ಬೆಂಗಳೂರು: ಬಹುನಿರೀಕ್ಷಿತ ನಮ್ಮ ಮೆಟ್ರೋದ ಗುಲಾಬಿ ಮಾರ್ಗ (ಪಿಂಕ್ ಲೈನ್) ಮೊದಲ ಹಂತದ ಕಾರ್ಯಾರಂಭಕ್ಕೆ ಸಿದ್ಧವಾಗಿದೆ. ಪ್ರಧಾನಿ ನರೇಂದ್ರ ಮೋದಿ ಅವರು ನವೆಂಬರ್ 13ರಂದು ತಾವರೆಕೆರೆ ಮೆಟ್ರೋ ನಿಲ್ದಾಣದಲ್ಲಿ ಹೊಸ ಮಾರ್ಗಕ್ಕೆ ಚಾಲನೆ ನೀಡಲಿದ್ದಾರೆ. ಆದರೆ, ಈ ಉದ್ಘಾಟನೆಯ ಸಂಭ್ರಮದ ನಡುವೆ, ಯೋಜನೆಯ ಅನುಷ್ಠಾನದಲ್ಲಿ ಆಗಿರುವ ಭಾರಿ ವಿಳಂಬ ಈಗ ಮತ್ತೆ ಚರ್ಚೆಗೆ ಗ್ರಾಸವಾಗಿದೆ. ಬರೋಬ್ಬರಿ ಐದು ವರ್ಷಗಳ ಹಿಂದೆಯೇ ಪೂರ್ಣಗೊಳ್ಳಬೇಕಿದ್ದ ಯೋಜನೆಯ ಮೊದಲ ಹಂತವಷ್ಟೇ ಇದೀಗ ಸಾರ್ವಜನಿಕ ಬಳಕೆಗೆ ಮುಕ್ತವಾಗುತ್ತಿದ್ದು, ಯೋಜನೆಯ ಒಟ್ಟು ಉದ್ದದ ಕೇವಲ ಶೇ. 35ರಷ್ಟು ಮಾತ್ರ ಸಂಚಾರ ಆರಂಭಗೊಳ್ಳುತ್ತಿದೆ.
5 ವರ್ಷ ತಡವಾಗಿ ಸೇವೆ ಆರಂಭ, 35% ಮಾತ್ರ ಲಭ್ಯ
ನಮ್ಮ ಮೆಟ್ರೋದ ಎರಡನೇ ಹಂತದ ಯೋಜನೆಗೆ 2014ರ ಜನವರಿ 30ರಂದು ಕೇಂದ್ರ ಸಚಿವ ಸಂಪುಟ ಅನುಮೋದನೆ ನೀಡಿತ್ತು. ಗೊಟ್ಟಿಗೆರೆ (ಕಾಳೇನ ಅಗ್ರಹಾರ) ಮತ್ತು ನಾಗವಾರವನ್ನು ಬೆಸೆಯುವ 21.25 ಕಿ.ಮೀ. ಉದ್ದದ ಈ ಪಿಂಕ್ ಲೈನ್ ಯೋಜನೆಯನ್ನು ಆರಂಭದಲ್ಲಿ ಐದು ವರ್ಷಗಳಲ್ಲಿ ಪೂರ್ಣಗೊಳಿಸುವ ಗುರಿ ಹೊಂದಲಾಗಿತ್ತು. 2017ರಲ್ಲಿ ಸಿದ್ಧಪಡಿಸಿದ ವೇಳಾಪಟ್ಟಿಯ ಪ್ರಕಾರ, ಎತ್ತರಿಸಿದ ಮಾರ್ಗದ ಕಾಮಗಾರಿಯನ್ನು 2020ರ ಜುಲೈಗೆ, ಭೂಗತ ಮಾರ್ಗವನ್ನು 2020ರ ಡಿಸೆಂಬರ್‌ಗೆ ಮುಗಿಸಿ 2021ರ ಮೇ ತಿಂಗಳಿನಲ್ಲಿ ಸಂಪೂರ್ಣ ಮಾರ್ಗವನ್ನು ಸಂಚಾರಕ್ಕೆ ಮುಕ್ತಗೊಳಿಸುವ ಗುರಿ ಇತ್ತು. ಆದರೆ, ಆ ಗುರಿ ಇದೀಗ ಐದೂವರೆ ವರ್ಷ ತಡವಾಗಿ, ನವೆಂಬರ್ 2026ಕ್ಕೆ ಮೊದಲ ಹಂತದ 7.5 ಕಿ.ಮೀ. ಮಾರ್ಗದಲ್ಲಿ ಮಾತ್ರ ಸಂಚಾರ ಆರಂಭವಾಗುತ್ತಿದೆ. ಅಂದರೆ 21.25 ಕಿ.ಮೀ. ಉದ್ದದ ಮಾರ್ಗದಲ್ಲಿ ಕೇವಲ ಶೇ.35ರಷ್ಟು ಮಾತ್ರ ಪ್ರಸ್ತುತ ಕಾರ್ಯಾರಂಭ ಮಾಡುತ್ತಿದ್ದು, ಉಳಿದ 13.76 ಕಿ.ಮೀ. ಭೂಗತ ಮಾರ್ಗ ಇನ್ನೂ ಪೂರ್ಣಗೊಂಡಿಲ್ಲ.
