ನವದೆಹಲಿ : ಸಾಮಾಜಿಕ ಜಾಲತಾಣಗಳಲ್ಲಿ ತಲ್ಲಣ ಸೃಷ್ಟಿಸಿರುವ ‘370 ರೂಪಾಯಿಯ ಬಿರಿಯಾನಿ‘ ವಿವಾದದ ಬೆನ್ನಲ್ಲೇ, ಸ್ಟ್ಯಾಂಡ್-ಅಪ್ ಕಾಮಿಡಿಯನ್ ಮಧುರ್ ವಿರ್ಲಿ ಅವರ ಹಳೆಯ ವಿಡಿಯೋವೊಂದು ಮುನ್ನೆಲೆಗೆ ಬಂದಿದ್ದು, ಅತ್ಯಾಚಾರದಂತಹ ಗಂಭೀರ ಮತ್ತು ಸೂಕ್ಷ್ಮ ವಿಷಯವನ್ನು ಹಾಸ್ಯಕ್ಕೆ ಬಳಸಿರುವುದಕ್ಕೆ ಸಾರ್ವಜನಿಕರಿಂದ ತೀವ್ರ ಖಂಡನೆ ವ್ಯಕ್ತವಾಗುತ್ತಿದೆ.
ದೆಹಲಿ ಮೂಲದ ಇಂಜಿನಿಯರಿಂಗ್ ಪದವೀಧರ ಹಾಗೂ ಹಾಸ್ಯ ಕಲಾವಿದ ಮಧುರ್ ವಿರ್ಲಿ ಅವರ 2024ರ ‘ಲವ್ ಅಂಡ್ ಲ್ಯಾಟೆಕ್ಸ್’ ಶೋನ ತುಣುಕೊಂದು ಈಗ ವೈರಲ್ ಆಗಿದೆ. ಈ ವಿಡಿಯೋದಲ್ಲಿ ಮಧುರ್, ಅತ್ಯಾಚಾರ ಪ್ರಕರಣಗಳ ಅಂಕಿ-ಅಂಶಗಳನ್ನು ಅತ್ಯಂತ ಕ್ರೂರವಾಗಿ ಲೇವಡಿ ಮಾಡಿದ್ದಾರೆ. 10 ಅತ್ಯಾಚಾರ ಪ್ರಕರಣಗಳಲ್ಲಿ 9 ಪ್ರಕರಣಗಳು ಕೇವಲ ಅತ್ಯಾಚಾರಕ್ಕೆ ಸೀಮಿತವಾಗಿದ್ದರೆ, ಒಂದರಲ್ಲಿ ಮಾತ್ರ ಕೊಲೆಯಾಗುತ್ತದೆ ಎಂದು ಹೇಳುತ್ತಾ, ಸಂತ್ರಸ್ತೆ ಮತ್ತು ಆರೋಪಿಯ ನಡುವಿನ ಘಟನೆಯನ್ನು ಅತ್ಯಂತ ಅಶ್ಲೀಲವಾಗಿ ಮತ್ತು ಅಮಾನವೀಯವಾಗಿ ಬಿಂಬಿಸಿದ್ದಾರೆ. ಅತ್ಯಾಚಾರ ಮತ್ತು ಕೊಲೆಯಂತಹ ಜೀವನ್ಮರಣದ ಆಘಾತಕಾರಿ ಸಂಗತಿಗಳನ್ನು ಕೇವಲ ‘ಪಂಚ್ಲೈನ್’ಗಳಾಗಿ ಬಳಸಿರುವುದಕ್ಕೆ ನೆಟ್ಟಿಗರು ಕೆಂಡಾಮಂಡಲರಾಗಿದ್ದಾರೆ. ವಿವಾದ ತಾರಕಕ್ಕೇರುತ್ತಿದ್ದಂತೆ ಮಧುರ್ ವಿರ್ಲಿ ತಮ್ಮ ಸಾಮಾಜಿಕ ಜಾಲತಾಣ ಖಾತೆಗಳನ್ನು ಡಿಲೀಟ್ ಮಾಡಿ ತಲೆಮರೆಸಿಕೊಂಡಿದ್ದಾರೆ.
