ನವದೆಹಲಿ : ಆಸ್ಟ್ರೇಲಿಯಾ ಪ್ರವಾಸದ ಏಕದಿನ ಸರಣಿಗೆ ಭಾರತ ತಂಡದಿಂದ ಅನಿರೀಕ್ಷಿತವಾಗಿ ಕೈ ಬಿಟ್ಟಿರುವುದರ ಕುರಿತು ಸ್ಟಾರ್ ಆಲ್ರೌಂಡರ್ ರವೀಂದ್ರ ಜಡೇಜಾ ಅವರು ಮೌನ ಮುರಿದಿದ್ದಾರೆ. ಈ ನಿರ್ಧಾರ ತಮಗೆ ಅಚ್ಚರಿ ತಂದಿಲ್ಲ, ಏಕೆಂದರೆ ತಂಡದ ಆಡಳಿತ ಮಂಡಳಿ ಮತ್ತು ಆಯ್ಕೆದಾರರು ಈ ಬಗ್ಗೆ ಮೊದಲೇ ತಮ್ಮೊಂದಿಗೆ ಸಂವಹನ ನಡೆಸಿದ್ದಾರೆ ಎಂದು ಅವರು ಸ್ಪಷ್ಟಪಡಿಸಿದ್ದಾರೆ. ವೆಸ್ಟ್ ಇಂಡೀಸ್ ವಿರುದ್ಧದ ದ್ವಿತೀಯ ಟೆಸ್ಟ್ ಪಂದ್ಯದ ಎರಡನೇ ದಿನದಾಟದ ನಂತರ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಅವರು, 2027ರ ಏಕದಿನ ವಿಶ್ವಕಪ್ ಆಡುವ ಬಲವಾದ ಆಕಾಂಕ್ಷೆಯನ್ನು ವ್ಯಕ್ತಪಡಿಸಿದ್ದಾರೆ.
ಆಯ್ಕೆ ಸಮಿತಿಯ ನಿರ್ಧಾರದ ಬಗ್ಗೆ ಜಡೇಜಾ ಹೇಳಿದ್ದೇನು? ತಂಡದಿಂದ ಕೈಬಿಟ್ಟಿರುವ ಬಗ್ಗೆ ಮಾತನಾಡಿದ ಜಡೇಜಾ, “ನೋಡಿ, ತಂಡಕ್ಕೆ ಆಯ್ಕೆ ಮಾಡುವುದು ಅಥವಾ ಬಿಡುವುದು ನನ್ನ ಕೈಯಲ್ಲಿಲ್ಲ. ಖಂಡಿತವಾಗಿಯೂ ನಾನು ಮುಂದಿನ ವಿಶ್ವಕಪ್ ಆಡಲು ಬಯಸುತ್ತೇನೆ. ಆದರೆ, ದಿನದ ಕೊನೆಯಲ್ಲಿ, ತಂಡದ ಆಡಳಿತ ಮಂಡಳಿ, ಆಯ್ಕೆದಾರರು, ಕೋಚ್ ಮತ್ತು ನಾಯಕರು ತಮ್ಮದೇ ಆದ ಯೋಜನೆಗಳನ್ನು ಹೊಂದಿರುತ್ತಾರೆ. ಈ ಸರಣಿಗೆ ನನ್ನನ್ನು ಆಯ್ಕೆ ಮಾಡದಿರುವುದರ ಹಿಂದೆ ಖಂಡಿತವಾಗಿಯೂ ಕೆಲವು ಕಾರಣಗಳಿವೆ,” ಎಂದು ಹೇಳಿದರು.
