮಾರಾಟದ ದಾಖಲೆಯನ್ನು ತಂದುಕೊಟ್ಟಿದೆ. ಜುಲೈನಲ್ಲಿ ಕಂಪನಿಯು ಗರಿಷ್ಠ 55,465 ಯೂನಿಟ್ಗಳನ್ನು ಅತಿ ಹೆಚ್ಚಿನ ಸಂಖ್ಯೆಯಲ್ಲಿ ಮಾರಾಟ ಮಾಡಿದೆ. ಹಾಗೆಯೇ, ಕಳೆದ ಮಾರ್ಚ್ನಲ್ಲಿಯೂ 51,632 ಸ್ಕೂಟರ್ಗಳು ಮಾರಾಟವಾಗಿದ್ದವು. ಜನವರಿಯಿಂದ ಜುಲೈವರೆಗೆ ಪ್ರತಿ ತಿಂಗಳು ಸರಾಸರಿ 43,898 ಯೂನಿಟ್ಗಳು ಸೇಲ್ ಆಗುತ್ತಿವೆ. ಇದೇ ಟ್ರೆಂಡ್ ಮುಂದಿನ ಐದು ತಿಂಗಳುಗಳಲ್ಲೂ ಮುಂದುವರಿದರೆ, ಈ ವರ್ಷ ಕಂಪನಿಯು ಸುಲಭವಾಗಿ 5 ಲಕ್ಷದ ಗಡಿ ದಾಟಲಿದೆ. ಮುಂಬರುವ ಹಬ್ಬದ ಸೀಸನ್ ಆಗಸ್ಟ್ನಿಂದ ಡಿಸೆಂಬರ್ ನಡುವೆ ಮಾರಾಟದ ಪ್ರಮಾಣವನ್ನು ಮತ್ತಷ್ಟು ಹೆಚ್ಚಿಸಲಿದ್ದು, ವರ್ಷಾಂತ್ಯಕ್ಕೆ ಇದು 5.27 ಲಕ್ಷದಿಂದ 5.47 ಲಕ್ಷ ಯೂನಿಟ್ಗಳಿಗೆ ತಲುಪಬಹುದು ಎಂದು ಅಂದಾಜಿಸಲಾಗಿದೆ.
ಪ್ರತಿಸ್ಪರ್ಧಿಗಳೆದುರು ಟಿವಿಎಸ್ ಮೇಲುಗೈ
ಭಾರತದ ಇ-ಸ್ಕೂಟರ್ ಮಾರುಕಟ್ಟೆಯಲ್ಲಿ ಟಿವಿಎಸ್ ಸದ್ಯದ ಮಟ್ಟಿಗೆ ಬಜಾಜ್ ಆಟೋ (Bajaj Auto) ಮತ್ತು ಏಥರ್ ಎನರ್ಜಿಯನ್ನು (Ather Energy) ಹಿಂದಿಕ್ಕಿ ಅಗ್ರಸ್ಥಾನದಲ್ಲಿದೆ. ಬಜಾಜ್ ಜನವರಿಯಿಂದ ಜುಲೈವರೆಗೆ 2.64 ಲಕ್ಷ ಯೂನಿಟ್ಗಳನ್ನು ಜಾಗತಿಕ ಮಾರುಕಟ್ಟೆಗೆ ಬಿಡುಗಡೆ ಮಾಡಿದ್ದು, ಇದು ಟಿವಿಎಸ್ಗಿಂತ ಸುಮಾರು 43,400 ಕಡಿಮೆ ಇದೆ. ಆದರೂ ಬಜಾಜ್ ತನ್ನ 2025ರ ಒಟ್ಟು ಮಾರಾಟದ ಶೇ.94ರಷ್ಟು ಗುರಿಯನ್ನು ಈಗಾಗಲೇ ತಲುಪಿದೆ. ಇತ್ತ ಮೂರನೇ ಸ್ಥಾನದಲ್ಲಿರುವ ಏಥರ್ ಎನರ್ಜಿ 2 ಲಕ್ಷಕ್ಕೂ ಅಧಿಕ ಯೂನಿಟ್ಗಳನ್ನು ಮಾರಾಟ ಮಾಡಿದ್ದು, ಟಿವಿಎಸ್ಗಿಂತ 1.07 ಲಕ್ಷ ವಾಹನಗಳಷ್ಟು ಹಿಂದಿದೆ.
ಹೀರೋ ಮತ್ತು ಓಲಾ ಪರಿಸ್ಥಿತಿ
ಹೀರೋ ಮೋಟೊಕಾರ್ಪ್ನ (Hero MotoCorp) ಎಲೆಕ್ಟ್ರಿಕ್ ವಿಭಾಗವಾದ ವಿಡಾ (Vida) 1.29 ಲಕ್ಷ ಗುರಿ ಮುಟ್ಟುವ ಮೂಲಕ ನಾಲ್ಕನೇ ಸ್ಥಾನ ಪಡೆದಿದೆ. ಇದು 2025ರ ಅವರ ಪೂರ್ಣ ವರ್ಷದ ಮಾರಾಟಕ್ಕಿಂತ ಶೇ.14ರಷ್ಟು ಹೆಚ್ಚಾಗಿದೆ. ಇನ್ನು ಓಲಾ ಎಲೆಕ್ಟ್ರಿಕ್ 2026ರ ಮೊದಲ ಏಳು ತಿಂಗಳಲ್ಲಿ 80,282 ವಾಹನಗಳನ್ನು ಮಾರಾಟ ಮಾಡುವ ಮೂಲಕ ಐದನೇ ಸ್ಥಾನಕ್ಕೆ ಕುಸಿದಿದೆ. ಒಟ್ಟಾರೆಯಾಗಿ ಹೇಳುವುದಾದರೆ, ಟಿವಿಎಸ್ ಮತ್ತು ಬಜಾಜ್ನಂತಹ ಸಾಂಪ್ರದಾಯಿಕ ವಾಹನ ತಯಾರಕರು ಭಾರತದ ಎಲೆಕ್ಟ್ರಿಕ್ ದ್ವಿಚಕ್ರ ವಾಹನಗಳ ಮಾರುಕಟ್ಟೆಯಲ್ಲಿ ಭದ್ರವಾಗಿ ನೆಲೆವೂರಿದ್ದು, 2026ನೇ ವರ್ಷವು ಇ-ವಾಹನ ಉದ್ದಿಮೆಗಳಿಗೆ ಭಾರೀ ಲಾಭದಾಯಕ ವರ್ಷವಾಗಿ ಮಾರ್ಪಡುತ್ತಿದೆ ಎಂಬುದು ಸ್ಪಷ್ಟವಾಗಿದೆ.
ಇದನ್ನೂ ಓದಿ : ರಾಜ್ಯದ ಅರಣ್ಯ ಇಲಾಖೆಯಲ್ಲಿ 57 ಕಾವಾಡಿಗರ ನೇಮಕಾತಿ: 52 ಸಾವಿರ ರೂ. ಸ್ಯಾಲರಿ
