ರೋಚಕ ಜಯ ಕಂಡ ಲಕ್ನೋ!

ಕೋಲ್ಕತ್ತಾ: ಕೋಲ್ಕತ್ತಾ ನೈಟ್ ರೈಡರ್ಸ್(KKR) ವಿರುದ್ಧ ಲಕ್ನೋ ಸೂಪರ್ ಜೈಂಟ್ಸ್(LSG) ತಂಡ ನಾಲ್ಕು ರನ್ ಗಳ ರೋಚಕ ಜಯ ಕಂಡಿದೆ.

ರಿಂಕು ಸಿಂಗ್‌ (Rinku Singh), ಹರ್ಷಿತ್‌ ರಾಣಾ ಹೋರಾಟದ ಫಲವೂ ಕೆಕೆಆರ್ ಗೆ ಸಿಗದಂತಾಯಿತು. ಕೊನೆಯ ಓವರ್ ನಲ್ಲಿ ಕೆಕೆಆರ್‌ ಗೆಲುವಿಗೆ 24 ರನ್‌ ಬೇಕಾಗಿದ್ದವು. ರವಿ ಬಿಷ್ಣೋಯಿ (Ravi Bishnoi) ಬೌಲಿಂಗ್‌ ನಲ್ಲಿದ್ದರೆ, ಹರ್ಷಿತ್‌ ರಾಣಾ ಸ್ಟ್ರೈಕ್‌ನಲ್ಲಿದ್ದರು.

ಈ ಪಂದ್ಯದಲ್ಲಿ ಟಾಸ್‌ ಸೋತು ಮೊದಲು ಬ್ಯಾಟಿಂಗ್‌ ಮಾಡಿದ ಲಕ್ನೋ ಸೂಪರ್‌ ಜೈಂಟ್ಸ್‌ ತಂಡ 20 ಓವರ್‌ ಗಳಲ್ಲಿ 3 ವಿಕೆಟ್‌ ನಷ್ಟಕ್ಕೆ 238 ರನ್‌ ಗಳಿಸಿತ್ತು. ಬೃಹತ್ ಗುರಿ ಬೆನ್ನಟ್ಟಿದ ಕೋಲ್ಕತ್ತಾ ನೈಟ್‌ ರೈಡರ್ಸ್‌ 20 ಓವರ್‌ಗಳಲ್ಲಿ 7 ವಿಕೆಟ್‌ ಕಳೆದುಕೊಂಡು 234 ರನ್‌ ಗಳಿಸಿ 4 ರನ್‌ ಗಳಿಂದ ವಿರೋಚಿತ ಸೋಲು ಕಂಡಿತು.

ಕೆಕೆಆರ್‌ ಆರಂಭದಿಂದಲೂ ಗೆಲುವಿನ ಭರವಸೆ ಮೂಡಿಸಿತ್ತು. ಅಜಿಂಕ್ಯಾ ರಹಾನೆ (Ajinkya Rahane), ಸುನೀಲ್‌ ನರೇನ್‌, ವೆಂಕಟೇಶ್‌ ಅಯ್ಯರ್‌ ಅವರ ಸ್ಫೋಟಕ ಬ್ಯಾಟಿಂಗ್‌ ತಂಡದ ಮೊತ್ತ ಹೆಚ್ಚಿಸುತ್ತ ಹೋಯಿತು. ಹೀಗಾಗಿ ಕೆಕೆಆರ್ ಗೆ ಸುಲಭ ಜಯ ಸಿಗಬಹುದು ಎಂದೇ ನಿರೀಕ್ಷಿಸಲಾಗಿತ್ತು. ಆದರೆ, 15, 16, 17ನೇ ಓವರ್‌ನಲ್ಲಿ ವಿಕೆಟ್ ಗಳು ಒಂದರ ಮೇಲೊಂದರಂತೆ ಉರುಳಿದ್ದರ ಪರಿಣಾಮ ತಂಡಕ್ಕೆ ಸೋಲು ಹತ್ತಿರವಾಯಿತು. ಆದರೂ ಕೊನೆಯಲ್ಲಿ ರಿಂಕು ಸಿಂಗ್ ಹಾಗೂ ಅಯ್ಯರ್ ಭರವಸೆ ಮೂಡಿಸಿದರು ಸೋಲೊಪ್ಪಿಕೊಳ್ಳುವಂತಾಯಿತು.

