ಇಸ್ಲಾಮಾಬಾದ್: ಜೈಲಿನಲ್ಲಿ ತನ್ನ ಪತ್ನಿ ಬುಶ್ರಾ ಬೀಬಿಗೆ ಜೈಲಿನಲ್ಲಿ ವಿಷಪ್ರಾಶನ ಮಾಡಿಸಲಾಗಿದೆ ಎಂದು ಪಾಕ್ ನ ಮಾಜಿ ಪ್ರಧಾನಿ ಇಮ್ರಾನ್ ಖಾನ್ ಗಂಭೀರ ಆರೋಪ ಮಾಡಿದ್ದಾರೆ.
ಮಾಜಿ ಪ್ರಥಮ ಮಹಿಳೆಯೂ ಆಗಿರುವ ಬುಶ್ರಾ ಬೀಬಿ ಅವರನ್ನು ಜೈಲಾಗಿ ಮಾರ್ಪಡಿಸಲಾದ ಖಾಸಗಿ ನಿವಾಸದಲ್ಲಿ ಬಂಧಿಸಿಡಲಾಗಿದ್ದು, ಅಲ್ಲಿಯೇ ವಿಷಪ್ರಾಶನ ಮಾಡಿಸಲಾಗಿದೆ. ಅವರಿಗೆ ಯಾವುದೇ ತೊಂದರೆಯಾದರೂ ಸೇನಾ ಮುಖ್ಯಸ್ಥರೇ ಹೊಣೆಯಾಗಬೇಕು ಎಂದು ಗುಡುಗಿದ್ದಾರೆ.
ಭ್ರಷ್ಟಾಚಾರ ಪ್ರಕರಣದ ವಿಚಾರಣೆ ಸಂದರ್ಭದಲ್ಲಿ ನ್ಯಾಯಾಲಯದಲ್ಲಿ ಅವರು, ಬುಶ್ರಾ ಬೀಬಿಯವರಿಗೆ ವಿಷ ಹಾಕುವ ಪ್ರಯತ್ನ ನಡೆದಿದೆ. ಆಕೆಯ ಚರ್ಮ ಮತ್ತು ನಾಲಿಗೆಯ ಮೇಲೆ ಗುರುತುಗಳಿವೆ. ಇದು ವಿಷದ ಅಡ್ಡ ಪರಿಣಾಮವಾಗಿದೆ. ಇದರ ಹಿಂದೆ ಯಾರಿದ್ದಾರೆ ಎಂಬುವುದು ನನಗೆ ಗೊತ್ತು ಎಂದು ಆಕ್ರೋಶ ವ್ಯಕ್ತಪಡಿಸಿದ್ದಾರೆ.
ಬುಶ್ರಾ ಬೀಬಿಗೆ ಏನಾದರೂ ತೊಂದರೆಯಾದರೆ, ಇಸ್ಲಾಮಾಬಾದ್ ನ ಬನಿ ಗಾಲಾ ನಿವಾಸ ಮತ್ತು ರಾವಲ್ಪಿಂಡಿಯ ಅಡಿಯಾಲಾ ಜೈಲಿನಲ್ಲಿ ಗುಪ್ತಚರ ಸಂಸ್ಥೆಯ ಸದಸ್ಯರು ಹಾಗೂ ಪಾಕಿಸ್ತಾನದ ಸೇನಾ ಮುಖ್ಯಸ್ಥ ಜನರಲ್ ಅಸಿಮ್ ಮುನೀರ್ ನೇರ ಹೊಣೆ ಎಂದು ಆರೋಪಿಸಿದ್ದಾರೆ.
ಹೀಗಾಗಿ 49 ವರ್ಷದ ಬುಶ್ರಾ ಬೀಬಿ ಅವರಿಗೆ ವೈದ್ಯಕೀಯ ಪರೀಕ್ಷೆ ನಡೆಸುವ ಹೊಣೆಯನ್ನು ಶೌಕತ್ ಖಾನಮ್ ಆಸ್ಪತ್ರೆಯ ಡಾ. ಆಸಿಮ್ ಗೆ ವಹಿಸಲು ಆದೇಶಿಸುವಂತೆ ಇಮ್ರಾನ್ ಖಾನ್ ನ್ಯಾಯಾಲಯಕ್ಕೆ ಒತ್ತಾಯಿಸಿದ್ದಾರೆ. ಇಮ್ರಾನ್ ಖಾನ್ ಮನವಿಗೆ ಸಕಾರಾತ್ಮಕವಾಗಿ ಸ್ಪಂದಿಸಿದ ಕೋರ್ಟ್, ಬುಶ್ರಾ ಬೀಬಿ ವೈದ್ಯಕೀಯ ಪರೀಕ್ಷೆಯ ಕುರಿತು ವಿವರವಾಗಿ ಅರ್ಜಿಯಲ್ಲಿ ತಿಳಿಸುವಂತೆ ಇಮ್ರಾನ್ ಖಾನ್ ಪರ ವಕೀಲರಿಗೆ ನಿರ್ದೇಶನ ಕೊಟ್ಟಿದೆ.
ಬುಶ್ರಾ ಬೀಬಿ, ನನ್ನ ಕಣ್ಣುಗಳು ಊದಿಕೊಳ್ಳುತ್ತಿವೆ. ನನ್ನ ಎದೆ ಭಾಗ ಮತ್ತು ಹೊಟ್ಟೆ ಭಾಗದಲ್ಲಿ ಅನಾರೋಗ್ಯ ಸಮಸ್ಯೆ ಅನುಭವಿಸುತ್ತಿದ್ದೇನೆ. ಸೇವಿಸುವ ಆಹಾರ ಮತ್ತು ಕುಡಿಯುವ ನೀರು ಕಹಿಯಾದ ಅನುಭವವಾಗುತ್ತದೆ. ಕೆಲವು ಅನುಮಾನಾಸ್ಪದ ವಸ್ತುವನ್ನು ಜೇನುತುಪ್ಪದಲ್ಲಿ ಮೊದಲು ಬೆರೆಸಲಾಗಿದೆ. ಆಹಾರದಲ್ಲಿ ಟಾಯ್ಲೆಟ್ ಕ್ಲೀನರ್ ಬೆರಸಿದ್ದಾರೆ ಎಂದು ಹೇಳಿಕೊಂಡಿದ್ದಾರೆ.
