ವಾಷಿಂಗ್ಟನ್: ತಂತ್ರಜ್ಞಾನ ವಿಚಾರದಲ್ಲಿ ಅಮೆರಿಕ ಮತ್ತು ಚೀನಾ ನಡುವೆ ಪರಸ್ಪರ ಪೈಪೋಟಿ ಇರುವಂತೆಯೇ, ಜಾಗತಿಕ ಎಐ ಚಿಪ್ ದೈತ್ಯ ಎನ್‌ವಿಡಿಯಾ (Nvidia) ಸಂಸ್ಥೆಯ ಸುತ್ತ ಮತ್ತೊಂದು ದೊಡ್ಡ ವಿವಾದ ಸುತ್ತಿಕೊಂಡಿದೆ. ಎನ್‌ವಿಡಿಯಾದ ಮುಖ್ಯ ಕಾರ್ಯನಿರ್ವಾಹಕ ಅಧಿಕಾರಿ (ಸಿಇಒ) ಜೆನ್ಸನ್ ಹುವಾಂಗ್ ಮತ್ತು ಚೀನಾದ ಶಂಕಿತ ಗೂಢಚಾರಿಣಿ ಆಲಿಸ್ ಹುವಾಂಗ್ ನಡುವಿನ ಅಕ್ರಮ ಸಂಬಂಧವನ್ನು ಬಳಸಿಕೊಂಡು, ಅಮೆರಿಕದ ನಿಷೇಧಿತ ಎಐ ಚಿಪ್‌ಗಳನ್ನು ಅಕ್ರಮವಾಗಿ ಚೀನಾಕ್ಕೆ ಸಾಗಿಸಲಾಗಿದೆ ಎಂಬ ಗಂಭೀರ ಆರೋಪ ಕೇಳಿಬಂದಿದೆ. ‘ದಿ ಇನ್ಫಾರ್ಮೇಶನ್’ ವರದಿ ಮಾಡಿರುವ ಪ್ರಕಾರ, ಈ ಸಂಬಂಧದ ನೆರವಿನಿಂದ ಸುಮಾರು 7.5 ಬಿಲಿಯನ್ ಅಮೆರಿಕನ್ ಡಾಲರ್ ಮೌಲ್ಯದ ಎನ್ ವಿಡಿಯಾ ಜಿಪಿಯು ಚಿಪ್‌ಗಳನ್ನು ಚೀನೀ ಕಂಪನಿಗಳ ಮೂಲಕ ಚೀನಾಗೆ ತಲುಪಿಸಲಾಗಿದೆ.
ಆಲಿಸ್ ಹುವಾಂಗ್ ರಚಿಸಿದ ರಹಸ್ಯ ಕಂಪನಿಗಳ ಜಾಲ
ವರದಿಗಳ ಪ್ರಕಾರ, ಚೀನಾದ ಭದ್ರತಾ ಸಚಿವಾಲಯದ (MSS) ಗೂಢಚಾರಿಣಿ ಎಂದು ಶಂಕಿಸಲಾಗಿರುವ ಆಲಿಸ್ ಹುವಾಂಗ್, ತಮ್ಮ ಸಹೋದರಿ ಮತ್ತು ಪತಿಯೊಂದಿಗೆ ಸೇರಿಕೊಂಡು ಚೀನಾ ಹಾಗೂ ಸಿಂಗಾಪುರಗಳಲ್ಲಿ ಹಲವು ಕಂಪನಿಗಳ ಬೃಹತ್ ಜಾಲವನ್ನೇ ಸೃಷ್ಟಿಸಿದ್ದರು. 2023ರಲ್ಲಿ ಸ್ಥಾಪನೆಯಾದ ‘ಶಾಂಘೈ ಸೆಂಚುರಿ ಲಿಟಾಂಗ್’ ಎಂಬ ಕಂಪನಿಯನ್ನು ಕೇವಲ ಕೆಲವೇ ತಿಂಗಳುಗಳಲ್ಲಿ ಅಂದರೆ ಅಕ್ಟೋಬರ್ ವೇಳೆಗೆ ಎನ್‌ವಿಡಿಯಾದ ‘ಆದ್ಯತೆಯ ಕ್ಲೌಡ್ ಪಾರ್ಟ್‌ನರ್’ ಪಟ್ಟಿಗೆ ಸೇರಿಸುವಲ್ಲಿ ಆಲಿಸ್ ಯಶಸ್ವಿಯಾಗಿದ್ದರು. ಈ ಸ್ಥಾನಮಾನ ದೊರೆತಿದ್ದರಿಂದ ಎನ್‌ವಿಡಿಯಾದ ಉನ್ನತ ತಂತ್ರಜ್ಞಾನದ ಚಿಪ್‌ಗಳಿಗೆ ಆದ್ಯತೆಯ ಪ್ರವೇಶ ಲಭ್ಯವಾಗಿತ್ತು. ಕಳೆದ ಎರಡು ವರ್ಷಗಳಲ್ಲಿ ಹೆಚ್100 (H100) ಮತ್ತು ಹೆಚ್200 (H200) ಮಾದರಿಯ ಸುಮಾರು 2,40,000 ನಿಷೇಧಿತ ಚಿಪ್‌ಗಳನ್ನು ಚೀನಾಕ್ಕೆ ರವಾನಿಸಲಾಗಿದೆ ಎಂದು ಹೇಳಲಾಗಿದೆ.
