ಅಮ್ಮ ಮನದಾಳದ ಆತ್ಮ. ಸದಾ ಹಸಿ- ಹಸಿ, ಹಸಿರು ಕನಸು ಹೊತ್ತು ನಡೆಯುವ ಜೀವಾತ್ಮ. ಕುಟುಂಬದವರ ಬದುಕಿಗಾಗಿ ಕೂಲಿ, ರಜೆ ಪಡೆಯದ ಜೀವಂತ ಯಂತ್ರ. ವಾತ್ಸಲ್ಯ, ಮಮತೆಗಳ ರೂಪಕ. ಭವ, ಭಾವದ್ದು ಎಂಥದ್ದೇ ಸಮಸ್ಯೆ ಇರಲಿ, ಅಮ್ಮ ಎಂಬ ಸತ್ಯದ ನದಿಯೊಂದು ಗುಪ್ತವಾಗಿ ಹರಿಯುತ್ತಲೇ ಇರುತ್ತದೆ. ಅದೇ ನನಗೆ ಶಕ್ತಿ. ಅದೇ ನನಗೆ ಪ್ರೇರಣೆ.
ಪ್ರೀತಿ, ವಾತ್ಸಲ್ಯ, ತ್ಯಾಗ, ಸಹನೆ ಇವೆಲ್ಲವೂ ಅಮ್ಮನೆಂಬ ಮೋಹಕರಾಗದ ರೂಪಕಗಳೇ. ದುಡಿಯುವ ಕೈಗಳು ಸೋಲುತ್ತವೆ. ಅಮ್ಮಂದಿರಿಗೂ ದಣಿವಾಗುತ್ತದೆ. ಆದರೂ ಅಮ್ಮ ನಮಗಾಗಿ ದುಡಿಯುತ್ತಾಳೆ. ಅಮ್ಮ ನಿನ್ನ ದಣಿವೆಲ್ಲಿ ಅಂದ್ರೆ, ನಿನ್ನ ನಗುವಿನಲ್ಲಿ ಮಾಯವಾಯ್ತು ಅಂತಾಳೆ..ಅಮ್ಮ..ಅಮ್ಮ…ಐ ಲವ್ ಯೂ…ಅಷ್ಟೇ!
ನಿನ್ನ ಹೊಗಳಿಕೆಗೆ ಯಾವ ಪದಗುಂಜ, ಪದಗುಚ್ಛವೂ ಇಲ್ಲ. ಯಾವ ಪದಗಳಿಗೂ ನಿಲುಕದ ಪ್ರೀತಿಯ ಗಣಿ ನೀನು. ಪ್ರತಿ ದಿನವೂ ನಿನ್ನದೇ ಆಗಿದ್ದರೂ ಇದೊಂದು ದಿನ ಯಾಕೋ ವಿಶೇಷ ಅಷ್ಟೇ ಅಮ್ಮ. ಆಗಸದಷ್ಟು ವಿಸ್ತಾರ ನೀನಮ್ಮ. ಸಾಗರದಷ್ಟು ಆಳದವಳು. ನಕ್ಷತ್ರ ಲೋಕದಂತೆ ಲೆಕ್ಕಕ್ಕೆ ಸಿಗದ ಗಣಿತದಂತೆ ನೀನು. ನೀನ್ನ ಬಣ್ಣಿಸಲಿ ಹೇಗೆ? ವರ್ಣಿಸಲಿ ಹೇಗೆ? ನಿನಗೆ ನೀನೇ ಸಾಟಿ ಐ ಲವ್ ಯೂ ಅಷ್ಟೇ…
ಆಡಿ ಬಾ ನನ್ನ ಕಂದ, ಅಂಗಾಲ ತೊಳೆದೇನ
ತೆಂಗಿನ ಕಾಯಿ ತಿಳಿನೀರ, ತೆಂಗಿನ ಕಾಯಿ ತಿಳಿನೀರ ತಕ್ಕೊಂಡು
ಬಂಗಾರದ ಮೊರೆ ತೊಳೆದೇನಾ…
ಬದುಕಿನ ಜಂಜಾಟ, ನೋವು, ಸಂಕಟದಲ್ಲೂ ನೀನು ಹಾಡುವ ಈ ಹಾಡು, ನೀನು ತೋರಿಸುವ ಈ ಪ್ರೀತಿ, ಬದುಕನ್ನೇ ಹಸಿರಾಗಿ ಕಾಣುವಂತೆ ಮಾಡುತ್ತಿದೆಯಲ್ಲವೇ ತಾಯಿ…ಎಲ್ಲ ಜಂಜಡಗಳ ಮಧ್ಯೆಯೂ ನೀನಗೊಬ್ಬಳಿಗೆ ಮಾತ್ರಮಕ್ಕಳನ್ನು ಬೆಳೆಸಲು ಸಮಯವಿರುವುದು, ಖುಷಿ ಇರುವುದು…. ಐ ಲವ್ ಯೂ ಅಮ್ಮ.