ಗುತ್ತಿಗೆದಾರರ ವೈಫಲ್ಯವೇ ವಿಳಂಬಕ್ಕೆ ಕಾರಣ
ಈ ಭಾರಿ ವಿಳಂಬಕ್ಕೆ ಪ್ರಮುಖ ಕಾರಣ ಕಾಮಗಾರಿ ನಿರ್ವಹಿಸುವ ಗುತ್ತಿಗೆದಾರರ ವೈಫಲ್ಯ. 2017ರ ಸೆಪ್ಟೆಂಬರ್‌ನಲ್ಲಿ ಸಿಂಪ್ಲೆಕ್ಸ್ ಇನ್‌ಫ್ರಾಸ್ಟ್ರಕ್ಚರ್ಸ್ ಸಂಸ್ಥೆಗೆ 7.5 ಕಿ.ಮೀ. ಉದ್ದದ ಎತ್ತರಿಸಿದ ಮಾರ್ಗದ ಕಾಮಗಾರಿಯನ್ನು 578.70 ಕೋಟಿ ರೂ. ವೆಚ್ಚದಲ್ಲಿ 27 ತಿಂಗಳ ಗಡುವಿನೊಂದಿಗೆ ನೀಡಲಾಗಿತ್ತು. 2019ರ ಅಂತ್ಯದ ವೇಳೆಗೆ ಮುಗಿಯಬೇಕಿದ್ದ ಕಾಮಗಾರಿ ನಿರೀಕ್ಷಿತ ವೇಗ ಪಡೆಯಲಿಲ್ಲ. 2021ರ ಆರಂಭದ ವೇಳೆಗೆ ಕೇವಲ ಶೇ.37ರಷ್ಟು ಮಾತ್ರ ಪೂರ್ಣಗೊಂಡಿತ್ತು. ಇದರಿಂದಾಗಿ ಬಿಎಂಆರ್‌ಸಿಎಲ್ ಗುತ್ತಿಗೆ ರದ್ದುಗೊಳಿಸಿ, ಆಗಸ್ಟ್ 2021ರಲ್ಲಿ ಮರುಟೆಂಡರ್ ಕರೆದು ಬೇರೆ ಗುತ್ತಿಗೆದಾರರಿಗೆ ವಹಿಸಬೇಕಾಯಿತು. ಇನ್ನು ಭೂಗತ ಮಾರ್ಗದಲ್ಲಿನ ಕಠಿಣ ಬಂಡೆಗಳು ಮತ್ತು ಸುರಂಗ ಕೊರೆಯುವ ಯಂತ್ರಗಳ ಕಾರ್ಯಾಚರಣೆಯಲ್ಲಾದ ಸವಾಲುಗಳು ಕಾಮಗಾರಿಯ ವೇಗಕ್ಕೆ ತಡೆಯೊಡ್ಡಿದವು.