ಸಿಇಒ ಸಾಮೀಪ್ಯದ ದುರ್ಬಳಕೆ
ಎನ್‌ವಿಡಿಯಾ ಸಂಸ್ಥೆಯ ಮುಖ್ಯಸ್ಥ ಜೆನ್ಸನ್ ಹುವಾಂಗ್ ಅವರೊಂದಿಗಿನ ತಮ್ಮ ನಿಕಟ ಸಂಬಂಧವನ್ನು ಪ್ರದರ್ಶಿಸುವ ಮೂಲಕ ಆಲಿಸ್ ಹುವಾಂಗ್ ಸುಲಭವಾಗಿ ತಂತ್ರಜ್ಞಾನ ಸಂಪನ್ಮೂಲಗಳನ್ನು ಪಡೆದುಕೊಳ್ಳುತ್ತಿದ್ದರು. ವಿಚಾಟ್ (WeChat) ಖಾತೆಯಲ್ಲಿ ಸಿಇಒ ಅವರೊಂದಿಗಿನ ಫೋಟೋಗಳನ್ನು ಹಂಚಿಕೊಳ್ಳುತ್ತಿದ್ದ ಆಲಿಸ್, ಸರಬರಾಜು ಸರಪಳಿಯಲ್ಲಿ ಉಂಟಾಗುತ್ತಿದ್ದ ತೊಡಕುಗಳನ್ನು ತಕ್ಷಣವೇ ನಿವಾರಿಸಿಕೊಳ್ಳುತ್ತಿದ್ದರು. ಮಾರ್ಗ ಬದಲಾವಣೆಯ ಭಾಗವಾಗಿ, ಮೆಗಾಸ್ಪೀಡ್ ಸಂಸ್ಥೆಯ ಇಂಡೋನೇಷ್ಯಾ ಅಂಗಸಂಸ್ಥೆಯ ಮೂಲಕವೂ ಹೆಚ್100 ಪ್ರೊಸೆಸರ್‌ಗಳನ್ನು ಆಮದು ಮಾಡಿಕೊಂಡು ತಲುಪಿಸಲಾಗಿತ್ತು ಎಂದು ರಾಯಿಟರ್ಸ್‌ನ ವ್ಯಾಪಾರ ದಾಖಲೆಗಳು ತೋರಿಸುತ್ತವೆ.
ಮಾಧ್ಯಮ ಕ್ಷೇತ್ರದಿಂದ ಎಐ ಉದ್ಯಮದವರೆಗೆ ಆಲಿಸ್ ಪಯಣ
ಸುಮಾರು 42 ವರ್ಷದ ಆಲಿಸ್ ಹುವಾಂಗ್, ತಮ್ಮ ವೃತ್ತಿಜೀವನವನ್ನು ಟೆಲಿವಿಷನ್ ಪತ್ರಕರ್ತೆಯಾಗಿ ಪ್ರಾರಂಭಿಸಿ, ನಂತರ ಶಾಂಘೈ ಹೈಕ್ಸಿ ಇನ್ವೆಸ್ಟ್‌ಮೆಂಟ್ ಮ್ಯಾನೇಜ್‌ಮೆಂಟ್‌ನಂತಹ ಪ್ರಮುಖ ಹಣಕಾಸು ಸಂಸ್ಥೆಗಳಲ್ಲಿ ಉನ್ನತ ಹುದ್ದೆಗಳನ್ನು ನಿರ್ವಹಿಸಿದ್ದರು. ಮಾರ್ಚ್ 2023ರಲ್ಲಿ ಸಿಂಗಾಪುರ ಮೂಲದ ‘ಮೆಗಾಸ್ಪೀಡ್ ಇಂಟರ್ನ್ಯಾಷನಲ್’ ಕಂಪನಿಯ ನಿಯಂತ್ರಕ ಷೇರುದಾರರಾಗಿ ಹೊರಹೊಮ್ಮಿದ ಅವರು, ಎನ್‌ವಿಡಿಯಾ ಚಿಪ್‌ಗಳ ಜಾಗತಿಕ ಸರಬರಾಜಿನಲ್ಲಿ ಪ್ರಮುಖ ಪಾತ್ರ ವಹಿಸಲು ತೊಡಗಿದರು. ಅಮೆರಿಕದ ರಫ್ತು ನಿಯಂತ್ರಣ ಕಾಯ್ದೆಯನ್ನು ಉಲ್ಲಂಘಿಸಿ ಚೀನಾಕ್ಕೆ ಚಿಪ್ ಪೂರೈಸುತ್ತಿರುವ ಆರೋಪದ ಮೇಲೆ ಪ್ರಸ್ತುತ ಮೆಗಾಸ್ಪೀಡ್ ಸಂಸ್ಥೆಯು ಅಮೆರಿಕದ ತನಿಖಾ ಸಂಸ್ಥೆಗಳ ಕಣ್ಗಾವಲಿನಲ್ಲಿದೆ.
