ವಡೋದರಾ : ಮಹಿಳಾ ಪ್ರೀಮಿಯರ್ ಲೀಗ್ (WPL) ಟೂರ್ನಿಯಲ್ಲಿ ದೆಹಲಿ ಕ್ಯಾಪಿಟಲ್ಸ್ ಮತ್ತು ಮುಂಬೈ ಇಂಡಿಯನ್ಸ್ ನಡುವಿನ ಪಂದ್ಯವು ಹೊಸ ಇತಿಹಾಸಕ್ಕೆ ಸಾಕ್ಷಿಯಾಗಿದೆ. ದೆಹಲಿ ಕ್ಯಾಪಿಟಲ್ಸ್ ತಂಡದ ಪರವಾಗಿ ಕಣಕ್ಕಿಳಿದ 16 ವರ್ಷದ ದಿಯಾ ಯಾದವ್, ಡಬ್ಲ್ಯುಪಿಎಲ್ ಇತಿಹಾಸದಲ್ಲೇ ಆಡಿದ ‘ಅತ್ಯಂತ ಕಿರಿಯ ಆಟಗಾರ್ತಿ’ ಎಂಬ ಹೆಗ್ಗಳಿಕೆಗೆ ಪಾತ್ರರಾಗಿದ್ದಾರೆ.
ಹರಿಯಾಣ ಮೂಲದ ಈ ಯುವ ಆಟಗಾರ್ತಿಯನ್ನು ಕ್ರಿಕೆಟ್ ವಲಯದಲ್ಲಿ ‘ಚೋಟಾ ಶಫಾಲಿ’ ಎಂದೇ ಕರೆಯಲಾಗುತ್ತದೆ. ದೆಹಲಿ ಕ್ಯಾಪಿಟಲ್ಸ್ ತಂಡದ ನಾಯಕಿ ಜೆಮಿಮಾ ರಾಡ್ರಿಗಸ್ ಅವರು ಟಾಸ್ ನಂತರ ಮಾತನಾಡಿ, ಮಿನ್ನು ಮಣಿ ಅವರ ಬದಲಿಗೆ ದಿಯಾ ಯಾದವ್ ಅವರಿಗೆ ತಂಡದಲ್ಲಿ ಸ್ಥಾನ ನೀಡಿರುವುದಾಗಿ ಖಚಿತಪಡಿಸಿದರು. ಕೇವಲ 10 ಲಕ್ಷ ರೂ. ಮೂಲ ಬೆಲೆಗೆ ದೆಹಲಿ ತಂಡಕ್ಕೆ ಆಯ್ಕೆಯಾಗಿದ್ದ ದಿಯಾ, ಈಗ ಪ್ರಮುಖ ಪಂದ್ಯದಲ್ಲಿ ಆಡುವ ಅವಕಾಶ ಪಡೆದಿದ್ದಾರೆ.
ಯಾರು ಈ ದಿಯಾ ಯಾದವ್?
ದಿಯಾ ಯಾದವ್ 2023ರ ಅಂಡರ್-15 ಏಕದಿನ ಟ್ರೋಫಿಯಲ್ಲಿ ಅದ್ಭುತ ಪ್ರದರ್ಶನ ನೀಡುವ ಮೂಲಕ ರಾಷ್ಟ್ರೀಯ ಗಮನ ಸೆಳೆದಿದ್ದರು. ಆ ಟೂರ್ನಿಯಲ್ಲಿ ಬರೋಬ್ಬರಿ 578 ರನ್ ಗಳಿಸಿದ್ದ ಅವರು, ತ್ರಿಪುರಾ ವಿರುದ್ಧ ಕೇವಲ 125 ಎಸೆತಗಳಲ್ಲಿ ಅಜೇಯ 213 ರನ್ ಸಿಡಿಸಿ ದಾಖಲೆ ಬರೆದಿದ್ದರು. 2017ರ ಮಹಿಳಾ ವಿಶ್ವಕಪ್ ಫೈನಲ್ ಪಂದ್ಯವನ್ನು ವೀಕ್ಷಿಸಿದ ನಂತರ ಕ್ರಿಕೆಟ್ನತ್ತ ಆಕರ್ಷಿತರಾದ ದಿಯಾ, ಭಾರತಕ್ಕೆ ವಿಶ್ವಕಪ್ ಗೆಲ್ಲಿಸಿಕೊಡುವ ಕನಸು ಹೊತ್ತಿದ್ದಾರೆ.
ಮುಂಬೈ ಪಾಳೆಯದಲ್ಲೂ ಹೊಸ ಮುಖ
ಇದೇ ಪಂದ್ಯದಲ್ಲಿ ಮುಂಬೈ ಇಂಡಿಯನ್ಸ್ ತಂಡ ಕೂಡ 20 ವರ್ಷದ ಎಡಗೈ ಸ್ಪಿನ್ನರ್ ವೈಷ್ಣವಿ ಶರ್ಮಾ ಅವರಿಗೆ ಪದಾರ್ಪಣೆ ಮಾಡುವ ಅವಕಾಶ ನೀಡಿದೆ. ಗಾಯಗೊಂಡಿರುವ ವಿಕೆಟ್ ಕೀಪರ್ ಜಿ. ಕಮಲಿನಿ ಅವರ ಬದಲಿಗೆ ತಂಡಕ್ಕೆ ಸೇರ್ಪಡೆಯಾಗಿರುವ ವೈಷ್ಣವಿ, 2025ರ ಅಂಡರ್-19 ಟಿ20 ವಿಶ್ವಕಪ್ ವಿಜೇತ ಭಾರತ ತಂಡದ ಸದಸ್ಯೆಯಾಗಿದ್ದರು. ಇತ್ತೀಚೆಗೆ ಶ್ರೀಲಂಕಾ ವಿರುದ್ಧದ ಸರಣಿಯಲ್ಲಿ ಅವರು ಹಿರಿಯರ ತಂಡಕ್ಕೆ ಪದಾರ್ಪಣೆ ಮಾಡಿದ್ದರು.
ಇದನ್ನೂ ಓದಿ : ಶಿವಣ್ಣ-ಸುದೀಪ್ ಭೇಟಿಯಾಗಿ ಆಶೀರ್ವಾದ ಪಡೆದ ಗಿಲ್ಲಿ ನಟ.. ವಿಡಿಯೋ ವೈರಲ್!
