ಬೆಂಗಳೂರು: ಪ್ರಮುಖ ದೂರಸಂಪರ್ಕ ದೈತ್ಯ ಸಂಸ್ಥೆಯಾದ ರಿಲಯನ್ಸ್ ಜಿಯೋ (Reliance Jio) ತನ್ನ ಗ್ರಾಹಕರಿಗಾಗಿ ಅತ್ಯಂತ ವಿಶಿಷ್ಟವಾದ ಹಾಗೂ ದೀರ್ಘಾವಧಿಯ ಪ್ರಿಪೇಯ್ಡ್ ರಿಚಾರ್ಜ್ ಪ್ಲ್ಯಾನ್ ಅನ್ನು ಮಾರುಕಟ್ಟೆಗೆ ಪರಿಚಯಿಸಿದೆ. ಪ್ರತ್ಯೇಕವಾಗಿ ಪ್ರತಿ ತಿಂಗಳು ಅಥವಾ ವರ್ಷಕ್ಕೊಮ್ಮೆ ರಿಚಾರ್ಜ್ ಮಾಡುವ ಕಿರಿಕಿರಿಯಿಂದ ಗ್ರಾಹಕರಿಗೆ ಮುಕ್ತಿ ನೀಡಲು ಜಿಯೋ ಈಗ 10 ಸಾವಿರ ರೂಪಾಯಿ ಬೆಲೆಯ 3 ವರ್ಷಗಳ ಪ್ಲ್ಯಾನ್ ಅನ್ನು ಅಧಿಕೃತವಾಗಿ ಲಾಂಚ್ ಮಾಡಿದೆ. ಈ ಹೊಸ ಯೋಜನೆಯು ನವೆಂಬರ್ 7 ರಿಂದ ದೇಶಾದ್ಯಂತ ಗ್ರಾಹಕರಿಗೆ ಲಭ್ಯವಾಗಿದೆ.
ಯೋಜನೆಯ ಮುಖ್ಯ ಸೌಲಭ್ಯಗಳು ಮತ್ತು ಪ್ರಯೋಜನಗಳು
10 ಸಾವಿರ ರೂಪಾಯಿಯ ಪ್ಯಾಕೇಜ್ ನಲ್ಲಿ ಗ್ರಾಹಕರಿಗೆ ಒಟ್ಟಾರೆಯಾಗಿ ಮೂರು ವರ್ಷಗಳವರೆಗೆ ಯಾವುದೇ ತೊಂದರೆಯಿಲ್ಲದೆ ನಿರಂತರ ಸೇವೆ ಸಿಗಲಿದೆ.
• ಅನ್ ಲಿಮಿಟೆಡ್ ವಾಯ್ಸ್ ಕಾಲ್ಸ್: ಯಾವುದೇ ನೆಟ್ ವರ್ಕ್ ಗೆ ಸಂಪೂರ್ಣವಾಗಿ ಉಚಿತ ಮತ್ತು ಅನಿಯಮಿತ ಸ್ಥಳೀಯ ಹಾಗೂ ಎಸ್.ಟಿ.ಡಿ ಕರೆಗಳ ಸೌಲಭ್ಯವಿದೆ.
• ಡೇಟಾ ಸೌಲಭ್ಯ: ಬಳಕೆದಾರರಿಗೆ ಪ್ರತಿ ದಿನ 2.5 GB ಹೈ-ಸ್ಪೀಡ್ 4G ಡೇಟಾ ಲಭ್ಯವಿರುತ್ತದೆ. ಇದರೊಂದಿಗೆ ಅರ್ಹ 5G ಸ್ಮಾರ್ಟ್ ಫೋನ್ ಹೊಂದಿರುವ ಗ್ರಾಹಕರಿಗೆ ಅನಿಯಮಿತ 5G ಡೇಟಾ ಸಿಗಲಿದೆ.
• ಎಸ್ಎಂಎಸ್ (SMS): ಪ್ರತಿದಿನ 100 ಎಸ್.ಎಂ.ಎಸ್.ಗಳನ್ನು ಕಳುಹಿಸುವ ಸೌಲಭ್ಯವನ್ನು ನೀಡಲಾಗಿದೆ.
ಹೆಚ್ಚುವರಿ ಡಿಜಿಟಲ್ ಕೊಡುಗೆಗಳು
ಕೇವಲ ಮೊಬೈಲ್ ಸೇವೆ ಮಾತ್ರವಲ್ಲದೆ, ಜಿಯೋ ಈ ಪ್ಲಾನ್ ನೊಂದಿಗೆ ಕೆಲವು ವಿಶೇಷ ಡಿಜಿಟಲ್ ಹಾಗೂ ಮನರಂಜನಾ ಪ್ರಯೋಜನಗಳನ್ನು ಕೂಡ ನೀಡಲಾಗಿದೆ. ಇದರಡಿ JioHotstar (Mobile + Hollywood) ಚಂದಾದಾರಿಕೆ, 12 ತಿಂಗಳ ಅವಧಿಗೆ Canva Pro Lite ಸಬ್ ಸ್ಕ್ರಿಪ್ಶನ್ ಮತ್ತು 50 GB ಯಷ್ಟು ಉಚಿತ JioAICloud ಕ್ಲೌಡ್ ಸ್ಟೋರೇಜ್ ಸೌಲಭ್ಯ ಲಭ್ಯವಿರಲಿದೆ. ಹೊಸ ಆಫರ್ ನಿಂದಾಗಿ ವರ್ಷಕ್ಕೆ 3,599 ರೂಪಾಯಿ ರಿಚಾರ್ಜ್ ಮಾಡುವ ಬದಲು 3 ವರ್ಷಕ್ಕೆ 10 ಸಾವಿರ ರೂಪಾಯಿ ಪಾವತಿಸಿದರೆ, 797 ರೂಪಾಯಿ ಉಳಿತಾಯವಾಗಲಿದೆ.
