ಬೆಂಗಳೂರು : ಭಾರತೀಯ ದ್ವಿಚಕ್ರ ವಾಹನ ಮಾರುಕಟ್ಟೆಯಲ್ಲಿ ತನ್ನದೇ ಆದ ವಿಶೇಷ ಕ್ರೇಜ್ ಹೊಂದಿರುವ ಆಸ್ಟ್ರಿಯಾ ಮೂಲದ ಜನಪ್ರಿಯ ಬೈಕ್ ತಯಾರಕ ಕಂಪನಿ ಕೆಟಿಎಂ (KTM) ಇದೀಗ ಗ್ರಾಹಕರಿಗೆ ಬಿಗ್ ಶಾಕ್ ನೀಡಿದೆ. ಇತ್ತೀಚೆಗಷ್ಟೇ 390 ಅಡ್ವೆಂಚರ್ ಸರಣಿಯ ಬೆಲೆಗಳನ್ನು ಏರಿಕೆ ಮಾಡಿದ್ದ ಕೆಟಿಎಂ, ಇದೀಗ ತನ್ನ ಆಕ್ರಮಣಕಾರಿ ಲುಕ್ ಹಾಗೂ ಪರ್ಫಾಮೆನ್ಸ್ಗೆ ಹೆಸರಾದ 390 ಡ್ಯೂಕ್ ಸರಣಿಯ ಬೈಕ್ಗಳ ಬೆಲೆಯನ್ನು ಕೂಡ ದಿಢೀರ್ ಹೆಚ್ಚಿಸಿದೆ. ಹೊಸ ಪರಿಷ್ಕೃತ ದರಗಳ ಪ್ರಕಾರ, ಈ ಶ್ರೇಣಿಯ ಬೈಕ್ಗಳ ಬೆಲೆಯಲ್ಲಿ 7,000 ರೂ. ವರೆಗೆ ಏರಿಕೆಯಾಗಿದೆ.
ಹೊಸ ಕೆಟಿಎಂ 390 ಡ್ಯೂಕ್ ಈಗಷ್ಟು ದುಬಾರಿ?
ಕೆಟಿಎಂ 390 ಡ್ಯೂಕ್ (350cc) ಮಾಡೆಲ್ನ ಬೆಲೆಯಲ್ಲಿ ಈಗ ಗರಿಷ್ಠ ಅಂದರೆ 7,000 ರೂ. ಗಳಷ್ಟು ಏರಿಕೆಯಾಗಿದೆ. ಈ ಹಿಂದೆ ಭಾರತೀಯ ಮಾರುಕಟ್ಟೆಯಲ್ಲಿ 2.77 ಲಕ್ಷ ರೂ. ಗಳಿಗೆ ಪ್ರವೇಶ ನೀಡುತ್ತಿದ್ದ ಈ ಬೈಕ್, ಈಗ ದರ ಪರಿಷ್ಕರಣೆಯ ನಂತರ 2.84 ಲಕ್ಷ ರೂ. (ಎಕ್ಸ್-ಶೋರೂಂ) ಬೆಲೆಗೆ ತಲುಪಿದೆ. ಇದು ಬಜೆಟ್ ಸ್ನೇಹಿಯಾಗಿ ಪರ್ಫಾಮೆನ್ಸ್ ಬೈಕ್ ಖರೀದಿಸುವ ಗ್ರಾಹಕರ ಜೇಬಿಗೆ ಕೊಂಚ ಕತ್ತರಿ ಹಾಕಲಿದೆ.