ಎಂದಿಗೂ ಎಂದೆಂದಿಗೂ ಬದಲಾಗದ ಜೀವ ಅಂದ್ರೆ ನನ್ನಮ್ಮ. ಅಮ್ಮ ನೀನ್ನ ಜವಾಬ್ದಾರಿ ಹಾಗೂ ನಿರ್ವಹಿಸುವ ಪಾತ್ರಗಳು ಬದಲಾಗಬಹುದು..ಆದರೆ, ನೀನು ಮಾತ್ರ ಬದಲಾಗಲೇ ಇಲ್ಲವಲ್ಲಮ್ಮ. ನೀನ್ನ ಪ್ರೀತಿ ಯಾವಾಗಲೂ ಹಾಗೆಯೇ ಉಳಿಯಿತು. ಅಮ್ಮ ಇಂದು ಮಮ್ಮಿ ಆಗಿರಬಹುದು. ಆದರೆ, ಪ್ರೀತಿಯಲ್ಲಿ ಭಾವದಲ್ಲಿ, ಭವದಲ್ಲಿ ಮಾತ್ರ ಬದಲಾವಣೆ ಇಲ್ಲ. ಬದಲಾದ ಬದುಕಿನಲ್ಲಿ ದುಡಿಮೆಯ ಜೊತೆಗೆ ಸಾಗುವ ಅಮ್ಮನಾದರೂ ಪ್ರೀತಿ ಮಾತ್ರ ಹಾಗೆಯೇ ಇದೆ.
ಸ್ನೇಹಿತರೆ, ಅಮ್ಮಂದಿರ ದಿನ ಇಂದು ಮಾತ್ರ ಆಚರಣೆಯಾಗುವ ಹಬ್ಬವಾಗದಿರಲಿ. ಅದು ಪ್ರತಿ ಕ್ಷಣ, ಪ್ರತಿ ದಿನ ಆಚರಣೆಯಾಗುವ ಸುದಿನವಾಗಲಿ. ಅಪ್ಪ -ಅಮ್ಮ ನಮ್ಮನ್ನು ಬೆಳೆಸುವ ಮಾಧ್ಯಮವಷ್ಟೇ ಆಗದಿರಲಿ. ಕಣ್ಣ ರೆಪ್ಪೆಯಂತೆ ಸಾಕಿದ ಅವಳಿಗೂ ವಯಸ್ಸಾಗುತ್ತದೆ. ಬದುಕಿನಲ್ಲಿ ಹಲವಾರು ಪಾತ್ರಗಳನ್ನು ನಿರ್ವಹಿಸಿದ ತಾಯಿ ಕೊನೆಗೂ ದಣಿಯುತ್ತಾಳೆ. ತಾಯಿ ಪಾತ್ರದ ನಂತರ ಮತ್ತೆ ಹಲವಾರು ತಿರುವು, ಪಾತ್ರಗಳನ್ನು ನಿರ್ವಹಿಸಿದ ಅವಳು ವೃದ್ಧೆಯಾಗಿ ಬಿಡುತ್ತಾಳೆ. ಅಲ್ಲಿಗೆ ಅವಳ ಬದುಕು ಮುಗಿಸುವುದು ಬೇಡ. ಅವಳ ಬದುಕಿಗೆ ಅಲ್ಲಿ ಮತ್ತೊಂದು ಹೊಸ ಹುಟ್ಟು ಸಿಗಲಿ.
ಆಗ ಅವಳು ನಮ್ಮ ಮಗುವಾಗಲಿ…ಪ್ರೀತಿಯ ಸ್ನೇಹಿತರೆ, ವೃದ್ಧ ತಾಯಿ ಮಗುವಾಗಲಿ..ಮಗುವಿನಂತೆ ನೋಡಿಕೊಳ್ಳಿ..ಮತ್ತೊಮ್ಮೆ ಐ ಲವ್ ಯೂ ಅಮ್ಮ..ಅಮ್ಮ ಹಾಗೂ ಅಮ್ಮನ ಪಾತ್ರ ನಿರ್ವಹಿಸುವ ಎಲ್ಲರಿಗೂ ಕರ್ನಾಟಕ ನ್ಯೂಸ್ ಬೀಟ್ ವತಿಯಿಂದ ವಿಶ್ವ ತಾಯಂದಿರ ದಿನದ ಶುಭಾಶಯಗಳು…ಅಮ್ಮ ನೀನು ಮಗುವಾಗಿ ಬದಲಾಗು ಅಷ್ಟೇ…ಧನ್ಯವಾದಗಳು…
