ಬದಲಾಗಿವೆ ನಿಯಮಗಳು : ಯಾವಾಗೆಲ್ಲ ಪ್ಯಾನ್ ಕಾರ್ಡ್ ಕಡ್ಡಾಯ ಗೊತ್ತಾ?

ಬೆಂಗಳೂರು : ಹೊಸ ಆದಾಯ ತೆರಿಗೆ ನಿಯಮಗಳ (Income Tax Rules) ಅನ್ವಯ ಪ್ಯಾನ್ (PAN) ಕಾರ್ಡ್ ಬಳಕೆಗೆ ಸಂಬಂಧಿಸಿದಂತೆ ಕೇಂದ್ರ ಸರ್ಕಾರವು ಪ್ರಮುಖ ಬದಲಾವಣೆಗಳನ್ನು ಜಾರಿಗೆ ತಂದಿದೆ. ಸಣ್ಣ ಮಟ್ಟದ ವಹಿವಾಟು ನಡೆಸುವವರಿಗೆ ನೆರವಾಗಲು ಕೆಲವು ಮಿತಿಗಳನ್ನು ಹೆಚ್ಚಿಸಲಾಗಿದ್ದರೆ, ದೊಡ್ಡ ಮೊತ್ತದ ವಹಿವಾಟುಗಳ ಮೇಲೆ ನಿಗಾ ಇರಿಸಲು ನಿಯಮಗಳನ್ನು ಕಟ್ಟುನಿಟ್ಟಾಗಿ ಜಾರಿಗೊಳಿಸಲಾಗಿದೆ. ಹೊಸ ನಿಯಮಗಳ ಕುರಿತು ಸಂಕ್ಷಿಪ್ತ ಮಾಹಿತಿ ಇಲ್ಲಿದೆ.

ನಗದು ಹಿಂಪಡೆಯುವಿಕೆ ಮತ್ತು ಜಮೆ

ಬ್ಯಾಂಕ್ ಅಥವಾ ಪೋಸ್ಟ್ ಆಫೀಸ್ ಖಾತೆಗಳಿಂದ ಒಂದು ಹಣಕಾಸು ವರ್ಷದಲ್ಲಿ ಒಟ್ಟು 10 ಲಕ್ಷ ರೂ. ಅಥವಾ ಅದಕ್ಕಿಂತ ಹೆಚ್ಚಿನ ನಗದು ಹಿಂಪಡೆಯುವಿಕೆಗೆ ಅಥವಾ ಜಮೆಗೆ ಪ್ಯಾನ್ ಕಾರ್ಡ್ ಕಡ್ಡಾಯವಾಗಿದೆ. ಇದಕ್ಕೂ ಮೊದಲು ಪ್ರತಿದಿನ 50 ಸಾವಿರ ರೂಪಾಯಿಗಿಂತ ಹೆಚ್ಚು ನಗದು ಜಮೆ ಮಾಡಿದರೆ ಪ್ಯಾನ್ ನೀಡಬೇಕಿತ್ತು. ಈಗ ಆ ದೈನಂದಿನ ಮಿತಿಯನ್ನು ತೆಗೆದುಹಾಕಿ, ವರ್ಷದ ಒಟ್ಟು ಮೊತ್ತದ ಆಧಾರದ ಮೇಲೆ ನಿಯಮ ರೂಪಿಸಲಾಗಿದೆ.

ಹೋಟೆಲ್ ಬಿಲ್ ಮತ್ತು ಕಾರ್ಯಕ್ರಮಗಳ ವೆಚ್ಚ

ಹೋಟೆಲ್ಗಳು, ರೆಸ್ಟೋರೆಂಟ್ ಗಳು, ಕನ್ವೆನ್ಷನ್ ಸೆಂಟರ್ ಗಳು, ಬ್ಯಾಂಕ್ವೆಟ್ ಹಾಲ್ ಗಳು ಅಥವಾ ಈವೆಂಟ್ ಮ್ಯಾನೇಜ್ ಮೆಂಟ್ ಸಂಸ್ಥೆಗಳಿಗೆ ನಗದು ರೂಪದಲ್ಲಿ 1 ಲಕ್ಷ ರೂ.ಗಿಂತ ಹೆಚ್ಚಿನ ಪಾವತಿ ಮಾಡಲು ಪ್ಯಾನ್ ಕಾರ್ಡ್ ಕಡ್ಡಾಯಗೊಳಿಸಲಾಗಿದೆ. ಹಿಂದೆ ಈ ಮಿತಿ 50 ಸಾವಿರ ರೂ. ಆಗಿತ್ತು. ಈಗ ಅದನ್ನು 1 ಲಕ್ಷ ರೂಪಾಯಿಗೆ ಹೆಚ್ಚಿಸುವ ಮೂಲಕ ಗ್ರಾಹಕರಿಗೆ ಸ್ವಲ್ಪ ಮಟ್ಟಿನ ವಿನಾಯಿತಿ ನೀಡಲಾಗಿದೆ. ಆದರೆ, ಇದರ ವ್ಯಾಪ್ತಿಗೆ ಕಲ್ಯಾಣ ಮಂಟಪಗಳು ಮತ್ತು ಈವೆಂಟ್ ಮ್ಯಾನೇಜರ್ ಗಳನ್ನೂ ಸೇರಿಸಲಾಗಿದೆ.

