ಭೋಪಾಲ್ : ಬಂದೂಕಿನ ಸದ್ದು, ಕಡಿದಾದ ಕಂದಕಗಳು ಮತ್ತು ರಕ್ತಪಾತಕ್ಕೆ ಹೆಸರಾಗಿದ್ದ ಮಧ್ಯಪ್ರದೇಶದ ಚಂಬಲ್ ಕಣಿವೆಯ ಮುರೇನಾ ಜಿಲ್ಲೆಯ ಸಣ್ಣ ಹಳ್ಳಿಯೊಂದರ ಯುವಕ ಇಂದು ದೇಶದ ಉನ್ನತ ನಾಗರಿಕ ಸೇವೆಗೆ ಆಯ್ಕೆಯಾಗುವ ಮೂಲಕ ಇಡೀ ಕುಟುಂಬದ ಇತಿಹಾಸವನ್ನೇ ಬದಲಾಯಿಸಿದ್ದಾರೆ. ಬಂದೂಕು ಹಿಡಿದು ‘ಬಾಗಿ’ (ಬಂಡುಕೋರ) ಎನಿಸಿಕೊಂಡಿದ್ದ ದರೋಡೆಕೋರನ ಮೊಮ್ಮಗ ದೇವ್ ಪ್ರಭಾಕರ್ ಸಿಂಗ್ ತೋಮರ್, ತಮ್ಮ ಸತತ ಶ್ರಮದಿಂದ ಐಐಟಿ ಪದವಿ ಪಡೆದು, ನೆದರ್ಲ್ಯಾಂಡ್ಸ್ನಲ್ಲಿದ್ದ ಲಕ್ಷಾಂತರ ರೂಪಾಯಿ ಸಂಬಳದ ಉದ್ಯೋಗ ತೊರೆದು ಯುಪಿಎಸ್ಸಿ ಪರೀಕ್ಷೆಯಲ್ಲಿ 629ನೇ ರ್ಯಾಂಕ್ ಗಳಿಸುವ ಮೂಲಕ ಸಾರ್ವಜನಿಕ ಸೇವೆಗೆ ಅಡಿಯಿಟ್ಟಿದ್ದಾರೆ.
ಮೂರು ತಲೆಮಾರಿನ ಮೂರು ವಿಭಿನ್ನ ಹಾದಿಗಳು
ದೇವ್ ಪ್ರಭಾಕರ್ ಅವರ ಕುಟುಂಬದ ಕಥೆ ಮೂರು ತಲೆಮಾರುಗಳ ಮೂರು ಭಿನ್ನ ನಿರ್ಧಾರಗಳನ್ನು ಬಿಂಬಿಸುತ್ತದೆ. ಸುಮಾರು 75 ವರ್ಷಗಳ ಹಿಂದೆ ಕುಟುಂಬದ ಕಲಹ ಹಾಗೂ ಅಂದಿನ ಅಧಿಕಾರಿಗಳೊಂದಿಗಿನ ವೈಷಮ್ಯದಿಂದಾಗಿ ದೇವ್ ಅವರ ಅಜ್ಜ ಕಣಿವೆಗಳಿಗೆ ಸೇರಿ ‘ಬಾಗಿ’ ಅಥವಾ ಬಂಡುಕೋರರಾದರು.