ಈ ವಿಡಿಯೋದಲ್ಲಿ ಹಾಸ್ಯ ಕಲಾವಿದನ ಮಾತಿಗಿಂತಲೂ, ಅಲ್ಲಿ ನೆರೆದಿದ್ದ ಪ್ರೇಕ್ಷಕರು ಅದಕ್ಕೆ ಬಿದ್ದು ಬಿದ್ದು ನಗುತ್ತಿರುವುದನ್ನು ಕಂಡು ಸಾರ್ವಜನಿಕರು ದಿಗ್ಭ್ರಮೆ ವ್ಯಕ್ತಪಡಿಸಿದ್ದಾರೆ. “ಇದು ಯಾವುದೇ ರೀತಿಯ ಬುದ್ಧಿವಂತಿಕೆಯ ಬರಹ ಅಥವಾ ಹಾಸ್ಯವಲ್ಲ, ಬದಲಿಗೆ ಸಮಾಜಕ್ಕೆ ಮಾರಕವಾದದ್ದು. ಇಂತಹ ಜೋಕ್ಗಳು ಕ್ರೌರ್ಯವನ್ನು ಸಾಮಾನ್ಯೀಕರಿಸುತ್ತವೆ” ಎಂದು ನೆಟ್ಟಿಗರೊಬ್ಬರು ಆತಂಕ ಹಂಚಿಕೊಂಡಿದ್ದಾರೆ. ಮತ್ತೊಬ್ಬರು, “ಇಲ್ಲಿ ಕಲಾವಿದನಿಗಿಂತಲೂ ಆ ವೇದಿಕೆಯ ಮುಂದೆ ಕುಳಿತು ಅಷ್ಟು ಅಸಹ್ಯವಾದ ಮಾತಿಗೆ ನಗುತ್ತಿರುವ ಪ್ರೇಕ್ಷಕರ ಮನಸ್ಥಿತಿ ನಿಜಕ್ಕೂ ಆಘಾತಕಾರಿ” ಎಂದು ಕಿಡಿಕಾರಿದ್ದಾರೆ.
‘370 ರೂಪಾಯಿ ಬಿರಿಯಾನಿ’ ಮತ್ತು ಶವ ವಿವಾದ
ಈಗಾಗಲೇ ದೇಶದಲ್ಲಿ ಪ್ರಣೀತ್ ಮೋರ್ ಎಂಬ ಮತ್ತೊಬ್ಬ ಹಾಸ್ಯ ಕಲಾವಿದನ ವಿಡಿಯೋಗಳು ದೊಡ್ಡ ವಿವಾದಕ್ಕೆ ನಾಂದಿ ಹಾಡಿವೆ. ಮುಂಬೈನ ಕೆಇಎಂ ಆಸ್ಪತ್ರೆಯ ವೈದ್ಯಕೀಯ ವಿದ್ಯಾರ್ಥಿನಿಯೊಬ್ಬಳು ಶೋನಲ್ಲಿ ಭಾಗವಹಿಸಿ, ವೈದ್ಯಕೀಯ ಅಧ್ಯಯನಕ್ಕೆ ಬಳಸುವ ಮೃತದೇಹಗಳ (ಶವಗಳ) ಗುಪ್ತಾಂಗಗಳ ಬಗ್ಗೆ ಹಾಸ್ಯ ಮಾಡಿದ್ದೂ ವ್ಯಾಪಕ ಆಕ್ರೋಶಕ್ಕೆ ಕಾರಣವಾಗಿದ್ದು, ಅದು ತನಿಖೆಯ ಹಂತದಲ್ಲಿದೆ. ಅಂಗಾಂಗ ದಾನಿಗಳಿಗೆ ಮಾಡಿದ ಅಪಮಾನ ಇದಾಗಿದೆ ಎಂಬ ಆರೋಪ ಕೇಳಿಬಂದಿದೆ.