ರಿಯಲ್ ಎಸ್ಟೇಟ್ ಮತ್ತು ಆಸ್ತಿ ಖರೀದಿ

ಯಾವುದೇ ಸ್ಥಿರಾಸ್ತಿಯ ಖರೀದಿ, ಮಾರಾಟ, ಗಿಫ್ಟ್ ಡೀಡ್ ಗಳ ಮೌಲ್ಯ 20 ಲಕ್ಷ ರೂ.ಗಿಂತ ಹೆಚ್ಚಿದ್ದರೆ ಪ್ಯಾನ್ ಕಾರ್ಡ್ ನಮೂದಿಸುವುದು ಕಡ್ಡಾವಾಗಿದೆ. ಇದಕ್ಕೂ ಮೊದಲು 10 ಲಕ್ಷ ರೂಪಾಯಿಗಿಂತ ಹೆಚ್ಚಿನ ಮೌಲ್ಯದ ಆಸ್ತಿ ಖರೀದಿಗೆ ಪ್ಯಾನ್ ಕಾರ್ಡ್ ಕಡ್ಡಾಯಗೊಳಿಸಲಾಗಿತ್ತು. ಈಗ ಅದನ್ನು 20 ಲಕ್ಷ ರೂಪಾಯಿಗೆ ಹೆಚ್ಚಿಸಲಾಗಿದೆ. ಇದು ಸಣ್ಣ ನಗರಗಳಲ್ಲಿ ಮನೆ ಅಥವಾ ಸೈಟು ಕೊಳ್ಳುವವರಿಗೆ ನೆರವಾಗಲಿದೆ.

ಗಮನಿಸಿ : ಆಸ್ತಿಯ ಮೌಲ್ಯ ಅಥವಾ ಮುದ್ರಾಂಕ ಶುಲ್ಕದ ಮೌಲ್ಯ 45 ಲಕ್ಷ ರೂಪಾಯಿ ದಾಟಿದರೆ, ಪ್ಯಾನ್ ಕಾರ್ಡ್ ಇಲ್ಲದ ವ್ಯಕ್ತಿಗಳು ಕಡ್ಡಾಯವಾಗಿ ಹೊಸ ಪ್ಯಾನ್ ಕಾರ್ಡ್ ಗೆ ಅರ್ಜಿ ಸಲ್ಲಿಸಬೇಕಾಗುತ್ತದೆ. ಹಿಂದೆ ಪ್ಯಾನ್ ಇಲ್ಲದವರು ಫಾರ್ಮ್ 60 ನೀಡಬಹುದಿತ್ತು, ಆದರೆ 45 ಲಕ್ಷ ರೂ.ಗಿಂತ ಹೆಚ್ಚಿನ ಆಸ್ತಿ ವಹಿವಾಟಿಗೆ ಈಗ ಫಾರ್ಮ್ 60 (ಅಥವಾ ಹೊಸ ಫಾರ್ಮ್ 97) ಬಳಸುವಂತಿಲ್ಲ. ಈಗ ಅದಕ್ಕೆ ಪ್ಯಾನ್ ಕಾರ್ಡ್ ಕಡ್ಡಾಯಗೊಳಿಸಲಾಗಿದೆ.

ಇದನ್ನೂ ಓದಿ : “ಅಯ್ಯರ್ ನಾಯಕನಾಗಿದ್ದಕ್ಕೆ ನನಗೆ ಅತೀವ ಸಂತಸವಿದೆ” : ಮೌನ ಮುರಿದ ಸೂರ್ಯಕುಮಾರ್!