ಬೆಂಗಳೂರು: ದೇಶದ ಪಿಂಚಣಿ ನಿಧಿ ನಿಯಂತ್ರಣ ಮತ್ತು ಅಭಿವೃದ್ಧಿ ಪ್ರಾಧಿಕಾರವು (PFRDA) ಅಕ್ಟೋಬರ್ 1ರಿಂದ ರಾಷ್ಟ್ರೀಯ ಪಿಂಚಣಿ ವ್ಯವಸ್ಥೆಯಲ್ಲಿ (NPS) ಮಹತ್ವದ ಬದಲಾವಣೆ ಜಾರಿಗೆ ತರುತ್ತಿದೆ. ಮಲ್ಟಿಪಲ್ ಸ್ಕೀಮ್ ಫ್ರೇಮ್ ವರ್ಕ್ ಎಂಬ ಹೊಸ ವ್ಯವಸ್ಥೆಯನ್ನು ಜಾರಿಗೆ ತರುತ್ತಿದೆ. ಇದರಿಂದಾಗಿ ಖಾಸಗಿ ವಲಯಗಳಲ್ಲಿ ಕೆಲಸ ಮಾಡುತ್ತಿರುವ ನೌಕರರು ಎನ್ ಪಿಎಸ್ ಅಡಿಯಲ್ಲಿ ಹೂಡಿಕೆ, ನಿವೃತ್ತಿಗೆ ಪ್ಲಾನ್ ಮಾಡಲು ಸಹಕಾರಿಯಾಗುತ್ತದೆ.
ನೂತನ ವ್ಯವಸ್ಥೆ ಅನ್ವಯ ಅನ್ವಯ ಕಾರ್ಪೊರೇಟ್ ವಲಯದ ಉದ್ಯೋಗಿಗಳು, ಗಿಗ್ ವರ್ಕರ್ ಗಳು (ತಾತ್ಕಾಲಿಕ ಉದ್ಯೋಗಿಗಳು), ಸ್ವಯಂ ಉದ್ಯೋಗ ಹೊಂದಿರುವವರು ಎನ್ ಪಿ ಎಸ್ ಅನ್ವಯ ಮಧ್ಯಮ ಶ್ರೇಣಿಯ ರಿಸ್ಕ್ ಅಥವಾ ಹೆಚ್ಚು ರಿಸ್ಕ್ ಇರುವ ಹೂಡಿಕೆ ಆಯ್ಕೆಗಳನ್ನು ಮಾಡಿಕೊಳ್ಳಬಹುದಾಗಿದೆ. ಅಲ್ಲದೆ, ಶೇ.100ರಷ್ಟು ಎನ್ ಪಿ ಎಸ್ ಮೊತ್ತವನ್ನು ಈಕ್ವಿಟಿಗಳಲ್ಲಿ ಹೂಡಿಕೆ ಮಾಡಲು ಅವಕಾಶ ನೀಡಲಾಗುತ್ತದೆ. ಇದರಿಂದ ಉದ್ಯೋಗಿಗಳಿಗೆ ಹೂಡಿಕೆ ದೃಷ್ಟಿಯಿಂದ ಹೆಚ್ಚಿನ ಅವಕಾಶಗಳು ಸಿಗಲಿವೆ.
ಎನ್ ಪಿ ಎಸ್ ಆಯ್ಕೆ ಮಾಡಿಕೊಂಡವರು ತಮ್ಮ ಒಂದೇ ಎನ್ ಪಿ ಎಸ್ ಖಾತೆಯಲ್ಲಿ ಬಹು ಯೋಜನೆಗಳಲ್ಲಿ ಹೂಡಿಕೆ ಮಾಡಬಹುದು. ಈ ಹಿಂದೆ, ಒಂದು ಪ್ಯಾನ್ ಸಂಖ್ಯೆಗೆ ಕೇವಲ ಒಂದು ಯೋಜನೆಯಲ್ಲಿ ಮಾತ್ರ ಹೂಡಿಕೆ ಮಾಡಲು ಅವಕಾಶವಿತ್ತು. ಆದರೆ ಈಗ, ಮಲ್ಟಿಪಲ್ ಸ್ಕೀಮ್ ಫ್ರೇಮ್ ವರ್ಕ್ ಮೂಲಕ, ತಮ್ಮ ಆರ್ಥಿಕ ಗುರಿಗಳು ಮತ್ತು ಅಪಾಯ ಸಹಿಷ್ಣುತೆಗೆ ತಕ್ಕಂತೆ ವಿವಿಧ ಯೋಜನೆಗಳನ್ನು ಆಯ್ಕೆ ಮಾಡಬಹುದು.
ಹೆಚ್ಚಿನ ಆದಾಯವನ್ನು ಬಯಸುವವರು ಈಕ್ವಿಟಿಗಳಲ್ಲಿ ಶೇ.100ರವರೆಗೆ ಹೂಡಿಕೆ ಮಾಡಬಹುದು, ಇದು ಹೆಚ್ಚಿನ ಅಪಾಯದ ಜತೆಗೆ ಹೆಚ್ಚಿನ ಲಾಭವನ್ನು ನೀಡುವ ಸಾಧ್ಯತೆ ಹೊಂದಿದೆ. ಇದೇ ರೀತಿ, ಕಡಿಮೆ ರಿಸ್ಕ್ ಬಯಸುವವರು ಸರ್ಕಾರಿ ಸೆಕ್ಯುರಿಟೀಸ್ ಅಥವಾ ಮಧ್ಯಮ ಅಪಾಯದ ಯೋಜನೆಗಳನ್ನು ಆಯ್ಕೆ ಮಾಡಬಹುದು.