ನವೆಂಬರ್ 14ರಿಂದ ಸಂಚಾರ ಆರಂಭ
ನವೆಂಬರ್ 13ರಂದು ಪ್ರಧಾನಿ ಮೋದಿಯವರು ತಾವರೆಕೆರೆಯಿಂದ ಐಐಎಂಬಿ ನಿಲ್ದಾಣದವರೆಗೆ ಮೆಟ್ರೋದಲ್ಲಿ ಸಂಚರಿಸಿ ಚಾಲನೆ ನೀಡಲಿದ್ದಾರೆ. ನವೆಂಬರ್ 14ರ ಬೆಳಿಗ್ಗೆ 6 ಗಂಟೆಯಿಂದ (ಭಾನುವಾರ 7 ಗಂಟೆ) ಕಾಳೇನ ಅಗ್ರಹಾರ ಮತ್ತು ತಾವರೆಕೆರೆ ನಿಲ್ದಾಣಗಳಿಂದ ಏಕಕಾಲದಲ್ಲಿ ರೈಲುಗಳ ವಾಣಿಜ್ಯ ಸಂಚಾರ ಆರಂಭವಾಗಲಿದೆ. ರಾತ್ರಿ 11 ಗಂಟೆಯವರೆಗೆ ಸೇವೆ ಲಭ್ಯವಿದ್ದು, ಆರಂಭದಲ್ಲಿ 5 ರೈಲುಗಳು ಪ್ರತಿ ಎಂಟು ನಿಮಿಷಕ್ಕೊಮ್ಮೆ ಕಾರ್ಯಾಚರಿಸಲಿವೆ.
ಭೂಗತ ಮಾರ್ಗಕ್ಕೆ ಇನ್ನೂ ಕಾಯಬೇಕು
ತಾವರೆಕೆರೆಯಿಂದ ನಾಗವಾರದವರೆಗಿನ 13.76 ಕಿ.ಮೀ. ಉದ್ದದ 12 ನಿಲ್ದಾಣಗಳ ಭೂಗತ ಮಾರ್ಗ ಕಾಮಗಾರಿ ಇನ್ನೂ ನಡೆಯುತ್ತಿದೆ. ಸುರಂಗ ಕಾಮಗಾರಿ 2024ರ ಅಕ್ಟೋಬರ್‌ಗೆ ಹಾಗೂ ಹಳಿ ಅಳವಡಿಕೆ 2026ರ ಮೇ ವೇಳೆಗೆ ಪೂರ್ಣಗೊಂಡಿದ್ದರೂ, ಸಿಗ್ನಲಿಂಗ್, ವಿದ್ಯುತ್, ದೂರಸಂಪರ್ಕ ಮತ್ತು ಸುರಕ್ಷತಾ ವ್ಯವಸ್ಥೆಗಳ ಅಳವಡಿಕೆ ಬಾಕಿ ಇದೆ. ಇತ್ತೀಚಿನ ವೇಳಾಪಟ್ಟಿಯ ಪ್ರಕಾರ ಈ ಮಾರ್ಗ 2027ರ ಮಾರ್ಚ್ ವೇಳೆಗೆ ಪೂರ್ಣಗೊಳ್ಳುವ ನಿರೀಕ್ಷೆ ಇದೆ. ಸಂಪೂರ್ಣ ಮಾರ್ಗ ಪೂರ್ಣಗೊಂಡಾಗ ಮಾತ್ರ ಉತ್ತರ ಮತ್ತು ದಕ್ಷಿಣ ಬೆಂಗಳೂರಿನ ನಡುವೆ ನೇರ ಸಂಪರ್ಕ ಸಾಧ್ಯವಾಗಲಿದೆ. ಅಲ್ಲಿಯವರೆಗೆ ಬನ್ನೇರುಘಟ್ಟ ರಸ್ತೆ, ಹುಳಿಮಾವು, ಐಐಎಂಬಿ, ಜಯದೇವ ಆಸ್ಪತ್ರೆ ಮಾರ್ಗದ ಪ್ರಯಾಣಿಕರು ಮೊದಲ ಹಂತದ ಮೆಟ್ರೋ ಸೇವೆಯನ್ನು ಬಳಸಿಕೊಳ್ಳಬಹುದಾಗಿದೆ.
