ಲಂಡನ್: ಭಾರತ ಮತ್ತು ಇಂಗ್ಲೆಂಡ್ ನಡುವಣ ಮೂರನೇ ಟೆಸ್ಟ್ ಸರಣಿಯ ಲಾರ್ಡ್ಸ್ನಲ್ಲಿ ನಡೆಯುತ್ತಿರುವ ಪಂದ್ಯದ ಮೂರನೇ ದಿನ, ಆಲ್ರೌಂಡರ್ ನಿತೀಶ್ ಕುಮಾರ್ ರೆಡ್ಡಿ ಅವರಿಗೆ ಇಂಗ್ಲೆಂಡ್ ನಾಯಕ ಬೆನ್ ಸ್ಟೋಕ್ಸ್ ಎಸೆದ ಮಾರಕ ಬೌನ್ಸರ್ ತಲೆಗೆ ಬಡಿಯಿತು. ಇದರಿಂದ ಮೈದಾನದಲ್ಲಿ ಆತಂಕದ ವಾತಾವರಣ ನಿರ್ಮಾಣವಾದರೂ, ನಿತೀಶ್ ರೆಡ್ಡಿ ಚಿಕಿತ್ಸೆ ಪಡೆದು ಮತ್ತೆ ಬ್ಯಾಟಿಂಗ್ಗೆ ಮರಳಿದ್ದು, ಅಭಿಮಾನಿಗಳ ಮೆಚ್ಚುಗೆಗೆ ಪಾತ್ರರಾಗಿದ್ದಾರೆ.
ಸ್ಟೋಕ್ಸ್ ಬೌನ್ಸರ್, ಮೈದಾನದಲ್ಲಿ ಆತಂಕ
ಭಾರತ ಪ್ರಥಮ ಇನ್ನಿಂಗ್ಸ್ನಲ್ಲಿ ಬ್ಯಾಟಿಂಗ್ ಮಾಡುತ್ತಿದ್ದಾಗ, 90ನೇ ಓವರ್ನಲ್ಲಿ ಬೆನ್ ಸ್ಟೋಕ್ಸ್ ಎಸೆದ ವೇಗದ ಬೌನ್ಸರ್ ನೇರವಾಗಿ ನಿತೀಶ್ ರೆಡ್ಡಿ ಅವರ ಹೆಲ್ಮೆಟ್ಗೆ ಬಡಿಯಿತು. ಚೆಂಡಿನ ಏಟಿಗೆ ನಿತೀಶ್ ರೆಡ್ಡಿ ತಕ್ಷಣವೇ ನೆಲದಲ್ಲಿ ಕುಸಿದು ಕುಳಿತರು. ಕೂಡಲೇ ಭಾರತ ತಂಡದ ಫಿಸಿಯೊ ಮೈದಾನಕ್ಕೆ ಧಾವಿಸಿದ್ದು, ಪರಿಸ್ಥಿತಿ ಸ್ವಲ್ಪ ಉದ್ವಿಗ್ನತೆಯಿಂದ ಕೂಡಿತ್ತು. ಆಟವನ್ನು ಸ್ವಲ್ಪ ಸಮಯದವರೆಗೆ ನಿಲ್ಲಿಸಲಾಯಿತು. ವೈದ್ಯಕೀಯ ತಂಡದ ತಪಾಸಣೆಯ ಬಳಿಕ ನಿತೀಶ್ ರೆಡ್ಡಿ ಪುನಃ ಬ್ಯಾಟಿಂಗ್ ಮುಂದುವರಿಸಿದಾಗ ಭಾರತೀಯ ಅಭಿಮಾನಿಗಳ ಆತಂಕ ಕೊಂಚ ಕಡಿಮೆಯಾಯಿತು.
ನಿತೀಶ್ ರೆಡ್ಡಿಯ ಹೋರಾಟದ ಬ್ಯಾಟಿಂಗ್ ಮತ್ತು ಜಡೇಜಾ ಜೊತೆಯಾಟ
ಹೆಲ್ಮೆಟ್ಗೆ ಚೆಂಡು ತಗುಲಿಸಿಕೊಂಡ ಹೊರತಾಗಿಯೂ ನಿತೀಶ್ ರೆಡ್ಡಿ ಉತ್ತಮ ಬ್ಯಾಟಿಂಗ್ ಪ್ರದರ್ಶನ ನೀಡಿದರು. ಅವರು 91 ಎಸೆತಗಳಲ್ಲಿ ನಾಲ್ಕು ಬೌಂಡರಿಗಳೊಂದಿಗೆ 30 ರನ್ಗಳನ್ನು ಗಳಿಸಿ, ರವೀಂದ್ರ ಜಡೇಜಾ ಅವರೊಂದಿಗೆ 72 ರನ್ಗಳ ಮಹತ್ವದ ಜೊತೆಯಾಟವನ್ನು ಆಡಿದರು. ಉತ್ತಮವಾಗಿ ಬ್ಯಾಟ್ ಮಾಡುತ್ತಿದ್ದ ನಿತೀಶ್, ಅಂತಿಮವಾಗಿ ಬೆನ್ ಸ್ಟೋಕ್ಸ್ ಅವರ ಎಸೆತದಲ್ಲೇ ವಿಕೆಟ್ ಒಪ್ಪಿಸಿದರು.