ತಂಡವನ್ನು ಪ್ರಕಟಿಸಿದಾಗ ತಮ್ಮ ಹೆಸರು ಇಲ್ಲದಿರುವುದು ತಮಗೆ ಯಾವುದೇ ಆಘಾತ ತರಲಿಲ್ಲ ಎಂದು ಜಡೇಜಾ ಸ್ಪಷ್ಟಪಡಿಸಿದರು. “ತಂಡ ಪ್ರಕಟವಾದಾಗ ನನ್ನ ಹೆಸರು ಇಲ್ಲದಿರುವುದನ್ನು ಕಂಡು ನನಗೆ ಅಚ್ಚರಿಯಾಗಲಿಲ್ಲ, ಏಕೆಂದರೆ ಅವರು ಮೊದಲೇ ನನ್ನೊಂದಿಗೆ ಮಾತನಾಡಿದ್ದರು. ನಾಯಕ, ಆಯ್ಕೆದಾರರು ಮತ್ತು ತರಬೇತುದಾರರು ತಮ್ಮ ಚಿಂತನೆಗಳೇನು ಮತ್ತು ಅದರ ಹಿಂದಿನ ಕಾರಣಗಳೇನು ಎಂಬುದನ್ನು ವಿವರಿಸಿದ್ದಾರೆ. ಇದು ಒಂದು ಒಳ್ಳೆಯ ವಿಷಯ, ಈ ಬಗ್ಗೆ ನನಗೆ ಸಂತೋಷವಿದೆ,” ಎಂದು ಜಡೇಜಾ ತಿಳಿಸಿದರು.
2027ರ ವಿಶ್ವಕಪ್ ಕನಸು ಮತ್ತು “ಅಪೂರ್ಣ ಕಾರ್ಯ” : ತಮ್ಮ ಏಕದಿನ ವೃತ್ತಿಜೀವನ ಮುಗಿದಿಲ್ಲ ಎಂಬುದನ್ನು ಒತ್ತಿ ಹೇಳಿದ ಜಡೇಜಾ, 2027ರ ವಿಶ್ವಕಪ್ ಗೆಲ್ಲುವುದು ತಮ್ಮ ಮುಂದಿನ ಗುರಿ ಎಂದು ಹೇಳಿದರು. “2023ರ ವಿಶ್ವಕಪ್ನಲ್ಲಿ ನಾವು ಗೆಲುವಿನ ಸನಿಹ ಬಂದು ಎಡವಿದ್ದೇವೆ. ಆ ‘ಅಪೂರ್ಣ ಕಾರ್ಯವನ್ನು’ ಪೂರ್ಣಗೊಳಿಸಲು ನಾನು ಪ್ರಯತ್ನಿಸುತ್ತೇನೆ,” ಎಂದು ಅವರು ಭರವಸೆ ವ್ಯಕ್ತಪಡಿಸಿದರು.
ಮುಂದಿನ ಅವಕಾಶ ಬಂದಾಗಲೆಲ್ಲಾ, ನಾನು ಅದನ್ನು ಎರಡೂ ಕೈಗಳಿಂದ ಬಳಸಿಕೊಳ್ಳುತ್ತೇನೆ. ಇಷ್ಟು ವರ್ಷಗಳಿಂದ ನಾನು ಏನು ಮಾಡುತ್ತಾ ಬಂದಿದ್ದೇನೋ, ಅದನ್ನೇ ಮುಂದುವರಿಸುತ್ತೇನೆ. ವಿಶ್ವಕಪ್ಗಿಂತ ಮೊದಲು ಇನ್ನೂ ಕೆಲವು ಏಕದಿನ ಪಂದ್ಯಗಳಿವೆ. ಅವುಗಳಲ್ಲಿ ನಾನು ಉತ್ತಮ ಪ್ರದರ್ಶನ ನೀಡಿ ಅವಕಾಶ ಪಡೆದರೆ, ಅದು ಭಾರತೀಯ ಕ್ರಿಕೆಟ್ಗೆ ಒಳ್ಳೆಯದು,” ಎಂದು ಜಡೇಜಾ ಹೇಳಿದರು. 2025ರ ಐಸಿಸಿ ಚಾಂಪಿಯನ್ಸ್ ಟ್ರೋಫಿ ಗೆದ್ದ ತಂಡದ ಭಾಗವಾಗಿದ್ದರೂ, ಆಸ್ಟ್ರೇಲಿಯಾ ಸರಣಿಯಿಂದ ಅವರನ್ನು ಕೈಬಿಟ್ಟಿರುವುದು ಹಲವರಲ್ಲಿ ಅಚ್ಚರಿ ಮೂಡಿಸಿತ್ತು.