ಕೆಟಿಎಂ 390 ಡ್ಯೂಕ್ ಆರ್ (399cc) ದರವೂ ಹೆಚ್ಚಳ
ಇನ್ನು ಇದೇ ಸರಣಿಯ ಟಾಪ್-ಎಂಡ್ ಪರ್ಫಾಮೆನ್ಸ್ ನೀಡುವ ಶಕ್ತಿಶಾಲಿ 399cc ಎಂಜಿನ್ ಸಾಮರ್ಥ್ಯದ ‘ಕೆಟಿಎಂ 390 ಡ್ಯೂಕ್ ಆರ್’ ಮಾಡೆಲ್ ಕೂಡ ದುಬಾರಿಯಾಗಿದೆ. ಈ ಮಾಡೆಲ್ನ ಬೆಲೆಯಲ್ಲಿ ಇದೀಗ 6,000 ರೂ. ಗಳಷ್ಟು ಹೆಚ್ಚಳವಾಗಿದ್ದು, ಈ ಹಿಂದೆ 3.39 ಲಕ್ಷ ರೂ. ಇದ್ದ ಇದರ ಬೆಲೆ ಇದೀಗ 3.45 ಲಕ್ಷ ರೂ. (ಎಕ್ಸ್-ಶೋರೂಂ) ಗಳಿಗೆ ಏರಿಕೆಯಾಗಿದೆ.
ಗಮನಾರ್ಹ ಬದಲಾವಣೆಗಳೇನು?
ಈ ಬೆಲೆ ಏರಿಕೆಯ ನಡುವೆಯೂ ಎರಡೂ ಬೈಕ್ಗಳಲ್ಲಿ ಯಾವುದೇ ತಾಂತ್ರಿಕ ಅಥವಾ ಯಾಂತ್ರಿಕ ಬದಲಾವಣೆಗಳನ್ನು ಮಾಡಲಾಗಿಲ್ಲ ಎನ್ನುವುದು ಗಮನಾರ್ಹ. ಎರಡೂ ಮಾಡೆಲ್ಗಳು ತಮ್ಮ ಹಿಂದಿನ ಎಂಜಿನ್ ಸಾಮರ್ಥ್ಯ, ವಿನ್ಯಾಸ ಮತ್ತು ವೈಶಿಷ್ಟ್ಯಗಳನ್ನೇ ಯಥಾವತ್ತಾಗಿ ಕಾಯ್ದುಕೊಂಡಿವೆ. ಕುತೂಹಲಕಾರಿ ಸಂಗತಿಯೆಂದರೆ, ಈ ಬೆಲೆ ಏರಿಕೆಯ ನಂತರ ಕೆಟಿಎಂ 390 ಡ್ಯೂಕ್ ಹಾಗೂ 390 ಡ್ಯೂಕ್ ಆರ್ ಮಾಡೆಲ್ಗಳ ನಡುವಿನ ಬೆಲೆಯ ಅಂತರವು ಸ್ವಲ್ಪ ಮಟ್ಟಿಗೆ ಕಡಿಮೆಯಾಗಿದೆ. ಈ ಮೊದಲು ಎರಡೂ ಬೈಕ್ಗಳ ನಡುವೆ 62,000 ರೂ. ಗಳಷ್ಟು ಬೆಲೆ ವ್ಯತ್ಯಾಸವಿದ್ದರೆ, ಭಿನ್ನ ದರ ಏರಿಕೆಯ ಕಾರಣ ಈ ಅಂತರವು ಇದೀಗ 61,000 ರೂ. ಗಳಿಗೆ ಇಳಿಕೆಯಾಗಿದೆ. ಆದರೂ ಕೂಡ, ಉತ್ಸಾಹಿ ರೈಡರ್ಗಳ ನೆಚ್ಚಿನ ಆಯ್ಕೆಯಾಗಿರುವ ಈ ಸ್ಪೋರ್ಟ್ಸ್ ಬೈಕ್ಗಳ ಬೇಡಿಕೆಯ ಮೇಲೆ ಈ ಸಣ್ಣ ಬೆಲೆ ಏರಿಕೆ ದೊಡ್ಡ ಪರಿಣಾಮ ಬೀರುವ ಸಾಧ್ಯತೆ ವಿರಳ.
ಇದನ್ನೂ ಓದಿ : ಕೆಎಸ್ಪಿಸಿಬಿ PRO ಹುದ್ದೆ ಶಾಶ್ವತ ವಿಲೀನದಲ್ಲಿ ಅಕ್ರಮ ಆರೋಪ : ಸಮಗ್ರ ತನಿಖೆಗೆ ದಿನೇಶ್ ಕಲ್ಲಹಳ್ಳಿ ದೂರು!