ರಾಹುಲ್ ಶತಕ, ಜಡೇಜಾ ಅರ್ಧಶತಕ
ಮೂರನೇ ದಿನದಾಟದಲ್ಲಿ ಭಾರತದ ಇನ್ನಿಂಗ್ಸ್ಗೆ ಆಧಾರವಾಗಿದ್ದು ಕೆ.ಎಲ್. ರಾಹುಲ್. ಲಾರ್ಡ್ಸ್ ಮೈದಾನದಲ್ಲಿ ತಮ್ಮ ಎರಡನೇ ಟೆಸ್ಟ್ ಶತಕವನ್ನು ಪೂರ್ಣಗೊಳಿಸಿ, ವೈಯಕ್ತಿಕ ಶತಕ ದಾಖಲಿಸಿದ ತಕ್ಷಣ ವಿಕೆಟ್ ಒಪ್ಪಿಸಿದರು. ಆದರೂ, ನಿತೀಶ್ ಕುಮಾರ್ ರೆಡ್ಡಿ ಮತ್ತು ನಂತರ ರವೀಂದ್ರ ಜಡೇಜಾ, ಜೋಫ್ರಾ ಆರ್ಚರ್ ನೇತೃತ್ವದ ಇಂಗ್ಲೆಂಡ್ನ ವೇಗದ ಬೌಲಿಂಗ್ ಅನ್ನು ಸಮರ್ಥವಾಗಿ ಎದುರಿಸಿದರು. ನಿತೀಶ್ ರೆಡ್ಡಿ ಬೇಗ ವಿಕೆಟ್ ಒಪ್ಪಿಸಿದರೂ, ರವೀಂದ್ರ ಜಡೇಜಾ ಬ್ಯಾಟಿಂಗ್ ಮುಂದುವರಿಸಿ ಅರ್ಧಶತಕವನ್ನು ಬಾರಿಸಿದರು. 113 ಓವರ್ಗಳ ಹೊತ್ತಿಗೆ ರವೀಂದ್ರ ಜಡೇಜಾ 129 ಎಸೆತಗಳಲ್ಲಿ 72 ರನ್ಗಳನ್ನು ಕಲೆ ಹಾಕಿದ್ದು, ಮತ್ತೊಂದು ತುದಿಯಲ್ಲಿ ವಾಷಿಂಗ್ಟನ್ ಸುಂದರ್ ಅವರಿಗೆ ಸಾಥ್ ನೀಡುತ್ತಿದ್ದರು. ಭಾರತ ತಂಡ 113 ಓವರ್ಗಳಿಗೆ ಪ್ರಥಮ ಇನ್ನಿಂಗ್ಸ್ನಲ್ಲಿ 376 ರನ್ಗಳನ್ನು ಗಳಿಸಿದೆ.
ಲಾರ್ಡ್ಸ್ನಲ್ಲಿ ರಾಹುಲ್ ವಿಶೇಷ ದಾಖಲೆ
ಕೆ.ಎಲ್. ರಾಹುಲ್ ಮೂರನೇ ದಿನದಾಟದಲ್ಲಿ ಅತ್ಯುತ್ತಮ ಬ್ಯಾಟಿಂಗ್ ಪ್ರದರ್ಶನ ತೋರಿದರು. ಅವರು 177 ಎಸೆತಗಳಲ್ಲಿ 13 ಬೌಂಡರಿಗಳೊಂದಿಗೆ 100 ರನ್ಗಳನ್ನು ಗಳಿಸಿ, ಕ್ರಿಕೆಟ್ ಕಾಶಿ ಲಾರ್ಡ್ಸ್ನಲ್ಲಿ ಎರಡು ಶತಕಗಳನ್ನು ಬಾರಿಸಿದ ಏಷ್ಯಾದ ಮೊದಲ ಆರಂಭಿಕ ಬ್ಯಾಟ್ಸ್ಮನ್ ಎಂಬ ಐತಿಹಾಸಿಕ ದಾಖಲೆಯನ್ನು ತಮ್ಮ ಹೆಸರಿಗೆ ಬರೆದುಕೊಂಡರು. ಅವರ ಈ ಸಾಧನೆ ಭಾರತೀಯ ಕ್ರಿಕೆಟ್ ಅಭಿಮಾನಿಗಳಿಗೆ ಹೆಮ್ಮೆಯನ್ನು ತಂದಿದೆ.