ಪೋಲಿಸ್ ದಾಖಲೆಗಳು ಅವರನ್ನು ದರೋಡೆಕೋರ ಎಂದು ಕರೆದರೂ ಸ್ಥಳೀಯವಾಗಿ ಅವರು ‘ಬಾಗಿ’ ಎಂದೇ ಗುರುತಿಸಲ್ಪಟ್ಟಿದ್ದರು. ಇದರಿಂದ ಕುಟುಂಬ ತೀವ್ರ ಬಡತನ ಮತ್ತು ಆಹಾರದ ಅಭಾವವನ್ನು ಎದುರಿಸಬೇಕಾಯಿತು. ನಂತರದ ದಿನಗಳಲ್ಲಿ ಅವರ ಚಿಕ್ಕಪ್ಪ ಕೂಡ ಇದೇ ಹಾದಿ ತುಳಿದರು. ಆದರೆ ದೇವ್ ಅವರ ತಂದೆ ಈ ಹಿಂಸಾಚಾರದ ಹಾದಿಯನ್ನು ನಿರಾಕರಿಸಿದರು. ಹಳ್ಳಿಯಿಂದ ಯಾರಿಗೂ ತಿಳಿಸದೆ ಗ್ವಾಲಿಯರ್ಗೆ ತೆರಳಿ ಶಿಕ್ಷಣ ಮುಂದುವರಿಸಿದ ಅವರು, ಕಾಲಕ್ರಮೇಣ ಶಿಕ್ಷಕರಾಗಿ ಉದ್ಯೋಗ ಗಿಟ್ಟಿಸಿಕೊಂಡು ಕುಟುಂಬಕ್ಕೆ ಹೊಸ ದಾರಿ ತೋರಿಸಿದರು.
ಸ್ವಯಂ ಅಧ್ಯಯನದ ಮೂಲಕ ಐಐಟಿ ಪ್ರವೇಶ
ಆರಂಭಿಕ 5 ವರ್ಷಗಳ ಶಿಕ್ಷಣವನ್ನು ಮಧ್ಯಪ್ರದೇಶ ರಾಜ್ಯ ಪಠ್ಯಕ್ರಮದಲ್ಲಿ ಪೂರೈಸಿದ ದೇವ್, 6ನೇ ತರಗತಿಯಲ್ಲಿ ಸಿಬಿಎಸ್ಇ ಶಾಲೆಗೆ ಸೇರಿದಾಗ ಭಾಷೆ ಮತ್ತು ವಾತಾವರಣದ ಬದಲಾವಣೆಯಿಂದಾಗಿ ಸಾಕಷ್ಟು ತೊಂದರೆ ಅನುಭವಿಸಿದರು. 11ನೇ ತರಗತಿಯಲ್ಲಿದ್ದಾಗ ಇಂಜಿನಿಯರಿಂಗ್ ಪ್ರವೇಶ ಪರೀಕ್ಷೆಗಳ ಬಗ್ಗೆ ತಿಳಿದ ದೇವ್, ಐಐಟಿಗೆ ಸೇರಲು ನಿರ್ಧರಿಸಿದರು. ಕೋಟಾದಂತಹ ದುಬಾರಿ ತರಬೇತಿ ಕೇಂದ್ರಗಳಿಗೆ ಹೋಗಲು ಹಣವಿಲ್ಲದ ಕಾರಣ, ಮನೆಯಲ್ಲೇ ಪುಸ್ತಕಗಳನ್ನು ಇಟ್ಟುಕೊಂಡು ಸ್ವಯಂ ಅಧ್ಯಯನ ನಡೆಸಿ ಐಐಟಿ ರೋಪಾರ್ನಲ್ಲಿ ಎಲೆಕ್ಟ್ರಿಕಲ್ ಇಂಜಿನಿಯರಿಂಗ್ ಸೀಟು ಪಡೆದರು.
ನೆದರ್ಲ್ಯಾಂಡ್ಸ್ ಉದ್ಯೋಗ ತೊರೆದು ಯುಪಿಎಸ್ಸಿಯತ್ತ ಹೆಜ್ಜೆ
ಐಐಟಿ ಶಿಕ್ಷಣದ ನಂತರ ನೆದರ್ಲ್ಯಾಂಡ್ಸ್ನ ಆಮ್ಸ್ಟರ್ಡ್ಯಾಮ್ನಲ್ಲಿದ್ದ ಪ್ರಸಿದ್ಧ ‘ಫಿಲಿಪ್ಸ್’ ಕಂಪನಿಯಲ್ಲಿ ಉದ್ಯೋಗ ಪಡೆದ ದೇವ್ ಅವರಿಗೆ ವಿದೇಶದಲ್ಲಿ ನೆಲೆಸುವ ಅವಕಾಶವಿತ್ತು. ಆದರೆ ಸಾರ್ವಜನಿಕ ಸೇವೆಯ ಕನಸು ಅವರನ್ನು ಕಾಡಲಾರಂಭಿಸಿತು. ಪೂರ್ಣಾವಧಿ ಉದ್ಯೋಗದಲ್ಲಿದ್ದುಕೊಂಡು ಯುಪಿಎಸ್ಸಿಗೆ ಸಿದ್ಧತೆ ನಡೆಸುವುದು ಕಷ್ಟವೆಂದು ಅರಿತ ಅವರು, ತಮ್ಮ ಕೆಲಸಕ್ಕೆ ರಾಜೀನಾಮೆ ನೀಡಿ ಭಾರತಕ್ಕೆ ಮರಳಿದರು.
