ಬೆಂಗಳೂರು : ಹತ್ತಾರು ವರ್ಷ ಕಂಡ ಕನಸಿನ ಮನೆಯ ಖರೀದಿಗಾಗಿಯೋ, ತುಂಬ ಇಷ್ಟದ ಕಾರು ಖರೀದಿಸಲೆಂದೋ ವೈಯಕ್ತಿ ಸಾಲ (Personal Loan) ಮಾಡಿರುತ್ತೇವೆ. ಆದರೆ, ಆರ್ಥಿಕ ಮುಗ್ಗಟ್ಟು ಅಥವಾ ಅಜಾಗರೂಕತೆಯಿಂದಾಗಿ ವೈಯಕ್ತಿಕ ಸಾಲದ ಇಎಂಐ ಪಾವತಿಯನ್ನು ಒಂದೇ ಒಂದು ತಿಂಗಳು ತಪ್ಪಿಸಿದರೂ ಅಥವಾ ಮಿಸ್ ಮಾಡಿಕೊಂಡರೂ ಗಂಭೀರ ಪರಿಣಾಮಗಳನ್ನು ಎದುರಿಸಬೇಕಾಗುತ್ತದೆ. ಅನೇಕರು ಇದನ್ನು ಸಾಮಾನ್ಯ ಸಂಗತಿ ಎಂದು ಭಾವಿಸುತ್ತಾರೆ. ಆದರೆ ಇದು ನಿಮ್ಮ ಆರ್ಥಿಕ ಆರೋಗ್ಯದ ಮೇಲೆ ವ್ಯತಿರಿಕ್ತ ಪರಿಣಾಮ ಬೀರುತ್ತದೆ.
ಇಎಂಐ ಪಾವತಿ ತಪ್ಪಿದ ತಕ್ಷಣ ಬ್ಯಾಂಕ್ ಗಳು ಅಥವಾ ಹಣಕಾಸು ಸಂಸ್ಥೆಗಳು ವಿಳಂಬ ಶುಲ್ಕ (Late Payment Fee) ವಿಧಿಸುತ್ತವೆ. ಇದು ಸಾಮಾನ್ಯವಾಗಿ ಬಾಕಿ ಇರುವ ಇಎಂಐ ಮೊತ್ತದ ಶೇ. 1 ರಿಂದ 2ರಷ್ಟು ಇರುತ್ತದೆ. ಇದರೊಂದಿಗೆ, ಬಾಕಿ ಮೊತ್ತದ ಮೇಲೆ ದಂಡ ಬಡ್ಡಿಯೂ (Penal Interest) ಸೇರಿಕೊಳ್ಳುತ್ತದೆ. ನಿಮ್ಮ ಬ್ಯಾಂಕ್ ಖಾತೆಯಲ್ಲಿ ಹಣವಿಲ್ಲದೆ ಆಟೋ-ಡೆಬಿಟ್ ವಿಫಲವಾದರೆ, ಬ್ಯಾಂಕ್ ಗಳು ಪ್ರತ್ಯೇಕವಾಗಿ ಬೌನ್ಸ್ ಶುಲ್ಕವನ್ನು ವಿಧಿಸುತ್ತವೆ.
ಅತಿ ಮುಖ್ಯವಾಗಿ, ಇಎಂಐ ಪಾವತಿ ವಿಳಂಬವಾದರೆ ಅದು ನಿಮ್ಮ ಕ್ರೆಡಿಟ್ ಸ್ಕೋರ್ (CIBIL Score) ಮೇಲೆ ನೇರ ಪರಿಣಾಮ ಬೀರುತ್ತದೆ. ಸಾಲದ ಕಂತು ಮಿಸ್ ಆಗುತ್ತಿದ್ದಂತೆ ಬ್ಯಾಂಕ್ ಗಳು ಕ್ರೆಡಿಟ್ ಬ್ಯೂರೋಗಳಿಗೆ ಮಾಹಿತಿ ನೀಡುತ್ತವೆ. ಇದರಿಂದ ನಿಮ್ಮ ಸಿಬಿಲ್ ಸ್ಕೋರ್ 50 ರಿಂದ 100 ಅಂಕಗಳವರೆಗೆ ಕುಸಿಯಬಹುದು. ಕಡಿಮೆ ಕ್ರೆಡಿಟ್ ಸ್ಕೋರ್ ಭವಿಷ್ಯದಲ್ಲಿ ಹೊಸ ಸಾಲಗಳು ಅಥವಾ ಕ್ರೆಡಿಟ್ ಕಾರ್ಡ್ ಗಳನ್ನು ಪಡೆಯುವುದು ಕಷ್ಟವಾಗುತ್ತದೆ.
ಒಂದು ವೇಳೆ ಒಂದೆರಡು ದಿನಗಳ ವಿಳಂಬವಾಗಿದ್ದರೆ ಮತ್ತು ಬ್ಯಾಂಕ್ ನೀಡುವ ಗ್ರೇಸ್ ಪಿರಿಯಡ್ (Grace Period) ಒಳಗೆ ಪಾವತಿಸಿದರೆ ದೊಡ್ಡ ಸಮಸ್ಯೆ ಇಲ್ಲದಿರಬಹುದು. ಆದರೆ ಇದು ಪುನರಾವರ್ತನೆಯಾದರೆ ಬ್ಯಾಂಕ್ ಗಳಿಂದ ನಿರಂತರ ರಿಮೈಂಡರ್ ಕಾಲ್ ಗಳು ಮತ್ತು ನೋಟಿಸ್ ಗಳು ಬರಲು ಪ್ರಾರಂಭಿಸುತ್ತವೆ. 90 ದಿನಗಳಿಗೂ ಹೆಚ್ಚು ಕಾಲ ಇಎಂಐ ಬಾಕಿ ಉಳಿದರೆ ಸಾಲವನ್ನು ‘ಎನ್ಪಿಎ’ (NPA) ಎಂದು ಪರಿಗಣಿಸಿ ಕಾನೂನು ಕ್ರಮ ಕೈಗೊಳ್ಳುವ ಸಾಧ್ಯತೆಯಿರುತ್ತದೆ. ಆದ್ದರಿಂದ, ಇಎಂಐ ಪಾವತಿ ತಪ್ಪಿದ ತಕ್ಷಣವೇ ಬಾಕಿ ಮೊತ್ತವನ್ನು ಪಾವತಿಸುವುದು ಉತ್ತಮ. ಹಣಕಾಸಿನ ಸಮಸ್ಯೆ ಇದ್ದರೆ ಮುಂಚಿತವಾಗಿ ನಿಮ್ಮ ಸಾಲದಾತರನ್ನು ಸಂಪರ್ಕಿಸಿ ಪರಿಹಾರ ಕಂಡುಕೊಳ್ಳುವುದು ಸೂಕ್ತ.
ಇದನ್ನೂ ಓದಿ : ಸರ್ಕಾರಿ ನೌಕರರೇ ಗಮನಿಸಿ : ಈ ಪಿಂಚಣಿ ಯೋಜನೆಯಲ್ಲಿ ಬದಲಾವಣೆ ಇಲ್ಲ ಎಂದಿದೆ ಸರ್ಕಾರ
