ನವದೆಹಲಿ: ಭಾರತೀಯ ರಿಸರ್ವ್ ಬ್ಯಾಂಕ್ (ಆರ್ ಬಿಐ) ರೆಪೋ ದರದಲ್ಲಿ 25 ಬೇಸಿಸ್ ಪಾಯಿಂಟ್ ಗಳನ್ನು ಇಳಿಕೆ ಮಾಡಿದೆ. ಕಳೆದ ಕೆಲವೇ ತಿಂಗಳಲ್ಲಿ ಆರ್ ಬಿಐ ಒಟ್ಟು 50 ಬೇಸಿಸ್ ಪಾಯಿಂಟ್ಸ್ ಅಥವಾ 0.5ರಷ್ಟು ಬಡ್ಡಿದರವನ್ನು ಇಳಿಕೆ ಮಾಡಿದಂತಾಗಿದೆ. ಇದರಿಂದ ಗೃಹಸಾಲ, ವಾಹನ ಸಾಲ, ವೈಯಕ್ತಿಕ ಸಾಲ ಮಾಡಿದವರ ಮಾಸಿಕ ಇಎಂಐ ಹೊರೆ ಕಡಿಮೆಯಾಗುತ್ತದೆ. ಹಾಗಾದರೆ, 50 ಬೇಸಿಸ್ ಪಾಯಿಂಟ್ ಇಳಿಕೆಯಾದರೆ ಇಎಂಐ ಹೊರೆ ಎಷ್ಟು ಇಳಿಕೆಯಾಗುತ್ತದೆ? ಇಲ್ಲಿದೆ ಲೆಕ್ಕಾಚಾರ.
ಒಬ್ಬ ವ್ಯಕ್ತಿ 20 ವರ್ಷಗಳ ಅವಧಿಗೆ ಶೇ.9ರಷ್ಟು ಬಡ್ಡಿದರದೊಂದಿಗೆ 50 ಲಕ್ಷ ರೂ. ಗೃಹಸಾಲ ಮಾಡಿದ್ದಾನೆ ಎಂದುಕೊಳ್ಳಿ. ಈಗ ಕಳೆದ ನಾಲ್ಕು ತಿಂಗಳಲ್ಲಿ ರೆಪೋ ದರದಲ್ಲಿ 50 ಬೇಸಿಸ್ ಪಾಯಿಂಟ್ ಗಳು ಕಡಿಮೆಯಾಗಿವೆ. ಅಂದರೆ, ಈಗ ಶೇ.8.5ರಷ್ಟು ಬಡ್ಡಿದರ ಅನ್ವಯವಾಗುತ್ತದೆ. ಇದುವರೆಗೆ ಮಾಸಿಕ 44,986 ರೂ. ಇಎಂಐ ಕಟ್ಟುತ್ತಿದ್ದರೆ, ಅದರಲ್ಲಿ 1,595 ರೂ. ಇಳಿಕೆಯಾಗುತ್ತದೆ. ಅಂದರೆ, ಮಾಸಿಕವಾಗಿ ಇನ್ನುಮುಂದೆ 43,391 ರೂ. ಕಟ್ಟಬೇಕಾಗುತ್ತದೆ. ಅಲ್ಲಿಗೆ, ವರ್ಷಕ್ಕೆ ಒಟ್ಟು 19,140 ರೂ. ಹೊರೆ ಇಳಿಕೆಯಾಗುತ್ತದೆ.
ಇದೇ ಬಡ್ಡಿದರದ ಲೆಕ್ಕಾಚಾರದಲ್ಲಿ 30 ಲಕ್ಷ ರೂ. ಸಾಲ ಇದ್ದರೆ ಮಾಸಿಕ 1,176 ರೂಪಾಯಿ ಉಳಿಯುತ್ತದೆ. 70 ಲಕ್ಷ ರೂಪಾಯಿಗೆ ಮಾಸಿಕ 2,744 ರೂ., 1 ಕೋಟಿ ರೂಪಾಯಿಗೆ ಮಾಸಿಕ 3,920 ರೂ., 1.5 ಕೋಟಿ ರೂಪಾಯಿಗೆ 5,880 ರೂ. ಉಳಿತಾಯವಾಗುತ್ತದೆ.
ಹಾಗೊಂದು ವೇಳೆ ಒಬ್ಬ ವ್ಯಕ್ತಿಯು 5 ಲಕ್ಷ ರೂಪಾಯಿ ಪರ್ಸನಲ್ ಲೋನ್ ಹೊಂದಿದ್ದರೆ, ಆತನಿಗೂ ಬಡ್ಡಿ ಹೊರೆ ಕಡಿಮೆಯಾಗಿದೆ. ಶೇ.12ರಷ್ಟು ಬಡ್ಡಿದರದಂತೆ 5 ವರ್ಷಗಳ ಅವಧಿಗೆ 5 ಲಕ್ಷ ರೂ. ಸಾಲ ಪಡೆದಿದ್ದಾನೆ ಎಂದಿಟ್ಟುಕೊಳ್ಳಿ. ಈಗಿನ ರೆಪೋ ದರ ಇಳಿಕೆ ಅಂದರೆ, 25 ಬೇಸಿಸ್ ಪಾಯಿಂಟ್ ಗಳ ಇಳಿಕೆ ಎಂದರೂ ಮಾಸಿಕ 11,282 ರೂ. ಇಎಂಐ ಬದಲು 11,149 ರೂ. ಕಟ್ಟಬೇಕಾಗುತ್ತದೆ. ತಿಂಗಳಿಗೆ 133 ರೂಪಾಯಿ ಉಳಿತಾಯ ಎಂದರೂ ವರ್ಷಕ್ಕೆ 1,596 ರೂ. ಉಳಿಯುತ್ತದೆ.