ಕೆಕೆಆರ್‌ ಪರ ಅಜಿಂಕ್ಯಾ ರಹಾನೆ 35 ಎಸೆತಗಳಲ್ಲಿ 61 ರನ್‌ (2 ಸಿಕ್ಸರ್‌, 8 ಬೌಂಡರಿ) ಚಚ್ಚಿದ್ರೆ, ಸುನೀಲ್‌ ನರೇನ್‌ 13 ಎಸೆತಗಳಲ್ಲಿ 30 ರನ್‌ (2 ಸಿಕ್ಸರ್‌, 4 ಬೌಂಡರಿ), ವೆಂಕಟೇಶ್‌ ಅಯ್ಯರ್‌ 45 ರನ್‌ (29 ಎಸೆತ, 6 ಬೌಂಡರಿ 1 ಸಿಕ್ಸರ್‌) ಬಾರಿಸಿದ್ರು. ಕೊನೆಯಲ್ಲಿ ರಿಂಕು ಸಿಂಗ್‌ 15 ಎಸೆತಗಳಲ್ಲಿ 38 ರನ್‌ ಬಾರಿಸಿದ್ರೆ, ಹರ್ಷಿತ್‌ ರಾಣಾ 9 ಎಸೆತಗಳಲ್ಲಿ 10 ರನ್‌ ಗಳಿಸಿದರು.

ಲಕ್ನೋ ಪರ ಆಕಾಶ್‌ ದೀಪ್‌, ಶಾರ್ದೂಲ್‌ ಠಾಕೂರ್‌ ತಲಾ 2, ಅವೇಶ್‌ ಖಾನ್‌, ದಿಗ್ವೇಷ್‌ ರಾಥಿ, ರವಿ ಬಿಷ್ಣೋಯಿ, ತಲಾ ಒಂದೊಂದು ವಿಕೆಟ್‌ ಪಡೆದರು. ಟಾಸ್‌ ಸೋತು ಮೊದಲು ಬ್ಯಾಟಿಂಗ್‌ ಮಾಡಿದ ಲಕ್ನೋ ಸೂಪರ್‌ ಜೈಂಟ್ಸ್‌ ತಂಡವು ನಿಕೋಲಸ್‌ ಪೂರನ್‌ (Nicholas Pooran) ಸಿಡಿಲಬ್ಬರದ ಬ್ಯಾಟಿಂಗ್‌ ನೆರವಿನಿಂದ 20 ಓವರ್‌ ಗಳಲ್ಲಿ ಕೇವಲ 3 ವಿಕೆಟ್‌ ಕಳೆದುಕೊಂಡು 238 ರನ್‌ ಗಳಿಸಿತ್ತು.

ಏಡನ್‌ ಮಾರ್ಕ್ರಮ್‌, ಮಿಚೆಲ್‌ ಮಾರ್ಷ್‌ (Mitchell Mar) ಜೋಡಿ ಮೊದಲ ವಿಕೆಟ್‌ಗೆ 62 ಎಸೆತಗಳಲ್ಲಿ 99 ರನ್‌ ಜೊತೆಯಾಟ ನೀಡಿದರು. ಆರೆಂಜ್‌ ಕ್ಯಾಪ್‌ ತೊಟ್ಟಿರುವ ನಿಕೋಲಸ್‌ ಪೂರನ್‌ 3ನೇ ಅರ್ಧಶತಕ ಸಿಡಿಸಿ ಮಿಂಚಿದರು. 36 ಎಸೆತಗಳಲ್ಲಿ 87 ರನ್‌ (241.66 ಸ್ಟ್ರೈಕ್‌ರೇಟ್‌) ಸಿಡಿಸಿ ಅಜೇಯರಾಗುಳಿದರು. ಮಿಚೆಲ್‌ ಮಾರ್ಷ್‌ 48 ಎಸೆತಗಳಲ್ಲಿ 81 ರನ್‌ (5 ಸಿಕ್ಸರ್‌, 6 ಬೌಂಡರಿ), ಏಡನ್‌ ಮಾರ್ಕ್ರಮ್‌ 47 ರನ್‌ (28 ಎಸೆತ, 2 ಸಿಕ್ಸರ್‌, 4 ಬೌಂಡರಿ), ಅಬ್ದುಲ್‌ ಸಮದ್‌ 6 ರನ್‌, ಡೇವಿಡ್‌ ಮಿಲ್ಲರ್‌ ಅಜೇಯ 4 ರನ್‌ ಗಳಿಸಿದರು. ಹೀಗಾಗಿ ತಂಡದ ಮೊತ್ತ ಹೆಚ್ಚಾಯಿತು. ಕೆಕೆಆರ್ ಪರ ಹರ್ಷಿತ್ ರಾಣಾ 2, ಆ್ಯಂಡ್ರೆ ರಸೆಲ್ 1 ವಿಕೆಟ್‌ ಪಡೆದು ಮಿಂಚಿದರು.