ಅದೇ ಶೋನಲ್ಲಿ ಹಿಮಾಂಶು ಜಾಂಗ್ರಾ ಎಂಬ ವೆಬ್ ಡೆವಲಪರ್, ತಾನು ಡೇಟಿಂಗ್ಗೆ ಹೋದಾಗ ಹುಡುಗಿಗೆ 370 ರೂಪಾಯಿ ನೀಡಿ ಚಿಕನ್ ಬಿರಿಯಾನಿ ಕೊಡಿಸಿದ್ದಾಗಿ ಮತ್ತು ಅವಳನ್ನು ಮನೆಗೆ ಬಿಡುವಾಗ ಆ ಹಣವನ್ನು ದೈಹಿಕವಾಗಿ ‘ವಸೂಲಿ’ ಮಾಡಲು ಯತ್ನಿಸಿದ್ದಾಗಿ ಹೇಳಿದ್ದ. ಪ್ರೇಕ್ಷಕರು ಇದಕ್ಕೆ ನಕ್ಕಿದ್ದರೂ, ಹಣ ಖರ್ಚು ಮಾಡಿದ ತಕ್ಷಣ ಮಹಿಳೆಯ ಒಪ್ಪಿಗೆ ಸಿಕ್ಕಂತಲ್ಲ ಮತ್ತು ಇದು ಪುರುಷ ಪ್ರಧಾನ ಮನಸ್ಥಿತಿಯ ಪರಮಾವಧಿ ಎಂದು ಸಾಮಾಜಿಕ ಜಾಲತಾಣಗಳಲ್ಲಿ ವ್ಯಾಪಕ ಟೀಕೆ ವ್ಯಕ್ತವಾಗಿದೆ.
ಮಿತಿ ಮೀರುತ್ತಿದೆಯೇ ಹಾಸ್ಯದ ಗಡಿ?
ಸತತವಾಗಿ ಹೊರಬರುತ್ತಿರುವ ಇಂತಹ ವಿಡಿಯೋಗಳು ಸದ್ಯ ಹಾಸ್ಯದ ಹೆಸರಿನಲ್ಲಿ ನಡೆಯುತ್ತಿರುವ ಅತಿರೇಕಗಳನ್ನು ಪ್ರಶ್ನಿಸುವಂತೆ ಮಾಡಿವೆ. ಮನರಂಜನೆಯ ಹೆಸರಿನಲ್ಲಿ ಅತ್ಯಾಚಾರ, ಲೈಂಗಿಕ ದೌರ್ಜನ್ಯ, ಮಹಿಳಾ ವಿರೋಧಿ ಧೋರಣೆ ಹಾಗೂ ಮೃತದೇಹಗಳಿಗೆ ಗೌರವ ನೀಡದಂತಹ ವಿಷಯಗಳನ್ನು ಹಾಸ್ಯಕ್ಕೆ ಬಳಸಿಕೊಳ್ಳುವುದು ಎಷ್ಟು ಸರಿ ಎಂಬ ಗಂಭೀರ ಚರ್ಚೆ ಸಾರ್ವಜನಿಕ ವಲಯದಲ್ಲಿ ಆರಂಭವಾಗಿದೆ. ಹಾಸ್ಯಕ್ಕೂ ಒಂದು ಘನತೆ ಮತ್ತು ಮಿತಿ ಇರಬೇಕು ಎಂಬ ಒತ್ತಾಯ ಕೇಳಿಬರುತ್ತಿದೆ.
ಇದನ್ನೂ ಓದಿ : 6ನೇ ಮಹಡಿಯಿಂದ ಮಗುವಿನೊಂದಿಗೆ ಜಿಗಿದ ತಾಯಿ ಸಾವು – ಕಂದಮ್ಮ ಪವಾಡ ಸದೃಶ ಪಾರು!