ಸತತ ಸೋಲುಗಳ ನಂತರ ಸಿಕ್ಕ ಯಶಸ್ಸು
ಯುಪಿಎಸ್ಸಿ ಪಯಣ ಸುಲಭವಾಗಿರಲಿಲ್ಲ. ಮೊದಲ ಪ್ರಯತ್ನದಲ್ಲಿ ಕೇವಲ 12.5 ಅಂಕಗಳಿಂದ ಹಾಗೂ ಎರಡನೇ ಪ್ರಯತ್ನದಲ್ಲಿ 2.5 ಅಂಕಗಳಿಂದ ಪ್ರಿಲಿಮ್ಸ್ ಅಂಕ ಗಳಿಕೆಯಲ್ಲಿ ಹಿನ್ನಡೆಯಾಯಿತು. ಈ ಸೋಲುಗಳಿಂದ ಧೃತಿಗೆಡದ ಅವರು, ಬರೀ ಓದುವುದಕ್ಕಿಂತ ಪರೀಕ್ಷೆಯ ಸ್ವರೂಪಕ್ಕೆ ತಕ್ಕಂತೆ ಸಿದ್ಧತೆ ನಡೆಸುವ ತಂತ್ರ ರೂಪಿಸಿದರು.
ತದನಂತರ ಮೇನ್ಸ್ ಮತ್ತು ಸಂದರ್ಶನದ ಹಂತ ತಲುಪಿದರೂ ಅಂತಿಮ ಪಟ್ಟಿಯಲ್ಲಿ ಹೆಸರು ಬರಲಿಲ್ಲ. ದೆಹಲಿಯಲ್ಲಿ ಶಿಕ್ಷಕರಾಗಿ ಕೆಲಸ ಮಾಡುತ್ತಲೇ ನಾಲ್ಕನೇ ಪ್ರಯತ್ನ ಮುಂದುವರಿಸಿದ ದೇವ್ ಪ್ರಭಾಕರ್, 2025ರ ಯುಪಿಎಸ್ಸಿ ಸಿವಿಲ್ ಸೇವೆಗಳ ಪರೀಕ್ಷೆಯಲ್ಲಿ ಅಖಿಲ ಭಾರತ ಮಟ್ಟದಲ್ಲಿ 629ನೇ ರ್ಯಾಂಕ್ ಗಳಿಸಿದರು. ಪ್ರಸ್ತುತ ಅವರು ಭಾರತೀಯ ರೈಲ್ವೆ ಸಂಚಾರ ಸೇವೆಗೆ (IRTS) ಆಯ್ಕೆಯಾಗಿದ್ದು, ಕೇಂದ್ರ ರೈಲ್ವೆ ಸಚಿವಾಲಯದಲ್ಲಿ ಅಧಿಕಾರಿಯಾಗಿ ಸೇವೆ ಸಲ್ಲಿಸುತ್ತಿದ್ದಾರೆ.
ಇದನ್ನೂ ಓದಿ : ಟಿವಿಯಲ್ಲಿ ‘ರೊ-ಕೊ’ ಸ್ಟೋರಿ ನೋಡಿದಾಗಲೆಲ್ಲಾ ನಾವು ನಗುತ್ತೇವೆ : ಕೊಹ್ಲಿ ಜೊತೆಗಿನ ಬಾಂಧವ್ಯ ಬಿಚ್ಚಿಟ್ಟ ರೋಹಿತ್!
