ಬೆಂಗಳೂರು : ದೇಶದಲ್ಲಿ 2 ಸಾವಿರ ರೂಪಾಯಿ ನೋಟುಗಳ ಚಲಾವಣೆಯನ್ನು ಭಾರತೀಯ ರಿಸರ್ವ್ ಬ್ಯಾಂಕ್ (RBI) 2023ರ ಮೇ ತಿಂಗಳಲ್ಲೇ ರದ್ದುಗೊಳಿಸಿದೆ. ಅಂದರೆ, 2 ಸಾವಿರ ರೂಪಾಯಿ ನೋಟುಗಳನ್ನು ತೆಗೆದುಕೊಂಡು ಹೋಗಿ ಎಲ್ಲಿಯೂ ವಹಿವಾಟು ಮಾಡಲು ಆಗುವುದಿಲ್ಲ. ಆದರೆ, ಆರ್ಬಿಐ ಈಗ ಹೊಸ ಸ್ಪಷ್ಟನೆ ನೀಡಿದ್ದು, ನೋಟುಗಳ ಬದಲಾವಣೆ ದೃಷ್ಟಿಯಿಂದ 2 ಸಾವಿರ ರೂ. ಮುಖಬೆಲೆಯ ನೋಟುಗಳು ಈಗಲೂ ಚಲಾವಣೆಯಲ್ಲಿವೆ ಎಂದು ತಿಳಿಸಿದೆ.
ಹೌದು, ಆರ್ಬಿಐ 2 ಸಾವಿರ ರೂ. ನೋಟುಗಳನ್ನು ಬದಲಾವಣೆ ಮಾಡಿಕೊಳ್ಳಲು ಅವಕಾಶ ನೀಡಿದ್ದರೂ ಎಲ್ಲ ನೋಟುಗಳನ್ನು ಸಾರ್ವಜನಿಕರಿಂದ ವಾಪಸ್ ಪಡೆಯಲು ಆಗಿಲ್ಲ. ಸಾರ್ವಜನಿಕರ ಬಳಿ ಇದ್ದ ಶೇ.98.47ರಷ್ಟು ನೋಟುಗಳನ್ನು ವಾಪಸ್ ಪಡೆಯಲು ಸಾಧ್ಯವಾಗಿದೆ. ಆದರೆ, ಇನ್ನೂ 5,451 ಕೋಟಿ ರೂಪಾಯಿ ಮೌಲ್ಯದ ನೋಟುಗಳು ಸಾರ್ವಜನಿಕರ ಬಳಿಯೇ ಇರುವುದರಿಂದ ಇವುಗಳನ್ನು ಬದಲಾವಣೆ ಮಾಡಿಕೊಳ್ಳಿ ಎಂದು ಆರ್ಬಿಐ ತಿಳಿಸಿದೆ.
“ದೇಶದಲ್ಲಿ ನಿಗದಿಪಡಿಸಿದ ಆರ್ ಬಿಐನ 19 ಕಚೇರಿಗಳಲ್ಲಿ ಸಾರ್ವಜನಿಕರು ತಮ್ಮ ಬಳಿ ಇರುವ 2 ಸಾವಿರ ರೂಪಾಯಿ ಮುಖಬೆಲೆಯ ನೋಟುಗಳನ್ನು ಬದಲಾವಣೆ ಮಾಡಿಕೊಳ್ಳಬಹುದು. ಇದೂ ಸಾಧ್ಯವಾಗದಿದ್ದರೆ, ಅಂಚೆ ಕಚೇರಿಗಳ ಮೂಲಕ 2 ಸಾವಿರ ರೂಪಾಯಿ ನೋಟುಗಳನ್ನು ಸಮೀಪದ ಆರ್ ಬಿಐ ಕಚೇರಿಗಳಿಗೆ ಕಳುಹಿಸಬಹುದು. ಹೀಗೂ ನೋಟುಗಳನ್ನು ಬದಲಾವಣೆ ಮಾಡಿಕೊಳ್ಳಬಹುದು” ಎಂದು ಆರ್ಬಿಐ ತಿಳಿಸಿದೆ.
ಕರ್ನಾಟಕದ ಬೆಂಗಳೂರು ಸೇರಿ ದೇಶದ 19 ನಗರಗಳಲ್ಲಿ ಆರ್ಬಿಐ ಕಚೇರಿಗಳಿವೆ. ಕರ್ನಾಟಕದವರಾದರೆ ಬೆಂಗಳೂರಿನಲ್ಲಿರುವ ಕಚೇರಿಗೆ ನೇರವಾಗಿ ತೆರಳಿ, ನೋಟುಗಳನ್ನು ಬದಲಾವಣೆ ಮಾಡಿಕೊಳ್ಳಬಹುದು. ಕರ್ನಾಟಕದಲ್ಲಿಯೇ ಬೆಂಗಳೂರಿನಿಂದ ದೂರದ ಊರುಗಳಲ್ಲಿ ಇದ್ದರೆ, ಅಲ್ಲಿಂದಲೇ ಅಂಚೆ ಕಚೇರಿ ಮೂಲಕ ನೋಟುಗಳನ್ನು ಪೋಸ್ಟ್ ಮಾಡಬಹುದಾಗಿದೆ.
ಇದನ್ನೂ ಓದಿ : ಮನುಷ್ಯನ ಬುರುಡೆ ಇಟ್ಟು ವಾಮಾಚಾರ ಶಂಕೆ ; ಬೆಚ್ಚಿಬಿದ್ದ ಗೋಳೂರು ಗ್ರಾಮಸ್ಥರು!
