ಬೆಂಗಳೂರು, ಜು.13 : ಗ್ರೇಟರ್ ಬೆಂಗಳೂರು ಪ್ರಾಧಿಕಾರ (GBA) ಜುಲೈ 1ರಿಂದ ಆರಂಭಿಸಿರುವ ಫುಟ್ಪಾತ್ ಒತ್ತುವರಿ ತೆರವು ಕಾರ್ಯಾಚರಣೆ ನಗರದಾದ್ಯಂತ ವೇಗ ಪಡೆದುಕೊಂಡಿದೆ. ಜುಲೈ 10ರವರೆಗೆ ಕೇವಲ 10 ದಿನಗಳಲ್ಲಿ ಒಟ್ಟು 490.55 ಕಿಲೋಮೀಟರ್ ವ್ಯಾಪ್ತಿಯಲ್ಲಿ ಕಾರ್ಯಾಚರಣೆ ನಡೆಸಲಾಗಿದೆ.
ಐದು ನಗರ ಪಾಲಿಕೆಗಳ ವ್ಯಾಪ್ತಿಯಲ್ಲಿ ಪಾದಚಾರಿಗಳ ಸುರಕ್ಷಿತ ಸಂಚಾರಕ್ಕೆ ಅಡ್ಡಿಯಾಗಿದ್ದ ಅನಧಿಕೃತ ಒತ್ತುವರಿ, ತಾತ್ಕಾಲಿಕ ನಿರ್ಮಾಣಗಳು ಹಾಗೂ ಅಡ್ಡಿಗಳನ್ನು ತೆರವುಗೊಳಿಸಲಾಗಿದ್ದು, ಹಲವು ಪ್ರಮುಖ ರಸ್ತೆಗಳ ಫುಟ್ಪಾತ್ಗಳನ್ನು ಸಾರ್ವಜನಿಕರ ಬಳಕೆಗೆ ಮುಕ್ತಗೊಳಿಸಲಾಗಿದೆ.
ನಗರ ಪಾಲಿಕೆವಾರು ಕಾರ್ಯಾಚರಣೆ :
- ಬೆಂಗಳೂರು ಪಶ್ಚಿಮ – 122.62 ಕಿ.ಮೀ.
- ಬೆಂಗಳೂರು ಉತ್ತರ – 115.35 ಕಿ.ಮೀ.
- ಬೆಂಗಳೂರು ದಕ್ಷಿಣ – 94.01 ಕಿ.ಮೀ.
- ಬೆಂಗಳೂರು ಪೂರ್ವ – 88.42 ಕಿ.ಮೀ.
- ಬೆಂಗಳೂರು ಕೇಂದ್ರ – 70.15 ಕಿ.ಮೀ.
- ಒಟ್ಟು: 490.55 ಕಿ.ಮೀ.
ಅಧಿಕಾರಿಗಳ ಪ್ರಕಾರ, ಫುಟ್ಪಾತ್ಗಳನ್ನು ಪಾದಚಾರಿಗಳಿಗೆ ಸುರಕ್ಷಿತವಾಗಿ ಲಭ್ಯವಾಗಿಸುವುದು, ಸಂಚಾರ ದಟ್ಟಣೆ ಕಡಿಮೆ ಮಾಡುವುದು ಹಾಗೂ ನಗರದಲ್ಲಿ ಶಿಸ್ತುಬದ್ಧ ಸಾರ್ವಜನಿಕ ಸ್ಥಳ ನಿರ್ವಹಣೆಯೇ ಈ ಕಾರ್ಯಾಚರಣೆಯ ಉದ್ದೇಶವಾಗಿದೆ.
ಮುಂದಿನ ದಿನಗಳಲ್ಲಿಯೂ ಒತ್ತುವರಿ ತೆರವು ಕಾರ್ಯಾಚರಣೆ ನಿರಂತರವಾಗಿ ಮುಂದುವರಿಯಲಿದೆ. ಇನ್ನೊಂದೆಡೆ, ಕಾರ್ಯಾಚರಣೆಯಿಂದ ಜೀವನೋಪಾಯಕ್ಕೆ ಧಕ್ಕೆಯಾಗಿದೆ ಎಂದು ಕೆಲವು ಬೀದಿಬದಿ ವ್ಯಾಪಾರಿಗಳು ಆಕ್ಷೇಪ ವ್ಯಕ್ತಪಡಿಸಿದ್ದು, ಸಮರ್ಪಕ ಪುನರ್ವಸತಿ ಕಲ್ಪಿಸುವಂತೆ ಸರ್ಕಾರವನ್ನು ಒತ್ತಾಯಿಸಿದ್ದಾರೆ.
ಇದನ್ನೂ ಓದಿ : ಬಿಡದಿ ಟೌನ್ಶಿಪ್ ಜಟಾಪಟಿ : ಸರ್ವೆಗೆ ಬಂದ ಅಧಿಕಾರಿಗಳಿಗೆ ಮಹಿಳೆಯರ ಪೊರಕೆ ಸೇವೆ.. ಕಾರಿನ ಗ್ಲಾಸ್ ಪೀಸ್ ಪೀಸ್!
