ಬೆಂಗಳೂರು: ಭಾರತ ಮಹಿಳಾ ಕ್ರಿಕೆಟ್ ತಂಡದ ಅನುಭವಿ ಬ್ಯಾಟರ್ ಪೂನಮ್ ರಾವತ್ ಅವರು ಅಂತಾರಾಷ್ಟ್ರೀಯ ಕ್ರಿಕೆಟ್‌ಗೆ ನಿವೃತ್ತಿ ಘೋಷಿಸಿದ್ದಾರೆ. ಬರೋಬ್ಬರಿ 12 ವರ್ಷಗಳ ಕಾಲ ಭಾರತ ತಂಡವನ್ನು ಪ್ರತಿನಿಧಿಸಿರುವ ಮುಂಬೈ ಮೂಲದ ಈ ಬಲಗೈ ಆಟಗಾರ್ತಿ, ಗುರುವಾರ (ಅಕ್ಟೋಬರ್ 15) ತಮ್ಮ ಅಧಿಕೃತ ನಿವೃತ್ತಿ ನಿರ್ಧಾರವನ್ನು ಪ್ರಕಟಿಸಿದ್ದಾರೆ.2009ರಲ್ಲಿ ಅಂತಾರಾಷ್ಟ್ರೀಯ ಕ್ರಿಕೆಟ್‌ಗೆ ಪದಾರ್ಪಣೆ ಮಾಡಿದ್ದ ಪೂನಮ್, ತಮ್ಮ ವೃತ್ತಿಜೀವನದುದ್ದಕ್ಕೂ ಗಮನಾರ್ಹ ಪ್ರದರ್ಶನ ನೀಡಿದ್ದರು. ಅವರು ಕೊನೆಯ ಬಾರಿಗೆ 2021ರ ಜೂನ್‌ನಲ್ಲಿ ಇಂಗ್ಲೆಂಡ್ ವಿರುದ್ಧ ಭಾರತದ ಜೆರ್ಸಿಯಲ್ಲಿ ಕಣಕ್ಕಿಳಿದಿದ್ದರು. ಭವಿಷ್ಯದಲ್ಲಿ ತಮಗೆ ಇಷ್ಟೆಲ್ಲಾ ನೀಡಿದ ಕ್ರಿಕೆಟ್ ಆಟಕ್ಕೆ ತಮ್ಮದೇ ಆದ ಕೊಡುಗೆ ನೀಡುವ ಇರಾದೆಯನ್ನು ಅವರು ವ್ಯಕ್ತಪಡಿಸಿದ್ದಾರೆ.
3 ಸಾವಿರಕ್ಕೂ ಅಧಿಕ ರನ್‌ಗಳ ಸಾಧನೆ ಹಾಗೂ ದಾಖಲೆಗಳು
ಪೂನಮ್ ರಾವತ್ ಅವರು ತಮ್ಮ ಸುದೀರ್ಘ ವೃತ್ತಿಬದುಕಿನಲ್ಲಿ ಭಾರತಕ್ಕಾಗಿ ಮೂರೂ ಮಾದರಿಯ ಕ್ರಿಕೆಟ್‌ನಲ್ಲಿ ಒಟ್ಟು 3,282 ರನ್ ಕಲೆಹಾಕಿದ್ದಾರೆ. 73 ಏಕದಿನ ಪಂದ್ಯಗಳನ್ನಾಡಿ 2,299 ರನ್, 35 ಟಿ20 ಪಂದ್ಯಗಳಿಂದ 719 ರನ್ ಹಾಗೂ ನಾಲ್ಕು ಟೆಸ್ಟ್ ಪಂದ್ಯಗಳಲ್ಲಿ 264 ರನ್ ಗಳಿಸಿದ ಹೆಗ್ಗಳಿಕೆ ಇವರದ್ದಾಗಿದೆ. ಏಕದಿನ ಮಾದರಿಯಲ್ಲಿ ಮೂರು ಶತಕ ಹಾಗೂ ಟೆಸ್ಟ್‌ನಲ್ಲಿ ಒಂದು ಶತಕ ಸೇರಿದಂತೆ ಒಟ್ಟು ನಾಲ್ಕು ಶತಕಗಳು ಇವರ ಬ್ಯಾಟ್‌ನಿಂದ ಸಿಡಿದಿವೆ. ಅಲ್ಲದೆ, 15 ಏಕದಿನ ಮತ್ತು 4 ಟಿ20 ಅರ್ಧಶತಕಗಳನ್ನೂ ಪೂನಮ್ ಸಿಡಿಸಿದ್ದಾರೆ.
2017ರ ಮಹಿಳಾ ಏಕದಿನ ವಿಶ್ವಕಪ್ ಟೂರ್ನಿಯಲ್ಲಿ ಭಾರತ ತಂಡವು ಫೈನಲ್ ತಲುಪುವಲ್ಲಿ ಪೂನಮ್ ಅವರ ಪಾತ್ರ ಅತ್ಯಂತ ಮಹತ್ವದ್ದಾಗಿತ್ತು. ಆ ಟೂರ್ನಿಯಲ್ಲಿ ಅವರು ಬರೋಬ್ಬರಿ 381 ರನ್ ಕಲೆಹಾಕಿದ್ದರು. ಐತಿಹಾಸಿಕ ಲಾರ್ಡ್ಸ್ ಮೈದಾನದಲ್ಲಿ ಇಂಗ್ಲೆಂಡ್ ವಿರುದ್ಧ ನಡೆದ ಫೈನಲ್ ಕದನದಲ್ಲಿ ಅವರು 86 ರನ್‌ಗಳ ಕೆಚ್ಚೆದೆಯ ಹೋರಾಟ ಪ್ರದರ್ಶಿಸಿದ್ದರು; ಆದರೆ ಆ ಪಂದ್ಯದಲ್ಲಿ ಭಾರತ ಕೇವಲ 9 ರನ್‌ಗಳಿಂದ ವೀರೋಚಿತ ಸೋಲು ಕಂಡಿತ್ತು. ಇದೇ ಟೂರ್ನಿಯಲ್ಲಿ ಐರ್ಲೆಂಡ್ ವಿರುದ್ಧ ದೀಪ್ತಿ ಶರ್ಮಾ ಅವರೊಂದಿಗೆ 320 ರನ್‌ಗಳ ಬೃಹತ್ ಆರಂಭಿಕ ಜೊತೆಯಾಟವಾಡಿದ್ದ ಪೂನಮ್ ಅವರ ದಾಖಲೆ ಇಂದಿಗೂ ಅಚ್ಚಳಿಯದೆ ಉಳಿದಿದೆ.
ಕ್ರಿಕೆಟ್ ನನ್ನ ಬದುಕಿಗೆ ಉದ್ದೇಶ ನೀಡಿದೆ: ಭಾವುಕ ಪತ್ರ
ನಿವೃತ್ತಿ ಕುರಿತು ತಮ್ಮ ಇನ್‌ಸ್ಟಾಗ್ರಾಮ್ ಖಾತೆಯಲ್ಲಿ ಸುದೀರ್ಘ ಹಾಗೂ ಭಾವುಕ ಪತ್ರವನ್ನು ಪೂನಮ್ ಹಂಚಿಕೊಂಡಿದ್ದಾರೆ. “ಮುಂಬೈನ ಬೀದಿಗಳಿಂದ ಹಿಡಿದು ಭಾರತದ ಜೆರ್ಸಿ ಧರಿಸುವವರೆಗಿನ ಈ ಪಯಣ ಆಶೀರ್ವಾದಕ್ಕಿಂತ ಕಡಿಮೆಯಿಲ್ಲ. ಇದು ತ್ಯಾಗ, ಹೋರಾಟ, ಮರೆಯಲಾಗದ ಗೆಲುವುಗಳು, ಕಠಿಣ ಪಾಠಗಳು ಮತ್ತು ಜೀವಮಾನವಿಡೀ ನೆನಪಿಡುವ ಕ್ಷಣಗಳಿಂದ ಕೂಡಿದೆ. ಭಾರತವನ್ನು ಪ್ರತಿನಿಧಿಸುವುದು ಕೇವಲ ಕನಸಾಗಿರಲಿಲ್ಲ, ಅದು ನಾನು ಅಪಾರ ಹೆಮ್ಮೆಯಿಂದ ಹೊತ್ತುಕೊಂಡ ಸೌಭಾಗ್ಯವಾಗಿತ್ತು,” ಎಂದು ಅವರು ಬರೆದುಕೊಂಡಿದ್ದಾರೆ. ಕ್ರಿಕೆಟ್ ತಮ್ಮ ಬದುಕಿಗೆ ಉದ್ದೇಶ, ಗುರುತು ಮತ್ತು ದೊಡ್ಡ ಕುಟುಂಬವನ್ನು ನೀಡಿದೆ ಎಂದಿರುವ ಅವರು, ಬೆಂಬಲಿಸಿದ ಪ್ರತಿಯೊಬ್ಬರಿಗೂ ಕೃತಜ್ಞತೆ ಸಲ್ಲಿಸಿದ್ದಾರೆ.
2021ರಲ್ಲಿ ಆಸ್ಟ್ರೇಲಿಯಾ ವಿರುದ್ಧ ನಡೆದಿದ್ದ ಚೊಚ್ಚಲ ಪಿಂಕ್-ಬಾಲ್ ಟೆಸ್ಟ್ ಪಂದ್ಯದಲ್ಲಿ ಪೂನಮ್ ರಾವತ್ ಅವರ ಕ್ರೀಡಾಸ್ಫೂರ್ತಿ ಎಲ್ಲರ ಮೆಚ್ಚುಗೆಗೆ ಪಾತ್ರವಾಗಿತ್ತು. ಅಂಪೈರ್ ನಾಟ್-ಔಟ್ ತೀರ್ಪು ನೀಡಿದ್ದರೂ, ತಾವು ಚೆಂಡನ್ನು ಸ್ಪರ್ಶಿಸಿರುವುದನ್ನು ಅರಿತು ತಾವಾಗಿಯೇ ಮೈದಾನದಿಂದ ಹೊರನಡೆದ ಅವರ ನಡೆ ಕ್ರೀಡಾಭಿಮಾನಿಗಳ ಮನಗೆದ್ದಿತ್ತು. ನಿವೃತ್ತಿಯ ನಂತರವೂ ಕ್ರಿಕೆಟ್ ಮೇಲಿನ ತಮ್ಮ ಪ್ರೀತಿ ಎಂದಿಗೂ ಕಡಿಮೆಯಾಗುವುದಿಲ್ಲ ಹಾಗೂ ಭವಿಷ್ಯದಲ್ಲಿ ಕ್ರೀಡೆಗೆ ಮರಳಿ ಸೇವೆ ಸಲ್ಲಿಸುವ ಗುರಿ ಹೊಂದಿರುವುದಾಗಿ ಅವರು ಸ್ಪಷ್ಟಪಡಿಸಿದ್ದಾರೆ.
ಇದನ್ನೂ ಓದಿ:ದುಬೈನಲ್ಲಿ ಐಷಾರಾಮಿ ಮನೆ ಖರೀದಿಸಿದ ಸೂರ್ಯಕುಮಾರ್ ಯಾದವ್: ಶಾರುಖ್ ಖಾನ್‌ಗೆ ನೆರೆಯವರಾದ ಸ್ಕೈ
